नृसिंहस्तोत्रम् पिशाचमोचन Pishachamochana Stotram

श्रीगणेशाय नमः । श्रीलक्ष्मीनृसिंहाय नमः ।विशुद्धमजमानन्दमेकमात्रमखण्डितम् ।सच्चिन्मात्रं परं शान्तं तद्धि ब्रह्म नमाम्यहम् ॥ १॥

śrīgaṇeśāya namaḥ | śrīlakṣmīnṛsiṃhāya namaḥ |viśuddhamajamānandamekamātramakhaṇḍitam |saccinmātraṃ paraṃ śāntaṃ taddhi brahma namāmyaham || 1||

यद्धासा निखिलं भाति यस्य नान्यत्प्रकाशकम् ।पुराणमव्ययं ज्योतिं तद्धि ब्रह्म नमाम्यहम् ॥ २॥

yaddhāsā nikhilaṃ bhāti yasya nānyatprakāśakam |purāṇamavyayaṃ jyotiṃ taddhi brahma namāmyaham || 2||

यदेकं सर्वभूतेषु प्रतिरूपतया स्थितम् ।ज्योतिर्यथोदपात्रेषु तद्धि ब्रह्म नमाम्यहम् ॥ ३॥

yadekaṃ sarvabhūteṣu pratirūpatayā sthitam |jyotiryathodapātreṣu taddhi brahma namāmyaham || 3||

यदन्तः सर्वभूतानां यद्रूपमबाधितम् ।मेवाभरणादीनां तद्धि ब्रह्म नमाम्यहम् ॥ ४॥

yadantaḥ sarvabhūtānāṃ yadrūpamabādhitam |mevābharaṇādīnāṃ taddhi brahma namāmyaham || 4||

यदेकं सर्वभावानां निरन्तरमदूषितम् ।चिन्मात्रं निष्कलं पूर्णं तद्धि ब्रह्म नमाम्यहम् ॥ ५॥

yadekaṃ sarvabhāvānāṃ nirantaramadūṣitam |cinmātraṃ niṣkalaṃ pūrṇaṃ taddhi brahma namāmyaham || 5||

ये नार्थान्भजते जन्तुः इन्द्रियेषु मनस्यपि ।निरहङ्कारमानन्दं तद्धि ब्रह्म नमाम्यहम् ॥ ६॥

ye nārthānbhajate jantuḥ indriyeṣu manasyapi |nirahaṅkāramānandaṃ taddhi brahma namāmyaham || 6||

यन्मनो मनसां प्राणः प्राणानामिन्द्रियं वरम् ।सर्वात्मकमखण्डं सत्तद्धि ब्रह्म नमाम्यहम् ॥ ७॥

yanmano manasāṃ prāṇaḥ prāṇānāmindriyaṃ varam |sarvātmakamakhaṇḍaṃ sattaddhi brahma namāmyaham || 7||

यन्नामगुणरूपाद्यैः विचित्रमणिसर्वगम् ।नीयते पशुबुद्धीनां तद्धि ब्रह्म नमाम्यहम् ॥ ८॥

yannāmaguṇarūpādyaiḥ vicitramaṇisarvagam |nīyate paśubuddhīnāṃ taddhi brahma namāmyaham || 8||

यस्मादुदेति सद्विश्वं येन जीवति वर्धते ।यस्मिन् प्रलीयते सर्वं तद्धि ब्रह्म नमाम्यहम् ॥ ९॥

yasmādudeti sadviśvaṃ yena jīvati vardhate |yasmin pralīyate sarvaṃ taddhi brahma namāmyaham || 9||

यतो वागादया भावाः उत्थिताः स्वस्वकर्मसु ।प्रवर्तन्ते साक्षिरूपात् तद्धि ब्रह्म नमाम्यहम् ॥ १०॥

yato vāgādayā bhāvāḥ utthitāḥ svasvakarmasu |pravartante sākṣirūpāt taddhi brahma namāmyaham || 10||

यद् ग्रासकं ग्रासकाणां वीराणां च विवर्धनम् ।व्यापकं व्यापकानां च तद्धि ब्रह्म नमाम्यहम् ॥ ११॥

yad grāsakaṃ grāsakāṇāṃ vīrāṇāṃ ca vivardhanam |vyāpakaṃ vyāpakānāṃ ca taddhi brahma namāmyaham || 11||

सकलं निष्कलं व्योम मायातीतं निरञ्जनम् ।अस्तिनास्तिद्वयातीतं तद्धि ब्रह्म नमाम्यहम् ॥ १२॥

sakalaṃ niṣkalaṃ vyoma māyātītaṃ nirañjanam |astināstidvayātītaṃ taddhi brahma namāmyaham || 12||

यज्ज्वालयति कालाद्यास्तमो येन प्रकाशते ।महाज्वालातमोरूपं तद्धि ब्रह्म नमाम्यहम् ॥ १३॥

yajjvālayati kālādyāstamo yena prakāśate |mahājvālātamorūpaṃ taddhi brahma namāmyaham || 13||

यत्सर्वतो वदनवत्सर्वतः करणाच्छिरः ।सर्वतो नयनश्रोत्रं तद्धि ब्रह्म नमाम्यहम् ॥ १४॥

yatsarvato vadanavatsarvataḥ karaṇācchiraḥ |sarvato nayanaśrotraṃ taddhi brahma namāmyaham || 14||

यद्विचारवतो नृणां बन्धोऽनादि तमोभवः ।सद्यो नश्यति शारीरस्तद्धि ब्रह्म नमाम्यहम् ॥ १५॥

yadvicāravato nṛṇāṃ bandho'nādi tamobhavaḥ |sadyo naśyati śārīrastaddhi brahma namāmyaham || 15||

यस्याज्ञयानिलार्केन्दुमृत्युवह्निग्रहादयः ।स्वकर्मसु वर्तन्ते तद्धि ब्रह्म नमाम्यहम् ॥ १६॥

yasyājñayānilārkendumṛtyuvahnigrahādayaḥ |svakarmasu vartante taddhi brahma namāmyaham || 16||

यन्नाम मङ्गलतमं मङ्गलानामनुत्तमम् ।स्तुतिभिः स्तूयते वेदैस्तद्धि ब्रह्म नमाम्यहम् ॥ १७॥

yannāma maṅgalatamaṃ maṅgalānāmanuttamam |stutibhiḥ stūyate vedaistaddhi brahma namāmyaham || 17||

यस्याऽत्मतां विदां मृत्युरनादि म्रियते क्षणात् ।मृत्युमारणमापूर्णं तद्धि ब्रह्म नमाम्यहम् ॥ १८॥

yasyā'tmatāṃ vidāṃ mṛtyuranādi mriyate kṣaṇāt |mṛtyumāraṇamāpūrṇaṃ taddhi brahma namāmyaham || 18||

निषिध्य सर्वलोकेऽस्मिन् यच्छेषमुपलभ्यते ।सत्तामात्रमनिर्देश्यं तद्धि ब्रह्म नमाम्यहम् ॥ १९॥

niṣidhya sarvaloke'smin yaccheṣamupalabhyate |sattāmātramanirdeśyaṃ taddhi brahma namāmyaham || 19||

पूर्णमन्तं बहिः पूर्णं येन पूर्णेन पूर्यते ।पूर्णस्य पूर्णमाकाशं तद्धि ब्रह्म नमाम्यहम् ॥ २०॥

pūrṇamantaṃ bahiḥ pūrṇaṃ yena pūrṇena pūryate |pūrṇasya pūrṇamākāśaṃ taddhi brahma namāmyaham || 20||

उग्रं वीरं महाविष्णुं ज्वलन्तं सर्वतो मुखम् ।नृसिंहं भीषणं भद्रं मृत्युमृत्युं नमाम्यहम् ॥ २१॥

ugraṃ vīraṃ mahāviṣṇuṃ jvalantaṃ sarvato mukham |nṛsiṃhaṃ bhīṣaṇaṃ bhadraṃ mṛtyumṛtyuṃ namāmyaham || 21||

इति नृसिंहपुराणे शिवपार्वतीसंवादे पिशाचमोचनस्तोत्रं सम्पूर्णम् ।

iti nṛsiṃhapurāṇe śivapārvatīsaṃvāde piśācamocanastotraṃ sampūrṇam |