शिवस्तोत्रम् (वेनकृतं वामनपुराणान्तर्गतम् प्रपद्ये देवमीशानं त्वामजं चन्द्रभूषणम्) Venakritam Shiva Stotram

(स्थाणु (स्थाण्वेश्वर लिङ्ग))वेन उवाच ।प्रपद्ये देवमीशानं त्वामजं चन्द्रभूषणम् ।महादेवं महात्मानं विश्वस्य जगतः पतिम् ॥ ६३॥

(sthāṇu (sthāṇveśvara liṅga))vena uvāca |prapadye devamīśānaṃ tvāmajaṃ candrabhūṣaṇam |mahādevaṃ mahātmānaṃ viśvasya jagataḥ patim || 63||

नमस्ते देवदेवेश सर्वशत्रुनिषूदन ।देवेश बलिविष्टम्भ देवदैत्यैश्च पूजित ॥ ६४॥

namaste devadeveśa sarvaśatruniṣūdana |deveśa baliviṣṭambha devadaityaiśca pūjita || 64||

विरूपाक्ष सहस्राक्ष त्र्यक्ष यक्षेश्वरप्रिय ।सर्वतः पाणिपादान्त सर्वतोऽक्षिशिरोमुख ॥ ६५॥

virūpākṣa sahasrākṣa tryakṣa yakṣeśvarapriya |sarvataḥ pāṇipādānta sarvato'kṣiśiromukha || 65||

सर्वतः श्रुतिमल्लोके सर्वमावृत्य तिष्ठसि ।शङ्कुकर्ण महाकर्ण कुम्भकर्णार्णवालय ॥ ६६॥

sarvataḥ śrutimalloke sarvamāvṛtya tiṣṭhasi |śaṅkukarṇa mahākarṇa kumbhakarṇārṇavālaya || 66||

गजेन्द्रकर्ण गोकर्ण पाणिकर्ण नमोऽस्तु ते ।शतजिह्व शतावर्त शतोदर शतानन ॥ ६७॥

gajendrakarṇa gokarṇa pāṇikarṇa namo'stu te |śatajihva śatāvarta śatodara śatānana || 67||

गायन्ति त्वां गायत्रिणो ह्यर्चयन्त्यर्क्कमर्चिणः ।ब्रह्माणं त्वा शतक्रतो उद्वंशमिव मेनिरे ॥ ६८॥

gāyanti tvāṃ gāyatriṇo hyarcayantyarkkamarciṇaḥ |brahmāṇaṃ tvā śatakrato udvaṃśamiva menire || 68||

मूर्तौ हि ते महामूर्ते समुद्राम्बुधरास्तथा ।देवताः सर्व एवात्र गोष्ठे गाव इवासते ॥ ६९॥

mūrtau hi te mahāmūrte samudrāmbudharāstathā |devatāḥ sarva evātra goṣṭhe gāva ivāsate || 69||

शरीरे तव पश्यामि सोममग्निं जलेश्वरम् ।नारायणं तथा सूर्यं ब्रह्माणं च बृहस्पतिम् ॥ ७०॥

śarīre tava paśyāmi somamagniṃ jaleśvaram |nārāyaṇaṃ tathā sūryaṃ brahmāṇaṃ ca bṛhaspatim || 70||

भगवान् कारणं कार्यं क्रियाकारणमेव तत् ।प्रभवः प्रलयश्चैव सदसच्चापि दैवतम् ॥ ७१॥

bhagavān kāraṇaṃ kāryaṃ kriyākāraṇameva tat |prabhavaḥ pralayaścaiva sadasaccāpi daivatam || 71||

नमो भवाय शर्वाय वरदायोग्ररूपिणे ।अन्धकासुरहन्त्रे च पशूनां पतये नमः ॥ ७२॥

namo bhavāya śarvāya varadāyograrūpiṇe |andhakāsurahantre ca paśūnāṃ pataye namaḥ || 72||

त्रिजटाय त्रिशीर्षाय त्रिशूलासक्तपाणये ।त्र्यम्बकाय त्रिनेत्राय त्रिपुरघ्न नमोऽस्तु ते ॥ ७३॥

trijaṭāya triśīrṣāya triśūlāsaktapāṇaye |tryambakāya trinetrāya tripuraghna namo'stu te || 73||

नमो मुण्डाय चण्डाय अण्डायोत्पत्तिहेतवे ।डिण्डिमासक्तहस्ताय डिण्डिमुण्डाय ते नमः ॥ ७४॥

namo muṇḍāya caṇḍāya aṇḍāyotpattihetave |ḍiṇḍimāsaktahastāya ḍiṇḍimuṇḍāya te namaḥ || 74||

नमोर्ध्वकेशदंष्ट्राय शुष्काय विकृताय च ।धूम्रलोहितकृष्णाय नीलग्रीवाय ते नमः ॥ ७५॥

namordhvakeśadaṃṣṭrāya śuṣkāya vikṛtāya ca |dhūmralohitakṛṣṇāya nīlagrīvāya te namaḥ || 75||

नमोऽस्त्वप्रतिरूपाय विरूपाय शिवाय च ।सूर्यमालाय सूर्याय स्वरूपध्वजमालिने ॥ ७६॥

namo'stvapratirūpāya virūpāya śivāya ca |sūryamālāya sūryāya svarūpadhvajamāline || 76||

नमो मानातिमानाय नमः पटुतराय ते ।नमो गणेन्द्र नाथाय वृषस्कन्धाय धन्विने ॥ ७७॥

namo mānātimānāya namaḥ paṭutarāya te |namo gaṇendra nāthāya vṛṣaskandhāya dhanvine || 77||

सङ्क्रन्दनाय चण्डाय पर्णधारपुटाय च ।नमो हिरण्यवर्णाय नमः कनकवर्चसे ॥ ७८॥

saṅkrandanāya caṇḍāya parṇadhārapuṭāya ca |namo hiraṇyavarṇāya namaḥ kanakavarcase || 78||

नमः स्तुताय स्तुत्याय स्तुतिस्थाय नमोऽस्तु ते ।सर्वाय सर्वभक्षाय सर्वभूतशरीरिणे ॥ ७९॥

namaḥ stutāya stutyāya stutisthāya namo'stu te |sarvāya sarvabhakṣāya sarvabhūtaśarīriṇe || 79||

नमो होत्रे च हन्त्रे च सितोदग्रपताकिने ।नमो नम्याय नम्राय नमः कटकटाय च ॥ ८०॥

namo hotre ca hantre ca sitodagrapatākine |namo namyāya namrāya namaḥ kaṭakaṭāya ca || 80||

नमोऽस्तु कृशनाशाय शयितायोत्थिताय च ।स्थिताय धावमानाय मुण्डाय कुटिलाय च ॥ ८१॥

namo'stu kṛśanāśāya śayitāyotthitāya ca |sthitāya dhāvamānāya muṇḍāya kuṭilāya ca || 81||

नमो नर्तनशीलाय लयवादित्रशालिने ।नाट्योपहारलुब्धाय मुखवादित्रशालिने ॥ ८२॥

namo nartanaśīlāya layavāditraśāline |nāṭyopahāralubdhāya mukhavāditraśāline || 82||

नमो ज्योष्ठाय श्रेष्ठाय बलातिबलघातिने ।कालनाशाय कालाय संसारक्षयरूपिणे ॥ ८३॥

namo jyoṣṭhāya śreṣṭhāya balātibalaghātine |kālanāśāya kālāya saṃsārakṣayarūpiṇe || 83||

हिमवद्दुहितुः कान्त भैरवाय नमोऽस्तु ते ।उग्राय च नमो नित्यं नमोऽस्तु दशबाहवे ॥ ८४॥

himavadduhituḥ kānta bhairavāya namo'stu te |ugrāya ca namo nityaṃ namo'stu daśabāhave || 84||

चितिभस्मप्रियायैव कपालासक्तपाणये ।विभीषणाय भीष्माय भीमव्रतधराय च ॥ ८५॥

citibhasmapriyāyaiva kapālāsaktapāṇaye |vibhīṣaṇāya bhīṣmāya bhīmavratadharāya ca || 85||

नमो विकृतवक्त्राय नमः पूतोग्रदृष्टये ।पक्वाममांसलुब्धाय तुम्बिवीणाप्रियाय च ॥ ८६॥

namo vikṛtavaktrāya namaḥ pūtogradṛṣṭaye |pakvāmamāṃsalubdhāya tumbivīṇāpriyāya ca || 86||

नमो वृषाङ्कवृक्षाय गोवृषाभिरुते नमः ।कटङ्कटाय भीमाय नमः परपराय च ॥ ८७॥

namo vṛṣāṅkavṛkṣāya govṛṣābhirute namaḥ |kaṭaṅkaṭāya bhīmāya namaḥ paraparāya ca || 87||

नमः सर्ववरिष्ठाय वराय वरदायिने ।नमो विरक्तरक्ताय भावनायाक्षमालिने ॥ ८८॥

namaḥ sarvavariṣṭhāya varāya varadāyine |namo viraktaraktāya bhāvanāyākṣamāline || 88||

विभेदभेदभिन्नाय छायायै तपनाय च ।अघोरघोररूपाय घोरघोरतराय च ॥ ८९॥

vibhedabhedabhinnāya chāyāyai tapanāya ca |aghoraghorarūpāya ghoraghoratarāya ca || 89||

नमः शिवाय शान्ताय नमः शान्ततमाय च ।बहुनेत्रकपालाय एकमूर्ते नमोऽस्तु ते ॥ ९०॥

namaḥ śivāya śāntāya namaḥ śāntatamāya ca |bahunetrakapālāya ekamūrte namo'stu te || 90||

नमः क्षुद्राय लुब्धाय यज्ञभागप्रियाय च ।पञ्चालाय सिताङ्गाय नमो यमनियामिने ॥ ९१॥

namaḥ kṣudrāya lubdhāya yajñabhāgapriyāya ca |pañcālāya sitāṅgāya namo yamaniyāmine || 91||

नमश्चित्रोरुघण्टाय घण्टाघण्टनिघण्टिने ।सहस्रशतघण्टाय घण्टामालाविभूषिणे ॥ ९२॥

namaścitrorughaṇṭāya ghaṇṭāghaṇṭanighaṇṭine |sahasraśataghaṇṭāya ghaṇṭāmālāvibhūṣiṇe || 92||

प्राणसङ्घट्टगर्वाय नमः किलिकिलिप्रिय ।हुंहुङ्काराय पाराय हुंहुङ्कारप्रियाय च ॥ ९३॥

prāṇasaṅghaṭṭagarvāya namaḥ kilikilipriya |huṃhuṅkārāya pārāya huṃhuṅkārapriyāya ca || 93||

नमः समसमे नित्यं गृहवृक्षनिकेतिने ।गर्भमांसशृगालाय तारकाय तराय च ॥ ९४॥

namaḥ samasame nityaṃ gṛhavṛkṣaniketine |garbhamāṃsaśṛgālāya tārakāya tarāya ca || 94||

नमो यज्ञाय यजिने हुताय प्रहुताय च ।यज्ञवाहाय हव्याय तप्याय तपनाय च ॥ ९५॥

namo yajñāya yajine hutāya prahutāya ca |yajñavāhāya havyāya tapyāya tapanāya ca || 95||

नमस्तु पयसे तुभ्यं तुण्डानां पतये नमः ।अन्नदायान्नपतये नमो नानान्नभोजिने ॥ ९६॥

namastu payase tubhyaṃ tuṇḍānāṃ pataye namaḥ |annadāyānnapataye namo nānānnabhojine || 96||

नमः सहस्रशीर्षाय सहस्रचरणाय च ।सहस्रोद्यतशूलाय सहस्राभरणाय च ॥ ९७॥

namaḥ sahasraśīrṣāya sahasracaraṇāya ca |sahasrodyataśūlāya sahasrābharaṇāya ca || 97||

बालानुचरगोप्त्रे च बाललीलाविलासिने ।नमो बालाय वृद्धाय क्षुब्धाय क्षोभणाय च ॥ ९८॥

bālānucaragoptre ca bālalīlāvilāsine |namo bālāya vṛddhāya kṣubdhāya kṣobhaṇāya ca || 98||

गङ्गालुलितकेशाय मुञ्जकेशाय वै नमः ।नमः षट्कर्मतुष्टाय त्रिकर्मनिरताय च ॥ ९९॥

gaṅgālulitakeśāya muñjakeśāya vai namaḥ |namaḥ ṣaṭkarmatuṣṭāya trikarmaniratāya ca || 99||

नग्नप्राणाय चण्डाय कृशाय स्फोटनाय च ।धर्मार्थकाममोक्षाणां कथ्याय कथनाय च ॥ १००॥

nagnaprāṇāya caṇḍāya kṛśāya sphoṭanāya ca |dharmārthakāmamokṣāṇāṃ kathyāya kathanāya ca || 100||

साङ्ख्याय साङ्ख्यमुख्याय साङ्ख्ययोगमुखाय च ।नमो विरथरथ्याय चतुष्पथरथाय च ॥ १०१॥

sāṅkhyāya sāṅkhyamukhyāya sāṅkhyayogamukhāya ca |namo viratharathyāya catuṣpatharathāya ca || 101||

कृष्णाजिनोत्तरीयाय व्यालयज्ञोपवीतिने ।वक्त्रसन्धानकेशाय हरिकेश नमोऽस्तु ते ।त्र्यम्बिकाम्बिकनाथाय व्यक्ताव्यक्ताय वेधसे ॥ १०२॥

kṛṣṇājinottarīyāya vyālayajñopavītine |vaktrasandhānakeśāya harikeśa namo'stu te |tryambikāmbikanāthāya vyaktāvyaktāya vedhase || 102||

कामकामदकामघ्न तृप्तातृप्तविचारिणे ।नमः सर्वद पापघ्न कल्पसङ्ख्याविचारिणे ॥ १०३॥

kāmakāmadakāmaghna tṛptātṛptavicāriṇe |namaḥ sarvada pāpaghna kalpasaṅkhyāvicāriṇe || 103||

महासत्त्व महाबाहो महाबल नमोऽस्तु ते ।महामेघ महाप्रख्य महाकाल महाद्युते ॥ १०४॥

mahāsattva mahābāho mahābala namo'stu te |mahāmegha mahāprakhya mahākāla mahādyute || 104||

मेघावर्त युगावर्त चन्द्रार्कपतये नमः ।त्वमन्नमन्नभोक्ता च पक्वभुक् पावनोत्तमः ॥ १०५॥

meghāvarta yugāvarta candrārkapataye namaḥ |tvamannamannabhoktā ca pakvabhuk pāvanottamaḥ || 105||

जरायुजाण्डजाश्चैव स्वेदजोद्भिदजाश्च ये ।त्वमेव देवदेवेश भूतग्रामश्चतुर्विधः ॥ १०६॥

jarāyujāṇḍajāścaiva svedajodbhidajāśca ye |tvameva devadeveśa bhūtagrāmaścaturvidhaḥ || 106||

स्रष्टा चराचरस्यास्य पाता हन्ता तथैव च ।त्वामाहुर्ब्रह्म विद्वांसो ब्रह्म ब्रह्मविदां गतिम् ॥ १०७॥

sraṣṭā carācarasyāsya pātā hantā tathaiva ca |tvāmāhurbrahma vidvāṃso brahma brahmavidāṃ gatim || 107||

मनसः परमज्योतिस्त्वं वायुर्ज्योतिषामपि ।हंसवृक्षे मधुकरमाहुस्त्वां ब्रह्मवादिनः ॥ १०८॥

manasaḥ paramajyotistvaṃ vāyurjyotiṣāmapi |haṃsavṛkṣe madhukaramāhustvāṃ brahmavādinaḥ || 108||

यजुर्मयो ऋङ्मयस्त्वामाहुः साममयस्तथा ।पठ्यसे स्तुतिभिर्नित्यं वेदोपनिषदां गणैः ॥ १०९॥

yajurmayo ṛṅmayastvāmāhuḥ sāmamayastathā |paṭhyase stutibhirnityaṃ vedopaniṣadāṃ gaṇaiḥ || 109||

ब्राह्मणाः क्षत्रिया वैश्याः शूद्रा वर्णावराश्च ये ।त्वमेव मेघसङ्घाश्च विद्युतोऽशनिगर्जितम् ॥ ११०॥

brāhmaṇāḥ kṣatriyā vaiśyāḥ śūdrā varṇāvarāśca ye |tvameva meghasaṅghāśca vidyuto'śanigarjitam || 110||

संवत्सरस्त्वमृतवो मासो मासार्धमेव च ।युगा निमेषाः काष्ठाश्च नक्षत्राणि ग्रहाः कलाः ॥ १११॥

saṃvatsarastvamṛtavo māso māsārdhameva ca |yugā nimeṣāḥ kāṣṭhāśca nakṣatrāṇi grahāḥ kalāḥ || 111||

वृक्षाणां ककुभोऽसि त्वं गिरीणां हिमवान् गिरिः ।व्याघ्रो मृगाणां पततां तार्क्ष्योऽनन्तश्च भोगिनाम् ॥ ११२॥

vṛkṣāṇāṃ kakubho'si tvaṃ girīṇāṃ himavān giriḥ |vyāghro mṛgāṇāṃ patatāṃ tārkṣyo'nantaśca bhoginām || 112||

क्षिरोदोऽस्युदधीनां च यन्त्राणां धनुरेव च ।वज्रं प्रहरणानां च व्रतानां सत्यमेव च ॥ ११३॥

kṣirodo'syudadhīnāṃ ca yantrāṇāṃ dhanureva ca |vajraṃ praharaṇānāṃ ca vratānāṃ satyameva ca || 113||

त्वमेव द्वेष इच्छा च रागो मोहः क्षमाक्षमे ।व्यवसायो धृतिर्लोभः कामक्रोधौ जयाजयौ ॥ ११४॥

tvameva dveṣa icchā ca rāgo mohaḥ kṣamākṣame |vyavasāyo dhṛtirlobhaḥ kāmakrodhau jayājayau || 114||

त्वं शरी त्वं गदी चापी खट्वाङ्गी च शरासनी ।छेत्ता मेत्ता प्रहर्तासि मन्ता नेता सनातनः ॥ ११५॥

tvaṃ śarī tvaṃ gadī cāpī khaṭvāṅgī ca śarāsanī |chettā mettā prahartāsi mantā netā sanātanaḥ || 115||

दशलक्षणसंयुक्तो धर्मोऽर्थः काम एव च ।समुद्राः सरितो गङ्गा पर्वताश्च सरांसि च ॥ ११६॥

daśalakṣaṇasaṃyukto dharmo'rthaḥ kāma eva ca |samudrāḥ sarito gaṅgā parvatāśca sarāṃsi ca || 116||

लतावल्ल्यस्तृणौषध्यः पशवो मृगपक्षिणः ।द्रव्यकर्मगुणारम्भः कालपुष्पफलप्रदः ॥ ११७॥

latāvallyastṛṇauṣadhyaḥ paśavo mṛgapakṣiṇaḥ |dravyakarmaguṇārambhaḥ kālapuṣpaphalapradaḥ || 117||

आदिश्चान्तश्च वेदानां गायत्री प्रणवस्तथा ।लोहितो हरितो नीलः कृष्णः पीतः सितस्तथा ॥ ११८॥

ādiścāntaśca vedānāṃ gāyatrī praṇavastathā |lohito harito nīlaḥ kṛṣṇaḥ pītaḥ sitastathā || 118||

कद्रुश्च कपिलश्चैव कपोतो मेचकस्तथा ।सवर्णश्चाप्यवर्णाश्च कर्ता हर्ता त्वमेव हि ॥ ११९॥

kadruśca kapilaścaiva kapoto mecakastathā |savarṇaścāpyavarṇāśca kartā hartā tvameva hi || 119||

त्वमिन्द्रश्च यमश्चैव वरुणो धनदोऽनिलः ।उपप्लवश्चित्रभानुः स्वर्भानुर्भानुरेव च ॥ १२०॥

tvamindraśca yamaścaiva varuṇo dhanado'nilaḥ |upaplavaścitrabhānuḥ svarbhānurbhānureva ca || 120||

शिक्षाहौत्रं त्रिसौपर्णं यजुषां शतरुद्रियम् ।पवित्रं च पवित्राणां मङ्गलानां च मङ्गलम् ॥ १२१॥

śikṣāhautraṃ trisauparṇaṃ yajuṣāṃ śatarudriyam |pavitraṃ ca pavitrāṇāṃ maṅgalānāṃ ca maṅgalam || 121||

तिन्दुको गिरिजो वृक्षो मुद्गं चाखिलजीवनम् ।प्राणाः सत्त्वं रजश्चैव तमश्च प्रतिपत्पतिः ॥ १२२॥

tinduko girijo vṛkṣo mudgaṃ cākhilajīvanam |prāṇāḥ sattvaṃ rajaścaiva tamaśca pratipatpatiḥ || 122||

प्राणोऽपानः समानश्च उदानो व्यान एव च ।उन्मेषश्च निमेषश्च क्षुतं जृम्भितमेव च ॥ १२३॥

prāṇo'pānaḥ samānaśca udāno vyāna eva ca |unmeṣaśca nimeṣaśca kṣutaṃ jṛmbhitameva ca || 123||

लोहितान्तर्गतो दृष्टिर्महावक्त्रो महोदरः ।शुचिरोमा हरिश्मश्रुरूर्ध्वकेशश्चलाचलः ॥ १२४॥

lohitāntargato dṛṣṭirmahāvaktro mahodaraḥ |śuciromā hariśmaśrurūrdhvakeśaścalācalaḥ || 124||

गीतवादित्रनृत्यज्ञो गीतवादित्रकप्रियः ।मत्स्यो जालो जलौकाश्च कालः केलिकला कलिः ॥ १२५॥

gītavāditranṛtyajño gītavāditrakapriyaḥ |matsyo jālo jalaukāśca kālaḥ kelikalā kaliḥ || 125||

अकालश्च विकालश्च दुष्कालः काल एव च ।मृत्युश्च मृत्युकर्ता च यक्षो यक्षभयङ्करः ॥ १२६॥

akālaśca vikālaśca duṣkālaḥ kāla eva ca |mṛtyuśca mṛtyukartā ca yakṣo yakṣabhayaṅkaraḥ || 126||

संवर्तकोऽन्तकश्चैव संवर्तकबलाहकः ।घण्टो घण्टी महाघण्टी चिरी माली च मातलिः ॥ १२७॥

saṃvartako'ntakaścaiva saṃvartakabalāhakaḥ |ghaṇṭo ghaṇṭī mahāghaṇṭī cirī mālī ca mātaliḥ || 127||

ब्रह्मकालयमाग्नीनां दण्डी मुण्डी त्रिमुण्डधृक् ।चतुर्युगश्चतुर्वेदश्चातुर्होत्रप्रवर्तकः ॥ १२८॥

brahmakālayamāgnīnāṃ daṇḍī muṇḍī trimuṇḍadhṛk |caturyugaścaturvedaścāturhotrapravartakaḥ || 128||

चातुराश्रम्यनेता च चातुर्वर्ण्यकरस्तथा ।नित्यमक्षप्रियो धूर्तो गणाध्यक्षो गणाधिपः ॥ १२९॥

cāturāśramyanetā ca cāturvarṇyakarastathā |nityamakṣapriyo dhūrto gaṇādhyakṣo gaṇādhipaḥ || 129||

रक्तमाल्याम्बरधरो गिरिको गिरिकप्रियः ।शिल्पं च शिल्पिनां श्रेष्ठः सर्वशिल्पप्रवर्तकः ॥ १३०॥

raktamālyāmbaradharo giriko girikapriyaḥ |śilpaṃ ca śilpināṃ śreṣṭhaḥ sarvaśilpapravartakaḥ || 130||

भगनेत्राङ्कुशश्चण्डः पूष्णो दन्तविनाशनः ।स्वाहा स्वधा वषट्कारो नमस्कारो नमो नमः ॥ १३१॥

bhaganetrāṅkuśaścaṇḍaḥ pūṣṇo dantavināśanaḥ |svāhā svadhā vaṣaṭkāro namaskāro namo namaḥ || 131||

गूढव्रतो गुह्यतपास्तारकास्तारकामयः ।धाता विधाता सन्धाता पृथिव्या धरणोऽपरः ॥ १३२॥

gūḍhavrato guhyatapāstārakāstārakāmayaḥ |dhātā vidhātā sandhātā pṛthivyā dharaṇo'paraḥ || 132||

ब्रह्मा तपश्च सत्यं च व्रतचर्यमथार्जवम् ।भूतात्मा भूतकृद्भूतिर्भूतभव्यभवोद्भवः ॥ १३३॥

brahmā tapaśca satyaṃ ca vratacaryamathārjavam |bhūtātmā bhūtakṛdbhūtirbhūtabhavyabhavodbhavaḥ || 133||

भूर्भुवः स्वरृतं चैव ध्रुवो दान्तो महेश्वरः ।दीक्षितोऽदीक्षितः कान्तो दुर्दान्तो दान्तसम्भवः ॥ १३४॥

bhūrbhuvaḥ svarṛtaṃ caiva dhruvo dānto maheśvaraḥ |dīkṣito'dīkṣitaḥ kānto durdānto dāntasambhavaḥ || 134||

चन्द्रावर्तो युगावर्तः संवर्तकप्रवर्तकः ।बिन्दुः कामो ह्यणुः स्थूलः कर्णिकारस्रजप्रियः ॥ १३५॥

candrāvarto yugāvartaḥ saṃvartakapravartakaḥ |binduḥ kāmo hyaṇuḥ sthūlaḥ karṇikārasrajapriyaḥ || 135||

नन्दीमुखो भीममुखः सुमुखो दुर्मुखस्तथा ।हिरण्यगर्भः शकुनिर्महोरगपतिर्विराट् ॥ १३६॥

nandīmukho bhīmamukhaḥ sumukho durmukhastathā |hiraṇyagarbhaḥ śakunirmahoragapatirvirāṭ || 136||

अधर्महा महादेवो दण्डधारो गणोत्कटः ।गोनर्दो गोप्रतारश्च गोवृषेश्वरवाहनः ॥ १३७॥

adharmahā mahādevo daṇḍadhāro gaṇotkaṭaḥ |gonardo gopratāraśca govṛṣeśvaravāhanaḥ || 137||

त्रैलोक्यगोप्ता गोविन्दो गोमार्गो मार्ग एव च ।स्थिरः श्रेष्ठश्च स्थाणुश्च विक्रोशः क्रोश एव च ॥ १३८॥

trailokyagoptā govindo gomārgo mārga eva ca |sthiraḥ śreṣṭhaśca sthāṇuśca vikrośaḥ krośa eva ca || 138||

दुर्वारणो दुर्विषहो दुःसहो दुरतिक्रमः ।दुर्द्धर्षो दुष्प्रकाशश्च दुर्दुर्शो दुर्जयो जयः ॥ १३९॥

durvāraṇo durviṣaho duḥsaho duratikramaḥ |durddharṣo duṣprakāśaśca durdurśo durjayo jayaḥ || 139||

शशाङ्कानलशीतोष्णः क्षुत्तृष्णा च निरामयः ।आधयो व्याधयश्चैव व्याधिहा व्याधिनाशनः ॥ १४०॥

śaśāṅkānalaśītoṣṇaḥ kṣuttṛṣṇā ca nirāmayaḥ |ādhayo vyādhayaścaiva vyādhihā vyādhināśanaḥ || 140||

समूहश्च समूहस्य हन्ता देवः सनातनः ।शिखण्डी पुण्डरीकाक्षः पुण्डरीकवनालयः ॥ १४१॥

samūhaśca samūhasya hantā devaḥ sanātanaḥ |śikhaṇḍī puṇḍarīkākṣaḥ puṇḍarīkavanālayaḥ || 141||

त्र्यम्बको दण्डधारश्च उग्रदंष्ट्रः कुलान्तकः ।विषापहः सुरश्रेष्ठः सोमपास्त्वं मरुत्पते ।अमृताशी जगन्नाथो देवदेवो गणेश्वरः ॥ १४२॥

tryambako daṇḍadhāraśca ugradaṃṣṭraḥ kulāntakaḥ |viṣāpahaḥ suraśreṣṭhaḥ somapāstvaṃ marutpate |amṛtāśī jagannātho devadevo gaṇeśvaraḥ || 142||

मधुश्च्युतानां मधुपो ब्रह्मवाक् त्वं घृतच्युतः ।सर्वलोकस्य भोक्ता त्वं सर्वलोकपितामहः ॥ १४३॥

madhuścyutānāṃ madhupo brahmavāk tvaṃ ghṛtacyutaḥ |sarvalokasya bhoktā tvaṃ sarvalokapitāmahaḥ || 143||

हिरण्यरेताः पुरुषस्त्वमेकः त्वं स्त्री पुमांस्त्वं हि नपुंसकं च ।बालो युवा स्थविरो देवदंष्ट्रा त्वन्नो गिरिर्विश्वकृद्विश्वहर्ता ॥ १४४॥

hiraṇyaretāḥ puruṣastvamekaḥ tvaṃ strī pumāṃstvaṃ hi napuṃsakaṃ ca |bālo yuvā sthaviro devadaṃṣṭrā tvanno girirviśvakṛdviśvahartā || 144||

त्वं वै धाता विश्वकृतां वरेण्यस्त्वां पूजयन्ति प्रणताः सदैव ।चन्द्रादित्यौ चक्षुषी ते भवान् हि त्वमेव चाग्निः प्रपितामहश्च ।आराध्य त्वां सरस्वतीं वाग्लभन्ते अहोरात्रे निमिषोन्मेषकर्ता ॥ १४५॥

tvaṃ vai dhātā viśvakṛtāṃ vareṇyastvāṃ pūjayanti praṇatāḥ sadaiva |candrādityau cakṣuṣī te bhavān hi tvameva cāgniḥ prapitāmahaśca |ārādhya tvāṃ sarasvatīṃ vāglabhante ahorātre nimiṣonmeṣakartā || 145||

न ब्रह्मा न च गोविन्दः पौराणा ऋषयो न ते ।माहात्म्यं वेदितुं शक्ता याथातथ्येन शङ्कर ॥ १४६॥

na brahmā na ca govindaḥ paurāṇā ṛṣayo na te |māhātmyaṃ vedituṃ śaktā yāthātathyena śaṅkara || 146||

पुंसां शतसहस्राणि यत्समावृत्य तिष्ठति ।महतस्तमसः पारे गोप्ता मन्ता भवान् सदा ॥ १४७॥

puṃsāṃ śatasahasrāṇi yatsamāvṛtya tiṣṭhati |mahatastamasaḥ pāre goptā mantā bhavān sadā || 147||

यं विनिद्रा जितश्वासाः सत्त्वस्थाः संयतेन्द्रियाः ।ज्योतिः पश्यन्ति युञ्जानास्तस्मै योगात्मने नमः ॥ १४८॥

yaṃ vinidrā jitaśvāsāḥ sattvasthāḥ saṃyatendriyāḥ |jyotiḥ paśyanti yuñjānāstasmai yogātmane namaḥ || 148||

या मूर्तयश्च सूक्ष्मास्ते न शक्या या निदर्शितुम् ।ताभिर्मां सततं रक्ष पिता पुत्रमिवौरसम् ॥ १४९॥

yā mūrtayaśca sūkṣmāste na śakyā yā nidarśitum |tābhirmāṃ satataṃ rakṣa pitā putramivaurasam || 149||

रक्ष मां रक्षणीयोऽहं तवानघ नमोऽस्तु ते ।भक्तानुकम्पी भगवान् भक्तश्चाहं सदा त्वयि ॥ १५०॥

rakṣa māṃ rakṣaṇīyo'haṃ tavānagha namo'stu te |bhaktānukampī bhagavān bhaktaścāhaṃ sadā tvayi || 150||

जटिने दण्डिने नित्यं लम्बोदरशरीरिणे ।कमण्डलुनिषङ्गाय तस्मै रुद्रात्मने नमः ॥ १५१॥

jaṭine daṇḍine nityaṃ lambodaraśarīriṇe |kamaṇḍaluniṣaṅgāya tasmai rudrātmane namaḥ || 151||

यस्य केशेषु जीमूता नद्यः सर्वाङ्गसन्धिषु ।कुक्षौ समुद्राश्चत्वारस्तस्मै तोयात्मने नमः ॥ १५२॥

yasya keśeṣu jīmūtā nadyaḥ sarvāṅgasandhiṣu |kukṣau samudrāścatvārastasmai toyātmane namaḥ || 152||

सम्भक्ष्य सर्वभूतानि युगान्ते पर्युपस्थिते ।यः शेते जलमध्यस्थस्तं प्रपद्येऽम्बुशायिनम् ॥ १५३॥

sambhakṣya sarvabhūtāni yugānte paryupasthite |yaḥ śete jalamadhyasthastaṃ prapadye'mbuśāyinam || 153||

प्रविश्य वदनं राहोर्यः सोमं पिबते निशि ।ग्रसत्यर्कं च स्वर्भानू रक्षितस्तव तेजसा ॥ १५४॥

praviśya vadanaṃ rāhoryaḥ somaṃ pibate niśi |grasatyarkaṃ ca svarbhānū rakṣitastava tejasā || 154||

ये चात्र पतिता गर्भा रुद्र गन्धस्य रक्षणे ।नमस्तेऽस्तु स्वधा स्वाहा प्राप्नुवन्ति तदद्भुते ॥ १५५॥

ye cātra patitā garbhā rudra gandhasya rakṣaṇe |namaste'stu svadhā svāhā prāpnuvanti tadadbhute || 155||

येऽङ्गुष्ठमात्राः पुरुषा देहस्थाः सर्वदेहिनाम् ।रक्षन्तु ते हि मां नित्यं ते मामाप्याययन्तु वै ॥ १५६॥

ye'ṅguṣṭhamātrāḥ puruṣā dehasthāḥ sarvadehinām |rakṣantu te hi māṃ nityaṃ te māmāpyāyayantu vai || 156||

ये नदीषु समुद्रेषु पर्वतेषु गुहासु च ।वृक्षमूलेषु गोष्ठेषु कान्तारगहनेषु च ॥ १५७॥

ye nadīṣu samudreṣu parvateṣu guhāsu ca |vṛkṣamūleṣu goṣṭheṣu kāntāragahaneṣu ca || 157||

चतुष्पथेषु रथ्यासु चत्वरेषु सभासु च ।हस्त्यश्वरथशालासु जीर्णोद्यानालयेषु च ॥ १५८॥

catuṣpatheṣu rathyāsu catvareṣu sabhāsu ca |hastyaśvarathaśālāsu jīrṇodyānālayeṣu ca || 158||

ये च पञ्चसु भूतेषु दिशासु विदिशासु च ।चन्द्रार्कयोर्मध्यगता ये च चन्द्रार्करश्मिषु ॥ १५९॥

ye ca pañcasu bhūteṣu diśāsu vidiśāsu ca |candrārkayormadhyagatā ye ca candrārkaraśmiṣu || 159||

रसातलगता ये च ये च तस्मात् परं गताः ।नमस्तेभ्यो नमस्तेभ्यो नमस्तेभ्यश्च नित्यशः ॥ १६०॥

rasātalagatā ye ca ye ca tasmāt paraṃ gatāḥ |namastebhyo namastebhyo namastebhyaśca nityaśaḥ || 160||

येषां न विद्यते सङ्ख्या प्रमाणं रूपमेव च ।असङ्ख्येयगणा रुद्रा नमस्तेभ्योऽस्तु नित्यशः ॥ १६१॥

yeṣāṃ na vidyate saṅkhyā pramāṇaṃ rūpameva ca |asaṅkhyeyagaṇā rudrā namastebhyo'stu nityaśaḥ || 161||

प्रसीद मम भद्रं ते तव भावगतस्य च ।त्वयि मे हृदयं देव त्वयि बुद्धिर्मतिस्त्वयि ॥ १६२॥

prasīda mama bhadraṃ te tava bhāvagatasya ca |tvayi me hṛdayaṃ deva tvayi buddhirmatistvayi || 162||

स्तुत्वैवं स महादेवं विरराम द्विजोत्तमः ॥ १६३॥

stutvaivaṃ sa mahādevaṃ virarāma dvijottamaḥ || 163||

इति श्रीवामनपुराणे सप्तचत्वारिंशत्तमाध्यायान्तर्गतंवेनकृतं शिवस्तोत्रं समाप्तम् ।वामनपुराण । अध्याय ४७/६३१६२॥वामनपुराण । अध्याय ४७/६३-१६२॥

iti śrīvāmanapurāṇe saptacatvāriṃśattamādhyāyāntargataṃvenakṛtaṃ śivastotraṃ samāptam |vāmanapurāṇa | adhyāya 47/63162||vāmanapurāṇa | adhyāya 47/63-162||