सत्यनारायणाष्टकम् Satyanarayanashtakam

आदिदेवं जगत्कारणं श्रीधरं लोकनाथं विभुं व्यापकं शङ्करम् ।सर्वभक्तेष्टदं मुक्तिदं माधवं सत्यनारायणं विष्णुमीशं भजे ॥ १॥

ādidevaṃ jagatkāraṇaṃ śrīdharaṃ lokanāthaṃ vibhuṃ vyāpakaṃ śaṅkaram |sarvabhakteṣṭadaṃ muktidaṃ mādhavaṃ satyanārāyaṇaṃ viṣṇumīśaṃ bhaje || 1||

सर्वदा लोककल्याणपारायणं देवगोविप्ररक्षार्थसद्विग्रहम् ।दीनहीनात्मभक्ताश्रयं सुन्दरं सत्यनारायणं विष्णुमीशं भजे ॥ २॥

sarvadā lokakalyāṇapārāyaṇaṃ devagoviprarakṣārthasadvigraham |dīnahīnātmabhaktāśrayaṃ sundaraṃ satyanārāyaṇaṃ viṣṇumīśaṃ bhaje || 2||

दक्षिणे यस्य गङ्गा शुभा शोभते राजते सा रमा यस्य वामे सदा ।यः प्रसन्नाननो भाति भव्यश्च तं सत्यनारायणं विष्णुमीशं भजे ॥ ३॥

dakṣiṇe yasya gaṅgā śubhā śobhate rājate sā ramā yasya vāme sadā |yaḥ prasannānano bhāti bhavyaśca taṃ satyanārāyaṇaṃ viṣṇumīśaṃ bhaje || 3||

सङ्कटे सङ्गरे यं जनः सर्वदा स्वात्मभीनाशनाय स्मरेत् पीडितः ।पूर्णकृत्यो भवेद् यत्प्रसादाच्च तं सत्यनारायणं विष्णुमीशं भजे ॥ ४॥

saṅkaṭe saṅgare yaṃ janaḥ sarvadā svātmabhīnāśanāya smaret pīḍitaḥ |pūrṇakṛtyo bhaved yatprasādācca taṃ satyanārāyaṇaṃ viṣṇumīśaṃ bhaje || 4||

वाञ्छितं दुर्लभं यो ददाति प्रभुः साधवे स्वात्मभक्ताय भक्तिप्रियः ।सर्वभूताश्रयं तं हि विश्वम्भरं सत्यनारायणं विष्णुमीशं भजे ॥ ५॥

vāñchitaṃ durlabhaṃ yo dadāti prabhuḥ sādhave svātmabhaktāya bhaktipriyaḥ |sarvabhūtāśrayaṃ taṃ hi viśvambharaṃ satyanārāyaṇaṃ viṣṇumīśaṃ bhaje || 5||

ब्राह्मणः साधुवैश्यश्च तुङ्गध्वजो येऽभवन् विश्रुता यस्य भक्त्याऽमरा ।लीलया यस्य विश्वं ततं तं विभुं सत्यनारायणं विष्णुमीशं भजे ॥ ६॥

brāhmaṇaḥ sādhuvaiśyaśca tuṅgadhvajo ye'bhavan viśrutā yasya bhaktyā'marā |līlayā yasya viśvaṃ tataṃ taṃ vibhuṃ satyanārāyaṇaṃ viṣṇumīśaṃ bhaje || 6||

येन चाब्रह्मबालतृणं धार्यते सृज्यते पाल्यते सर्वमेतज्जगत् ।भक्तभावप्रियं श्रीदयासागरं सत्यनारायणं विष्णुमीशं भजे ॥ ७॥

yena cābrahmabālatṛṇaṃ dhāryate sṛjyate pālyate sarvametajjagat |bhaktabhāvapriyaṃ śrīdayāsāgaraṃ satyanārāyaṇaṃ viṣṇumīśaṃ bhaje || 7||

सर्वकामप्रदं सर्वदा सत्प्रियं वन्दितं देववृन्दैर्मुनीन्द्रार्चितम् ।पुत्रपौत्रादिसर्वेष्टदं शाश्वतं सत्यनारायणं विष्णुमीशं भजे ॥ ८॥

sarvakāmapradaṃ sarvadā satpriyaṃ vanditaṃ devavṛndairmunīndrārcitam |putrapautrādisarveṣṭadaṃ śāśvataṃ satyanārāyaṇaṃ viṣṇumīśaṃ bhaje || 8||

अष्टकं सत्यदेवस्य भक्त्या नरः भावयुक्तो मुदा यस्त्रिसन्ध्यं पठेत् ।तस्य नश्यन्ति पापानि तेनाऽग्निना इन्धनानीव शुष्काणि सर्वाणि वै ॥ ९॥

aṣṭakaṃ satyadevasya bhaktyā naraḥ bhāvayukto mudā yastrisandhyaṃ paṭhet |tasya naśyanti pāpāni tenā'gninā indhanānīva śuṣkāṇi sarvāṇi vai || 9||

इति सत्यनारायणाष्टकं सम्पूर्णम् ।

iti satyanārāyaṇāṣṭakaṃ sampūrṇam |