विष्णुस्तोत्रम् (देवैः कृतं ०७ शिवपुराणान्तर्गतम् नमो हिरण्यगर्भाय सर्वसृष्टिविधायिने) Devaih Kritam 07 Vishnu Stotram

देवा ऊचुः ।नमो हिरण्यगर्भाय सर्वसृष्टिविधायिने ।नमः स्थितिकृते तुभ्यं विष्णवे प्रभविष्णवे ॥ १३॥

devā ūcuḥ |namo hiraṇyagarbhāya sarvasṛṣṭividhāyine |namaḥ sthitikṛte tubhyaṃ viṣṇave prabhaviṣṇave || 13||

नमो हरस्वरूपाय भूतसंहारकारिणे ।निर्गुणाय नमस्तुभ्यं शिवायामिततेजसे ॥ १४॥

namo harasvarūpāya bhūtasaṃhārakāriṇe |nirguṇāya namastubhyaṃ śivāyāmitatejase || 14||

अवस्थारहितायाथ निर्विकाराय वर्चसे ।महाभूतात्मभूताय निर्लिप्ताय महात्मने ॥ १५॥

avasthārahitāyātha nirvikārāya varcase |mahābhūtātmabhūtāya nirliptāya mahātmane || 15||

नमस्ते भूतपतये महाभारसहिष्णवे ।तृष्णाहराय निर्वैराकृतये भूरितेजसे ॥ १६॥

namaste bhūtapataye mahābhārasahiṣṇave |tṛṣṇāharāya nirvairākṛtaye bhūritejase || 16||

महादैत्यमहारण्यनाशिने दाववह्नये ।दैत्यद्रुमकुठाराय नमस्ते शूलपाणये ॥ १७॥

mahādaityamahāraṇyanāśine dāvavahnaye |daityadrumakuṭhārāya namaste śūlapāṇaye || 17||

महादनुजनाशाय नमस्ते परमेश्वर ।अम्बिकापतये तुभ्यं नमस्सर्वास्त्रधारक ॥ १८॥

mahādanujanāśāya namaste parameśvara |ambikāpataye tubhyaṃ namassarvāstradhāraka || 18||

नमस्ते पार्वतीनाथ परमात्मन्महेश्वर ।नीलकण्ठाय रुद्राय नमस्ते रुद्ररूपिणे ॥ १९॥

namaste pārvatīnātha paramātmanmaheśvara |nīlakaṇṭhāya rudrāya namaste rudrarūpiṇe || 19||

नमो वेदान्तवेद्याय मार्गातीताय ते नमः ।नमो गुणस्वरूपाय गुणिने गुणवर्जिते ॥ ५\।२\।२०॥महादेव नमस्तुभ्यं त्रिलोकीनन्दनाय च ।प्रद्युम्नायानिरुद्धाय वासुदेवाय ते नमः ॥ २१॥

namo vedāntavedyāya mārgātītāya te namaḥ |namo guṇasvarūpāya guṇine guṇavarjite || 5\|2\|20||mahādeva namastubhyaṃ trilokīnandanāya ca |pradyumnāyāniruddhāya vāsudevāya te namaḥ || 21||

सङ्कर्षणाय देवाय नमस्ते कंसनाशिने ।चाणूरमर्दिने तुभ्यं दामोदर विषादिने ॥ २२॥

saṅkarṣaṇāya devāya namaste kaṃsanāśine |cāṇūramardine tubhyaṃ dāmodara viṣādine || 22||

हृषीकेशाच्युत विभो मृड शङ्कर ते नमः ।अधोक्षज गजाराते कामारे विषभक्षण ॥ २३॥

hṛṣīkeśācyuta vibho mṛḍa śaṅkara te namaḥ |adhokṣaja gajārāte kāmāre viṣabhakṣaṇa || 23||

नारायणाय देवाय नारायणपराय च ।नारायणस्वरूपाय नाराणयतनूद्भव ॥ २४॥

nārāyaṇāya devāya nārāyaṇaparāya ca |nārāyaṇasvarūpāya nārāṇayatanūdbhava || 24||

नमस्ते सर्वरूपाय महानरकहारिणे ।पापापहारिणे तुभ्यं नमो वृषभवाहन ॥ २५॥

namaste sarvarūpāya mahānarakahāriṇe |pāpāpahāriṇe tubhyaṃ namo vṛṣabhavāhana || 25||

क्षणादिकालरूपाय स्वभक्तबलदायिने ।नानारूपाय रूपाय दैत्यचक्रविमर्दिने ॥ २६॥

kṣaṇādikālarūpāya svabhaktabaladāyine |nānārūpāya rūpāya daityacakravimardine || 26||

नमो ब्रह्मण्यदेवाय गोब्राह्मणहिताय च ।सहस्रमूर्त्तये तुभ्यं सहस्रावयवाय च ॥ २७॥

namo brahmaṇyadevāya gobrāhmaṇahitāya ca |sahasramūrttaye tubhyaṃ sahasrāvayavāya ca || 27||

धर्मरूपाय सत्त्वाय नमस्सत्त्वात्मने हर ।वेदवेद्यस्वरूपाय नमो वेदप्रियाय च ॥ २८॥

dharmarūpāya sattvāya namassattvātmane hara |vedavedyasvarūpāya namo vedapriyāya ca || 28||

नमो वेदस्वरूपाय वेदवक्त्रे नमो नमः ।सदाचाराध्वगम्याय सदाचाराध्वगामिने ॥ २९॥

namo vedasvarūpāya vedavaktre namo namaḥ |sadācārādhvagamyāya sadācārādhvagāmine || 29||

विष्टरश्रवसे तुभ्यं नमस्सत्यमयाय च ।सत्यप्रियाय सत्याय सत्यगम्याय ते नमः ॥ ५\।२\।३०॥नमस्ते मायिने तुभ्यं मायाधीशाय वै नमः ।ब्रह्मगाय नमस्तुभ्यं ब्रह्मणे ब्रह्मजाय च ॥ ३१॥

viṣṭaraśravase tubhyaṃ namassatyamayāya ca |satyapriyāya satyāya satyagamyāya te namaḥ || 5\|2\|30||namaste māyine tubhyaṃ māyādhīśāya vai namaḥ |brahmagāya namastubhyaṃ brahmaṇe brahmajāya ca || 31||

तपसे ते नमोऽस्त्वीश तपसां फलदायिने ।स्तुत्याय स्तुतये नित्यं स्तुतिसम्प्रीतचेतसे ॥ ३२॥

tapase te namo'stvīśa tapasāṃ phaladāyine |stutyāya stutaye nityaṃ stutisamprītacetase || 32||

श्रुत्याचारप्रसन्नाय स्तुत्याचारप्रियाय च ।चतुर्विधस्वरूपाय जलस्थलजरूपिणे ॥ ३३॥

śrutyācāraprasannāya stutyācārapriyāya ca |caturvidhasvarūpāya jalasthalajarūpiṇe || 33||

सर्वे देवादयो नाथ श्रेष्ठत्वेन विभूतयः ।देवानामिन्द्ररूपोऽसि ग्रहाणां त्वं रविर्मतः ॥ ३४॥

sarve devādayo nātha śreṣṭhatvena vibhūtayaḥ |devānāmindrarūpo'si grahāṇāṃ tvaṃ ravirmataḥ || 34||

सत्यलोकोऽसि लोकानां सरितां द्युसरिद्भवान् ।श्वेतवर्णोऽसि वर्णानां सरसां मानसं सरः ॥ ३५॥

satyaloko'si lokānāṃ saritāṃ dyusaridbhavān |śvetavarṇo'si varṇānāṃ sarasāṃ mānasaṃ saraḥ || 35||

शैलानां गिरिजातातः कामधुक्त्वं च गोषु ह ।क्षीरोदधिस्तु सिन्धूनां धातूनां हाटको भवान् ॥ ३६॥

śailānāṃ girijātātaḥ kāmadhuktvaṃ ca goṣu ha |kṣīrodadhistu sindhūnāṃ dhātūnāṃ hāṭako bhavān || 36||

वर्णानां ब्राह्मणोऽसि त्वं नृणां राजासि शङ्कर ।मुक्तिक्षेत्रेषु काशी त्वं तीर्थानां तीर्थराड् भवान् ॥ ३७॥

varṇānāṃ brāhmaṇo'si tvaṃ nṛṇāṃ rājāsi śaṅkara |muktikṣetreṣu kāśī tvaṃ tīrthānāṃ tīrtharāḍ bhavān || 37||

उपलेषु समस्तेषु स्फटिकस्त्वं महेश्वर ।कमलस्त्वं प्रसूनेषु शैलेषु हिमवांस्तथा ॥ ३८॥

upaleṣu samasteṣu sphaṭikastvaṃ maheśvara |kamalastvaṃ prasūneṣu śaileṣu himavāṃstathā || 38||

भवान्वाग्व्यवहारेषु भार्गवस्त्वं कविष्वपि ।पक्षिष्वेवासि शरभः सिंहो हिंस्रेषु सम्मतः ॥ ३९॥

bhavānvāgvyavahāreṣu bhārgavastvaṃ kaviṣvapi |pakṣiṣvevāsi śarabhaḥ siṃho hiṃsreṣu sammataḥ || 39||

शालग्रामशिला च त्वं शिलासु वृषभध्वज ।पूज्यरूपेषु सर्वेषु नर्मदालिङ्गमेव हि ॥ ५\।२\।४०॥नन्दीश्वरोऽसि पशुषु वृषभः परमेश्वर ।वेदेषूपनिषद्रूपी यज्वनां शीतभानुमान् ॥ ४१॥

śālagrāmaśilā ca tvaṃ śilāsu vṛṣabhadhvaja |pūjyarūpeṣu sarveṣu narmadāliṅgameva hi || 5\|2\|40||nandīśvaro'si paśuṣu vṛṣabhaḥ parameśvara |vedeṣūpaniṣadrūpī yajvanāṃ śītabhānumān || 41||

प्रतापिनां पावकस्त्वं शैवानामच्युतो भवान् ।भारतं त्वं पुराणानां मकारोऽस्यक्षरेषु च ॥ ४२॥

pratāpināṃ pāvakastvaṃ śaivānāmacyuto bhavān |bhārataṃ tvaṃ purāṇānāṃ makāro'syakṣareṣu ca || 42||

प्रणवो बीजमन्त्राणां दारुणानां विषं भवान् ।व्योमव्यप्तिमतां त्वं वै परमात्मासि चात्मनाम् ॥ ४३॥

praṇavo bījamantrāṇāṃ dāruṇānāṃ viṣaṃ bhavān |vyomavyaptimatāṃ tvaṃ vai paramātmāsi cātmanām || 43||

इन्द्रियाणां मनश्च त्वं दानानामभयं भवान् ।पावनानां जलं चासि जीवनानां तथामृतम् ॥ ४४॥

indriyāṇāṃ manaśca tvaṃ dānānāmabhayaṃ bhavān |pāvanānāṃ jalaṃ cāsi jīvanānāṃ tathāmṛtam || 44||

लाभानां पुत्रलाभोऽसि वायुर्वेगवतामसि ।नित्यकर्मसु सर्वेषु सन्ध्योपास्तिर्भवान्मता ॥ ४५॥

lābhānāṃ putralābho'si vāyurvegavatāmasi |nityakarmasu sarveṣu sandhyopāstirbhavānmatā || 45||

क्रतूनामश्वमेधोऽसि युगानां प्रथमो युगः ।पुष्यस्त्वं सर्वधिष्ण्यानाममावास्या तिथिष्वसि ॥ ४६॥

kratūnāmaśvamedho'si yugānāṃ prathamo yugaḥ |puṣyastvaṃ sarvadhiṣṇyānāmamāvāsyā tithiṣvasi || 46||

सर्वर्तुषु वसन्तस्त्वं सर्वपर्वसु सङ्क्रमः ।कुशोऽसि तृणजातीनां स्थूलवृक्षेषु वै वटः ॥ ४७॥

sarvartuṣu vasantastvaṃ sarvaparvasu saṅkramaḥ |kuśo'si tṛṇajātīnāṃ sthūlavṛkṣeṣu vai vaṭaḥ || 47||

योगेषु च व्यतीपातस्सोमवल्ली लतासु च ।बुद्धीनां धर्मबुद्धिस्त्वं कलत्रं सुहृदां भवान् ॥ ४८॥

yogeṣu ca vyatīpātassomavallī latāsu ca |buddhīnāṃ dharmabuddhistvaṃ kalatraṃ suhṛdāṃ bhavān || 48||

साधकानां शुचीनां त्वं प्राणायामो महेश्वर ।ज्योतिर्लिङ्गेषु सर्वेषु भवान् विश्वेश्वरो मतः ॥ ४९॥

sādhakānāṃ śucīnāṃ tvaṃ prāṇāyāmo maheśvara |jyotirliṅgeṣu sarveṣu bhavān viśveśvaro mataḥ || 49||

धर्मस्त्वं सर्वबन्धूनामाश्रमाणां परो भवान् ।मोक्षस्त्वं सर्ववर्णेषु रुद्राणां नीललोहितः ॥ ५\।२\।५०॥आदित्यानां वासुदेवो हनूमान्वानरेषु च ।यज्ञानां जपयज्ञोऽसि रामः शस्त्रभृतां भवान् ॥ ५१॥

dharmastvaṃ sarvabandhūnāmāśramāṇāṃ paro bhavān |mokṣastvaṃ sarvavarṇeṣu rudrāṇāṃ nīlalohitaḥ || 5\|2\|50||ādityānāṃ vāsudevo hanūmānvānareṣu ca |yajñānāṃ japayajño'si rāmaḥ śastrabhṛtāṃ bhavān || 51||

गन्धर्वाणां चित्ररथो वसूनां पावको ध्रुवम् ।मासानामधिमासस्त्वं व्रतानां त्वं चतुर्दशी ॥ ५२॥

gandharvāṇāṃ citraratho vasūnāṃ pāvako dhruvam |māsānāmadhimāsastvaṃ vratānāṃ tvaṃ caturdaśī || 52||

ऐरावतो गजेन्द्राणां सिद्धानां कपिलो मतः ।अनन्तस्त्वं हि नागानां पितॄणामर्यमा भवान् ॥ ५३॥

airāvato gajendrāṇāṃ siddhānāṃ kapilo mataḥ |anantastvaṃ hi nāgānāṃ pitṝṇāmaryamā bhavān || 53||

कालः कलयतां च त्वं दैत्यानां बलिरेव च ।किं बहूक्तेन देवेश सर्वं विष्टभ्य वै जगत् ॥ ५४॥

kālaḥ kalayatāṃ ca tvaṃ daityānāṃ balireva ca |kiṃ bahūktena deveśa sarvaṃ viṣṭabhya vai jagat || 54||

एकाङ्शेन स्थितस्त्वं हि बहिःस्थोऽन्वित एव च ॥ ५५॥

ekāṅśena sthitastvaṃ hi bahiḥstho'nvita eva ca || 55||

इति शिवपुराणे रुद्रसंहितायां युद्धखण्डे द्वितीयाध्यायान्तर्गतंदेवैः कृतं विष्णुस्तोत्रं समाप्तम् ।शिवपुराण । रुद्रसंहिता । युद्धखण्ड । अध्याय २/१३५५॥शिवपुराण । रुद्रसंहिता । युद्धखण्ड । अध्याय २/१३-५५॥

iti śivapurāṇe rudrasaṃhitāyāṃ yuddhakhaṇḍe dvitīyādhyāyāntargataṃdevaiḥ kṛtaṃ viṣṇustotraṃ samāptam |śivapurāṇa | rudrasaṃhitā | yuddhakhaṇḍa | adhyāya 2/1355||śivapurāṇa | rudrasaṃhitā | yuddhakhaṇḍa | adhyāya 2/13-55||