शाकम्भरीकवचम् Shri Shakambhari Kavacham

शक्र उवाचशाकम्भर्यास्तु कवचं सर्वरक्षाकरं नृणाम् ।यन्न कस्यचिदाख्यातं तन्मे कथय षण्मुख ॥ १॥

śakra uvācaśākambharyāstu kavacaṃ sarvarakṣākaraṃ nṛṇām |yanna kasyacidākhyātaṃ tanme kathaya ṣaṇmukha || 1||

स्कन्द उवाचशक्र शाकम्भरीदेव्याः कवचं सिद्धिदायकम् ।कथयामि महाभाग श्रुणु सर्वशुभावहम् ॥ २॥

skanda uvācaśakra śākambharīdevyāḥ kavacaṃ siddhidāyakam |kathayāmi mahābhāga śruṇu sarvaśubhāvaham || 2||

अस्य श्री शाकम्भरी कवचस्य स्कन्द ऋषिः ।शाकम्भरी देवता । अनुष्टुप्छन्दः ।चतुर्विधपुरुषार्थसिद्।ह्ध्यर्थे जपे विनियोगः ॥ध्यानम् ।शूलं खड्गं च डमरुं दधानामभयप्रदम् ।सिंहासनस्थां ध्यायामि देवी शाकम्भरीमहम् ॥ ३॥

asya śrī śākambharī kavacasya skanda ṛṣiḥ |śākambharī devatā | anuṣṭupchandaḥ |caturvidhapuruṣārthasid|hdhyarthe jape viniyogaḥ ||dhyānam |śūlaṃ khaḍgaṃ ca ḍamaruṃ dadhānāmabhayapradam |siṃhāsanasthāṃ dhyāyāmi devī śākambharīmaham || 3||

अथ कवचम् ।शाकम्भरी शिरः पातु नेत्रे मे रक्तदन्तिका ।कर्णो रमे नन्दजः पातु नासिकां पातु पार्वती ॥ ४॥

atha kavacam |śākambharī śiraḥ pātu netre me raktadantikā |karṇo rame nandajaḥ pātu nāsikāṃ pātu pārvatī || 4||

ओष्ठौ पातु महाकाली महालक्ष्मीश्च मे मुखम् ।महासरस्वती जिह्वां चामुण्डाऽवतु मे रदाम् ॥ ५॥

oṣṭhau pātu mahākālī mahālakṣmīśca me mukham |mahāsarasvatī jihvāṃ cāmuṇḍā'vatu me radām || 5||

कालकण्ठसती कण्ठं भद्रकाली करद्वयम् ।हृदयं पातु कौमारी कुक्षिं मे पातु वैष्णवी ॥ ६॥

kālakaṇṭhasatī kaṇṭhaṃ bhadrakālī karadvayam |hṛdayaṃ pātu kaumārī kukṣiṃ me pātu vaiṣṇavī || 6||

नाभिं मेऽवतु वाराही ब्राह्मी पार्श्वे ममावतु ।पृष्ठं मे नारसिंही च योगीशा पातु मे कटिम् ॥ ७॥

nābhiṃ me'vatu vārāhī brāhmī pārśve mamāvatu |pṛṣṭhaṃ me nārasiṃhī ca yogīśā pātu me kaṭim || 7||

ऊरु मे पातु वामोरुर्जानुनी जगदम्बिका ।जङ्घे मे चण्डिकां पातु पादौ मे पातु शाम्भवी ॥ ८॥

ūru me pātu vāmorurjānunī jagadambikā |jaṅghe me caṇḍikāṃ pātu pādau me pātu śāmbhavī || 8||

शिरःप्रभृति पादान्तं पातु मां सर्वमङ्गला ।रात्रौ पातु दिवा पातु त्रिसन्ध्यं पातु मां शिवा ॥ ९॥

śiraḥprabhṛti pādāntaṃ pātu māṃ sarvamaṅgalā |rātrau pātu divā pātu trisandhyaṃ pātu māṃ śivā || 9||

गच्छन्तं पातु तिष्ठन्तं शयानं पातु शूलिनी ।राजद्वारे च कान्तारे खड्गिनी पातु मां पथि ॥ १०॥

gacchantaṃ pātu tiṣṭhantaṃ śayānaṃ pātu śūlinī |rājadvāre ca kāntāre khaḍginī pātu māṃ pathi || 10||

सङ्ग्रामे सङ्कटे वादे नद्युत्तारे महावने ।भ्रामणेनात्मशूलस्य पातु मां परमेश्वरी ॥ ११॥

saṅgrāme saṅkaṭe vāde nadyuttāre mahāvane |bhrāmaṇenātmaśūlasya pātu māṃ parameśvarī || 11||

गृहं पातु कुटुम्बं मे पशुक्षेत्रधनादिकम् ।योगक्षैमं च सततं पातु मे बनशङ्करी ॥ १२॥

gṛhaṃ pātu kuṭumbaṃ me paśukṣetradhanādikam |yogakṣaimaṃ ca satataṃ pātu me banaśaṅkarī || 12||

इतीदं कवचं पुण्यं शाकम्भर्याः प्रकीर्तितम् ।यस्त्रिसन्ध्यं पठेच्छक्र सर्वापद्भिः स मुच्यते ॥ १३॥

itīdaṃ kavacaṃ puṇyaṃ śākambharyāḥ prakīrtitam |yastrisandhyaṃ paṭhecchakra sarvāpadbhiḥ sa mucyate || 13||

तुष्टिं पुष्टिं तथारोग्यं सन्ततिं सम्पदं च शम् ।शत्रुक्षयं समाप्नोति कवचस्यास्य पाठतः ॥ १४॥

tuṣṭiṃ puṣṭiṃ tathārogyaṃ santatiṃ sampadaṃ ca śam |śatrukṣayaṃ samāpnoti kavacasyāsya pāṭhataḥ || 14||

शाकिनीडाकिनीभूत बालग्रहमहाग्रहाः ।नश्यन्ति दर्शनात्त्रस्ताः कवचं पठतस्त्विदम् ॥ १५॥

śākinīḍākinībhūta bālagrahamahāgrahāḥ |naśyanti darśanāttrastāḥ kavacaṃ paṭhatastvidam || 15||

सर्वत्र जयमाप्नोति धनलाभं च पुष्कलम् ।विद्यां वाक्पटुतां चापि शाकम्भर्याः प्रसादतः ॥ १६॥

sarvatra jayamāpnoti dhanalābhaṃ ca puṣkalam |vidyāṃ vākpaṭutāṃ cāpi śākambharyāḥ prasādataḥ || 16||

आवर्तनसहस्रेण कवचस्यास्य वासव ।यद्यत्कामयतेऽभीष्टं तत्सर्वं प्राप्नुयाद् ध्रुवम् ॥ १७॥

āvartanasahasreṇa kavacasyāsya vāsava |yadyatkāmayate'bhīṣṭaṃ tatsarvaṃ prāpnuyād dhruvam || 17||

॥ इति श्री स्कन्दपुराणे स्कन्दप्रोक्तं शाकम्भरी कवचं सम्पूर्णम् ॥

|| iti śrī skandapurāṇe skandaproktaṃ śākambharī kavacaṃ sampūrṇam ||