दुर्गामानस पूजा Shridurgamanasa Puja

श्री गणेशाय नमः ।उद्यच्चन्दनकुङ्कुमारुणपयोधाराभिराप्लावितांनानानर्घ्यमणिप्रवालघटितां दत्तां गृहाणाम्बिके ।आमृष्टां सुरसुन्दरीभिरभितो हस्ताम्बुजैर्भक्तितोमातः सुन्दरि भक्तकल्पलतिके श्रीपादुकामादरात् ॥ १॥

śrī gaṇeśāya namaḥ |udyaccandanakuṅkumāruṇapayodhārābhirāplāvitāṃnānānarghyamaṇipravālaghaṭitāṃ dattāṃ gṛhāṇāmbike |āmṛṣṭāṃ surasundarībhirabhito hastāmbujairbhaktitomātaḥ sundari bhaktakalpalatike śrīpādukāmādarāt || 1||

देवेन्द्रादिभिरर्चितं सुरगणैरादाय सिंहासनंचञ्चत्काञ्चनसञ्चयाभिरचितं चारुप्रभाभास्वरम् ।एतच्चम्पककेतकीपरिमलं तैलं महानिर्मलंगन्धोद्वर्तनमादरेण तरुणीदत्तं गृहाणाम्बिके ॥ २॥

devendrādibhirarcitaṃ suragaṇairādāya siṃhāsanaṃcañcatkāñcanasañcayābhiracitaṃ cāruprabhābhāsvaram |etaccampakaketakīparimalaṃ tailaṃ mahānirmalaṃgandhodvartanamādareṇa taruṇīdattaṃ gṛhāṇāmbike || 2||

पश्चाद्देवि गृहाण शम्भुगृहिणि श्रीसुन्दरि प्रायशोगन्धद्रव्यसमूहनिर्भरतरं धात्रीफलं निर्मलम् ।तत्केशान् परिशोध्य कङ्कतिकया मन्दाकिनीस्रोतसिस्नात्वा प्रोज्ज्वलगन्धकं भवतु हे श्रीसुन्दरि त्वन्मुदे ॥ ३॥

paścāddevi gṛhāṇa śambhugṛhiṇi śrīsundari prāyaśogandhadravyasamūhanirbharataraṃ dhātrīphalaṃ nirmalam |tatkeśān pariśodhya kaṅkatikayā mandākinīsrotasisnātvā projjvalagandhakaṃ bhavatu he śrīsundari tvanmude || 3||

सुराधिपतिकामिनीकरसरोजनालीधृतांसचन्दनसकुङ्कुमागुरुभरेण विभ्राजिताम् ।महापरिमलोज्ज्वलां सरसशुद्धकस्तूरिकांगृहाण वरदायिनि त्रिपुरसुन्दरि श्रीप्रदे ॥ ४॥

surādhipatikāminīkarasarojanālīdhṛtāṃsacandanasakuṅkumāgurubhareṇa vibhrājitām |mahāparimalojjvalāṃ sarasaśuddhakastūrikāṃgṛhāṇa varadāyini tripurasundari śrīprade || 4||

गन्धर्वामरकिन्नरप्रियतमासन्तानहस्ताम्बुजप्रस्तारैर्ध्रियमाणमुत्तमतरं काश्मीरजापिञ्जरम् ।मातर्भास्वरभानुमण्डललसत्कान्तिप्रदानोज्ज्वलंचैतन्निर्मलमातनोतु वसनं श्रीसुन्दरि त्वन्मुदम् ॥ ५॥

gandharvāmarakinnarapriyatamāsantānahastāmbujaprastārairdhriyamāṇamuttamataraṃ kāśmīrajāpiñjaram |mātarbhāsvarabhānumaṇḍalalasatkāntipradānojjvalaṃcaitannirmalamātanotu vasanaṃ śrīsundari tvanmudam || 5||

स्वर्णाकल्पितकुण्डले श्रुतियुगे हस्ताम्बुजे मुद्रिकामध्ये सारसना नितम्बफलके मञ्जीरमंघ्रिद्वये ।हारो वक्षसि कङ्कणौ क्वणरणत्कारौ करद्वन्द्वकेविन्यस्तं मुकुटं शिरस्यनुदिनं दत्तोन्मदं स्तूयताम् ॥ ६॥

svarṇākalpitakuṇḍale śrutiyuge hastāmbuje mudrikāmadhye sārasanā nitambaphalake mañjīramaṃghridvaye |hāro vakṣasi kaṅkaṇau kvaṇaraṇatkārau karadvandvakevinyastaṃ mukuṭaṃ śirasyanudinaṃ dattonmadaṃ stūyatām || 6||

ग्रीवायां धृतकान्तिकान्तपटलं ग्रैवेयकं सुन्दरंसिन्दूरं विलसल्ललाटफलके सौन्दर्यमुद्राधरम् ।राजत्कज्जलमुज्ज्वलोत्पलदलश्रीमोचने लोचनेतद्दिव्यौषधिनिर्मितं रचयतु श्रीशाम्भवि श्रीप्रदे ॥ ७॥

grīvāyāṃ dhṛtakāntikāntapaṭalaṃ graiveyakaṃ sundaraṃsindūraṃ vilasallalāṭaphalake saundaryamudrādharam |rājatkajjalamujjvalotpaladalaśrīmocane locanetaddivyauṣadhinirmitaṃ racayatu śrīśāmbhavi śrīprade || 7||

अमन्दतरमन्दरोन्मथितदुग्धसिन्धूद्भवंनिशाकरकरोपमं त्रिपुरसुन्दरि श्रीप्रदे ।गृहाण मुखमीक्षतुं मुकुरबिम्बमाविद्रुमैर्विनिर्मितमधच्छिदे रतिकराम्बुजस्थायिनम् ॥ ८॥

amandataramandaronmathitadugdhasindhūdbhavaṃniśākarakaropamaṃ tripurasundari śrīprade |gṛhāṇa mukhamīkṣatuṃ mukurabimbamāvidrumairvinirmitamadhacchide ratikarāmbujasthāyinam || 8||

कस्तूरीद्रवचन्दनागुरुसुधाधाराभिराप्लावितंचञ्चच्चम्पकपाटलादिसुरभिर्द्रव्यैः सुगन्धीकृतम् ।देवस्त्रीगणमस्तकस्थितमहारत्नादिकुम्भव्रजैरम्भःशाम्भवि सम्भ्रमेण विमलं दत्तं गृहाणाम्बिके ॥ ९॥

kastūrīdravacandanāgurusudhādhārābhirāplāvitaṃcañcaccampakapāṭalādisurabhirdravyaiḥ sugandhīkṛtam |devastrīgaṇamastakasthitamahāratnādikumbhavrajairambhaḥśāmbhavi sambhrameṇa vimalaṃ dattaṃ gṛhāṇāmbike || 9||

कह्लारोत्पलनागकेसरसरोजाख्यावलीमालतीमल्लीकैरवकेतकादिकुसुमै रक्ताश्वमारादिभिः ।पुष्पैर्माल्यभरेण वै सुरभिणा नानारसस्रोतसाताम्राम्भोजनिवासिनीं भगवतीं श्रीचण्डिकां पूजये ॥ १०॥

kahlārotpalanāgakesarasarojākhyāvalīmālatīmallīkairavaketakādikusumai raktāśvamārādibhiḥ |puṣpairmālyabhareṇa vai surabhiṇā nānārasasrotasātāmrāmbhojanivāsinīṃ bhagavatīṃ śrīcaṇḍikāṃ pūjaye || 10||

मांसीगुग्गुलचन्दनागुरुरजः कर्पूरशैलेयजैर्माध्वीकैः सहकुङ्कुमैः सुरचितैः सर्पिभिरामिश्रितैः ।सौरभ्यस्थितिमन्दिरे मणिमये पात्रे भवेत् प्रीतयेधूपोऽयं सुरकामिनीविरचितः श्रीचण्डिके त्वन्मुदे ॥ ११॥

māṃsīguggulacandanāgururajaḥ karpūraśaileyajairmādhvīkaiḥ sahakuṅkumaiḥ suracitaiḥ sarpibhirāmiśritaiḥ |saurabhyasthitimandire maṇimaye pātre bhavet prītayedhūpo'yaṃ surakāminīviracitaḥ śrīcaṇḍike tvanmude || 11||

घृतद्रवपरिस्फुरद्रुचिररत्नयष्ट्यान्वितोमहातिमिरनाशनः सुरनितम्बिनीनिर्मितः ।सुवर्णचषकस्थितः सघनसारवर्त्यान्वितस्तव त्रिपुरसुन्दरि स्फुरति देवि दीपो मुदे ॥ १२॥

ghṛtadravaparisphuradruciraratnayaṣṭyānvitomahātimiranāśanaḥ suranitambinīnirmitaḥ |suvarṇacaṣakasthitaḥ saghanasāravartyānvitastava tripurasundari sphurati devi dīpo mude || 12||

जातीसौरभनिर्भरं रुचिकरं शाल्योदनं निर्मलंयुक्तं हिङ्गुमरीचजीरसुरभिर्द्रव्यान्वितैर्व्यञ्जनैः ।पक्वान्नेन सपायसेन मधुना दध्याज्यसम्मिश्रितंनैवेद्यं सुरकामिनीविरचितं श्रीचण्डिके त्वन्मुदे ॥ १३॥

jātīsaurabhanirbharaṃ rucikaraṃ śālyodanaṃ nirmalaṃyuktaṃ hiṅgumarīcajīrasurabhirdravyānvitairvyañjanaiḥ |pakvānnena sapāyasena madhunā dadhyājyasammiśritaṃnaivedyaṃ surakāminīviracitaṃ śrīcaṇḍike tvanmude || 13||

लवङ्गकलिकोज्ज्वलं बहुलनागवल्लीदलंसजातिफलकोमलं सघनसारपूगीफलम् ।सुधामधुरमाकुलं रुचिररत्नपात्रस्थितंगृहाण मुखपङ्कजे स्फुरितमम्ब ताम्बूलकम् ॥ १४॥

lavaṅgakalikojjvalaṃ bahulanāgavallīdalaṃsajātiphalakomalaṃ saghanasārapūgīphalam |sudhāmadhuramākulaṃ ruciraratnapātrasthitaṃgṛhāṇa mukhapaṅkaje sphuritamamba tāmbūlakam || 14||

शरत्प्रभवचन्द्रमः स्फुरितचन्द्रिकासुन्दरंगलत्सुरतरङ्गिणीललितमौक्तिकाडम्बरम् ।गृहाण नवकाञ्चनप्रभवदण्डखण्डोज्ज्वलंमहात्रिपुरसुन्दरि प्रकटमातपत्रं महत् ॥ १५॥

śaratprabhavacandramaḥ sphuritacandrikāsundaraṃgalatsurataraṅgiṇīlalitamauktikāḍambaram |gṛhāṇa navakāñcanaprabhavadaṇḍakhaṇḍojjvalaṃmahātripurasundari prakaṭamātapatraṃ mahat || 15||

मातस्त्वन्मुदमातनोतु सुभगस्त्रीभिः सदाऽऽन्दोलितंशुभ्रं चामरमिन्दुकुन्दसदृशं प्रस्वेददुःखापहम् ।सद्योऽगस्त्यवसिष्ठनारदशुकव्यासादिवाल्मीकिभिःस्वे चित्ते क्रियमाण एव कुरुतां शर्माणि वेदध्वनिः ॥ १६॥

mātastvanmudamātanotu subhagastrībhiḥ sadā''ndolitaṃśubhraṃ cāmaramindukundasadṛśaṃ prasvedaduḥkhāpaham |sadyo'gastyavasiṣṭhanāradaśukavyāsādivālmīkibhiḥsve citte kriyamāṇa eva kurutāṃ śarmāṇi vedadhvaniḥ || 16||

स्वर्गाङ्गणे वेणुमृदङ्गशङ्खभेरीनिनादैरूपगीयमाना ।कोलाहलैराकलितातवास्तु विद्याधरीनृत्यकलासुखाय ॥ १७॥

svargāṅgaṇe veṇumṛdaṅgaśaṅkhabherīninādairūpagīyamānā |kolāhalairākalitātavāstu vidyādharīnṛtyakalāsukhāya || 17||

देवि भक्तिरसभावितवृत्ते प्रीयतां यदि कुतोऽपि लभ्यते ।तत्र लौल्यमपि सत्फलमेकञ्जन्मकोटिभिरपीह न लभ्यम् ॥ १८॥

devi bhaktirasabhāvitavṛtte prīyatāṃ yadi kuto'pi labhyate |tatra laulyamapi satphalamekañjanmakoṭibhirapīha na labhyam || 18||

एतैः षोडशभिः पद्यैरूपचारोपकल्पितैः ।यः परां देवतां स्तौति स तेषां फलमाप्नुयात् ॥ १९॥

etaiḥ ṣoḍaśabhiḥ padyairūpacāropakalpitaiḥ |yaḥ parāṃ devatāṃ stauti sa teṣāṃ phalamāpnuyāt || 19||

॥ इति दुर्गातन्त्रे दुर्गामानसपूजा समाप्ता ॥

|| iti durgātantre durgāmānasapūjā samāptā ||