सप्तशतीध्यानात्मकस्तोत्रम् Saptashatidhyanatmakam Stotram

श्रीगणेशाय नमः ॥विद्युद्दामसमप्रभां मृगपतिस्कन्धस्थितां भीषणांकन्याभिः करवालखेटविलसद्धस्ताभिरासेविताम् ।हस्तैश्चक्रदरालिखेटविशिखाँश्चापं गुणं तर्जनींबिभ्राणामनलात्मिकां शशिधरां दुर्गां त्रिनेत्रां भजे ॥ १॥

śrīgaṇeśāya namaḥ ||vidyuddāmasamaprabhāṃ mṛgapatiskandhasthitāṃ bhīṣaṇāṃkanyābhiḥ karavālakheṭavilasaddhastābhirāsevitām |hastaiścakradarālikheṭaviśikhām̐ścāpaṃ guṇaṃ tarjanīṃbibhrāṇāmanalātmikāṃ śaśidharāṃ durgāṃ trinetrāṃ bhaje || 1||

मातर्मे मधुकैटभघ्नि महिषप्राणापहारोद्यमेहेलानिर्मितधूम्रलोचनवधे हे चण्डमुण्डार्दिनि ।निःशेषीकृतरक्तबीजदनुजे नित्ये निशुम्भापहेशुम्भध्वंसिनि सहराशु दुरितं दुर्गे नमस्तेऽम्बिके ॥ २॥

mātarme madhukaiṭabhaghni mahiṣaprāṇāpahārodyamehelānirmitadhūmralocanavadhe he caṇḍamuṇḍārdini |niḥśeṣīkṛtaraktabījadanuje nitye niśumbhāpaheśumbhadhvaṃsini saharāśu duritaṃ durge namaste'mbike || 2||

या देवी मधुकैटभप्रमथिनी या माहिषोन्मूलिनीया धूम्रेक्षणचण्डमुण्डशमनी या रक्तबीजाशिनी ।या शुम्भादिनिशुम्भदैत्यदमनी या सिद्धलक्ष्मी परासा चण्डी नवकोटिशक्तिसहिता मां पातु विश्वेश्वरी ॥ ३॥

yā devī madhukaiṭabhapramathinī yā māhiṣonmūlinīyā dhūmrekṣaṇacaṇḍamuṇḍaśamanī yā raktabījāśinī |yā śumbhādiniśumbhadaityadamanī yā siddhalakṣmī parāsā caṇḍī navakoṭiśaktisahitā māṃ pātu viśveśvarī || 3||

दुर्गां ध्यायतु दुर्गतिप्रशमनीं दूर्वादलश्यामलांचन्द्रार्धोज्ज्वलशेखरां त्रिनयनामापीतवासोवसम् ।चक्रं शङ्खमिषुं धनुश्च दधतीं कोदण्डबाणाशयोर्मुद्रेवाभयकामदे सकटिबन्धाभीष्टदां वानयोः ॥ ४॥

durgāṃ dhyāyatu durgatipraśamanīṃ dūrvādalaśyāmalāṃcandrārdhojjvalaśekharāṃ trinayanāmāpītavāsovasam |cakraṃ śaṅkhamiṣuṃ dhanuśca dadhatīṃ kodaṇḍabāṇāśayormudrevābhayakāmade sakaṭibandhābhīṣṭadāṃ vānayoḥ || 4||

भावोद्भेदवृता सहाभयवरा विस्रस्तनीलालकाबिम्बोष्ठी तरुणाऽरुणाब्जचरणा रक्तान्तनेत्रत्रया ।पीनोरुस्तनभारभङ्गुरतनुः श्यामा प्रसन्नाननादेवी वस्त्वरिता तनोतु विभवानानन्दयन्ती मनः ॥ ५॥

bhāvodbhedavṛtā sahābhayavarā visrastanīlālakābimboṣṭhī taruṇā'ruṇābjacaraṇā raktāntanetratrayā |pīnorustanabhārabhaṅguratanuḥ śyāmā prasannānanādevī vastvaritā tanotu vibhavānānandayantī manaḥ || 5||

मुक्ताविद्युत्पयोदस्फटिकनवजपाभास्वरैः पञ्चवक्त्रैःशीतांशूल्लासिचूडैस्त्रिनयनलसितैर्भासुरामच्छवर्णाम् ।चक्रं शङ्खं कपालं गुणपरशुसुधाकुम्भवेदाक्षमालाविद्यापद्मान्वहन्तीं नमत मुनिनतां भारतीं पद्मसंस्थाम् ॥ ६॥

muktāvidyutpayodasphaṭikanavajapābhāsvaraiḥ pañcavaktraiḥśītāṃśūllāsicūḍaistrinayanalasitairbhāsurāmacchavarṇām |cakraṃ śaṅkhaṃ kapālaṃ guṇaparaśusudhākumbhavedākṣamālāvidyāpadmānvahantīṃ namata muninatāṃ bhāratīṃ padmasaṃsthām || 6||

हंसारूढा हरहसितहारेन्दुकुन्दावदातावाणी मन्दस्मिततरमुखी मौलिबद्धेन्दुलेखा ।विद्यावीणाऽमृतमयघटाक्षस्रजादीप्तहस्ताश्वेताब्जस्था भवदभिमतप्राप्तये भारती स्यात् ॥ ७॥

haṃsārūḍhā harahasitahārendukundāvadātāvāṇī mandasmitataramukhī maulibaddhendulekhā |vidyāvīṇā'mṛtamayaghaṭākṣasrajādīptahastāśvetābjasthā bhavadabhimataprāptaye bhāratī syāt || 7||

सौवर्णाम्बुजमध्यगां त्रिनयनां सौदामिनीसन्निभांशङ्खं चक्रवराभयं च दधतीमिन्दोः कलां बिभ्रतीम् ।ग्रैवेयाङ्गदहारकुण्डलधरामाखण्डलाद्यैः स्तुतांध्यायेद्विन्ध्यनिवासिनीं शशिमुखीं पार्श्वस्थपञ्चाननाम् ॥ ८॥

sauvarṇāmbujamadhyagāṃ trinayanāṃ saudāminīsannibhāṃśaṅkhaṃ cakravarābhayaṃ ca dadhatīmindoḥ kalāṃ bibhratīm |graiveyāṅgadahārakuṇḍaladharāmākhaṇḍalādyaiḥ stutāṃdhyāyedvindhyanivāsinīṃ śaśimukhīṃ pārśvasthapañcānanām || 8||

शङ्खं चक्रमथो धनुश्च दधतीं बिभ्रामितां तर्जनींवामे शक्तिमसिं शरान्कलयतीं तिर्यक् त्रिशूलं भुजैः ।सन्नद्धां विविधायुधैः परिवृतां मन्त्री कुमारीजनैर्ध्यायेदिष्टवरप्रदां त्रिनयनां सिंहाधिरूढां शिवाम् ॥ ९॥

śaṅkhaṃ cakramatho dhanuśca dadhatīṃ bibhrāmitāṃ tarjanīṃvāme śaktimasiṃ śarānkalayatīṃ tiryak triśūlaṃ bhujaiḥ |sannaddhāṃ vividhāyudhaiḥ parivṛtāṃ mantrī kumārījanairdhyāyediṣṭavarapradāṃ trinayanāṃ siṃhādhirūḍhāṃ śivām || 9||

शङ्खासिचापशरभिन्नकरां त्रिनेत्रांतिग्मेतरांशुकलया विलसत्किरीटाम् ।सिंहस्थितां ससुरसिद्धनुतां च दुर्गांदूर्वानिभां दुरितवर्गहरां नमामि ॥ १०॥

śaṅkhāsicāpaśarabhinnakarāṃ trinetrāṃtigmetarāṃśukalayā vilasatkirīṭām |siṃhasthitāṃ sasurasiddhanutāṃ ca durgāṃdūrvānibhāṃ duritavargaharāṃ namāmi || 10||

प्रकाशमध्यस्थितचित्स्वरूपां वराभये सन्दधतीं त्रिनेत्राम् ।सिन्दूरवर्णामतिकोमलाङ्गीं मायामयीं तत्त्वमयीं नमामि ॥ ११॥

prakāśamadhyasthitacitsvarūpāṃ varābhaye sandadhatīṃ trinetrām |sindūravarṇāmatikomalāṅgīṃ māyāmayīṃ tattvamayīṃ namāmi || 11||

शोणप्रभां सोमकलावतंसां पाणिस्फुरत्पञ्चशरेषुचापाम् ।प्राणप्रियां नौमि पिनाकपाणेः कोणत्रयस्थां कुलदेवतां मे ॥ १२॥

śoṇaprabhāṃ somakalāvataṃsāṃ pāṇisphuratpañcaśareṣucāpām |prāṇapriyāṃ naumi pinākapāṇeḥ koṇatrayasthāṃ kuladevatāṃ me || 12||

खड्गोद्भिन्नेन्दुबिम्बस्रवदमृतरसाप्लाविताङ्गी त्रिनेत्रासव्ये पाणौ कपालाद्गलदमृतमथो मुक्तकेशी पिबन्ती ।दिग्वस्त्राबद्धकाञ्चीमणिमयमुकुटाद्यैर्युता दीप्तजिह्वापायान्नीलोत्पलाभा रविशशिविलसत्कुण्डलालीढपादा ॥ १३॥

khaḍgodbhinnendubimbasravadamṛtarasāplāvitāṅgī trinetrāsavye pāṇau kapālādgaladamṛtamatho muktakeśī pibantī |digvastrābaddhakāñcīmaṇimayamukuṭādyairyutā dīptajihvāpāyānnīlotpalābhā raviśaśivilasatkuṇḍalālīḍhapādā || 13||

सद्यश्छिन्नशिरःकृपाणमभयं हस्तैर्वरैर्बिभ्रतींघोरास्यां शिरसाऽस्रजासुरुचिरामुन्मुक्तकेशावलिम् ।सृक्कासृक्प्रवहां श्मशाननिलयां श्रुत्योः शवालङ्कृतिंश्यामाङ्गीं कृतमेखलाशवकरां देवीं भजे कालिकाम् ॥ १४॥

sadyaśchinnaśiraḥkṛpāṇamabhayaṃ hastairvarairbibhratīṃghorāsyāṃ śirasā'srajāsurucirāmunmuktakeśāvalim |sṛkkāsṛkpravahāṃ śmaśānanilayāṃ śrutyoḥ śavālaṅkṛtiṃśyāmāṅgīṃ kṛtamekhalāśavakarāṃ devīṃ bhaje kālikām || 14||

सर्वाद्यामगुणामलक्ष्यवपुषं व्याप्याखिलं संस्तुतांलक्ष्यां च त्रिगुणात्मिकां कनकभां सौवर्णभूषान्विताम् ।बीजापूरगदे च खेटकसुधापात्रे करैर्बिभ्रतींयोनिं लिङ्गमहिं च मूर्ध्नि दधतीं चण्डीं भजे चिन्मयीम् ॥ १५॥

sarvādyāmaguṇāmalakṣyavapuṣaṃ vyāpyākhilaṃ saṃstutāṃlakṣyāṃ ca triguṇātmikāṃ kanakabhāṃ sauvarṇabhūṣānvitām |bījāpūragade ca kheṭakasudhāpātre karairbibhratīṃyoniṃ liṅgamahiṃ ca mūrdhni dadhatīṃ caṇḍīṃ bhaje cinmayīm || 15||

धृत्वा श्रीर्मातुलिङ्गं तदुपरि च गदां खेटकं पानपात्रंनागं लिङ्गं च योनिं शिरसि धृतवती राजते हेमवर्णा ।आद्या शक्तिस्त्रिरूपा त्रिगुणपरिवृता ब्रह्मणो हेतुभूताविश्वाद्या सृष्टिकर्त्री वसतु मम गृहे सर्वदा सुप्रसन्ना ॥ १६॥

dhṛtvā śrīrmātuliṅgaṃ tadupari ca gadāṃ kheṭakaṃ pānapātraṃnāgaṃ liṅgaṃ ca yoniṃ śirasi dhṛtavatī rājate hemavarṇā |ādyā śaktistrirūpā triguṇaparivṛtā brahmaṇo hetubhūtāviśvādyā sṛṣṭikartrī vasatu mama gṛhe sarvadā suprasannā || 16||

या सा पद्मासनस्था विपुलकटितटीपद्मपत्रायताक्षीगम्भीरावर्तनाभिस्तनभरनमिता शुभ्रवस्त्रोत्तरीया ।लक्ष्मीर्दिव्यैर्गजेन्द्रैर्मणिगणखचितैः स्नापिता हेमकुभैर्नित्यं सा पद्महस्ता मम वसतु गृहे सर्वमाङ्गल्ययुक्ता ॥ १७॥

yā sā padmāsanasthā vipulakaṭitaṭīpadmapatrāyatākṣīgambhīrāvartanābhistanabharanamitā śubhravastrottarīyā |lakṣmīrdivyairgajendrairmaṇigaṇakhacitaiḥ snāpitā hemakubhairnityaṃ sā padmahastā mama vasatu gṛhe sarvamāṅgalyayuktā || 17||

लक्ष्मीं कोल्हापुरस्थां भुवि गणपतिनाऽग्रे च पार्श्वद्वये तांकाल्या वाण्याऽऽसमन्तात्परिजननिकरैः सेवितां देवताभिः ।नागं लिङ्गं च योनिं स्वशिरसि दधतीं मातुलिङ्गं गदां तत्खेटं श्रीपानपात्रं त्रिभुवनजननीं नौमि दोर्भिश्चतुर्भिः ॥ १८॥

lakṣmīṃ kolhāpurasthāṃ bhuvi gaṇapatinā'gre ca pārśvadvaye tāṃkālyā vāṇyā''samantātparijananikaraiḥ sevitāṃ devatābhiḥ |nāgaṃ liṅgaṃ ca yoniṃ svaśirasi dadhatīṃ mātuliṅgaṃ gadāṃ tatkheṭaṃ śrīpānapātraṃ tribhuvanajananīṃ naumi dorbhiścaturbhiḥ || 18||

हस्तैः पद्मं रथाङ्ग गुणमथ हरिणं पुस्तकं वर्णमालांटङ्कं शूलं कपालं दरममृतलसद्धेमकुम्भं वहन्तीम् ।मुक्ताविद्युत्पयोधेः स्फटिकनवजपाबन्धुरैः पञ्चवक्त्रैस्त्र्यक्षैर्वक्षोजनम्रां सकलशशिनिभां मातृकां तां नमामि ॥ १९॥

hastaiḥ padmaṃ rathāṅga guṇamatha hariṇaṃ pustakaṃ varṇamālāṃṭaṅkaṃ śūlaṃ kapālaṃ daramamṛtalasaddhemakumbhaṃ vahantīm |muktāvidyutpayodheḥ sphaṭikanavajapābandhuraiḥ pañcavaktraistryakṣairvakṣojanamrāṃ sakalaśaśinibhāṃ mātṛkāṃ tāṃ namāmi || 19||

ब्रह्माणी कमलेन्दुसौम्यवदना माहेश्वरी लीलयाकौमारी रिपुदर्पनाशनकरी चक्रायुधा वैष्णवी ।वाराही घनघोरघर्घरमुखी चैन्द्री च वज्रायुधाचामुण्डा गणनाथरुद्रसहिता रक्षन्तु मां मातरः ॥ २०॥

brahmāṇī kamalendusaumyavadanā māheśvarī līlayākaumārī ripudarpanāśanakarī cakrāyudhā vaiṣṇavī |vārāhī ghanaghoraghargharamukhī caindrī ca vajrāyudhācāmuṇḍā gaṇanātharudrasahitā rakṣantu māṃ mātaraḥ || 20||

अरुणकमलसंस्था तद्रजःपुञ्जवर्णाकरकमलधृतेष्टाभीतियुग्माम्बुजा च ।मणिमुकुटविचित्राऽलङ्कृता कल्पजालैर्भवतु भुवनमाता सन्ततं श्रीः श्रिये नः ॥ २१॥

aruṇakamalasaṃsthā tadrajaḥpuñjavarṇākarakamaladhṛteṣṭābhītiyugmāmbujā ca |maṇimukuṭavicitrā'laṅkṛtā kalpajālairbhavatu bhuvanamātā santataṃ śrīḥ śriye naḥ || 21||

हेमप्रख्यामिन्दुखण्डात्तमौलिं शङ्खारिष्टाभीतिहस्तां त्रिनेत्राम् ।हेमाब्जस्थां पीतवर्णां प्रसन्नां देवीं दुर्गां दिव्यरूपां नमामि ॥ २२॥

hemaprakhyāmindukhaṇḍāttamauliṃ śaṅkhāriṣṭābhītihastāṃ trinetrām |hemābjasthāṃ pītavarṇāṃ prasannāṃ devīṃ durgāṃ divyarūpāṃ namāmi || 22||

सिन्दूरारुणविग्रहां त्रिनयनां माणिक्यमौलिस्फुरत्तारानायकशेखरां स्मितमुखीमापीनवक्षोरुहाम् ।पाणिभ्यामतिपूर्णरत्नचषकं रक्तोत्पलं बिभ्रतींसौम्यां रत्नघटस्थरक्तचरणां ध्यायेत्परामम्बिकाम् ॥ २३॥

sindūrāruṇavigrahāṃ trinayanāṃ māṇikyamaulisphurattārānāyakaśekharāṃ smitamukhīmāpīnavakṣoruhām |pāṇibhyāmatipūrṇaratnacaṣakaṃ raktotpalaṃ bibhratīṃsaumyāṃ ratnaghaṭastharaktacaraṇāṃ dhyāyetparāmambikām || 23||

बिभ्राणा शूलबाणास्यरिसदरगदाचापपाशान् कराब्जैर्मेघश्यामा किरीटोल्लसितशशिकला भीषणा भूषणाढ्या ।सिंहस्कन्धाधिरूढा चतसृभिरसिखेटान्विताभिः परीताकन्याभिर्भिन्नदैत्या भवतु भवभयध्वंसिनी शूलिनी वः ॥ २४॥

bibhrāṇā śūlabāṇāsyarisadaragadācāpapāśān karābjairmeghaśyāmā kirīṭollasitaśaśikalā bhīṣaṇā bhūṣaṇāḍhyā |siṃhaskandhādhirūḍhā catasṛbhirasikheṭānvitābhiḥ parītākanyābhirbhinnadaityā bhavatu bhavabhayadhvaṃsinī śūlinī vaḥ || 24||

अष्टौभुजाङ्गीन् महिषस्य मर्दिनीं सशङ्खचक्रां शरशूलधारिणीम् ।तां दिव्यरूपां सह जातवेदसीं दुर्गां सदा शरणमहं प्रपद्ये ॥ २५॥

aṣṭaubhujāṅgīn mahiṣasya mardinīṃ saśaṅkhacakrāṃ śaraśūladhāriṇīm |tāṃ divyarūpāṃ saha jātavedasīṃ durgāṃ sadā śaraṇamahaṃ prapadye || 25||

महिषमस्तकनृत्तविनोदनस्फुटरणन्मणिनूपुरमेखला ।जननरक्षणमोक्षविधायिनी जयतु शुम्भनिशुम्भनिषूदनी ॥ २६॥

mahiṣamastakanṛttavinodanasphuṭaraṇanmaṇinūpuramekhalā |jananarakṣaṇamokṣavidhāyinī jayatu śumbhaniśumbhaniṣūdanī || 26||

उद्धतौ मधुकैटभौ महिषासुरं च निहत्य तंधूम्रलोचन चण्ड मुण्ड रक्तबीजमुखांश्च तान् ।दुष्टशुम्भनिशुम्भमर्दिनि नन्दिताऽमरवन्दितेविष्टपत्रयतुष्टिकारिणि भद्रकालि नमोऽस्तु ते ॥ २७॥

uddhatau madhukaiṭabhau mahiṣāsuraṃ ca nihatya taṃdhūmralocana caṇḍa muṇḍa raktabījamukhāṃśca tān |duṣṭaśumbhaniśumbhamardini nanditā'maravanditeviṣṭapatrayatuṣṭikāriṇi bhadrakāli namo'stu te || 27||

लक्ष्मीप्रदानसमये नवविद्रुमाभांविद्याप्रदानसमये शरदिन्दुशुभ्राम् ।विद्वेषिवर्गविजयेऽपि तमालनीलांदेवीं त्रिलोकजननीं शरणं प्रपद्ये ॥ २८॥

lakṣmīpradānasamaye navavidrumābhāṃvidyāpradānasamaye śaradinduśubhrām |vidveṣivargavijaye'pi tamālanīlāṃdevīṃ trilokajananīṃ śaraṇaṃ prapadye || 28||

चन्द्रहासं त्रिशूलं च शङ्खचक्रगदास्तथा ।धनुर्बाणं च मुसलं पिङ्गलं मुष्टिमेव च ॥ २९॥

candrahāsaṃ triśūlaṃ ca śaṅkhacakragadāstathā |dhanurbāṇaṃ ca musalaṃ piṅgalaṃ muṣṭimeva ca || 29||

पाशाङ्कुशभुसुण्ठीश्च मुद्गरं परशुं तथा ।वज्रायुधं च कुन्तं च खट्वाङ्गं च हलायुधम् ॥ ३०॥

pāśāṅkuśabhusuṇṭhīśca mudgaraṃ paraśuṃ tathā |vajrāyudhaṃ ca kuntaṃ ca khaṭvāṅgaṃ ca halāyudham || 30||

तूणीरं क्षुरिकां मुद्रां तोमरं पानपात्रकम् ।पट्टसन्दण्डनागं च कुन्तदन्तौ तथैव च ॥ ३१॥

tūṇīraṃ kṣurikāṃ mudrāṃ tomaraṃ pānapātrakam |paṭṭasandaṇḍanāgaṃ ca kuntadantau tathaiva ca || 31||

दर्पणं रुद्रवीणां च बिभ्रद्।ह्वात्रिंशदोस्तलाम् ।पद्मरागप्रभां देवीं बालार्ककिरणारुणाम् ॥ ३२॥

darpaṇaṃ rudravīṇāṃ ca bibhrad|hvātriṃśadostalām |padmarāgaprabhāṃ devīṃ bālārkakiraṇāruṇām || 32||

रक्तवस्त्रपरीधानां रक्तमाल्यानुलेपनाम् ।दशपादाम्बुजां देवीं दशमण्डलपूरिताम् ॥ ३३॥

raktavastraparīdhānāṃ raktamālyānulepanām |daśapādāmbujāṃ devīṃ daśamaṇḍalapūritām || 33||

दशाननां त्रिनेत्रां च समुन्नतपयोधराम् ।एवं ध्यायेन्महाज्वालां महिषासुरमर्दिनीम् ॥ ३४॥

daśānanāṃ trinetrāṃ ca samunnatapayodharām |evaṃ dhyāyenmahājvālāṃ mahiṣāsuramardinīm || 34||

सर्वदारिद्र्यशमनीं सर्वदुःखनिवारिणीम् ।ब्रह्माण्डमध्यजिह्वां तां महावक्त्रकरालिनीम् ॥ ३५॥

sarvadāridryaśamanīṃ sarvaduḥkhanivāriṇīm |brahmāṇḍamadhyajihvāṃ tāṃ mahāvaktrakarālinīm || 35||

दशसाहस्रदोर्दण्डां नानाशस्त्रास्त्रधारिणीम् ।विचित्रायुधसन्नद्धां विश्वरूपां शिवात्मिकाम् ॥ ३६॥

daśasāhasradordaṇḍāṃ nānāśastrāstradhāriṇīm |vicitrāyudhasannaddhāṃ viśvarūpāṃ śivātmikām || 36||

दानवान्तकरीं देवीं रक्तबीजवधोद्यताम् ।रक्तवस्त्रधरां चण्डीं भीषणामतिभैरवाम् ॥ ३७॥

dānavāntakarīṃ devīṃ raktabījavadhodyatām |raktavastradharāṃ caṇḍīṃ bhīṣaṇāmatibhairavām || 37||

सम्पूर्णयौवनां लक्ष्मीं कालिकां कमलाननाम् ।मधुकैटभसहर्त्रीं महिषासुरमर्दिनीम् ॥ ३८॥

sampūrṇayauvanāṃ lakṣmīṃ kālikāṃ kamalānanām |madhukaiṭabhasahartrīṃ mahiṣāsuramardinīm || 38||

चण्डमुण्डशिरश्छेत्त्रीं सर्वदैत्यनिषूदिनीम् ।रक्तबीजस्य सहर्त्रीमशेषासुरभक्षिणीम् ॥ ३९॥

caṇḍamuṇḍaśiraśchettrīṃ sarvadaityaniṣūdinīm |raktabījasya sahartrīmaśeṣāsurabhakṣiṇīm || 39||

निशुम्भशुम्भमथिनीमशेषायुधभीषणाम् ।महाब्रह्माण्डमालाङ्गीं सर्वाभरणभूषिताम् ॥ ४०॥

niśumbhaśumbhamathinīmaśeṣāyudhabhīṣaṇām |mahābrahmāṇḍamālāṅgīṃ sarvābharaṇabhūṣitām || 40||

वेतालवाहनारूढां सिंहव्याघ्रादिवाहनाम् ।नररक्तप्रियां मायां मधुमांसोपहारिणीम् ॥ ४१॥

vetālavāhanārūḍhāṃ siṃhavyāghrādivāhanām |nararaktapriyāṃ māyāṃ madhumāṃsopahāriṇīm || 41||

य इदं शृणुयान्नित्यं त्रिसन्ध्यं यः पठेन्नरः ।ऋणकोट्यपहरणं रोगदारिद्र्यनाशनम् ॥ ४२॥

ya idaṃ śṛṇuyānnityaṃ trisandhyaṃ yaḥ paṭhennaraḥ |ṛṇakoṭyapaharaṇaṃ rogadāridryanāśanam || 42||

सर्वसिद्धिकरं पुण्यं सर्वकामफलप्रदम् ।भक्तानन्दकरीं देवीं परब्रह्मस्वरूपिणीम् ॥ ४३॥

sarvasiddhikaraṃ puṇyaṃ sarvakāmaphalapradam |bhaktānandakarīṃ devīṃ parabrahmasvarūpiṇīm || 43||

तामष्टादशपीठस्थां त्रिपुरामधिदेवताम् ।वन्दे विश्वेश्वरीं देवीं भुक्तिमुक्तिफलप्रदाम् ॥ ४४॥

tāmaṣṭādaśapīṭhasthāṃ tripurāmadhidevatām |vande viśveśvarīṃ devīṃ bhuktimuktiphalapradām || 44||

हदं सप्तशतीध्यानं सर्वरक्षाकरं नृणाम् ।रसं रसायनं सिद्ध्येद्गुलिकाञ्जनसिद्धिदम् ॥ ४५॥

hadaṃ saptaśatīdhyānaṃ sarvarakṣākaraṃ nṛṇām |rasaṃ rasāyanaṃ siddhyedgulikāñjanasiddhidam || 45||

पादुकायुगुलं सिद्ध्येन्मन्त्रसिद्धिकरं नृणाम् ।सौन्दर्यराजसम्मानपुत्रपौत्राभिवर्धनम् ॥ ४६॥

pādukāyugulaṃ siddhyenmantrasiddhikaraṃ nṛṇām |saundaryarājasammānaputrapautrābhivardhanam || 46||

ऐश्वर्यलाभविजयभुक्तिमुक्तिफलप्रदम् ।सदासन्निहितां लक्ष्मीं चण्डिकां मम देवताम् ॥ ४७॥

aiśvaryalābhavijayabhuktimuktiphalapradam |sadāsannihitāṃ lakṣmīṃ caṇḍikāṃ mama devatām || 47||

स्मरेन्नित्यं प्रयत्नेन षण्मासात्प्राप्यते फलम् ।महाभयापहरणं शत्रुक्षयकरं तथा ॥ ४८॥

smarennityaṃ prayatnena ṣaṇmāsātprāpyate phalam |mahābhayāpaharaṇaṃ śatrukṣayakaraṃ tathā || 48||

अचलां श्रियमाप्नोति सर्वव्याधिविनाशनम् ।अन्ते स्वर्गं च मोक्षं च सत्यमेव न संशयः ।इति श्रीकाशीकर अनन्तभट्टसुतरामकृष्णभट्टसम्पादितसप्तशतीध्यानात्मकस्तोत्रं सम्पूर्णम् ॥

acalāṃ śriyamāpnoti sarvavyādhivināśanam |ante svargaṃ ca mokṣaṃ ca satyameva na saṃśayaḥ |iti śrīkāśīkara anantabhaṭṭasutarāmakṛṣṇabhaṭṭasampāditasaptaśatīdhyānātmakastotraṃ sampūrṇam ||