वामदेवकवचम् विश्वमङ्गलम् Shri Vamadeva Kavacham

ॐ श्रीगणेशाय नमः ।ॐ श्रीदेव्यै सदासुफलदायिन्यै नमः ।श्रीभैरव उवाचअथ वक्ष्यामि देवेशि कवचं मन्त्रगर्भकम् ।मूलमन्त्रस्वरूपं च विश्वमङ्गलकाभिधम् ॥ १॥

oṃ śrīgaṇeśāya namaḥ |oṃ śrīdevyai sadāsuphaladāyinyai namaḥ |śrībhairava uvācaatha vakṣyāmi deveśi kavacaṃ mantragarbhakam |mūlamantrasvarūpaṃ ca viśvamaṅgalakābhidham || 1||

सर्वसम्पत्प्रदं चैव वामदेवस्य पार्वति ।गुह्यातिगुह्यं परमं मूलविद्यामयं ध्रुवम् ॥ २॥

sarvasampatpradaṃ caiva vāmadevasya pārvati |guhyātiguhyaṃ paramaṃ mūlavidyāmayaṃ dhruvam || 2||

परमार्थप्रदं नित्यं भोगमोक्षैककारणम् ।महाभयहरं देवि महैश्वर्यप्रदं शिवे ॥ ३॥

paramārthapradaṃ nityaṃ bhogamokṣaikakāraṇam |mahābhayaharaṃ devi mahaiśvaryapradaṃ śive || 3||

कवचस्यास्य देवेशि ऋषिर्भैरव ईरितः ।अनुष्टुप्छन्द इत्युक्तं वामदेवश्च देवता ॥ ४॥

kavacasyāsya deveśi ṛṣirbhairava īritaḥ |anuṣṭupchanda ityuktaṃ vāmadevaśca devatā || 4||

इन्द्रो बीजं पराशक्तिः तारं कीलकमीरितम् ।धर्मार्थकाममोक्षार्थविनियोग इतीरितः ॥ ५॥

indro bījaṃ parāśaktiḥ tāraṃ kīlakamīritam |dharmārthakāmamokṣārthaviniyoga itīritaḥ || 5||

अस्य श्रीवामदेवकवचस्य भैरवऋषिः, अनुष्टुप्छन्दः, श्रीवामदेवोदेवता ।इन्द्रो बीजं, पराशक्तिः, तारं कीलकृम्म् ।धर्मार्थकाममोक्षार्थे कवचपाठे विनियोगः ।भैरवऋषये नमः शिरसि । अनुष्टुप्छन्दसे नमः मुखे ।श्रीवामदेवदेवतायै नमः हॄदि । इन्द्रो बीजाय नमो गुह्ये ।पराशक्तये नमः पादयोः । तारं कीलकाय नमः नाभौ ।कवचपाठे विनियोगः सर्वाङ्गे ।अथ ध्यानम् ।वरक्षमालाऽभयढक्कहस्तः सरोजकिञ्जल्कसमानवर्णः ।त्रिलोचनश्चारुचतुर्मुखो मां पयादुदीच्यां दिशि वामदेवः ॥ॐ वां शिरः पातु मे देवो ललाटं ह्रीं सदा मम ।वामदेवः प्रदेशं मे बीजद्वयस्वरूपिणम् ॥ १॥

asya śrīvāmadevakavacasya bhairavaṛṣiḥ, anuṣṭupchandaḥ, śrīvāmadevodevatā |indro bījaṃ, parāśaktiḥ, tāraṃ kīlakṛmm |dharmārthakāmamokṣārthe kavacapāṭhe viniyogaḥ |bhairavaṛṣaye namaḥ śirasi | anuṣṭupchandase namaḥ mukhe |śrīvāmadevadevatāyai namaḥ hṝdi | indro bījāya namo guhye |parāśaktaye namaḥ pādayoḥ | tāraṃ kīlakāya namaḥ nābhau |kavacapāṭhe viniyogaḥ sarvāṅge |atha dhyānam |varakṣamālā'bhayaḍhakkahastaḥ sarojakiñjalkasamānavarṇaḥ |trilocanaścārucaturmukho māṃ payādudīcyāṃ diśi vāmadevaḥ ||oṃ vāṃ śiraḥ pātu me devo lalāṭaṃ hrīṃ sadā mama |vāmadevaḥ pradeśaṃ me bījadvayasvarūpiṇam || 1||

हुं पातु लोचनद्वन्द्वं मुखं ह्रीं बीजरूपिणम् ।ह्रीङ्कारो कण्ठदेलं ह्रीं पातु स्कन्धयोर्मम ॥ २॥

huṃ pātu locanadvandvaṃ mukhaṃ hrīṃ bījarūpiṇam |hrīṅkāro kaṇṭhadelaṃ hrīṃ pātu skandhayormama || 2||

वामदेवो सदा पातु भुजौ सव्येतरौ मम ।ह्रीङ्कारो हृदयं पातु ह्रीं सोऽव्यादुदरं मम ॥ ३॥

vāmadevo sadā pātu bhujau savyetarau mama |hrīṅkāro hṛdayaṃ pātu hrīṃ so'vyādudaraṃ mama || 3||

ह्रीं नाभौ पातु सततं देवो ह्रिङ्काररूपकः ।अव्यान्मे लिङ्गदेशं च ह्रिं रक्षेद्गुददेशके ॥ ४॥

hrīṃ nābhau pātu satataṃ devo hriṅkārarūpakaḥ |avyānme liṅgadeśaṃ ca hriṃ rakṣedgudadeśake || 4||

चन्द्रबीजं पातु पादौ नमः पादतलं मम ।दशाक्षरः पातु नित्यं सर्वाङ्गं मम सर्वदा ॥ ५॥

candrabījaṃ pātu pādau namaḥ pādatalaṃ mama |daśākṣaraḥ pātu nityaṃ sarvāṅgaṃ mama sarvadā || 5||

अन्तर्बहिश्च मां पातु वामदेवश्च भैरवः ।भगलिङ्गामृतप्रीतो सर्वसन्धिषु रक्षतु ॥ ६॥

antarbahiśca māṃ pātu vāmadevaśca bhairavaḥ |bhagaliṅgāmṛtaprīto sarvasandhiṣu rakṣatu || 6||

शङ्करो मां सदा पातु ममेन्द्रियसमानकम् ।शिवो ममेन्द्रियार्थेषु रक्षयेदखिलेष्वपि ॥ ७॥

śaṅkaro māṃ sadā pātu mamendriyasamānakam |śivo mamendriyārtheṣu rakṣayedakhileṣvapi || 7||

वामदेवःपश्चिमेऽव्यादक्षिणे देवदत्तकः ।भगलिङ्गामृतप्रीतो भगलिङ्गस्वरूपकः ॥ ८॥

vāmadevaḥpaścime'vyādakṣiṇe devadattakaḥ |bhagaliṅgāmṛtaprīto bhagaliṅgasvarūpakaḥ || 8||

उदीच्यामूर्ध्वगः पातु पूर्वे संहारभैरवः ।दिगम्बरः श्मशानस्थः पातु दिक्षु विदिक्षु च ॥ ९॥

udīcyāmūrdhvagaḥ pātu pūrve saṃhārabhairavaḥ |digambaraḥ śmaśānasthaḥ pātu dikṣu vidikṣu ca || 9||

घोररावाट्टाट्टहासो मे शिवो त्वं सुशोभितः ।पातु विघ्नेषु घोरेषु जगद्रुधिरभक्षकः ॥ १०॥

ghorarāvāṭṭāṭṭahāso me śivo tvaṃ suśobhitaḥ |pātu vighneṣu ghoreṣu jagadrudhirabhakṣakaḥ || 10||

करालवदनो घोरः प्रेतकोलाहलप्रियः ।मुक्तकेशः सुकेशश्च मदिरोन्मत्तभैरवः ॥ ११॥

karālavadano ghoraḥ pretakolāhalapriyaḥ |muktakeśaḥ sukeśaśca madironmattabhairavaḥ || 11||

देवदत्तो महोग्रश्च सदाश्मशानगः परः ।शिरसः पादपर्यन्तं देवदत्तोऽवतात्सदा ॥ १२॥

devadatto mahograśca sadāśmaśānagaḥ paraḥ |śirasaḥ pādaparyantaṃ devadatto'vatātsadā || 12||

इतीदं कवचं दिव्यं साधकानां सुदुर्लभम् ।मन्त्रसिद्धिकरं साक्षान्महादेवस्य भाषितम् ॥ १३॥

itīdaṃ kavacaṃ divyaṃ sādhakānāṃ sudurlabham |mantrasiddhikaraṃ sākṣānmahādevasya bhāṣitam || 13||

इदं कवचमज्ञात्वा योजयेद्वामदेवकः ।शतलक्षप्रजप्तोऽपि तस्य देवो न सिद्।ह्ध्यते ॥ १४॥

idaṃ kavacamajñātvā yojayedvāmadevakaḥ |śatalakṣaprajapto'pi tasya devo na sid|hdhyate || 14||

स शस्त्रघातमाप्नोति सोऽचिरन्मृतुमाप्नुयात् ।मन्त्रेण म्रियते योगी रक्षयेत् कवचं परम् ॥ १५॥

sa śastraghātamāpnoti so'ciranmṛtumāpnuyāt |mantreṇa mriyate yogī rakṣayet kavacaṃ param || 15||

त्रिसन्ध्यं पठनादस्य कवचस्य तु पार्वति ।सिद्धयोऽष्टौ करे तस्य महेश इव चापरः ॥ १६॥

trisandhyaṃ paṭhanādasya kavacasya tu pārvati |siddhayo'ṣṭau kare tasya maheśa iva cāparaḥ || 16||

रूपेण स्मरतुल्योऽसौ कामिनीनां प्रियो भवेत् ।तस्मादेतत्सुकवचं न देयं यस्यकस्यचित् ।भक्तियुक्ताय शान्ताय दानशीलाय धीमते ॥ १७॥

rūpeṇa smaratulyo'sau kāminīnāṃ priyo bhavet |tasmādetatsukavacaṃ na deyaṃ yasyakasyacit |bhaktiyuktāya śāntāya dānaśīlāya dhīmate || 17||

यो ददाति सुशिष्येभ्यस्तस्य वश्यं जगद्भवेत् ।गुह्याद्गुह्यतरं गुह्यं महारुद्रेण भाषितम् ॥ १८॥

yo dadāti suśiṣyebhyastasya vaśyaṃ jagadbhavet |guhyādguhyataraṃ guhyaṃ mahārudreṇa bhāṣitam || 18||

यस्य कण्ठगतं तस्य करस्थाः सर्वसिद्धयः ।श्रीविश्वमङ्गलं नाम कवचं न प्रकाशयेत् ।रहस्यातिरहस्यं च गोपनीयं स्वयोनिवत् ॥ १९॥

yasya kaṇṭhagataṃ tasya karasthāḥ sarvasiddhayaḥ |śrīviśvamaṅgalaṃ nāma kavacaṃ na prakāśayet |rahasyātirahasyaṃ ca gopanīyaṃ svayonivat || 19||

इति श्रीरुद्रयामलेतन्त्रे श्रीविश्वमङ्गलं नाम वामदेवकवचं सम्पूर्णम् ॥

iti śrīrudrayāmaletantre śrīviśvamaṅgalaṃ nāma vāmadevakavacaṃ sampūrṇam ||