स्कन्दस्तोत्रम् Agastikritam Skanda Stotram

अगस्तिरुवाच ।नमोऽस्तु वृन्दारकवृन्दवन्द्य पादारविन्दाय सुधाकराय ।षडाननायामितविक्रमाय गौरीहृदानन्दसमुद्भवाय ॥ १॥

agastiruvāca |namo'stu vṛndārakavṛndavandya pādāravindāya sudhākarāya |ṣaḍānanāyāmitavikramāya gaurīhṛdānandasamudbhavāya || 1||

नमोऽस्तु तुभ्यं प्रणतार्तिहन्त्रे कर्त्रे समस्तस्य मनोरथानाम् ।दात्रे रथानां परतारकस्य हन्त्रे प्रचण्डासुरतारकस्य ॥ २॥

namo'stu tubhyaṃ praṇatārtihantre kartre samastasya manorathānām |dātre rathānāṃ paratārakasya hantre pracaṇḍāsuratārakasya || 2||

अमूर्तमूर्ताय सहस्रमूर्तये गुणाय गुण्याय परात्पराय ।अपारपाराय परापराय नमोऽस्तु तुभ्यं शिखिवाहनाय ॥ ३॥

amūrtamūrtāya sahasramūrtaye guṇāya guṇyāya parātparāya |apārapārāya parāparāya namo'stu tubhyaṃ śikhivāhanāya || 3||

नमोऽस्तु ते ब्रह्मविदांवराय दिगम्बरायाम्बरसंस्थिताय ।हिरण्यवर्णाय हिरण्यबाहवे नमो हिरण्याय हिरण्यरेतसे ॥ ४॥

namo'stu te brahmavidāṃvarāya digambarāyāmbarasaṃsthitāya |hiraṇyavarṇāya hiraṇyabāhave namo hiraṇyāya hiraṇyaretase || 4||

तपःस्वरूपाय तपोधनाय तपःफलानां प्रतिपादकाय ।सदा कुमाराय हिमारमारिणे तृणीकृतैश्वर्यविरागिणे नमः ॥ ५॥

tapaḥsvarūpāya tapodhanāya tapaḥphalānāṃ pratipādakāya |sadā kumārāya himāramāriṇe tṛṇīkṛtaiśvaryavirāgiṇe namaḥ || 5||

नमोऽस्तु तुभ्यं शरजन्मने विभो प्रभातसूर्यारुणदन्तपङ्क्तये ।बालाय चाबालपराक्रमाय षाण्मातुरायालमनातुराय ॥ ६॥

namo'stu tubhyaṃ śarajanmane vibho prabhātasūryāruṇadantapaṅktaye |bālāya cābālaparākramāya ṣāṇmāturāyālamanāturāya || 6||

मीढुष्टमायोत्तरमीढुषे नमो नमो गणानां पतये गणाय ।नमोऽस्तु ते जन्मजरातिगाय नमो विशाखाय सुशक्तिपाणये ॥ ७॥

mīḍhuṣṭamāyottaramīḍhuṣe namo namo gaṇānāṃ pataye gaṇāya |namo'stu te janmajarātigāya namo viśākhāya suśaktipāṇaye || 7||

सर्वस्य नाथस्य कुमारकाय क्रौञ्चारये तारकमारकाय ।स्वाहेय गाङ्गेय च कार्तिकेय शैवेय तुभ्यं सततं नमोऽस्तु ॥ ८॥

sarvasya nāthasya kumārakāya krauñcāraye tārakamārakāya |svāheya gāṅgeya ca kārtikeya śaiveya tubhyaṃ satataṃ namo'stu || 8||

इत्थं परिष्टुत्य स कार्तिकेयं नमो नमस्त्वित्यभिभाषमाणः ।द्विस्त्रिःपरिक्रम्य पुरो विवेश स्थितो मुनीशोपविशेति चोक्तः ॥ ९॥

itthaṃ pariṣṭutya sa kārtikeyaṃ namo namastvityabhibhāṣamāṇaḥ |dvistriḥparikramya puro viveśa sthito munīśopaviśeti coktaḥ || 9||

इति श्रीस्कादपुराणे काशीखण्डे पूर्वार्द्धे पञ्चविंशाध्यायान्तर्गतंअगस्तिकृतं स्कन्दस्तोत्रं समाप्तम् ।स्कन्दपुराण । काशीखण्ड । पूर्वखण्ड १ । अध्याय २५/१०१७॥स्कन्दपुराण । काशीखण्ड । पूर्वखण्ड १ । अध्याय २५/१०-१७॥

iti śrīskādapurāṇe kāśīkhaṇḍe pūrvārddhe pañcaviṃśādhyāyāntargataṃagastikṛtaṃ skandastotraṃ samāptam |skandapurāṇa | kāśīkhaṇḍa | pūrvakhaṇḍa 1 | adhyāya 25/1017||skandapurāṇa | kāśīkhaṇḍa | pūrvakhaṇḍa 1 | adhyāya 25/10-17||