शिवशङ्करस्तुतिः परशुरामकृता Shivashankara Stuti

परशुराम उवाचनमस्ते देवदेवेश नमस्ते परमेश्वर ।नमस्ते जगतो नाथ नमस्ते त्रिपुरान्तक ॥ १॥

paraśurāma uvācanamaste devadeveśa namaste parameśvara |namaste jagato nātha namaste tripurāntaka || 1||

नमस्ते सकलाध्यक्ष नमस्ते भक्तवत्सल ।नमस्ते सर्वभूतेश नमस्ते वृषभध्वज ॥ २॥

namaste sakalādhyakṣa namaste bhaktavatsala |namaste sarvabhūteśa namaste vṛṣabhadhvaja || 2||

नमस्ते सकलाधीश नमस्ते करुणाकर ।नमस्ते सकलावास नमस्ते नीललोहित ॥ ३॥

namaste sakalādhīśa namaste karuṇākara |namaste sakalāvāsa namaste nīlalohita || 3||

नमः सकलदेवारिगणनाशाय शूलिने ।कपालिने नमस्तुभ्यं सर्वलोकैकपालिने ॥ ४॥

namaḥ sakaladevārigaṇanāśāya śūline |kapāline namastubhyaṃ sarvalokaikapāline || 4||

श्मशानवासिने नित्यं नमः कैलासवासिने ।नमोऽस्तु पाशिने तुभ्यं कालकूटविषाशिने ॥ ५॥

śmaśānavāsine nityaṃ namaḥ kailāsavāsine |namo'stu pāśine tubhyaṃ kālakūṭaviṣāśine || 5||

विभवेऽमरवन्द्याय प्रभवे ते स्वयम्भुवे ।नमोऽखिलजगत्कर्मसाक्षिभूताय शम्भवे ॥ ६॥

vibhave'maravandyāya prabhave te svayambhuve |namo'khilajagatkarmasākṣibhūtāya śambhave || 6||

नमस्त्रिपथगाफेनभासिगार्द्धन्दुमौलिने ।महाभोगीन्द्रहाराय शिवाय परमात्मने ॥ ७॥

namastripathagāphenabhāsigārddhandumauline |mahābhogīndrahārāya śivāya paramātmane || 7||

भस्मसंच्छन्नदेहाय नमोऽर्काग्नीन्दुचक्षुषे ।कपर्दिने नमस्तुभ्यमन्धकासुरमर्द्दिने ॥ ८॥

bhasmasaṃcchannadehāya namo'rkāgnīnducakṣuṣe |kapardine namastubhyamandhakāsuramarddine || 8||

त्रिपुरध्वंसिने दक्षयज्ञविध्वंसिने नमः ।गिरिजाकुचकाश्मीरविरञ्जितमहोरसे ॥ ९॥

tripuradhvaṃsine dakṣayajñavidhvaṃsine namaḥ |girijākucakāśmīravirañjitamahorase || 9||

महादेवाय महते नमस्ते कृत्तिवाससे ।योगिध्येयस्वरूपाय शिवायाचिन्त्यतेजसे ॥ १०॥

mahādevāya mahate namaste kṛttivāsase |yogidhyeyasvarūpāya śivāyācintyatejase || 10||

स्वभक्तहृदयाम्भोजकर्णिकामध्यवर्त्तिने ।सकलागमसिद्धान्तसाररूपाय ते नमः ॥ ११॥

svabhaktahṛdayāmbhojakarṇikāmadhyavarttine |sakalāgamasiddhāntasārarūpāya te namaḥ || 11||

नमो निखिलयोगेन्द्रबोधनायामृतात्मने ।शङ्करायाखिलव्याप्तमहिम्ने परमात्मने ॥ १२॥

namo nikhilayogendrabodhanāyāmṛtātmane |śaṅkarāyākhilavyāptamahimne paramātmane || 12||

नमः शर्वाय शान्ताय ब्रह्मणे विश्वरुपिणे ।आदिमध्यान्तहीनाय नित्यायाव्यक्तमूर्त्तये ॥ १३॥

namaḥ śarvāya śāntāya brahmaṇe viśvarupiṇe |ādimadhyāntahīnāya nityāyāvyaktamūrttaye || 13||

व्यक्ताव्यक्तस्वरूपाय स्थूलसूक्ष्मात्मने नमः ।नमो वेदान्तवेद्याय विश्वविज्ञानरूपिणे ॥ १४॥

vyaktāvyaktasvarūpāya sthūlasūkṣmātmane namaḥ |namo vedāntavedyāya viśvavijñānarūpiṇe || 14||

नमः सुरासुरश्रेणिमौलिपुष्पार्चिताङ्घ्रये ।श्रीकण्ठाय जगद्धात्रे लोककर्त्रे नमोनमः ॥ १५॥

namaḥ surāsuraśreṇimaulipuṣpārcitāṅghraye |śrīkaṇṭhāya jagaddhātre lokakartre namonamaḥ || 15||

रजोगुणात्मने तुभ्यं विश्वसृष्टिविधायिने ।हिरण्यगर्भरूपाय हराय जगदादये ॥ १६॥

rajoguṇātmane tubhyaṃ viśvasṛṣṭividhāyine |hiraṇyagarbharūpāya harāya jagadādaye || 16||

नमो विश्वात्मने लोकस्थितिव्यापारकारिणे ।सत्त्वविज्ञानरूपाय पराय प्रत्यगात्मने ॥१७॥

namo viśvātmane lokasthitivyāpārakāriṇe |sattvavijñānarūpāya parāya pratyagātmane ||17||

तमोगुणविकाराय जगत्संहारकारिणे ।कल्पान्ते रुद्ररूपाय परापरविदे नमः ॥ १८॥

tamoguṇavikārāya jagatsaṃhārakāriṇe |kalpānte rudrarūpāya parāparavide namaḥ || 18||

अविकाराय नित्याय नमः सदसदात्मने ।बुद्धिबुद्धिप्रबोधाय बुद्धीन्द्रियविकारिणे ॥ १९॥

avikārāya nityāya namaḥ sadasadātmane |buddhibuddhiprabodhāya buddhīndriyavikāriṇe || 19||

वस्वादित्यमरुद्भिश्च साध्यरुद्राश्विभेदतः ।यन्मायाभिन्नमतयो देवास्तस्मै नमोनमः ॥ २०॥

vasvādityamarudbhiśca sādhyarudrāśvibhedataḥ |yanmāyābhinnamatayo devāstasmai namonamaḥ || 20||

अविकारमजं नित्यं सूक्ष्मरूपमनौपमम् ।तव यत्तन्न जानन्ति योगिनोऽपि सदाऽमलाः ॥ २१॥

avikāramajaṃ nityaṃ sūkṣmarūpamanaupamam |tava yattanna jānanti yogino'pi sadā'malāḥ || 21||

त्वामविज्ञाय दुर्ज्ञेयं सम्यग्ब्रह्मादयोऽपि हि ।संसरन्ति भवे नूनं न तत्कर्मात्मकाश्चिरम् ॥ २२॥

tvāmavijñāya durjñeyaṃ samyagbrahmādayo'pi hi |saṃsaranti bhave nūnaṃ na tatkarmātmakāściram || 22||

यावन्नोपैति चरणौ तवाज्ञानविघातिनः ।तावद्भ्रमति संसारे पण्डितोऽचेतनोऽपि वा ॥ २३॥

yāvannopaiti caraṇau tavājñānavighātinaḥ |tāvadbhramati saṃsāre paṇḍito'cetano'pi vā || 23||

स एव दक्षः स कृती स मुनिः स च पण्डितः ।भवतश्चरणाम्भोजे येन बुद्धिः स्थिरीकृता ॥ २४॥

sa eva dakṣaḥ sa kṛtī sa muniḥ sa ca paṇḍitaḥ |bhavataścaraṇāmbhoje yena buddhiḥ sthirīkṛtā || 24||

सुसूक्ष्मत्वेन गहनः सद्भावस्ते त्रयीमयः ।विदुषामपि मूढेन स मया ज्ञायते कथम् ॥ २५॥

susūkṣmatvena gahanaḥ sadbhāvaste trayīmayaḥ |viduṣāmapi mūḍhena sa mayā jñāyate katham || 25||

अशब्दगोचरत्वेन महिम्नस्तव साम्प्रतम् ।स्तोतुमप्यनलं सम्यक्त्वामहं जडधीर्यतः ॥ २६॥

aśabdagocaratvena mahimnastava sāmpratam |stotumapyanalaṃ samyaktvāmahaṃ jaḍadhīryataḥ || 26||

तस्मादज्ञानतो वापि मया भक्त्यैव संस्तुतः ।प्रीतश्च भव देवेश ननु त्वं भक्तवत्सलः ॥ २७॥

tasmādajñānato vāpi mayā bhaktyaiva saṃstutaḥ |prītaśca bhava deveśa nanu tvaṃ bhaktavatsalaḥ || 27||

॥ इति ब्रह्माण्डपुराणान्तर्गता परशुरामप्रोक्ता शिवशङ्करस्तुतिः ॥ब्रह्माण्डपुराणम् ॥ मध्यभागः ३ उपोद्घातपादः ।ब्रह्माण्डपुराण । मध्यभागः ३ । अध्यायः २५ जाम्दग्नेयकृतशिवस्तुतिः । ५ ३१ ॥ब्रह्माण्डपुराण । मध्यभागः ३ । अध्यायः २५ – जाम्दग्नेयकृतशिवस्तुतिः । ५ – ३१ ॥

|| iti brahmāṇḍapurāṇāntargatā paraśurāmaproktā śivaśaṅkarastutiḥ ||brahmāṇḍapurāṇam || madhyabhāgaḥ 3 upodghātapādaḥ |brahmāṇḍapurāṇa | madhyabhāgaḥ 3 | adhyāyaḥ 25 jāmdagneyakṛtaśivastutiḥ | 5 31 ||brahmāṇḍapurāṇa | madhyabhāgaḥ 3 | adhyāyaḥ 25 – jāmdagneyakṛtaśivastutiḥ | 5 – 31 ||