ऋद्धिस्तव Riddhistavah

श्रीमन्वृषभशैलेश वर्धतां विजयी भवान् ।दिव्यं त्वदीयमैश्वर्यं निर्मर्यादं विजृम्भताम् ॥ १॥

śrīmanvṛṣabhaśaileśa vardhatāṃ vijayī bhavān |divyaṃ tvadīyamaiśvaryaṃ nirmaryādaṃ vijṛmbhatām || 1||

देवीभूषायुधैर्नित्यैर्मुक्तैर्मोक्षैकलक्षणैः ।सत्त्वोत्तरैस्त्वदीयैश्च सङ्गः स्तात्सरसस्तव ॥ २॥

devībhūṣāyudhairnityairmuktairmokṣaikalakṣaṇaiḥ |sattvottaraistvadīyaiśca saṅgaḥ stātsarasastava || 2||

प्राकारगोपुरवरप्रासादमणिमण्टपाः ।शालिमुद्गतिलादीनां शालाश्शैलकुलोज्ज्वलाः ॥ ३॥

prākāragopuravaraprāsādamaṇimaṇṭapāḥ |śālimudgatilādīnāṃ śālāśśailakulojjvalāḥ || 3||

रत्नकाञ्चनकौशेयक्षौमक्रमुकशालिकाः ।शय्यागृहाणि पर्यङ्कवर्याः स्थूलासनानि च ॥ ४॥

ratnakāñcanakauśeyakṣaumakramukaśālikāḥ |śayyāgṛhāṇi paryaṅkavaryāḥ sthūlāsanāni ca || 4||

कनत्कनकभृङ्गारपतद्ग्रहकलाचिकाः ।छत्रचामरमुख्याश्च सन्तु नित्याः परिच्छदाः ॥ ५॥

kanatkanakabhṛṅgārapatadgrahakalācikāḥ |chatracāmaramukhyāśca santu nityāḥ paricchadāḥ || 5||

अस्तु निस्तुलमव्यग्रं नित्यमभ्यर्चनं तव ।पक्षेपक्षे विवर्धन्तां मासिमासि महोत्सवाः ॥ ६॥

astu nistulamavyagraṃ nityamabhyarcanaṃ tava |pakṣepakṣe vivardhantāṃ māsimāsi mahotsavāḥ || 6||

मणिकाञ्चनचित्राणि भूषणान्यम्बराणि च ।काश्मीरसारकस्तूरीकर्पूराद्यनुलेपनम् ॥ ७॥

maṇikāñcanacitrāṇi bhūṣaṇānyambarāṇi ca |kāśmīrasārakastūrīkarpūrādyanulepanam || 7||

कोमलानि च दामानि कुसुमैस्सौरभोत्करैः ।धूपाः कर्पूरदीपाश्च सन्तु सन्ततमेव ते ॥ ८॥

komalāni ca dāmāni kusumaissaurabhotkaraiḥ |dhūpāḥ karpūradīpāśca santu santatameva te || 8||

नृत्तगीतयुतं वाद्यं नित्यमत्र विवर्धताम् ।श्रोत्रेषु[च] सुधाधाराः कल्पन्तां काहलीस्वनाः ॥ ९॥

nṛttagītayutaṃ vādyaṃ nityamatra vivardhatām |śrotreṣu[ca] sudhādhārāḥ kalpantāṃ kāhalīsvanāḥ || 9||

कन्दमूलफलोदग्रं कालेकाले चतुर्विधम् ।सूपापूपघृतक्षीरशर्करासहितं हविः ॥ १०॥

kandamūlaphalodagraṃ kālekāle caturvidham |sūpāpūpaghṛtakṣīraśarkarāsahitaṃ haviḥ || 10||

घनसारशिलोदग्रैः क्रमुकाष्टदलैस्सह ।विमलानि च ताम्बूलीदलानि स्वीकुरु प्रभो ॥ ११॥

ghanasāraśilodagraiḥ kramukāṣṭadalaissaha |vimalāni ca tāmbūlīdalāni svīkuru prabho || 11||

प्रीतिभीतियुतो भूयाद्भूयान् परिजनस्तव ।भक्तिमन्तो भजन्तु त्वां पौरा जानपदास्तथा ॥ १२॥

prītibhītiyuto bhūyādbhūyān parijanastava |bhaktimanto bhajantu tvāṃ paurā jānapadāstathā || 12||

वरणीधनरत्नानि वितरन्तु चिरं तव ।कैङ्कर्यमखिलं सर्वे कुर्वन्तु क्षोणिपालकाः ॥ १३॥

varaṇīdhanaratnāni vitarantu ciraṃ tava |kaiṅkaryamakhilaṃ sarve kurvantu kṣoṇipālakāḥ || 13||

प्रेमदिग्धदृशः स्वैरं प्रेक्षमाणास्त्वदाननम् ।महान्तस्सन्ततं सन्तो मङ्गलानि प्रयुञ्जताम् ॥ १४॥

premadigdhadṛśaḥ svairaṃ prekṣamāṇāstvadānanam |mahāntassantataṃ santo maṅgalāni prayuñjatām || 14||

एवमेव भवेन्नित्यं पालयन् कुशली भवान् ।मामहीरमण श्रीमान् वर्धतामभिवर्धताम् ॥ १५॥

evameva bhavennityaṃ pālayan kuśalī bhavān |māmahīramaṇa śrīmān vardhatāmabhivardhatām || 15||

पत्युः प्रत्यहमित्थं यः प्रार्थयेत समुच्छ्यम् ।प्रसादसुमुखः श्रीमान् पश्यत्येनं परः पुमान् ॥ १६॥

patyuḥ pratyahamitthaṃ yaḥ prārthayeta samucchyam |prasādasumukhaḥ śrīmān paśyatyenaṃ paraḥ pumān || 16||

॥ इति ऋद्धिस्तवः सम्पूर्णः ॥

|| iti ṛddhistavaḥ sampūrṇaḥ ||