वीरभद्रप्रति महादेवप्रसादनम् Virabhadraprati Mahadevaprasadanam

(शिवरहस्यान्तर्गते ईशाख्ये)वीरभद्र उवाच ।शम्भो भवाम्बुनिधितारणकर्णधारविश्वम्भराधरविभूषण कालकाल ।श्रीव्योमकेश गरलाश महेश शम्भोपाह्यब्जमित्रनयनैणकलङ्कचूड ॥ ९॥

(śivarahasyāntargate īśākhye)vīrabhadra uvāca |śambho bhavāmbunidhitāraṇakarṇadhāraviśvambharādharavibhūṣaṇa kālakāla |śrīvyomakeśa garalāśa maheśa śambhopāhyabjamitranayanaiṇakalaṅkacūḍa || 9||

स्तुत्वा नत्वा महादेवं गणेन्द्रो गणपैःसह ।शम्भोः पार्श्वगतो भूत्वा व्यतिष्ठत्स कृताञ्जलिः ॥ १०॥

stutvā natvā mahādevaṃ gaṇendro gaṇapaiḥsaha |śambhoḥ pārśvagato bhūtvā vyatiṣṭhatsa kṛtāñjaliḥ || 10||

ईश्वर उवाच ।वत्साद्य परिखिन्नोऽसि गणेशैः सुरजन्यकै ।नैतच्चित्रं जयस्तेऽद्य मत्कृपावशतोऽभवत् ॥ ११॥

īśvara uvāca |vatsādya parikhinno'si gaṇeśaiḥ surajanyakai |naitaccitraṃ jayaste'dya matkṛpāvaśato'bhavat || 11||

गणेशतामुपगत एभिर्गणवरैः सह ।हेतिशूलायुधधरैर्भस्मभालाचलोन्नतैः ॥ १२॥

gaṇeśatāmupagata ebhirgaṇavaraiḥ saha |hetiśūlāyudhadharairbhasmabhālācalonnataiḥ || 12||

वस मत्तद्विपाकारैः काश्यां नित्यमतन्द्रितैः ।तत्र पापकृतामन्ते जीवतां विघ्नराशिभिः ॥ १३॥

vasa mattadvipākāraiḥ kāśyāṃ nityamatandritaiḥ |tatra pāpakṛtāmante jīvatāṃ vighnarāśibhiḥ || 13||

निघ्नन्गदायुधैः पापान् भस्मरुद्राक्षवर्जितान् ।यज्ञवापीस्नानहीनान् मणिकर्ण्यार्चनोज्झितान् ॥ १४॥

nighnangadāyudhaiḥ pāpān bhasmarudrākṣavarjitān |yajñavāpīsnānahīnān maṇikarṇyārcanojjhitān || 14||

प्रदोषसोमवारार्चाविहीनाँल्लिङ्गमौलिषु ।कालाष्टमीव्रताऽश्रद्धान् चतुर्दश्यर्चनोज्झितान् ॥ १५॥

pradoṣasomavārārcāvihīnām̐lliṅgamauliṣu |kālāṣṭamīvratā'śraddhān caturdaśyarcanojjhitān || 15||

विश्वेशदर्शनेहीनान् स्तोत्रार्चनविवर्जितान् ।अन्नपूर्णादर्शनार्चाविहीनान् शिक्षयाधुना ॥ १७॥

viśveśadarśanehīnān stotrārcanavivarjitān |annapūrṇādarśanārcāvihīnān śikṣayādhunā || 17||

रुद्रपञ्चाक्षरावृत्ति विहीनान् जहि नित्यशः ।अशाम्भवान् यातनाभिः संशिक्षय यथारुचि ॥ १८॥

rudrapañcākṣarāvṛtti vihīnān jahi nityaśaḥ |aśāmbhavān yātanābhiḥ saṃśikṣaya yathāruci || 18||

इत्युक्तो वीरभद्रोऽसौ ययौ नत्वा महेश्वरम् ।अविमुक्तं समासाद्य गणपैस्तत्र शाङ्करैः ॥ १९॥

ityukto vīrabhadro'sau yayau natvā maheśvaram |avimuktaṃ samāsādya gaṇapaistatra śāṅkaraiḥ || 19||

वीरभद्रेश्वरं लिङ्गं प्रतिष्ठाप्यावसत्तदा ।शिवाज्ञया तदा भद्रो भद्रदः शाम्भवेषु सः ॥ २०॥

vīrabhadreśvaraṃ liṅgaṃ pratiṣṭhāpyāvasattadā |śivājñayā tadā bhadro bhadradaḥ śāmbhaveṣu saḥ || 20||

॥ इति शिवरहस्यान्तर्गते वीरभद्रादिकृता शिवस्तुतिः सम्पूर्णा ॥॥ श्रीशिवरहस्यम् । ईशाख्यः द्वादशमांशः । ७ महादेवप्रसादनम् । ९२० ॥

|| iti śivarahasyāntargate vīrabhadrādikṛtā śivastutiḥ sampūrṇā |||| śrīśivarahasyam | īśākhyaḥ dvādaśamāṃśaḥ | 7 mahādevaprasādanam | 920 ||

– ॥ श्रीशिवरहस्यम् ।ईशाख्यः द्वादशमांशः ।७ महादेवप्रसादनम् ।९-२० ॥

– || śrīśivarahasyam |īśākhyaḥ dvādaśamāṃśaḥ | 7 mahādevaprasādanam | 9-20 ||