महादेवस्तुतिः ऋषिभिः कृता Rishibhih Krita Mahadeva Stuti

वन्दे सुराराधितमिन्दुमौलिं वन्दे भवानीरमणं महेशम् ।वन्दे महामेरुशरासनोरुकोटिप्रभाकूटविघट्टिताङ्गम् ॥ १॥

vande surārādhitamindumauliṃ vande bhavānīramaṇaṃ maheśam |vande mahāmeruśarāsanorukoṭiprabhākūṭavighaṭṭitāṅgam || 1||

वन्दे महानन्दपदप्रदानं विहारलोलं खलकालकालम् ।वन्दे पुरश्रीपरिहारहेतुं वन्दे स्मरारातिमुमासहायम् ॥ २॥

vande mahānandapadapradānaṃ vihāralolaṃ khalakālakālam |vande puraśrīparihārahetuṃ vande smarārātimumāsahāyam || 2||

वन्दे तमर्धेन्दुकलावतंसं ताराविहाराकरसंवृतांसम् ।वन्दे मनोमानसराजहंसं वन्दे भवानीस्मितमन्दहासम् ॥ ३॥

vande tamardhendukalāvataṃsaṃ tārāvihārākarasaṃvṛtāṃsam |vande manomānasarājahaṃsaṃ vande bhavānīsmitamandahāsam || 3||

वन्दे मुकुन्दाद्यमरासुराणां वन्द्यं च वेदान्तगणैः स्तुतं च ।वन्दे प्रपन्नार्तिहरं परं तं वन्दे मुहुः शङ्करमेव वन्दे ॥ ४॥

vande mukundādyamarāsurāṇāṃ vandyaṃ ca vedāntagaṇaiḥ stutaṃ ca |vande prapannārtiharaṃ paraṃ taṃ vande muhuḥ śaṅkarameva vande || 4||

वन्दे जगत्सर्गविधानहेतुं वन्दे जगत्पालनहेतुमीढ्यम् ।वन्दे जगत्संहरणक्षमं त्वां वन्दे भवानीमुखपद्मभानुम् ॥ ५॥

vande jagatsargavidhānahetuṃ vande jagatpālanahetumīḍhyam |vande jagatsaṃharaṇakṣamaṃ tvāṃ vande bhavānīmukhapadmabhānum || 5||

वन्दे मुहुः संहृतकालकूटं वन्दे स्मरारिं मदनान्तकं तम् ।वन्दे विभूतिस्फुरदुन्नताङ्गं रुद्राक्षमालाकुलभूषणं तम् ॥ ६॥

vande muhuḥ saṃhṛtakālakūṭaṃ vande smarāriṃ madanāntakaṃ tam |vande vibhūtisphuradunnatāṅgaṃ rudrākṣamālākulabhūṣaṇaṃ tam || 6||

वन्दे तमेवान्धकदुर्मदान्ध महान्धकारप्रलयानलं तम् ।वन्दे मुदा तं गिरिराजकन्याकुचाङ्ककाश्मीररजःकणाङ्कम् ॥ ७॥

vande tamevāndhakadurmadāndha mahāndhakārapralayānalaṃ tam |vande mudā taṃ girirājakanyākucāṅkakāśmīrarajaḥkaṇāṅkam || 7||

वन्दे मुहुः भालविलोचनं तं वन्दे त्रिशूलस्फुरदग्रहस्तम् ।वन्दे पुनस्त्वां मृगशावहस्तं वन्दे शिवालङ्कृतवामभागम् ॥ ८॥

vande muhuḥ bhālavilocanaṃ taṃ vande triśūlasphuradagrahastam |vande punastvāṃ mṛgaśāvahastaṃ vande śivālaṅkṛtavāmabhāgam || 8||

वन्दे चतुर्वर्गफलप्रदं तं वन्दे वृषाधीश्वर केतनं तम् ।वन्दे जटाजूटतटाभिघातवित्रस्तनक्षत्रगणावृतं तम् ॥ ९॥

vande caturvargaphalapradaṃ taṃ vande vṛṣādhīśvara ketanaṃ tam |vande jaṭājūṭataṭābhighātavitrastanakṣatragaṇāvṛtaṃ tam || 9||

॥ इति शिवरहस्यान्तर्गते ऋषिभिः कृता महादेवस्तुतिः सम्पूर्णा ॥बृहतीपुष्पार्चनमहिमा॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः २६। २२३० ॥

|| iti śivarahasyāntargate ṛṣibhiḥ kṛtā mahādevastutiḥ sampūrṇā ||bṛhatīpuṣpārcanamahimā|| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 26| 2230 ||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः २६। २२-३० ॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 26| 22-30 ||