गर्भस्तुतिः Garbhastutih

श्री गणेशाय नमः ।देवा ऊचुः ।जगद्योनिरयोनिस्त्वमनन्तोऽव्यय एव च ।ज्योतिःस्वरूपो ह्यनिशः सगुणो निर्गुणो महान् ॥ १॥

śrī gaṇeśāya namaḥ |devā ūcuḥ |jagadyonirayonistvamananto'vyaya eva ca |jyotiḥsvarūpo hyaniśaḥ saguṇo nirguṇo mahān || 1||

भक्तानुरोधात्साकारो निराकारो निरङ्कुशः ।निर्व्यूहो निखिलाधारो निःशङ्को निरुपद्रवः ॥ २॥

bhaktānurodhātsākāro nirākāro niraṅkuśaḥ |nirvyūho nikhilādhāro niḥśaṅko nirupadravaḥ || 2||

निरुपाधिश्च निर्लिप्तो निरीहो निधनान्तकः ।स्वात्मारामः पूर्णकामोऽनिमिषो नित्य एव च ॥ ३॥

nirupādhiśca nirlipto nirīho nidhanāntakaḥ |svātmārāmaḥ pūrṇakāmo'nimiṣo nitya eva ca || 3||

स्वेच्छामयः सर्वहेतुः सर्वः सर्वगुणाश्रयः ।सर्वदो दुःखदो दुर्गो दुर्जनान्तक एव च ॥ ४॥

svecchāmayaḥ sarvahetuḥ sarvaḥ sarvaguṇāśrayaḥ |sarvado duḥkhado durgo durjanāntaka eva ca || 4||

सुभगो दुर्भगो वाग्मी दुराराध्यो दुरत्ययः ।वेदहेतुश्च वेदश्च वेदाङ्गो वेदविद्विभुः ॥ ५॥

subhago durbhago vāgmī durārādhyo duratyayaḥ |vedahetuśca vedaśca vedāṅgo vedavidvibhuḥ || 5||

इत्येवमुक्त्वा देवाश्च प्रणेमुश्च मुहुर्मुहुः ।हर्षाश्रुलोचनाः सर्वे ववृषुः कुसुमानि च ॥ ६॥

ityevamuktvā devāśca praṇemuśca muhurmuhuḥ |harṣāśrulocanāḥ sarve vavṛṣuḥ kusumāni ca || 6||

द्विचत्वारिंशन्नामानि प्रातरुत्थाय यः पठेत् ।दृढां भक्तिं हरेर्दास्यं लभते वाञ्छितं फलम् ॥ ७॥

dvicatvāriṃśannāmāni prātarutthāya yaḥ paṭhet |dṛḍhāṃ bhaktiṃ harerdāsyaṃ labhate vāñchitaṃ phalam || 7||

इत्येवं स्तवनं कृत्वा देवास्ते स्वालयं ययुः ।बभूव जलवृष्टिश्च निश्चेष्टा मथुरापुरी ॥ ८॥

ityevaṃ stavanaṃ kṛtvā devāste svālayaṃ yayuḥ |babhūva jalavṛṣṭiśca niśceṣṭā mathurāpurī || 8||

॥ इति श्रीब्रह्मवैवर्ते देवकृता गर्भस्तुतिः सम्पूर्णा ॥

|| iti śrībrahmavaivarte devakṛtā garbhastutiḥ sampūrṇā ||