बालामुक्तावलीस्तोत्रम् Shri Bala Muktavali Stotram

बालार्ककोटिरुचिरां कोटिब्रह्माण्डभूषिताम् ।कन्दर्पकोटिलावण्यां बालां वन्दे शिवप्रियाम् ॥ १॥

bālārkakoṭirucirāṃ koṭibrahmāṇḍabhūṣitām |kandarpakoṭilāvaṇyāṃ bālāṃ vande śivapriyām || 1||

वह्निकोटिप्रभां सूक्ष्मां कोटिकोटिसहेलिनीम् ।वरदां रक्तवर्णां च बालां वन्दे सनातनीम् ॥ २॥

vahnikoṭiprabhāṃ sūkṣmāṃ koṭikoṭisahelinīm |varadāṃ raktavarṇāṃ ca bālāṃ vande sanātanīm || 2||

ज्ञानरत्नाकरां भीमां परब्रह्मावतारिणीम् ।पञ्चप्रेतासनगतां बालां वन्दे गुहाशयाम् ॥ ३॥

jñānaratnākarāṃ bhīmāṃ parabrahmāvatāriṇīm |pañcapretāsanagatāṃ bālāṃ vande guhāśayām || 3||

पराप्रासादमूर्ध्निस्थां पवित्रां पात्रधारिणीम् ।पशुपाशच्छिदां तीक्ष्णां बालां वन्दे शिवासनाम् ॥ ४॥

parāprāsādamūrdhnisthāṃ pavitrāṃ pātradhāriṇīm |paśupāśacchidāṃ tīkṣṇāṃ bālāṃ vande śivāsanām || 4||

गिरिजां गिरिमध्यस्थां गीः रूपां ज्ञानदायिनीम् ।गुह्यतत्त्वपरां चाद्यां बालां वन्दे पुरातनिम् ॥ ५॥

girijāṃ girimadhyasthāṃ gīḥ rūpāṃ jñānadāyinīm |guhyatattvaparāṃ cādyāṃ bālāṃ vande purātanim || 5||

बौद्धकोटिसुसौन्दर्यां चन्द्रकोटिसुशीतलाम् ।आशावासां परां देवीं वन्दे बालां कपर्दिनीम् ॥ ६॥

bauddhakoṭisusaundaryāṃ candrakoṭisuśītalām |āśāvāsāṃ parāṃ devīṃ vande bālāṃ kapardinīm || 6||

सृष्टिस्थित्यन्तकारिणीं त्रिगुणात्मकरूपिणीम् ।कालग्रसनसामर्थ्यां बालां वन्दे फलप्रदाम् ॥ ७॥

sṛṣṭisthityantakāriṇīṃ triguṇātmakarūpiṇīm |kālagrasanasāmarthyāṃ bālāṃ vande phalapradām || 7||

यज्ञनाशीं यज्ञदेहां यज्ञकर्मशुभप्रदाम् ।जीवात्मविश्वजननीं बालां वन्दे परात्पराम् ॥ ८॥

yajñanāśīṃ yajñadehāṃ yajñakarmaśubhapradām |jīvātmaviśvajananīṃ bālāṃ vande parātparām || 8||

इत्येतत्परमं गुह्यं नाम्ना मुक्तावलीस्तवम् ।ये पठन्ति महेशानि फलं वक्तुं न शक्यते ॥ ९॥

ityetatparamaṃ guhyaṃ nāmnā muktāvalīstavam |ye paṭhanti maheśāni phalaṃ vaktuṃ na śakyate || 9||

गुह्याद्गुह्यतरं गुह्यं महागुह्यं वरानने ।विद्यार्थी लभते विद्यां धनार्थी लभते धनम् ॥ १०॥

guhyādguhyataraṃ guhyaṃ mahāguhyaṃ varānane |vidyārthī labhate vidyāṃ dhanārthī labhate dhanam || 10||

कन्यार्थी लभते कन्यां मोक्षार्थी मोक्षमाप्नुयात् ।बहुनात्र किमुक्तेन चिन्तामणिरिवापरम् ॥ ११॥

kanyārthī labhate kanyāṃ mokṣārthī mokṣamāpnuyāt |bahunātra kimuktena cintāmaṇirivāparam || 11||

गोपनीयं प्रयत्नेन गोपनीयं न संशयः ।अन्येभ्यो नैव दातव्यं किमन्यच्छ्रोतुमिच्छसि ॥ १२॥

gopanīyaṃ prayatnena gopanīyaṃ na saṃśayaḥ |anyebhyo naiva dātavyaṃ kimanyacchrotumicchasi || 12||

इति श्रीविष्णुयामले श्रीबालामुक्तावलीस्तोत्रं सम्पूर्णम् ।

iti śrīviṣṇuyāmale śrībālāmuktāvalīstotraṃ sampūrṇam |