महादेवस्तुतिः २ Shri Mahadeva Stuti

रुद्राय शितिकण्ठाय सुरूपाय सुवर्चसे ।कपर्दिने करालाय हर्यक्ष्णे वरदाय च ॥ १॥

rudrāya śitikaṇṭhāya surūpāya suvarcase |kapardine karālāya haryakṣṇe varadāya ca || 1||

तृष्णे पूष्णे दशभिदे देवानामधिपाय च ।क्षेम्या(य) हरिनेत्राय स्थाणवे पुरुषाय च ॥ २॥

tṛṣṇe pūṣṇe daśabhide devānāmadhipāya ca |kṣemyā(ya) harinetrāya sthāṇave puruṣāya ca || 2||

हरिकेशाय मुण्डाय क्रोधायोत्तारणाय च ।भास्वराय सुतीर्थाय देवदेवाय रंहसे ॥ ३॥

harikeśāya muṇḍāya krodhāyottāraṇāya ca |bhāsvarāya sutīrthāya devadevāya raṃhase || 3||

उष्णीषिणे सुवक्त्राय पशुहस्ताय पार्षिणे ।हिरण्यबाहवे राजन्योग्राय पतये दिशाम् ॥ ४॥

uṣṇīṣiṇe suvaktrāya paśuhastāya pārṣiṇe |hiraṇyabāhave rājanyogrāya pataye diśām || 4||

पशूनां पतये चैव भूतानां पतये नमः ।वृषाय मातृभक्ताय सेनान्ये मध्यमाय च ॥ ५॥

paśūnāṃ pataye caiva bhūtānāṃ pataye namaḥ |vṛṣāya mātṛbhaktāya senānye madhyamāya ca || 5||

महात्मने चानङ्गाय सर्वाङ्गाय प्रमाथिने ।तथा रुद्राणीपतये पृथवे कृत्तिवाससे ॥ ६॥

mahātmane cānaṅgāya sarvāṅgāya pramāthine |tathā rudrāṇīpataye pṛthave kṛttivāsase || 6||

कपालभूषिणे नित्यं सुवर्णमकुटाय च ।महादेवाय कृष्णाय त्र्यम्बकाय हराय च ॥ ७॥

kapālabhūṣiṇe nityaṃ suvarṇamakuṭāya ca |mahādevāya kṛṣṇāya tryambakāya harāya ca || 7||

क्रोधनायानृशंसाय मृत्यवे बाहुशालिने ।दण्डिने दृप्ततपसे तथैवाक्रूरकर्मिणे ॥ ८॥

krodhanāyānṛśaṃsāya mṛtyave bāhuśāline |daṇḍine dṛptatapase tathaivākrūrakarmiṇe || 8||

सहस्रशिरसे चैव सहस्रचरणाय च ।विरूपाय सुरूपाय महारूपाय दंष्ट्रिणे ॥ ९॥

sahasraśirase caiva sahasracaraṇāya ca |virūpāya surūpāya mahārūpāya daṃṣṭriṇe || 9||

पिनाकिनं महादेवं महाभोगिनमव्ययम् ।त्रिशूलपाणिं वरदं त्र्यम्बकं भुवनेश्वरम् ॥ १०॥

pinākinaṃ mahādevaṃ mahābhoginamavyayam |triśūlapāṇiṃ varadaṃ tryambakaṃ bhuvaneśvaram || 10||

त्रिपुरघ्नं त्रिनयनं त्रिलोकेशं महौजसम् ।प्रभवं सर्वभूतानां धातारं धरणीधरम् ॥ ११॥

tripuraghnaṃ trinayanaṃ trilokeśaṃ mahaujasam |prabhavaṃ sarvabhūtānāṃ dhātāraṃ dharaṇīdharam || 11||

ईशानं शङ्करं शर्वं शिवं विश्वेश्वरं भवम् ।उमापतिं पशुपतिं विश्वरूपं महेश्वरम् ॥ १२॥

īśānaṃ śaṅkaraṃ śarvaṃ śivaṃ viśveśvaraṃ bhavam |umāpatiṃ paśupatiṃ viśvarūpaṃ maheśvaram || 12||

विरूपाक्षं दशभुजं विष्यद्गङ्गं वृषध्वजम् ।उग्रं स्थाणुं शिवं घोरं शर्वं गौरीशमीश्वरम् ॥ १३॥

virūpākṣaṃ daśabhujaṃ viṣyadgaṅgaṃ vṛṣadhvajam |ugraṃ sthāṇuṃ śivaṃ ghoraṃ śarvaṃ gaurīśamīśvaram || 13||

शितिकण्ठमजं शुभ्रं पृथुं विधुहरं हरम् ।विश्वरूपं विरूपाक्षं बहुरूपमुमापतिम् ॥ १४॥

śitikaṇṭhamajaṃ śubhraṃ pṛthuṃ vidhuharaṃ haram |viśvarūpaṃ virūpākṣaṃ bahurūpamumāpatim || 14||

प्रणम्य शिरसा देवं नागाङ्गदधरं हरम् ।शरण्यं शरणं यामि महादेवं चतुर्मुखम् ॥ १५॥

praṇamya śirasā devaṃ nāgāṅgadadharaṃ haram |śaraṇyaṃ śaraṇaṃ yāmi mahādevaṃ caturmukham || 15||

विरोचमानं वपुषा दिव्याभरणभूषितम् ।अनाद्यन्तमजं शम्भुं सर्वव्यापिनमीश्वरम् ॥ १६॥

virocamānaṃ vapuṣā divyābharaṇabhūṣitam |anādyantamajaṃ śambhuṃ sarvavyāpinamīśvaram || 16||

निस्त्रैगुण्यं निरुद्योगं निर्मलं निधिमोजसाम् ।प्रणम्य प्राञ्जलिः शर्वं प्रयामि शरणं हरम् ॥ १७॥

nistraiguṇyaṃ nirudyogaṃ nirmalaṃ nidhimojasām |praṇamya prāñjaliḥ śarvaṃ prayāmi śaraṇaṃ haram || 17||

निष्कलं निर्मलं नित्यमकारणमलेपनम् ।अध्यात्मवेदमासाद्य प्रयामि शरणं मुहुः ॥ १८॥

niṣkalaṃ nirmalaṃ nityamakāraṇamalepanam |adhyātmavedamāsādya prayāmi śaraṇaṃ muhuḥ || 18||

यस्य नित्यं विदुः स्थानं मोक्षमध्यात्मचिन्तकाः ।योगीशं तत्त्वमार्गस्थाः कैवल्यपदमक्षरम् ॥ १९॥

yasya nityaṃ viduḥ sthānaṃ mokṣamadhyātmacintakāḥ |yogīśaṃ tattvamārgasthāḥ kaivalyapadamakṣaram || 19||

यं विदुः सङ्गनिर्मुक्ताः सामान्यं समदर्शिनः ।तं प्रपद्ये जगद्योनिमयोनिं निर्गुणात्मकम् ॥ २०॥

yaṃ viduḥ saṅganirmuktāḥ sāmānyaṃ samadarśinaḥ |taṃ prapadye jagadyonimayoniṃ nirguṇātmakam || 20||

असृजद्यस्तु भूतादीन् सप्तलोकान् सनातनान् ।स्थितः सत्योपरि स्थाणुं तं प्रपद्ये सनातनम् ॥ २१॥

asṛjadyastu bhūtādīn saptalokān sanātanān |sthitaḥ satyopari sthāṇuṃ taṃ prapadye sanātanam || 21||

भक्तानां सुलभं तं तु दुर्लभं दूरपातिनाम् ।अदूरस्थममुं देवं प्रकृतेः परतः स्थितम् ।नमामि सर्वलोकस्थं व्रजामि शरणं शिवम् ॥ २२॥

bhaktānāṃ sulabhaṃ taṃ tu durlabhaṃ dūrapātinām |adūrasthamamuṃ devaṃ prakṛteḥ parataḥ sthitam |namāmi sarvalokasthaṃ vrajāmi śaraṇaṃ śivam || 22||

॥ इति श्रीमहाभारते आश्वमेधिके पर्वणि संवर्तमरुत्तसंवादेमञ्जवद्गिरिवासमहादेवस्तुतिर्नाम सप्तमाध्यायः सम्पूर्णः ॥

|| iti śrīmahābhārate āśvamedhike parvaṇi saṃvartamaruttasaṃvādemañjavadgirivāsamahādevastutirnāma saptamādhyāyaḥ sampūrṇaḥ ||