विष्णुस्तोत्रम् (देवैः कृतं १० स्कन्दपुराणान्तर्गतम् नमस्तेऽस्तु जगद्बीज नमस्ते कमलापते) Devaih Kritam 10 Vishnu Stotram

देवा ऊचुः ।नमस्तेऽस्तु जगद्बीज नमस्ते कमलापते ।नमस्तेऽस्तु सुरेशान नमस्ते कमलेक्षण ॥ १॥

devā ūcuḥ |namaste'stu jagadbīja namaste kamalāpate |namaste'stu sureśāna namaste kamalekṣaṇa || 1||

त्वं स्थितिः सर्वभूतानां त्वमेव शरणं सताम् ।त्वं हन्ता सर्वदुष्टानां हयग्रीव नमोऽस्तु ते ॥ २॥

tvaṃ sthitiḥ sarvabhūtānāṃ tvameva śaraṇaṃ satām |tvaṃ hantā sarvaduṣṭānāṃ hayagrīva namo'stu te || 2||

त्वमोङ्कारो वषट्कारः स्वाहा स्वधा चतुर्विधा ।आद्यस्त्वं च सुरेशान त्वमेव शरणं सदा ॥ ३॥

tvamoṅkāro vaṣaṭkāraḥ svāhā svadhā caturvidhā |ādyastvaṃ ca sureśāna tvameva śaraṇaṃ sadā || 3||

यज्ञो यज्ञपतिर्यज्वा द्रव्यं होता हुतस्तथा ।त्वदर्थं हूयते देव त्वमेव शरणं सखा ॥ ४॥

yajño yajñapatiryajvā dravyaṃ hotā hutastathā |tvadarthaṃ hūyate deva tvameva śaraṇaṃ sakhā || 4||

कालः करालरूपस्त्वं त्वं वार्कः शीतदीधितिः ।त्वमग्निर्वरुणश्चैव त्वं च कालक्षयङ्करः ॥ ५॥

kālaḥ karālarūpastvaṃ tvaṃ vārkaḥ śītadīdhitiḥ |tvamagnirvaruṇaścaiva tvaṃ ca kālakṣayaṅkaraḥ || 5||

गुणत्रयं त्वमेवेह गुणहीनस्त्वमेव हि ।गुणानामालयस्त्वं च गोप्ता सर्वेषु जन्तुषु ॥ ६॥

guṇatrayaṃ tvameveha guṇahīnastvameva hi |guṇānāmālayastvaṃ ca goptā sarveṣu jantuṣu || 6||

स्त्रीपुंसोश्च द्विधा त्वं च पशुपक्ष्यादिमानवैः ।चतुर्विधं कुलं त्वं हि चतुराशीतिलक्षणः ॥ ७॥

strīpuṃsośca dvidhā tvaṃ ca paśupakṣyādimānavaiḥ |caturvidhaṃ kulaṃ tvaṃ hi caturāśītilakṣaṇaḥ || 7||

दिनान्तश्चैव पक्षान्तो मासान्तो हायनं युगम् ।कल्पान्तश्च महान्तश्च कालान्तस्त्वं च वै हरे ॥ ८॥

dināntaścaiva pakṣānto māsānto hāyanaṃ yugam |kalpāntaśca mahāntaśca kālāntastvaṃ ca vai hare || 8||

इति स्कन्दपुराणे ब्रह्मखण्डे धर्मारण्यखण्डे पञ्चदशाध्यायान्तर्गतंदेवैः कृतं विष्णुस्तोत्रं समाप्तम् ।स्कन्दपुराण । ब्राह्मखण्ड । धर्मारण्यखण्ड । अध्याय १५/१११८॥स्कन्दपुराण । ब्राह्मखण्ड । धर्मारण्यखण्ड । अध्याय १५/११-१८॥

iti skandapurāṇe brahmakhaṇḍe dharmāraṇyakhaṇḍe pañcadaśādhyāyāntargataṃdevaiḥ kṛtaṃ viṣṇustotraṃ samāptam |skandapurāṇa | brāhmakhaṇḍa | dharmāraṇyakhaṇḍa | adhyāya 15/1118||skandapurāṇa | brāhmakhaṇḍa | dharmāraṇyakhaṇḍa | adhyāya 15/11-18||