विष्णुस्तोत्रम् (मार्कण्डेयकृतं २ स्कन्दपुराणान्तर्गतम् त्वत्पादपद्मानुसरानुषङ्गं रुद्रेन्द्रपद्मासनसम्पदाढ्यम्) Markandeyakritam 2 Vishnu Stotram

मार्कण्डेय उवाच ।त्वत्पादपद्मानुसरानुषङ्गं रुद्रेन्द्रपद्मासनसम्पदाढ्यम् ।त्वद्भक्तिहीनं परितः प्रतप्तं दीनं परित्राहि कृपाम्बुधे माम् ॥ १७॥

mārkaṇḍeya uvāca |tvatpādapadmānusarānuṣaṅgaṃ rudrendrapadmāsanasampadāḍhyam |tvadbhaktihīnaṃ paritaḥ prataptaṃ dīnaṃ paritrāhi kṛpāmbudhe mām || 17||

ब्रह्मादिभिर्यत्परिचर्यमाणं पदाम्बुजद्वन्द्वमचिन्त्यशक्ति ।श्वः श्रेयसप्राप्तिनिदानतत्त्वं दीनं परित्राहि कृपाम्बुधे माम् ॥ १८॥

brahmādibhiryatparicaryamāṇaṃ padāmbujadvandvamacintyaśakti |śvaḥ śreyasaprāptinidānatattvaṃ dīnaṃ paritrāhi kṛpāmbudhe mām || 18||

यदङ्गभूतं जगदण्डमेतदनेककोटि प्रगुणं विभाति ।लीलाविलासस्थितिसृष्टिलीनं तन्मां सुदीनं परिरक्ष विष्णो ॥ १९॥

yadaṅgabhūtaṃ jagadaṇḍametadanekakoṭi praguṇaṃ vibhāti |līlāvilāsasthitisṛṣṭilīnaṃ tanmāṃ sudīnaṃ parirakṣa viṣṇo || 19||

एकं सुवर्णं कटकादिभेदैर्नाना यथा वा नभसोदितोऽर्कः ।आधारवैषम्यजलेषु तादृग्विभाव्यसे निर्गुण एक एव ॥ २\।३\।२०॥अशेषसम्पूर्णरुचिप्रहीणोपादानसङ्कल्पविवर्जितोऽपि ।दीनानुकम्पानुगुणं बिभर्षि युगे युगे देहमपारशक्ते ॥ २१॥

ekaṃ suvarṇaṃ kaṭakādibhedairnānā yathā vā nabhasodito'rkaḥ |ādhāravaiṣamyajaleṣu tādṛgvibhāvyase nirguṇa eka eva || 2\|3\|20||aśeṣasampūrṇaruciprahīṇopādānasaṅkalpavivarjito'pi |dīnānukampānuguṇaṃ bibharṣi yuge yuge dehamapāraśakte || 21||

त्वत्पादपद्मं जगदीश पूर्वमसेव्यतानात्मधिया मया यत् ।तत्कर्मणा दारुणपाकभाजं दीनं परित्राहि कृपाम्बुधे माम् ॥ २२॥

tvatpādapadmaṃ jagadīśa pūrvamasevyatānātmadhiyā mayā yat |tatkarmaṇā dāruṇapākabhājaṃ dīnaṃ paritrāhi kṛpāmbudhe mām || 22||

अशेषलोकस्थितिसृष्टिलीनविलासि यत्ते त्रिगुणं विभाति ।वपुर्महात्मन्महदादिहेतुर्हेतोर्नमस्ते प्रकृतेः परस्य ॥ २३॥

aśeṣalokasthitisṛṣṭilīnavilāsi yatte triguṇaṃ vibhāti |vapurmahātmanmahadādiheturhetornamaste prakṛteḥ parasya || 23||

सर्वत्र गत्वा बृहदप्रमेयं प्रवर्द्धमानं त्वयि बृंहितं च ।तद्बह्मरूपं परिणामहेतुं स्वाध्यात्मविश्वात्मकमाश्रयामि ॥ २४॥

sarvatra gatvā bṛhadaprameyaṃ pravarddhamānaṃ tvayi bṛṃhitaṃ ca |tadbahmarūpaṃ pariṇāmahetuṃ svādhyātmaviśvātmakamāśrayāmi || 24||

एकार्णवे महाघोरे नावस्थातुं प्रदेशभूः ।अस्ति लक्ष्मीपते मेघवारिवातप्रकम्पनात् ॥ २५॥

ekārṇave mahāghore nāvasthātuṃ pradeśabhūḥ |asti lakṣmīpate meghavārivātaprakampanāt || 25||

त्राहि विष्णो जगन्नाथ मग्नं संसारसागरे ।मामुद्धरास्माद्गोविन्द कृपापाङ्गविलोकनात् ॥ २६॥

trāhi viṣṇo jagannātha magnaṃ saṃsārasāgare |māmuddharāsmādgovinda kṛpāpāṅgavilokanāt || 26||

इति श्रीस्कन्दपुराणे वैष्णवखण्डे पुरुषोत्तमजगन्नाथमाहात्म्येतृतीयाध्यायान्तर्गतं मार्कण्डेयकृतं विष्णुस्तोत्रं समाप्तम् ।स्कन्दपुराण । वैष्णवखण्ड । पुरुषोत्तमखण्ड । अध्याय ३/१७२६॥स्कन्दपुराण । वैष्णवखण्ड । पुरुषोत्तमखण्ड । अध्याय ३/१७-२६॥

iti śrīskandapurāṇe vaiṣṇavakhaṇḍe puruṣottamajagannāthamāhātmyetṛtīyādhyāyāntargataṃ mārkaṇḍeyakṛtaṃ viṣṇustotraṃ samāptam |skandapurāṇa | vaiṣṇavakhaṇḍa | puruṣottamakhaṇḍa | adhyāya 3/1726||skandapurāṇa | vaiṣṇavakhaṇḍa | puruṣottamakhaṇḍa | adhyāya 3/17-26||