परमेश्वरीस्तोत्रम् Devatabhihkritam Parameshvari Stotram

देवता इन्द्रप्रस्थे वै विशाले वनविस्तरे ।कुण्डं सुयोग्यविस्तारं कृत्वा वह्निं निधाय च ॥ ६७॥

devatā indraprasthe vai viśāle vanavistare |kuṇḍaṃ suyogyavistāraṃ kṛtvā vahniṃ nidhāya ca || 67||

कृत्वा दृढां प्रतिज्ञां वै महालक्ष्मीं प्रपूज्य च ।परितो हवनं चक्रुः प्रीत्यर्थं तु श्रिया हरेः ॥ ६८॥

kṛtvā dṛḍhāṃ pratijñāṃ vai mahālakṣmīṃ prapūjya ca |parito havanaṃ cakruḥ prītyarthaṃ tu śriyā hareḥ || 68||

ब्रह्मभूता भविष्यामो भोक्ष्यामो वा त्रिविष्टपम् ।इत्येवं हवनं चक्रुस्तावत्प्रादुर्बभूव ह ॥ ६९॥

brahmabhūtā bhaviṣyāmo bhokṣyāmo vā triviṣṭapam |ityevaṃ havanaṃ cakrustāvatprādurbabhūva ha || 69||

चक्राकारं महत्तेजस्तन्मध्ये पारमेश्वरी ।जगन्माता जीवदात्री नारायणी परेश्वरी ॥ ७०॥

cakrākāraṃ mahattejastanmadhye pārameśvarī |jaganmātā jīvadātrī nārāyaṇī pareśvarī || 70||

व्यूहतेजोमयी ब्रह्मानन्दिनी हरिसुन्दरी ।पाशाङ्कुशेक्षुकोदण्डपद्ममाला लसत्करा ॥ ७१॥

vyūhatejomayī brahmānandinī harisundarī |pāśāṅkuśekṣukodaṇḍapadmamālā lasatkarā || 71||

दृष्ट्वा तां मुमुहुर्देवाः प्रणेमुर्विगतज्वराः ।तुष्टुवुः श्रीमहालक्ष्मीं ललितां वैष्णवीं प्रसूम् ॥ ७२॥

dṛṣṭvā tāṃ mumuhurdevāḥ praṇemurvigatajvarāḥ |tuṣṭuvuḥ śrīmahālakṣmīṃ lalitāṃ vaiṣṇavīṃ prasūm || 72||

जय लक्ष्मि जगन्मातर्जय लक्ष्मि परात्परे ।जय कल्याणनिलये जय सर्वकलात्मिके ॥ ७३॥

jaya lakṣmi jaganmātarjaya lakṣmi parātpare |jaya kalyāṇanilaye jaya sarvakalātmike || 73||

जय ब्राह्मि महालक्ष्मि ब्रह्मात्मिके परात्मिके ।जय नारायणि शान्ते जय श्रीललिते रमे ॥ ७४॥

jaya brāhmi mahālakṣmi brahmātmike parātmike |jaya nārāyaṇi śānte jaya śrīlalite rame || 74||

जय श्रीविजये देवीश्वरि श्रीदे जयर्द्धिदे ।नमः सहस्रशीर्षायै सहस्राननलोचने ॥ ७५॥

jaya śrīvijaye devīśvari śrīde jayarddhide |namaḥ sahasraśīrṣāyai sahasrānanalocane || 75||

नमः सहस्रहस्ताब्जपादपङ्कजशोभिते ।अणोरणुतरे लक्ष्मि महतोऽपि महीयसि ॥ ७६॥

namaḥ sahasrahastābjapādapaṅkajaśobhite |aṇoraṇutare lakṣmi mahato'pi mahīyasi || 76||

अतलं ते स्मृतौ पादौ वितलं जानुनी तव ।रसातलं कटिस्ते च कुक्षिस्ते पृथिवी मता ॥ ७७॥

atalaṃ te smṛtau pādau vitalaṃ jānunī tava |rasātalaṃ kaṭiste ca kukṣiste pṛthivī matā || 77||

हृदयं भुवः स्वस्तेऽस्तु मुखं सत्यं शिरो मतम् ।दृशश्चन्द्रार्कदहना दिशः कर्णा भुजाः सुराः ॥ ७८॥

hṛdayaṃ bhuvaḥ svaste'stu mukhaṃ satyaṃ śiro matam |dṛśaścandrārkadahanā diśaḥ karṇā bhujāḥ surāḥ || 78||

मरुतस्तु तवोच्छ्वासा वाचस्ते श्रुतयो मताः ।क्रीडा ते लोकरचना सखा ते परमेश्वरः ॥ ७९॥

marutastu tavocchvāsā vācaste śrutayo matāḥ |krīḍā te lokaracanā sakhā te parameśvaraḥ || 79||

आहारस्ते सदाऽऽनन्दो वासस्ते हृदये हरेः ।दृश्यादृश्यस्वरूपाणि रूपाणि भुवनानि ते ॥ ८०॥

āhāraste sadā''nando vāsaste hṛdaye hareḥ |dṛśyādṛśyasvarūpāṇi rūpāṇi bhuvanāni te || 80||

शिरोरुहा घनास्ते वै तारकाः कुसुमानि ते ।धर्माद्या बाहवस्ते च कालाद्या हेतयस्तव ॥ ८१॥

śiroruhā ghanāste vai tārakāḥ kusumāni te |dharmādyā bāhavaste ca kālādyā hetayastava || 81||

यमाश्च नियमाश्चापि करपादनखास्तव ।स्तनौ स्वाहास्वधाकारौ सर्वजीवनदुग्धदौ ॥ ८२॥

yamāśca niyamāścāpi karapādanakhāstava |stanau svāhāsvadhākārau sarvajīvanadugdhadau || 82||

प्राणायामस्तव श्वासो रसना ते सरस्वती ।महीरुहास्तेऽङ्गरुहाः प्रभातं वसनं तव ॥ ८३॥

prāṇāyāmastava śvāso rasanā te sarasvatī |mahīruhāste'ṅgaruhāḥ prabhātaṃ vasanaṃ tava || 83||

आदौ दया धर्मपत्नी ससर्ज निखिलाः प्रजाः ।हृत्स्था त्वं व्यापिनी लक्ष्मीर्मोहिनी त्वं तथा परा ॥ ८४॥

ādau dayā dharmapatnī sasarja nikhilāḥ prajāḥ |hṛtsthā tvaṃ vyāpinī lakṣmīrmohinī tvaṃ tathā parā || 84||

इदानीं दृश्यसे ब्राह्मी नारायणी प्रियङ्करी ।नमस्तस्यै महालक्ष्म्यै गजमुख्यै नमो नमः ॥ ८५॥

idānīṃ dṛśyase brāhmī nārāyaṇī priyaṅkarī |namastasyai mahālakṣmyai gajamukhyai namo namaḥ || 85||

सर्वशक्त्यै सर्वधात्र्यै महालक्ष्म्यै नमो नमः ।या ससर्ज विराजं च ततोऽजं विष्णुमीश्वरम् ॥ ८६॥

sarvaśaktyai sarvadhātryai mahālakṣmyai namo namaḥ |yā sasarja virājaṃ ca tato'jaṃ viṣṇumīśvaram || 86||

रुद्रं तथा सुराग्र्याँश्च तस्यै लक्ष्म्यै नमो नमः ।त्रिगुणायै निर्गुणायै हरिण्यै ते नमो नमः ॥ ८७॥

rudraṃ tathā surāgryām̐śca tasyai lakṣmyai namo namaḥ |triguṇāyai nirguṇāyai hariṇyai te namo namaḥ || 87||

यन्त्रतन्त्रात्मिकायै ते जगन्मात्रे नमो नमः ।वाग्विभूत्यै गुरुतन्व्यै महालक्ष्म्यै नमो नमः ॥ ८८॥

yantratantrātmikāyai te jaganmātre namo namaḥ |vāgvibhūtyai gurutanvyai mahālakṣmyai namo namaḥ || 88||

कम्भरायै सर्वविद्याभरायै ते नमो नमः ।जयाललितापाञ्चालीरमातन्वै नमो नमः ॥ ८९॥

kambharāyai sarvavidyābharāyai te namo namaḥ |jayālalitāpāñcālīramātanvai namo namaḥ || 89||

पद्मावतीरमाहंसीसुगुणाऽऽज्ञाश्रियै नमः ।नमःस्तुता प्रसन्नैवं छन्दयामास सद्वरैः ॥ ९०॥

padmāvatīramāhaṃsīsuguṇā''jñāśriyai namaḥ |namaḥstutā prasannaivaṃ chandayāmāsa sadvaraiḥ || 90||

देवाः प्राहुश्च तुष्टा चेद्भण्डासुरं विनाशय ।दुर्धरं जीवितं सौख्यं देहि ते शरणार्थिनः ॥ ९१॥

devāḥ prāhuśca tuṣṭā cedbhaṇḍāsuraṃ vināśaya |durdharaṃ jīvitaṃ saukhyaṃ dehi te śaraṇārthinaḥ || 91||

महालक्ष्मीः समुवाच मुदिताः सन्तु निर्भयाः ।भण्डासुरं नाशयिष्ये ललिताऽहं महासती ॥ ९२॥

mahālakṣmīḥ samuvāca muditāḥ santu nirbhayāḥ |bhaṇḍāsuraṃ nāśayiṣye lalitā'haṃ mahāsatī || 92||

स्तावका मे भविष्यन्ति श्रीयशोधर्मसम्भृताः ।विद्याविनयसम्पन्ना निरोगा दीर्घजीविनः ॥ ९३॥

stāvakā me bhaviṣyanti śrīyaśodharmasambhṛtāḥ |vidyāvinayasampannā nirogā dīrghajīvinaḥ || 93||

पुत्रमित्रकलत्राढ्या भविष्यन्ति सुसम्पदः ।इतिलब्धवरा देवाः सत्रं चक्रुः प्रपूर्णकम् ॥ ९४॥

putramitrakalatrāḍhyā bhaviṣyanti susampadaḥ |itilabdhavarā devāḥ satraṃ cakruḥ prapūrṇakam || 94||

अथ सा ललिता लक्ष्मीर्वरमालां करोत्थिताम् ।अनादिश्रीमहाविष्णुस्वरूपाय परात्मने ॥ ९५॥

atha sā lalitā lakṣmīrvaramālāṃ karotthitām |anādiśrīmahāviṣṇusvarūpāya parātmane || 95||

तत्रैव पश्यतां सर्वसुराणां चार्पयद्गले ।देवदुन्दुभयो नेदुर्जयशब्दास्तदाऽभवन् ॥ ९६॥

tatraiva paśyatāṃ sarvasurāṇāṃ cārpayadgale |devadundubhayo nedurjayaśabdāstadā'bhavan || 96||

गीतयश्चाऽभवंस्तत्राऽप्सरसां सुरयोषिताम् ।ननृतुश्चाप्सरसश्च जगुर्गन्धर्वसत्तमाः ॥ ९७॥

gītayaścā'bhavaṃstatrā'psarasāṃ surayoṣitām |nanṛtuścāpsarasaśca jagurgandharvasattamāḥ || 97||

ऋषयः स्तवनं चक्रुराशीर्वादपरायणाः ।साधवो नमनं चक्रुः सेवां चक्रुश्च पार्षदाः ॥ ९८॥

ṛṣayaḥ stavanaṃ cakrurāśīrvādaparāyaṇāḥ |sādhavo namanaṃ cakruḥ sevāṃ cakruśca pārṣadāḥ || 98||

इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे११५अध्यायान्तर्गतं देवताभिःकृतं परमेश्वरीस्तोत्रं सम्पूर्णम् ।लक्ष्मीनारायणीयसंहिता । खण्ड ३। अध्याय ११५/६७९८॥लक्ष्मीनारायणीयसंहिता । खण्ड ३। अध्याय ११५/६७-९८॥

iti śrīlakṣmīnārāyaṇīyasaṃhitāyāḥ dvāparayugasantānātmakasya tṛtīyakhaṇḍe115adhyāyāntargataṃ devatābhiḥkṛtaṃ parameśvarīstotraṃ sampūrṇam |lakṣmīnārāyaṇīyasaṃhitā | khaṇḍa 3| adhyāya 115/6798||lakṣmīnārāyaṇīyasaṃhitā | khaṇḍa 3| adhyāya 115/67-98||