महादेवार्चनमहिमा ऋषिगौतमप्रोक्ता Rishigautamaprokta Mahadevarchana Mahima

शिवलिङ्गार्चनध्यानशस्त्रेणातिशितेन तु ।संसारपाशविच्छेदो भवतीत्यवगम्यताम् ॥ १॥

śivaliṅgārcanadhyānaśastreṇātiśitena tu |saṃsārapāśavicchedo bhavatītyavagamyatām || 1||

संसारसागरे तावत् भयं भवति सर्वथा ।यावन्नाराधितो देवो महादेवो भवः प्रभुः ॥ २॥

saṃsārasāgare tāvat bhayaṃ bhavati sarvathā |yāvannārādhito devo mahādevo bhavaḥ prabhuḥ || 2||

यस्तु देवो महादेवः सर्वदेवशिखामणिः ।तन्नामस्मरणोद्योगेऽप्यघराशिलयो भवेत् ॥ ३॥

yastu devo mahādevaḥ sarvadevaśikhāmaṇiḥ |tannāmasmaraṇodyoge'pyagharāśilayo bhavet || 3||

श्रीमहादेवनामानि स्मर्तव्यानीति यस्य धीः ।तस्य पापाचलाद्भीतिः कदापि न भविष्यति ॥ ४॥

śrīmahādevanāmāni smartavyānīti yasya dhīḥ |tasya pāpācalādbhītiḥ kadāpi na bhaviṣyati || 4||

महादेवार्चने बुद्धिः तावन्नैवोपजायते ।यावन्नाघकुलध्वान्तविलयः शङ्करः स्मृतः ॥ ५॥

mahādevārcane buddhiḥ tāvannaivopajāyate |yāvannāghakuladhvāntavilayaḥ śaṅkaraḥ smṛtaḥ || 5||

शङ्करस्मरणाकारप्रभाकरकरादृते ।चित्तपापान्धकारस्य विलयो न भवेत ध्रुवम् ॥ ६॥

śaṅkarasmaraṇākāraprabhākarakarādṛte |cittapāpāndhakārasya vilayo na bhaveta dhruvam || 6||

श्रीमहादेवभक्तानां भवबन्धभयं कुतः ।भवस्मरणमात्रेण भवराशिर्विनश्यति ॥ ७॥

śrīmahādevabhaktānāṃ bhavabandhabhayaṃ kutaḥ |bhavasmaraṇamātreṇa bhavarāśirvinaśyati || 7||

भवगाढान्धकारोऽपि महामोहप्रदः सदा ।तद्भक्तिभानुमालोक्य स्वत एव विनश्यति ॥ ८॥

bhavagāḍhāndhakāro'pi mahāmohapradaḥ sadā |tadbhaktibhānumālokya svata eva vinaśyati || 8||

दिवाभीतनिभं यत्तु भयं संसारलक्षणम् ।तन्महेशार्चनाकारसूरे दृष्टे विनश्यति ॥ ९॥

divābhītanibhaṃ yattu bhayaṃ saṃsāralakṣaṇam |tanmaheśārcanākārasūre dṛṣṭe vinaśyati || 9||

महादेवप्रसादस्तु सहसा जायतेऽपि न ।तज्ज्ञाने सति संसारभयमेव न जायते ॥ १०॥

mahādevaprasādastu sahasā jāyate'pi na |tajjñāne sati saṃsārabhayameva na jāyate || 10||

महादेवं सकृद्वाऽपि यः स्मरेत् भस्मभूषणः ।तत्पाददर्शनेनापि न संसारमहाभयम् ॥ ११॥

mahādevaṃ sakṛdvā'pi yaḥ smaret bhasmabhūṣaṇaḥ |tatpādadarśanenāpi na saṃsāramahābhayam || 11||

महादेवार्चने भक्तिः सहसा नोपजायते ।सा चेज्जाता ततो दुःखं कालादपि न जायते ॥ १२॥

mahādevārcane bhaktiḥ sahasā nopajāyate |sā cejjātā tato duḥkhaṃ kālādapi na jāyate || 12||

महादेवाभिधानानि सुधाधारानिभानि यः ।शृणोति तत्कुलस्यापि न संसारभयं भवेत् ॥ १३॥

mahādevābhidhānāni sudhādhārānibhāni yaḥ |śṛṇoti tatkulasyāpi na saṃsārabhayaṃ bhavet || 13||

महादेवाभिधानेन श्रुतेनापि स्मृतेन वा ।संसारसागरापारतरिणाऽपि तरन्ति ते ॥ १४॥

mahādevābhidhānena śrutenāpi smṛtena vā |saṃsārasāgarāpāratariṇā'pi taranti te || 14||

महादेवं सकृत् ध्यात्वा स्मृत्वा तन्नाम सादरम् ।सम्भारनागरं तीर्त्वा प्रयान्ति शिवम दरम् ॥ १५॥

mahādevaṃ sakṛt dhyātvā smṛtvā tannāma sādaram |sambhāranāgaraṃ tīrtvā prayānti śivama daram || 15||

भाग्यवन्तो महादेवनामरूपां सुधां मुहुः ।स्मृत्वा कर्णपुटैः पीत्वा स्तन्यानि पिबन्ति हि ॥ १६॥

bhāgyavanto mahādevanāmarūpāṃ sudhāṃ muhuḥ |smṛtvā karṇapuṭaiḥ pītvā stanyāni pibanti hi || 16||

भक्या कर्णसुवर्णपात्रगमहादेवाभिधानामृतंपीत्वा तिष्ठ गरिष्ठनिष्ठुरवचोचीचीप्रपञ्चैरलम् ।तेनैवाशु वरिष्ठतां व्रज पुनः संसारघोरार्णवंव्याकीर्णामिव कर्णधारवरतां प्राप्य त्वया सत्वरम् ॥ १७॥

bhakyā karṇasuvarṇapātragamahādevābhidhānāmṛtaṃpītvā tiṣṭha gariṣṭhaniṣṭhuravacocīcīprapañcairalam |tenaivāśu variṣṭhatāṃ vraja punaḥ saṃsāraghorārṇavaṃvyākīrṇāmiva karṇadhāravaratāṃ prāpya tvayā satvaram || 17||

महादेवाभिधानेन निधानेन परं धनी ।तद्धनं सावधानेन साधुभिर्ध्यायते हृदि ॥ १८॥

mahādevābhidhānena nidhānena paraṃ dhanī |taddhanaṃ sāvadhānena sādhubhirdhyāyate hṛdi || 18||

महादेवाभिधानस्य ध्वनिमध्वनि साधवः ।सुधाधुनीमिव प्राप्य सानन्दं प्राप्नुवन्ति हि ॥ १९॥

mahādevābhidhānasya dhvanimadhvani sādhavaḥ |sudhādhunīmiva prāpya sānandaṃ prāpnuvanti hi || 19||

महादेवाभिधानेन महानन्दसमृद्धयः ।वृद्धिं प्रयान्ति तासां तु परमानन्दसन्निभाः ॥ २०॥

mahādevābhidhānena mahānandasamṛddhayaḥ |vṛddhiṃ prayānti tāsāṃ tu paramānandasannibhāḥ || 20||

महादेवं मुहुर्ध्यात्वा सकृद्वा पुण्यकोटिभिः ।पुण्यराशिमनुप्राप्य पुण्यवानेव जायते ॥ २१॥

mahādevaṃ muhurdhyātvā sakṛdvā puṇyakoṭibhiḥ |puṇyarāśimanuprāpya puṇyavāneva jāyate || 21||

पापघोराब्धिमग्नानां क्षणात् तरणकारणम् ।महादेवभिधानं हि महापत्तारकं परम् ॥ २२॥

pāpaghorābdhimagnānāṃ kṣaṇāt taraṇakāraṇam |mahādevabhidhānaṃ hi mahāpattārakaṃ param || 22||

महादेवाभिधारूपममृतं शिवनिर्मितम् ।संसारोस्मरापारविषयशिविनाशकम् ॥ २३॥

mahādevābhidhārūpamamṛtaṃ śivanirmitam |saṃsārosmarāpāraviṣayaśivināśakam || 23||

संसारसागरे घोरे मग्नो भग्नमनोरथः ।अनाथनाथं न कथं विश्वनाथमहं भजे ॥ २४॥

saṃsārasāgare ghore magno bhagnamanorathaḥ |anāthanāthaṃ na kathaṃ viśvanāthamahaṃ bhaje || 24||

इदं दृष्टं शिवस्थाने पापनाशाय जायते ।पापघोराब्धिममग्नानां क्षणात् तरणकारणम् ॥ २५॥

idaṃ dṛṣṭaṃ śivasthāne pāpanāśāya jāyate |pāpaghorābdhimamagnānāṃ kṣaṇāt taraṇakāraṇam || 25||

इतोऽप्यत्युत्तमं लिङ्गं लिङ्गं तीर्थेश्वराभिधम् ।इतोऽप्यत्युत्तमं लिङ्गं मण्डलेऽस्मिन् न दृश्यते ॥ २६॥

ito'pyatyuttamaṃ liṅgaṃ liṅgaṃ tīrtheśvarābhidham |ito'pyatyuttamaṃ liṅgaṃ maṇḍale'smin na dṛśyate || 26||

तत्राद्य गत्वा तीर्थेशः पूजनीयः प्रयत्नतः ।सोमत्रयोदशी सेयं पातार्द्रासंयुता तथा ॥ २७॥

tatrādya gatvā tīrtheśaḥ pūjanīyaḥ prayatnataḥ |somatrayodaśī seyaṃ pātārdrāsaṃyutā tathā || 27||

॥ इति शिवरहस्यान्तर्गते ऋषिगौतमप्रोक्ता महादेवार्चनमहिमा सम्पूर्णा ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ३६। १७४९ ॥

|| iti śivarahasyāntargate ṛṣigautamaproktā mahādevārcanamahimā sampūrṇā |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 36| 1749 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ३६। १७-४९ ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 36| 17-49 ||