वेङ्कटेशस्तोत्रम् ५ Shri Venkatesha Stotram 5

व्येमित्यव्ययमाख्यातं मुनिभिः पापवाचकम् ।कटते नाशनार्थत्वात्पापहा वेङ्कटेश्वरः ॥ १॥

vyemityavyayamākhyātaṃ munibhiḥ pāpavācakam |kaṭate nāśanārthatvātpāpahā veṅkaṭeśvaraḥ || 1||

यो भक्तरक्षणार्थाय विष्णुर्वैकुण्ठवास्ययम् ।शेषाचले महालक्ष्म्या सह तिष्ठति वेङ्कटः ॥ २॥

yo bhaktarakṣaṇārthāya viṣṇurvaikuṇṭhavāsyayam |śeṣācale mahālakṣmyā saha tiṣṭhati veṅkaṭaḥ || 2||

चतुर्बाहुरुदाराङ्गो निजलाञ्छनलाञ्छितः ।वेङ्कटेश इति ख्यातो देवः पद्मावतीप्रियः ॥ ३॥

caturbāhurudārāṅgo nijalāñchanalāñchitaḥ |veṅkaṭeśa iti khyāto devaḥ padmāvatīpriyaḥ || 3||

शेषाचलं महत्तुङ्गं सर्वसम्पत्समन्वितम् ।वैकुण्ठतुल्यमकरोच्छ्रीनिवासः स नोऽवतु ॥ ४॥

śeṣācalaṃ mahattuṅgaṃ sarvasampatsamanvitam |vaikuṇṭhatulyamakarocchrīnivāsaḥ sa no'vatu || 4||

यद्दर्शनार्थमखिला ऋषियोगिसुरादयः ।आयान्ति परया भक्त्या सपत्नीकाश्च सानुगाः ॥ ५॥

yaddarśanārthamakhilā ṛṣiyogisurādayaḥ |āyānti parayā bhaktyā sapatnīkāśca sānugāḥ || 5||

विशेषादाश्विने मासे महोत्सवदिदृक्षवः ।भक्तानुकम्पी भगवान्वेङ्कटेशः स नोऽवतु ॥ ६॥

viśeṣādāśvine māse mahotsavadidṛkṣavaḥ |bhaktānukampī bhagavānveṅkaṭeśaḥ sa no'vatu || 6||

स त्वं मां पाहि देवेश लक्ष्मीश गरुडध्वज ।सर्वापत्तिविनाशाय प्रसन्नो भव सर्वदा ॥ ७॥

sa tvaṃ māṃ pāhi deveśa lakṣmīśa garuḍadhvaja |sarvāpattivināśāya prasanno bhava sarvadā || 7||

प्रसीद लक्ष्मीरमण प्रसीद प्रसीद शेषाद्रिशय प्रसीद ।दारिद्र्यदुःखौघभयं हरन्तं तं वेङ्कटेशं शरणं प्रपद्ये ॥ ८॥

prasīda lakṣmīramaṇa prasīda prasīda śeṣādriśaya prasīda |dāridryaduḥkhaughabhayaṃ harantaṃ taṃ veṅkaṭeśaṃ śaraṇaṃ prapadye || 8||

इति श्रीवासुदेवानन्दसरस्वतीविरचितं श्रीवेङ्कटेशस्तोत्रं सम्पूर्णम् ।

iti śrīvāsudevānandasarasvatīviracitaṃ śrīveṅkaṭeśastotraṃ sampūrṇam |