शाकम्भर्यष्टकम् Shri Shakambhari Ashtakam

शक्तिः शाम्भवविश्वरूपमहिमा माङ्गल्यमुक्तामणिर्घण्टा शूलमसिं लिपिं च दधतीं दक्षैश्चतुर्भिः करैः ।वामैर्बाहुभिरर्घ्यशेषभरितं पात्रं च शीर्षं तथाचक्रं खेटकमन्धकारिदयिता त्रैलोक्यमाता शिवा ॥ १॥

śaktiḥ śāmbhavaviśvarūpamahimā māṅgalyamuktāmaṇirghaṇṭā śūlamasiṃ lipiṃ ca dadhatīṃ dakṣaiścaturbhiḥ karaiḥ |vāmairbāhubhirarghyaśeṣabharitaṃ pātraṃ ca śīrṣaṃ tathācakraṃ kheṭakamandhakāridayitā trailokyamātā śivā || 1||

देवी दिव्यसरोजपादयुगले मञ्जुक्वणन्नूपुरासिंहारूढकलेवरा भगवती व्याघ्राम्बरावेष्टिता ।वैडूर्यादिमहार्घरत्नविलसन्नक्षत्रमालोज्ज्वलावाग्देवी विषमेक्षणा शशिमुखी त्रैलोक्यमाता शिवा ॥ २॥

devī divyasarojapādayugale mañjukvaṇannūpurāsiṃhārūḍhakalevarā bhagavatī vyāghrāmbarāveṣṭitā |vaiḍūryādimahārgharatnavilasannakṣatramālojjvalāvāgdevī viṣamekṣaṇā śaśimukhī trailokyamātā śivā || 2||

ब्रह्माणी च कपालिनी सुयुवती रौद्री त्रिशूलान्वितानाना दैत्यनिबर्हिणी नृशरणा शङ्खासिखेटायुधा ।भेरीशङ्खक्ष् मृदङ्गक्ष् घोषमुदिता शूलिप्रिया चेश्वरीमाणिक्याढ्यकिरीटकान्तवदना त्रैलोक्यमाता शिवा ॥ ३॥

brahmāṇī ca kapālinī suyuvatī raudrī triśūlānvitānānā daityanibarhiṇī nṛśaraṇā śaṅkhāsikheṭāyudhā |bherīśaṅkhakṣ mṛdaṅgakṣ ghoṣamuditā śūlipriyā ceśvarīmāṇikyāḍhyakirīṭakāntavadanā trailokyamātā śivā || 3||

वन्दे देवि भवार्तिभञ्जनकरी भक्तप्रिया मोहिनीमायामोहमदान्धकारशमनी मत्प्राणसञ्जीवनी ।यन्त्रं मन्त्रजपौ तपो भगवती माता पिता भ्रातृकाविद्या बुद्धिधृती गतिश्च सकलत्रैलोक्यमाता शिवा ॥ ४॥

vande devi bhavārtibhañjanakarī bhaktapriyā mohinīmāyāmohamadāndhakāraśamanī matprāṇasañjīvanī |yantraṃ mantrajapau tapo bhagavatī mātā pitā bhrātṛkāvidyā buddhidhṛtī gatiśca sakalatrailokyamātā śivā || 4||

श्रीमातस्त्रिपुरे त्वमब्जनिलया स्वर्गादिलोकान्तरेपाताले जलवाहिनी त्रिपथगा लोकत्रये शङ्करी ।त्वं चाराधकभाग्यसम्पदविनी श्रीमूर्ध्नि लिङ्गाङ्कितात्वां वन्दे भवभीतिभञ्जनकरीं त्रैलोक्यमातः शिवे ॥ ५॥

śrīmātastripure tvamabjanilayā svargādilokāntarepātāle jalavāhinī tripathagā lokatraye śaṅkarī |tvaṃ cārādhakabhāgyasampadavinī śrīmūrdhni liṅgāṅkitātvāṃ vande bhavabhītibhañjanakarīṃ trailokyamātaḥ śive || 5||

श्रीदुर्गे भगिनीं त्रिलोकजननीं कल्पान्तरे डाकिनींवीणापुस्तकधारिणीं गुणमणिं कस्तूरिकालेपनीम् ।नानारत्नविभूषणां त्रिनयनां दिव्याम्बरावेष्टितांवन्दे त्वां भवभीतिभञ्जनकरीं त्रैलोक्यमातः शिवे ॥ ६॥

śrīdurge bhaginīṃ trilokajananīṃ kalpāntare ḍākinīṃvīṇāpustakadhāriṇīṃ guṇamaṇiṃ kastūrikālepanīm |nānāratnavibhūṣaṇāṃ trinayanāṃ divyāmbarāveṣṭitāṃvande tvāṃ bhavabhītibhañjanakarīṃ trailokyamātaḥ śive || 6||

नैरृत्यां दिशि पत्रतीर्थममलं मूर्तित्रये वासिनींसाम्मुख्या च हरिद्रतीर्थमनघं वाप्यां च तैलोदकम् ।गङ्गादित्रयसङ्गमे सकुतुकं पीतोदके पावनेत्वां वन्दे भवभीतिभञ्जनकरीं त्रैलोक्यमातः शिवे ॥ ७॥

nairṛtyāṃ diśi patratīrthamamalaṃ mūrtitraye vāsinīṃsāmmukhyā ca haridratīrthamanaghaṃ vāpyāṃ ca tailodakam |gaṅgāditrayasaṅgame sakutukaṃ pītodake pāvanetvāṃ vande bhavabhītibhañjanakarīṃ trailokyamātaḥ śive || 7||

द्वारे तिष्ठति वक्रतुण्डगणपः क्षेत्रस्य पालस्ततःशक्रेड्या च सरस्वती वहति सा भक्तिप्रिया वाहिनी ।मध्ये श्रीतिलकाभिधं तव वनं शाकम्भरी चिन्मयीत्वां वन्दे भवभीतिभञ्जनकरीं त्रैलोक्यमातः शिवे ॥ ८॥

dvāre tiṣṭhati vakratuṇḍagaṇapaḥ kṣetrasya pālastataḥśakreḍyā ca sarasvatī vahati sā bhaktipriyā vāhinī |madhye śrītilakābhidhaṃ tava vanaṃ śākambharī cinmayītvāṃ vande bhavabhītibhañjanakarīṃ trailokyamātaḥ śive || 8||

शाकम्भर्यष्टकमिदं यः पठेत्प्रयतः पुमान् ।स सर्वपापविनिर्मुक्तः सायुज्यं पदमाप्नुयात् ॥ ९॥

śākambharyaṣṭakamidaṃ yaḥ paṭhetprayataḥ pumān |sa sarvapāpavinirmuktaḥ sāyujyaṃ padamāpnuyāt || 9||

इति श्रीमच्छङ्कराचार्यविरचितं शाकम्भर्यष्टकं सम्पूर्णम् ॥

iti śrīmacchaṅkarācāryaviracitaṃ śākambharyaṣṭakaṃ sampūrṇam ||