नटेश्वरचिन्तामणिविद्यास्तवः Shri Nateshvarachintamanividya Stava

श्रीगणेशाय नमः ।श्रीचित्सभेशाय नमः ।सनत्कुमारःनन्दिकेश शिवानन्यभावनाभावितान्तर ।शिलादतनय श्रीमन् चिदम्बरसभापतेः ॥ १॥

śrīgaṇeśāya namaḥ |śrīcitsabheśāya namaḥ |sanatkumāraḥnandikeśa śivānanyabhāvanābhāvitāntara |śilādatanaya śrīman cidambarasabhāpateḥ || 1||

चिन्तामणिमहाविद्यामन्त्रवर्णस्तवोत्तमम् ।मननात्सर्वपापघ्नं नृत्तराजप्रियङ्करम् ॥ २॥

cintāmaṇimahāvidyāmantravarṇastavottamam |mananātsarvapāpaghnaṃ nṛttarājapriyaṅkaram || 2||

पुरुषार्थप्रदं पुंसां मोक्षदं सर्वकामदम् ।हरिणा ब्रह्मणा देव रुद्रेणापि सुरैरपि ॥ ३॥

puruṣārthapradaṃ puṃsāṃ mokṣadaṃ sarvakāmadam |hariṇā brahmaṇā deva rudreṇāpi surairapi || 3||

सदा सङ्कीर्तितं प्रेम्णा वक्तुमर्हसि तत्स्तवम् ।श्रीनन्दिकेश्वरःसनत्कुमार वक्ष्यामि ब्रह्ममानससम्भव ॥ ४॥

sadā saṅkīrtitaṃ premṇā vaktumarhasi tatstavam |śrīnandikeśvaraḥsanatkumāra vakṣyāmi brahmamānasasambhava || 4||

पुरा स्कन्दाय देवेन शम्भुना प्रोक्तमद्भुतम् ।नृत्यति यो महादेवो दहराकाशमध्यमे ॥ ५॥

purā skandāya devena śambhunā proktamadbhutam |nṛtyati yo mahādevo daharākāśamadhyame || 5||

तदीयमन्त्रवर्णाद्यं स्तवराजं विशेषतः ।ब्रह्मादयोऽपि यत्स्तोत्रजपादापुर्मुनीश्वर ॥ ६॥

tadīyamantravarṇādyaṃ stavarājaṃ viśeṣataḥ |brahmādayo'pi yatstotrajapādāpurmunīśvara || 6||

इष्टार्थान् वाक्पतित्वादीन् सावधानमनाः शृणु ।अहमेव ऋषिस्तस्य छन्दोऽनुष्टुप् सभापतिः ॥ ७॥

iṣṭārthān vākpatitvādīn sāvadhānamanāḥ śṛṇu |ahameva ṛṣistasya chando'nuṣṭup sabhāpatiḥ || 7||

देवता प्रणवेनैव न्यासं कृत्वा पठेत्स्तवम् ॥वन्देऽपस्मारदेहस्थितमतिधवलं श्रीतनुं नृत्तराजंवामेनाकुञ्चिताङ्घ्रिं डमरुकमभयं वह्निनृत्ताभिनीतिम् ।दक्षे वामे दधानं द्विदशमथ जटाजान्हवीचन्द्रचूडंद्वीपीट्चर्माम्बराढ्यं भुजगवलयिनं श्रीजटाढ्यापराङ्गम् ॥ ८॥

devatā praṇavenaiva nyāsaṃ kṛtvā paṭhetstavam ||vande'pasmāradehasthitamatidhavalaṃ śrītanuṃ nṛttarājaṃvāmenākuñcitāṅghriṃ ḍamarukamabhayaṃ vahninṛttābhinītim |dakṣe vāme dadhānaṃ dvidaśamatha jaṭājānhavīcandracūḍaṃdvīpīṭcarmāmbarāḍhyaṃ bhujagavalayinaṃ śrījaṭāḍhyāparāṅgam || 8||

वामे हस्ते च वह्निं नयुतमथ करे दक्षिणे शिवस्वरूपंनादब्रह्मैकनिष्ठं डमरुकमभयं यं वकारं च वामे ।हस्ते श्रीदक्षिणेन स्वपदसरसिजेनात्ममोहं मधाम्नात्वाक्रम्यावस्थितं त्वां भजति हि निटिले निग्रहानुग्रहाभ्याम् ॥ ९॥

vāme haste ca vahniṃ nayutamatha kare dakṣiṇe śivasvarūpaṃnādabrahmaikaniṣṭhaṃ ḍamarukamabhayaṃ yaṃ vakāraṃ ca vāme |haste śrīdakṣiṇena svapadasarasijenātmamohaṃ madhāmnātvākramyāvasthitaṃ tvāṃ bhajati hi niṭile nigrahānugrahābhyām || 9||

ध्यायेत्कोटिरविप्रभं त्रिणयनं शीतांशुगङ्गाधरंदक्षाङ्घ्रिस्थितवामकुञ्चितपदं शार्दूलचर्माम्बरम् ।वह्निं डोलकराभयं डमरुकं वामे शिवां श्यामलांकल्हारं दधतीं प्रलम्बितकरां देवीं सभेशं सदा ॥ १०॥

dhyāyetkoṭiraviprabhaṃ triṇayanaṃ śītāṃśugaṅgādharaṃdakṣāṅghristhitavāmakuñcitapadaṃ śārdūlacarmāmbaram |vahniṃ ḍolakarābhayaṃ ḍamarukaṃ vāme śivāṃ śyāmalāṃkalhāraṃ dadhatīṃ pralambitakarāṃ devīṃ sabheśaṃ sadā || 10||

वह्निं पाशं च लम्बं धनुरपि मधुरं वामहस्तैश्चतुर्भिःबिभ्राणं चान्यहस्तैर्डमरुमपि सृणिं चाभयं पुष्पबाणान् ।वामार्धाङ्गं पुमांसं परिचिनु हृदये स्वर्णसंसद्भ्रकुंसंसेवा हेवाक देवाधिपमकुटतटी लोलुठत्पादपीठम् ॥ ११॥

vahniṃ pāśaṃ ca lambaṃ dhanurapi madhuraṃ vāmahastaiścaturbhiḥbibhrāṇaṃ cānyahastairḍamarumapi sṛṇiṃ cābhayaṃ puṣpabāṇān |vāmārdhāṅgaṃ pumāṃsaṃ paricinu hṛdaye svarṇasaṃsadbhrakuṃsaṃsevā hevāka devādhipamakuṭataṭī loluṭhatpādapīṭham || 11||

ओङ्कारमन्त्रसंवेद्यं ओतप्रोतजगत्त्रयम् ।चिन्तयामि महादेवं चिदम्बर सभानटम् ॥ १२॥

oṅkāramantrasaṃvedyaṃ otaprotajagattrayam |cintayāmi mahādevaṃ cidambara sabhānaṭam || 12||

ह्रीङ्कारिणीं प्रशंसन्ति यन्मायामूर्तिमास्तिकाः ।चित्त चिन्तय तं देवं चिदम्बरसभानटम् ॥ १३॥

hrīṅkāriṇīṃ praśaṃsanti yanmāyāmūrtimāstikāḥ |citta cintaya taṃ devaṃ cidambarasabhānaṭam || 13||

पश्यल्ललाटं प्रवहच्छेखरं विश्वसृट्स्रजम् ।शिवमालोकयाम्यन्तः चिदम्बरसभानटम् ॥ १४॥

paśyallalāṭaṃ pravahacchekharaṃ viśvasṛṭsrajam |śivamālokayāmyantaḥ cidambarasabhānaṭam || 14||

रम्भोर्वशीमुखादेव्यो यद्वामाङ्गपदानुगाः ।तमेकं दैवतं वन्दे चिदम्बरसभानटम् ॥ १५॥

rambhorvaśīmukhādevyo yadvāmāṅgapadānugāḥ |tamekaṃ daivataṃ vande cidambarasabhānaṭam || 15||

ज्योतिः प्रकटितानङ्ग गर्वनिर्वापणालिकम् ।प्रणमामि प्रभुं शम्भुं चिदम्बरसभानटम् ॥ १६॥

jyotiḥ prakaṭitānaṅga garvanirvāpaṇālikam |praṇamāmi prabhuṃ śambhuṃ cidambarasabhānaṭam || 16||

तिसृभिश्शक्तिभिर्विश्वं व्यश्नुवानमनादिमम् ।कलयामि कलातीतं चिदम्बरसभानटम् ॥ १७॥

tisṛbhiśśaktibhirviśvaṃ vyaśnuvānamanādimam |kalayāmi kalātītaṃ cidambarasabhānaṭam || 17||

हङ्कारदुस्सहव्याधेरगदङ्कारमादिमम् ।अहं प्रभुं व्रजाम्याद्यं चिदम्बरसभानटम् ॥ १८॥

haṅkāradussahavyādheragadaṅkāramādimam |ahaṃ prabhuṃ vrajāmyādyaṃ cidambarasabhānaṭam || 18||

सदाशिवं सदाराध्यं सदाधारं सदोदितम् ।चिरन्तनं सदा नौमि चिदम्बर सभानटम् ॥ १९॥

sadāśivaṃ sadārādhyaṃ sadādhāraṃ sadoditam |cirantanaṃ sadā naumi cidambara sabhānaṭam || 19||

हन्त्रीं पुरत्रयस्याहुः यस्य शक्तिं त्रयीगिरः ।तं नौमि स्थिरधन्वानं चिदम्बरसभानटम् ॥ २०॥

hantrīṃ puratrayasyāhuḥ yasya śaktiṃ trayīgiraḥ |taṃ naumi sthiradhanvānaṃ cidambarasabhānaṭam || 20||

सर्वोत्तीर्णपदं यस्य न जानन्ति दिवौकसः ।तमाश्रयेऽहं नृत्तेशं चिदम्बरसभानटम् ॥ २१॥

sarvottīrṇapadaṃ yasya na jānanti divaukasaḥ |tamāśraye'haṃ nṛtteśaṃ cidambarasabhānaṭam || 21||

व्योमेति नाद इत्यात्मेत्यन्तरात्मेति यं विदुः ।त्र्यम्बकं तं प्रत्येमि चिदम्बरसभानटम् ॥ २२॥

vyometi nāda ityātmetyantarātmeti yaṃ viduḥ |tryambakaṃ taṃ pratyemi cidambarasabhānaṭam || 22||

महीहृदयमध्यस्थं महानादविजृम्भितम् ।चित्ते भजामि चिन्मात्रं चिदम्बरसभानटम् ॥ २३॥

mahīhṛdayamadhyasthaṃ mahānādavijṛmbhitam |citte bhajāmi cinmātraṃ cidambarasabhānaṭam || 23||

व्योमकेशं व्योमपादं व्योमाख्यं व्योमविग्रहम् ।व्योमातीतं भजे देवं चिदम्बरसभानटम् ॥ २४॥

vyomakeśaṃ vyomapādaṃ vyomākhyaṃ vyomavigraham |vyomātītaṃ bhaje devaṃ cidambarasabhānaṭam || 24||

महेश्वरं महानन्दं महानादं महोदयम् ।मम नाथं प्रपद्येऽहं चिदम्बरसभानटम् ॥ २५॥

maheśvaraṃ mahānandaṃ mahānādaṃ mahodayam |mama nāthaṃ prapadye'haṃ cidambarasabhānaṭam || 25||

व्योम्नः शब्दो गुणो यस्य सप्रवृत्तिचतुष्टयः (१) ।तमात्मानमवाप्तोऽस्मि चिदम्बरसभानटम् ॥ २६॥

vyomnaḥ śabdo guṇo yasya sapravṛtticatuṣṭayaḥ (1) |tamātmānamavāpto'smi cidambarasabhānaṭam || 26||

म्नाधातुर्यस्य माहात्म्ये पर्यवस्यति भूयसा (२) ।तं नत्वा कृतकृत्योऽस्मि चिदम्बरसभानटम् ॥ २७॥

mnādhāturyasya māhātmye paryavasyati bhūyasā (2) |taṃ natvā kṛtakṛtyo'smi cidambarasabhānaṭam || 27||

शरायितरमाकान्तं धन्वायितधराधरम् ।श्रये गुणायिताहीन्द्रं चिदम्बरसभानटम् ॥ २८॥

śarāyitaramākāntaṃ dhanvāyitadharādharam |śraye guṇāyitāhīndraṃ cidambarasabhānaṭam || 28||

कति(३)वर्णद्वयं श्लिष्टं यन्मन्त्रान्तरसङ्गतम् ।श्रीकण्ठं तं श्रयाम्येनं चिदम्बरसभानटम् ॥ २९॥

kati(3)varṇadvayaṃ śliṣṭaṃ yanmantrāntarasaṅgatam |śrīkaṇṭhaṃ taṃ śrayāmyenaṃ cidambarasabhānaṭam || 29||

शिरोहृदयमूलेषु सुधातपशिखात्मना ।भासमानं तमुद्वीक्षे चिदम्बरसभानटम् ॥ ३०॥

śirohṛdayamūleṣu sudhātapaśikhātmanā |bhāsamānaṃ tamudvīkṣe cidambarasabhānaṭam || 30||

वन्दारुसुरकोटीर नीराजितपदाम्बुजम् ।उमासखमुपासेऽहं चिदम्बरसभानटम् ॥ ३१॥

vandārusurakoṭīra nīrājitapadāmbujam |umāsakhamupāse'haṃ cidambarasabhānaṭam || 31||

ज्योत्स्नाकमलिनीकान्त वामदक्षिणलोचनम् ।परामृशामि परमं चिदम्बरसभानटम् ॥ ३२॥

jyotsnākamalinīkānta vāmadakṣiṇalocanam |parāmṛśāmi paramaṃ cidambarasabhānaṭam || 32||

तिर्यक्कुञ्चितवामाङ्घ्रिं तदेकाग्रोल्लसत्करम् ।पश्याम्यभयदं पुंसां चिदम्बरसभानटम् ॥ ३३॥

tiryakkuñcitavāmāṅghriṃ tadekāgrollasatkaram |paśyāmyabhayadaṃ puṃsāṃ cidambarasabhānaṭam || 33||

रामणीयकसर्वस्वं यस्य वामाङ्गमिष्यते ।तं नौमि शक्तिचक्रेशं चिदम्बरसभानटम् ॥ ३४॥

rāmaṇīyakasarvasvaṃ yasya vāmāṅgamiṣyate |taṃ naumi śakticakreśaṃ cidambarasabhānaṭam || 34||

नन्दामि वीक्ष्य वीक्ष्येशं नवं नारायणार्चितम् ।जैमिनीयतपोराशिं चिदम्बरसभानटम् ॥ ३५॥

nandāmi vīkṣya vīkṣyeśaṃ navaṃ nārāyaṇārcitam |jaiminīyataporāśiṃ cidambarasabhānaṭam || 35||

दयातरङ्गितापाङ्ग दयितार्धकलेवरम् ।प्राज्ञैर्नुतं प्रशंसामि चिदम्बरसभानटम् ॥ ३६॥

dayātaraṅgitāpāṅga dayitārdhakalevaram |prājñairnutaṃ praśaṃsāmi cidambarasabhānaṭam || 36||

(४)नृगादिपूर्वराजेन्द्रैः पुण्यश्लोकैरभिष्टुतम् ।निवेशयामि हृदये चिदम्बरसभानटम् ॥ ३७॥

(4)nṛgādipūrvarājendraiḥ puṇyaślokairabhiṣṭutam |niveśayāmi hṛdaye cidambarasabhānaṭam || 37||

(५)ततयोगार्णनिर्देश्यं षट्त्रिंशत्तत्त्वनायकम् ।शेखरीकुरु चेतस्त्वं चिदम्बरसभानटम् ॥ ३८॥

(5)tatayogārṇanirdeśyaṃ ṣaṭtriṃśattattvanāyakam |śekharīkuru cetastvaṃ cidambarasabhānaṭam || 38||

परात्परतरं तत्त्वं पारेमोहं प्रतिष्ठितम् ।भजेऽहं भावनासिद्।ह्ध्यै चिदम्बरसभानटम् ॥ ३९॥

parātparataraṃ tattvaṃ pāremohaṃ pratiṣṭhitam |bhaje'haṃ bhāvanāsid|hdhyai cidambarasabhānaṭam || 39||

रजस्सत्वतमोरूपगुणत्रयनिगुम्भनम् ।आराधयाम्यनौपम्यं चिदम्बरसभानटम् ॥ ४०॥

rajassatvatamorūpaguṇatrayanigumbhanam |ārādhayāmyanaupamyaṃ cidambarasabhānaṭam || 40||

प्रकृतिप्रत्ययात्मानं प्रकाशं परमेश्वरम् ।सेवे शेखरितार्धेन्दुं चिदम्बरसभानटम् ॥ ४१॥

prakṛtipratyayātmānaṃ prakāśaṃ parameśvaram |seve śekharitārdhenduṃ cidambarasabhānaṭam || 41||

कालारिं कालयोक्तारं कामदं कामनाशकम् ।विमृशामि विधीशानं चिदम्बरसभानटम् ॥ ४२॥

kālāriṃ kālayoktāraṃ kāmadaṃ kāmanāśakam |vimṛśāmi vidhīśānaṃ cidambarasabhānaṭam || 42||

शाणोल्लीढेन्दुमणिवद्द्योतन्ते यस्य किङ्कराः ।तमेव स्थापयाम्यन्तः चिदम्बरसभानटम् ॥ ४३॥

śāṇollīḍhendumaṇivaddyotante yasya kiṅkarāḥ |tameva sthāpayāmyantaḥ cidambarasabhānaṭam || 43||

नन्दनारण्यलीला मे न कदाचन रोचते ।यमीक्ष्य यमिनां गम्यं चिदम्बरसभानटम् ॥ ४४॥

nandanāraṇyalīlā me na kadācana rocate |yamīkṣya yamināṃ gamyaṃ cidambarasabhānaṭam || 44||

दर्शं दर्शं प्रनृत्यामि मोहद्रुमदवानलम् ।चिन्तितार्थप्रदातारं चिदम्बरसभानटम् ॥ ४५॥

darśaṃ darśaṃ pranṛtyāmi mohadrumadavānalam |cintitārthapradātāraṃ cidambarasabhānaṭam || 45||

नादपञ्चक(६)लातीतव्युष्टसौधविहारिणम् ।नाथं नाहं विमुञ्चामि चिदम्बरसभानटम् ॥ ४६॥

nādapañcaka(6)lātītavyuṣṭasaudhavihāriṇam |nāthaṃ nāhaṃ vimuñcāmi cidambarasabhānaṭam || 46||

(७)थस्थितानन्दसम्मेलसम्भूतगणनायकम् ।सभाजयामि सर्वेशं चिदम्बरसभानटम् ॥ ४७॥

(7)thasthitānandasammelasambhūtagaṇanāyakam |sabhājayāmi sarveśaṃ cidambarasabhānaṭam || 47||

(८)रसाम्बुतेजःपवन व्योमार्केन्द्वात्म विग्रहम् ।दिगम्बरेशं ध्यायामि चिदम्बरसभानटम् ॥ ४८॥

(8)rasāmbutejaḥpavana vyomārkendvātma vigraham |digambareśaṃ dhyāyāmi cidambarasabhānaṭam || 48||

कत(९)योरैक्यमुद्भाति यस्य मन्त्राक्षरान्तरे ।स्मरामि मन्त्रदेहं तं चिदम्बरसभानटम् ॥ ४९॥

kata(9)yoraikyamudbhāti yasya mantrākṣarāntare |smarāmi mantradehaṃ taṃ cidambarasabhānaṭam || 49||

पाशच्छेत्तारमाप्तानां प्रौढकृत्येषु पञ्चसु ।पतिं प्रकाशयाम्यन्तः चिदम्बरसभानटम् ॥ ५०॥

pāśacchettāramāptānāṃ prauḍhakṛtyeṣu pañcasu |patiṃ prakāśayāmyantaḥ cidambarasabhānaṭam || 50||

दुरितध्वान्तमार्ताण्डं दुर्मोहार्णवतारकम् ।अर्चाम्याम्नायजीवातुं चिदम्बरसभानटम् ॥ ५१॥

duritadhvāntamārtāṇḍaṃ durmohārṇavatārakam |arcāmyāmnāyajīvātuṃ cidambarasabhānaṭam || 51||

काम्भोजकर्णिकापीठकमनीयसुखासनम् ।आलोकये हृदादर्शे चिदम्बरसभानटम् ॥ ५२॥

kāmbhojakarṇikāpīṭhakamanīyasukhāsanam |ālokaye hṛdādarśe cidambarasabhānaṭam || 52||

पूर्णैर्मनोरथैर्युक्ताः पूजया यस्य देहिनः ।चित्तभित्तौ लिखाम्येनं चिदम्बरसभानटम् ॥ ५३॥

pūrṇairmanorathairyuktāḥ pūjayā yasya dehinaḥ |cittabhittau likhāmyenaṃ cidambarasabhānaṭam || 53||

जडाजडविभेदेन जगद्यस्माद्विजृम्भते ।प्रपन्नोऽस्मि तमात्मानं चिदम्बरसभानटम् ॥ ५४॥

jaḍājaḍavibhedena jagadyasmādvijṛmbhate |prapanno'smi tamātmānaṃ cidambarasabhānaṭam || 54||

यातुधानाः प्रणश्यन्ति याश्चान्याः क्षुद्रदेवताः ।यद्।ह्ध्यानात्तमहं प्रेक्षे चिदम्बरसभानटम् ॥ ५५॥

yātudhānāḥ praṇaśyanti yāścānyāḥ kṣudradevatāḥ |yad|hdhyānāttamahaṃ prekṣe cidambarasabhānaṭam || 55||

मिथ्यासत्यपरिच्छेत्ता द्रष्टा वक्ता प्रमातृता(कः) ।हन्ता च तं समेतोऽस्मि चिदम्बरसभानटम् ॥ ५६॥

mithyāsatyaparicchettā draṣṭā vaktā pramātṛtā(kaḥ) |hantā ca taṃ sameto'smi cidambarasabhānaṭam || 56||

ह्रीमामनन्ति छन्दांसि या माया सेत्यभिष्टुताम् ।तयाऽनन्यं वरं याचे चिदम्बरसभानटम् ॥ ५७॥

hrīmāmananti chandāṃsi yā māyā setyabhiṣṭutām |tayā'nanyaṃ varaṃ yāce cidambarasabhānaṭam || 57||

शिवकामेश्वरी यस्य शृङ्गारकुलदेवता ।शिवकामं तमिच्छामि चिदम्बरसभानटम् ॥ ५८॥

śivakāmeśvarī yasya śṛṅgārakuladevatā |śivakāmaṃ tamicchāmi cidambarasabhānaṭam || 58||

वासना विश्वशक्तीनां वामाङ्गे यस्य दृश्यते ।अध्यक्षयाम्यधीशं तं चिदम्बरसभानटम् ॥ ५९॥

vāsanā viśvaśaktīnāṃ vāmāṅge yasya dṛśyate |adhyakṣayāmyadhīśaṃ taṃ cidambarasabhānaṭam || 59||

यैका मन्त्रमयी यस्य स्फुरत्ता या वियन्मयी ।तमात्मीकुरुते चित्तं चिदम्बरसभानटम् ॥ ६०॥

yaikā mantramayī yasya sphurattā yā viyanmayī |tamātmīkurute cittaṃ cidambarasabhānaṭam || 60||

नतिर्यस्य प्रसूते द्राक् सम्पत्तन्त्राणि देहिनाम् ।नतोऽस्मि हृदयाब्जस्थं चिदम्बरसभानटम् ॥ ६१॥

natiryasya prasūte drāk sampattantrāṇi dehinām |nato'smi hṛdayābjasthaṃ cidambarasabhānaṭam || 61||

मस्तकेऽब्जे सहस्रारे यः शक्त्या सह नृत्यति ।पश्यामि तमहं भावात् चिदम्बरसभानटम् ॥ ६२॥

mastake'bje sahasrāre yaḥ śaktyā saha nṛtyati |paśyāmi tamahaṃ bhāvāt cidambarasabhānaṭam || 62||

इत्येवं श्रीमदानन्दनटेशस्य महामनोः ।वर्णाद्यस्तवराजोऽयं चिन्तामणिसमाह्वयः (१०)॥ ६३॥

ityevaṃ śrīmadānandanaṭeśasya mahāmanoḥ |varṇādyastavarājo'yaṃ cintāmaṇisamāhvayaḥ (10)|| 63||

चिन्तामणिवदिष्टार्थदायी नृत्तेश्वरप्रियः ।प्रभातकाले पठतां मातृकावर्णसिद्विदः ॥ ६४॥

cintāmaṇivadiṣṭārthadāyī nṛtteśvarapriyaḥ |prabhātakāle paṭhatāṃ mātṛkāvarṇasidvidaḥ || 64||

नित्यंसङ्कीर्तयेद्धीमान् त्रिकालं च विशेषतः ।चित्ते नृत्यति तस्येशः चिदम्बरसभानटः ॥ ६५॥

nityaṃsaṅkīrtayeddhīmān trikālaṃ ca viśeṣataḥ |citte nṛtyati tasyeśaḥ cidambarasabhānaṭaḥ || 65||

दुःस्वप्नदुःशकुनदुर्गमदुर्मनस्कदुष्कृत्यदुष्टतरदुःखनिकराश्च बाधाः ।यत्कीर्तनादतितरां प्रशमनं प्रयान्तिश्रीनृत्तराजपदमेत्यपुनर्भवं च ॥ ६६॥

duḥsvapnaduḥśakunadurgamadurmanaskaduṣkṛtyaduṣṭataraduḥkhanikarāśca bādhāḥ |yatkīrtanādatitarāṃ praśamanaṃ prayāntiśrīnṛttarājapadametyapunarbhavaṃ ca || 66||

इति चिदम्बररहस्ये मन्त्रकल्पतः श्रीनटेश्वरचिन्तामणिविद्यास्तवः सम्पूर्णः ।१\। शब्दस्य प्रवृत्तयः परापश्यन्तीमध्यमावैस्वर्यः ।२\। म्नाअभ्यासे(इति धातुः) । अभ्यासः पारम्पर्येण वृत्तिः ।३\। क्तीतिसंयुक्ताक्षरपरः गुरुमुखैकवेद्यः ।४\। षोडशसु राजस्वन्यतमः इक्ष्वाकुवंश्यः ।५\। ततयोगार्णः संयुक्ततकास्प्तेत्याकारकः ।६\। नादादिपञ्चकलातीतंब्रह्मरन्ध्रस्थानं तत्रव्युष्टं प्रभातंसौधं सभा तस्मिन् विहारिणंविहरण शीलम् ।७\। थपर्वतः ।८\। रसा भूमिः । आत्मा यजमानः इति अष्टमूर्तिः ।९\। कतयोरेकवर्णाकारकं ऐक्यङ्क्तेति।१०\। ॐ ह्रीं परञ्ज्योतिः हंस हंस व्योम व्योम व्योम्ना शक्ति शिवज्योतिरानन्दनृत्तपरप्रकाशानन्दनाय रक्तपादुकां पूजयामि ह्रीं शिवाय नमः इति मनुः ।

iti cidambararahasye mantrakalpataḥ śrīnaṭeśvaracintāmaṇividyāstavaḥ sampūrṇaḥ | 1\| śabdasya pravṛttayaḥ parāpaśyantīmadhyamāvaisvaryaḥ | 2\| mnāabhyāse(iti dhātuḥ) | abhyāsaḥ pāramparyeṇa vṛttiḥ | 3\| ktītisaṃyuktākṣaraparaḥ gurumukhaikavedyaḥ | 4\| ṣoḍaśasu rājasvanyatamaḥ ikṣvākuvaṃśyaḥ | 5\| tatayogārṇaḥ saṃyuktatakāsptetyākārakaḥ | 6\| nādādipañcakalātītaṃbrahmarandhrasthānaṃ tatravyuṣṭaṃ prabhātaṃsaudhaṃ sabhā tasmin vihāriṇaṃviharaṇa śīlam | 7\| thaparvataḥ | 8\| rasā bhūmiḥ | ātmā yajamānaḥ iti aṣṭamūrtiḥ | 9\| katayorekavarṇākārakaṃ aikyaṅkteti| 10\| oṃ hrīṃ parañjyotiḥ haṃsa haṃsa vyoma vyoma vyomnā śakti śivajyotirānandanṛttaparaprakāśānandanāya raktapādukāṃ pūjayāmi hrīṃ śivāya namaḥ iti manuḥ |