शिवस्तोत्रम् (देवैः कृतं १० शिवपुराणान्तर्गतम् देवदेव जगद्व्यापिन्परमेश सदाशिव) Devaih Kritam 10 Shiva Stotram

देवा ऊचुः ।देवदेव जगद्व्यापिन्परमेश सदाशिव ।जगदीश जगन्नाथ सम्प्रसीद जगन्मय ॥ १२॥

devā ūcuḥ |devadeva jagadvyāpinparameśa sadāśiva |jagadīśa jagannātha samprasīda jaganmaya || 12||

सर्वेषामपि भावानां त्वमात्मा हेतुरीश्वरः ।निर्विकारोऽव्ययो नित्यो निर्विकल्पोऽक्षरः परः ॥ १३॥

sarveṣāmapi bhāvānāṃ tvamātmā heturīśvaraḥ |nirvikāro'vyayo nityo nirvikalpo'kṣaraḥ paraḥ || 13||

आद्यन्तावस्य यन्मध्यमिदमन्यदहम्बहिः ।यतोऽव्ययः सनैतानि तत्सत्यम्ब्रह्म चिद्भवान् ॥ १४॥

ādyantāvasya yanmadhyamidamanyadahambahiḥ |yato'vyayaḥ sanaitāni tatsatyambrahma cidbhavān || 14||

तवैव चरणाम्भोजं मुक्तिकामा दृढव्रताः ।विसृज्योभयतस्सङ्गं मुनयस्समुपासते ॥ १५॥

tavaiva caraṇāmbhojaṃ muktikāmā dṛḍhavratāḥ |visṛjyobhayatassaṅgaṃ munayassamupāsate || 15||

त्वम्ब्रह्म पूर्णममृतं विशोकं निर्गुणं परम् ।आनन्दमात्रमव्यग्रमविकारमनात्मकम् ॥ १६॥

tvambrahma pūrṇamamṛtaṃ viśokaṃ nirguṇaṃ param |ānandamātramavyagramavikāramanātmakam || 16||

विश्वस्य हेतुरुदयस्थितिसंयमनस्य हि ।तदपेक्षतयाऽऽत्मेशोऽनपेक्षस्सर्वदा विभुः ॥ १७॥

viśvasya heturudayasthitisaṃyamanasya hi |tadapekṣatayā''tmeśo'napekṣassarvadā vibhuḥ || 17||

एकस्त्वमेव सदसद्द्वयमद्वयमेव च ।स्वर्णं कृताकृतमिव वस्तुभेदो न चैव हि ॥ १६॥

ekastvameva sadasaddvayamadvayameva ca |svarṇaṃ kṛtākṛtamiva vastubhedo na caiva hi || 16||

अज्ञानतस्त्वयि जनैर्विकल्पो विदितो यतः ।तस्माद्भ्रमप्रतीकारो निरुपाधेर्न हि स्वतः ॥ १९॥

ajñānatastvayi janairvikalpo vidito yataḥ |tasmādbhramapratīkāro nirupādherna hi svataḥ || 19||

धन्या वयं महेशान तव दर्शनमात्रतः ।दृढभक्तजनानन्दप्रदश्शम्भो दयां कुरु ॥ २०॥

dhanyā vayaṃ maheśāna tava darśanamātrataḥ |dṛḍhabhaktajanānandapradaśśambho dayāṃ kuru || 20||

त्वमादिस्त्वमनादिश्च प्रकृतेस्त्वं परः पुमान् ।विश्वेश्वरो जगन्नाथो निर्विकारः परात्परः ॥ २१॥

tvamādistvamanādiśca prakṛtestvaṃ paraḥ pumān |viśveśvaro jagannātho nirvikāraḥ parātparaḥ || 21||

योऽयं ब्रह्मास्ति रजसा विश्वमूर्तिः पितामहः ।त्वत्प्रसादात्प्रभो विष्णुस्सत्त्वेन पुरुषोत्तमः ॥ २२॥

yo'yaṃ brahmāsti rajasā viśvamūrtiḥ pitāmahaḥ |tvatprasādātprabho viṣṇussattvena puruṣottamaḥ || 22||

कालाग्निरुद्रस्तमसा परमात्मा गुणः परः ।सदाशिवो महेशानस्सर्वव्यापी महेश्वरः ॥ २३॥

kālāgnirudrastamasā paramātmā guṇaḥ paraḥ |sadāśivo maheśānassarvavyāpī maheśvaraḥ || 23||

व्यक्तं महच्च भूतादिस्तन्मात्राणीन्द्रियाणि च ।त्वयैवाधिष्ठितान्येव विश्वमूर्ते महेश्वर ॥ २४॥

vyaktaṃ mahacca bhūtādistanmātrāṇīndriyāṇi ca |tvayaivādhiṣṭhitānyeva viśvamūrte maheśvara || 24||

महादेव परेशान करुणाकर शङ्कर ।प्रसीद देवदेवेश प्रसीद पुरुषोत्तम ॥ २५॥

mahādeva pareśāna karuṇākara śaṅkara |prasīda devadeveśa prasīda puruṣottama || 25||

वासांसि सागरास्सप्त दिशश्चैव महाभुजाः ।द्यौर्मूर्द्धा ते विभोर्नाभिः खं वायुर्नासिका ततः ॥ २६॥

vāsāṃsi sāgarāssapta diśaścaiva mahābhujāḥ |dyaurmūrddhā te vibhornābhiḥ khaṃ vāyurnāsikā tataḥ || 26||

चक्षूंष्यग्नी रविस्सोमः केशा मेघास्तव प्रभो ।नक्षत्रतारकाद्याश्च ग्रहाश्चैव विभूषणम् ॥ २७॥

cakṣūṃṣyagnī ravissomaḥ keśā meghāstava prabho |nakṣatratārakādyāśca grahāścaiva vibhūṣaṇam || 27||

कथं स्तोष्यामि देवेश त्वां विभो परमेश्वर ।वाचामगोचरोऽसि त्वं मनसा चापि शङ्कर ॥ २८॥

kathaṃ stoṣyāmi deveśa tvāṃ vibho parameśvara |vācāmagocaro'si tvaṃ manasā cāpi śaṅkara || 28||

पञ्चास्याय च रुद्राय पञ्चाशत्कोटिमूर्तये ।त्र्यधिपाय वरिष्ठाय विद्यातत्त्वाय ते नमः ॥ २९॥

pañcāsyāya ca rudrāya pañcāśatkoṭimūrtaye |tryadhipāya variṣṭhāya vidyātattvāya te namaḥ || 29||

अनिर्देश्याय नित्याय विद्युज्ज्वालाय रूपिणे ।अग्निवर्णाय देवाय शङ्कराय नमो नमः ॥ ३०॥

anirdeśyāya nityāya vidyujjvālāya rūpiṇe |agnivarṇāya devāya śaṅkarāya namo namaḥ || 30||

विद्युत्कोटिप्रतीकाशमष्टकोणं सुशोभनम् ।रूपमास्थाय लोकेऽस्मिन्संस्थिताय नमो नमः ॥ ३१॥

vidyutkoṭipratīkāśamaṣṭakoṇaṃ suśobhanam |rūpamāsthāya loke'sminsaṃsthitāya namo namaḥ || 31||

इति शिवपुराणे रुद्रसंहितायां पार्वतीखण्डेएकोनपञ्चाशत्तमाध्यायान्तर्गतं देवैः कृतंशिवस्तोत्रं समाप्तम् ।शिवपुराण । रुद्रसंहिता ३ । पार्वतीखण्ड । अध्याय ४९/१२३१॥शिवपुराण । रुद्रसंहिता ३ । पार्वतीखण्ड । अध्याय ४९/१२-३१॥

iti śivapurāṇe rudrasaṃhitāyāṃ pārvatīkhaṇḍeekonapañcāśattamādhyāyāntargataṃ devaiḥ kṛtaṃśivastotraṃ samāptam |śivapurāṇa | rudrasaṃhitā 3 | pārvatīkhaṇḍa | adhyāya 49/1231||śivapurāṇa | rudrasaṃhitā 3 | pārvatīkhaṇḍa | adhyāya 49/12-31||