कालीध्यानम् Shrikalidhyanam

सद्यश्छिन्नशिरःकृपाणमभयं हस्तैर्वरं बिभ्रतींघोरास्यां शिरसां स्रजा सुरुचिरामुन्मुक्तकेशावलीम् ।सृक्कासृत्प्रवहां श्मशाननिलयां श्रुत्योः शवालङ्कृतिंश्यामाङ्गीं कृतमेखलां शवकरैर्देवीं भजे कालिकाम् ॥ १॥

sadyaśchinnaśiraḥkṛpāṇamabhayaṃ hastairvaraṃ bibhratīṃghorāsyāṃ śirasāṃ srajā surucirāmunmuktakeśāvalīm |sṛkkāsṛtpravahāṃ śmaśānanilayāṃ śrutyoḥ śavālaṅkṛtiṃśyāmāṅgīṃ kṛtamekhalāṃ śavakarairdevīṃ bhaje kālikām || 1||

शिवारूढां महाभीमां घोरदंष्ट्रां हसन्मुखीम् ।चतुर्भुजां खड्गमुण्डवराभयकरांशिवाम् ॥ २॥

śivārūḍhāṃ mahābhīmāṃ ghoradaṃṣṭrāṃ hasanmukhīm |caturbhujāṃ khaḍgamuṇḍavarābhayakarāṃśivām || 2||

मुण्डमालाधरां देवीं ललज्जिह्वां दिगम्बराम् ।सदा सञ्चिन्तये कालीं श्मशानालयवासिनीम् ॥ ३॥

muṇḍamālādharāṃ devīṃ lalajjihvāṃ digambarām |sadā sañcintaye kālīṃ śmaśānālayavāsinīm || 3||

नमामि दक्षिणामूर्तिं कालिकां परभैरवीम् ।भिन्नाञ्जनचयप्रख्यां प्रवीरशवसंस्थिताम् ॥ ४॥

namāmi dakṣiṇāmūrtiṃ kālikāṃ parabhairavīm |bhinnāñjanacayaprakhyāṃ pravīraśavasaṃsthitām || 4||

गलच्छोणितधाराभिः स्मेराननसरोरुहाम् ।पीनोन्नतकुचद्वन्द्वां पीनवक्षोनितम्बिनीम् ॥ ५॥

galacchoṇitadhārābhiḥ smerānanasaroruhām |pīnonnatakucadvandvāṃ pīnavakṣonitambinīm || 5||

दक्षिणां मुक्तकेशालीं दिगम्बरविनोदिनीम् ।महाकालशवाविष्टां स्मेराम्बरपरिस्थिताम् ॥ ६॥

dakṣiṇāṃ muktakeśālīṃ digambaravinodinīm |mahākālaśavāviṣṭāṃ smerāmbaraparisthitām || 6||

मुखसान्द्रस्मितामोदमोदिनीं मदविह्वलाम् ।आरक्तमुखसान्द्राभिः नेत्रालीभिर्विराजिताम् ॥ ७॥

mukhasāndrasmitāmodamodinīṃ madavihvalām |āraktamukhasāndrābhiḥ netrālībhirvirājitām || 7||

शवद्वयकृतोत्तंसांसिन्दूरतिलकोज्ज्वलाम् ।पञ्चाशन्मुण्डघटितमालाशोणितलोहिताम् ॥ ८॥

śavadvayakṛtottaṃsāṃsindūratilakojjvalām |pañcāśanmuṇḍaghaṭitamālāśoṇitalohitām || 8||

नानामणिविशोभाढ्यनानालङ्कारशोभिताम् ।शवास्थिकृतकेयूरशङ्खकङ्कणमण्डिताम् ॥ ९॥

nānāmaṇiviśobhāḍhyanānālaṅkāraśobhitām |śavāsthikṛtakeyūraśaṅkhakaṅkaṇamaṇḍitām || 9||

शववक्षःसमारूढां लेलिहानां शवं क्वचित् ।शवमांसकृतग्रासां साट्टहासं मुहुर्मुहुः ॥ १०॥

śavavakṣaḥsamārūḍhāṃ lelihānāṃ śavaṃ kvacit |śavamāṃsakṛtagrāsāṃ sāṭṭahāsaṃ muhurmuhuḥ || 10||

खड्गमुण्डधरां वामे सव्येऽभयवरप्रदाम् ।दन्तुरां च महारौद्रीं चण्डनादातिभीषणाम् ॥ ११॥

khaḍgamuṇḍadharāṃ vāme savye'bhayavarapradām |danturāṃ ca mahāraudrīṃ caṇḍanādātibhīṣaṇām || 11||

शिवाभिर्घोररूपाभिर्वेष्टितां भयनाशिनीम् ।माभैर्माभैः स्वभक्तेषु जल्पन्तीं घोरनिःस्वनैः ॥ १२॥

śivābhirghorarūpābhirveṣṭitāṃ bhayanāśinīm |mābhairmābhaiḥ svabhakteṣu jalpantīṃ ghoraniḥsvanaiḥ || 12||

यूयं किमिच्छत ब्रूत ददामीति प्रभाषिणीम् ।ध्यायामि तां महाकालीं सर्वोपद्रववारिणीम् ॥ १३॥

yūyaṃ kimicchata brūta dadāmīti prabhāṣiṇīm |dhyāyāmi tāṃ mahākālīṃ sarvopadravavāriṇīm || 13||

इति श्रीकालीध्यानं सपूर्णम् ॥

iti śrīkālīdhyānaṃ sapūrṇam ||