वेङ्कटेशाष्टकम् २ Shri Venkateshashtakam 2

ॐतत्सदिति निर्देश्यं जगज्जन्मादिकारणम् ।अनन्तकल्याणगुणं वन्दे श्रीवेङ्कटेश्वरम् ॥ १॥

oṃtatsaditi nirdeśyaṃ jagajjanmādikāraṇam |anantakalyāṇaguṇaṃ vande śrīveṅkaṭeśvaram || 1||

नतामरशिरोरत्न श्रीयुतम् श्रीपदाम्बुजम् ।प्रावृषेण्यघनश्यामं वन्दे श्रीवेङ्कटेश्वरम् ॥ २॥

natāmaraśiroratna śrīyutam śrīpadāmbujam |prāvṛṣeṇyaghanaśyāmaṃ vande śrīveṅkaṭeśvaram || 2||

मोहादिषडरिव्यूहग्रहाकुलमहार्णवे ।मज्जतां तरणीं नॄणां वन्दे श्रीवेङ्कटेश्वरम् ॥ ३॥

mohādiṣaḍarivyūhagrahākulamahārṇave |majjatāṃ taraṇīṃ nṝṇāṃ vande śrīveṅkaṭeśvaram || 3||

नाथं त्रिजगतां एकं साधुरक्षणदीक्षितम् ।श्रीशेषशैलमध्यस्थं वन्दे श्रीवेङ्कटेश्वरम् ॥ ४॥

nāthaṃ trijagatāṃ ekaṃ sādhurakṣaṇadīkṣitam |śrīśeṣaśailamadhyasthaṃ vande śrīveṅkaṭeśvaram || 4||

राजद्राजीवपत्रश्रीमदमोचनलोचनम् ।मन्दहासलसद् वक्त्रं वन्दे श्रीवेङ्कटेश्वरम् ॥ ५॥

rājadrājīvapatraśrīmadamocanalocanam |mandahāsalasad vaktraṃ vande śrīveṅkaṭeśvaram || 5||

यन्मुखेन्दुस्मितज्योत्स्ना भूयसीं तमसां ततिम् ।विधुनोति प्रपन्नानां वन्दे श्रीवेङ्कटेश्वरम्॥ ६॥

yanmukhendusmitajyotsnā bhūyasīṃ tamasāṃ tatim |vidhunoti prapannānāṃ vande śrīveṅkaṭeśvaram|| 6||

नान्तस्य कस्यचिद् वाक्यं शब्दस्यानन्य वाचिनः ।ब्रह्मारुद्रेन्द्रजनकं वन्दे श्रीवेङ्कटेश्वरम् ॥ ७॥

nāntasya kasyacid vākyaṃ śabdasyānanya vācinaḥ |brahmārudrendrajanakaṃ vande śrīveṅkaṭeśvaram || 7||

यद्वक्षःस्थलमध्यास्य भाति श्रीरनपायिनी ।तडिल्लेखेवाभ्रमध्ये वन्दे श्रीवेङ्कटेश्वरम् ॥ ८॥

yadvakṣaḥsthalamadhyāsya bhāti śrīranapāyinī |taḍillekhevābhramadhye vande śrīveṅkaṭeśvaram || 8||

वेङ्कटेशाष्टकमिदं नरकण्ठीरवोदितम् ।यः पठेत् सततं भक्त्या तस्मै विष्णुः प्रसीदति ॥॥ इति श्री वट्टेपल्ले नरकण्ठीरव शास्त्रि विरचितम्श्री वेङ्कटेशाष्टकं समाप्तम् ॥

veṅkaṭeśāṣṭakamidaṃ narakaṇṭhīravoditam |yaḥ paṭhet satataṃ bhaktyā tasmai viṣṇuḥ prasīdati |||| iti śrī vaṭṭepalle narakaṇṭhīrava śāstri viracitamśrī veṅkaṭeśāṣṭakaṃ samāptam ||