शिवस्तोत्रम् (देवैः कृतं ०८ शिवपुराणान्तर्गतम् नमो भगवते तुभ्यं यत एतच्चराचरम्) Devaih Kritam 08 Shiva Stotram

(नन्दाव्रतविधानशिवस्तुतिवर्णनम्)देवा ऊचुः ।नमो भगवते तुभ्यं यत एतच्चराचरम् ।पुरुषाय महेशाय परेशाय महात्मने ॥ ३६॥

(nandāvratavidhānaśivastutivarṇanam)devā ūcuḥ |namo bhagavate tubhyaṃ yata etaccarācaram |puruṣāya maheśāya pareśāya mahātmane || 36||

आदिबीजाय सर्वेषां चिद्रूपाय पराय च ।ब्रह्मणे निर्विकाराय प्रकृतेः पुरुषस्य च ॥ ३७॥

ādibījāya sarveṣāṃ cidrūpāya parāya ca |brahmaṇe nirvikārāya prakṛteḥ puruṣasya ca || 37||

य इदं प्रतिपञ्च्येदं येनेदं विचकास्ति हि ।यस्मादिदं यतश्चेदं यस्येदं त्वं च यत्नतः ॥ ३८॥

ya idaṃ pratipañcyedaṃ yenedaṃ vicakāsti hi |yasmādidaṃ yataścedaṃ yasyedaṃ tvaṃ ca yatnataḥ || 38||

योऽस्मात्परस्माच्च परो निर्विकारी महाप्रभुः ।ईक्षते यस्स्वात्मनीदं तं नताः स्म स्वयम्भुवम् ॥ ३९॥

yo'smātparasmācca paro nirvikārī mahāprabhuḥ |īkṣate yassvātmanīdaṃ taṃ natāḥ sma svayambhuvam || 39||

अविद्धदृक् परः साक्षी सर्वात्माऽनेकरूपधृक् ।आत्मभूतः परब्रह्म तपन्तं शरणं गताः ॥ २\।१५\।४०॥न यस्य देवा ऋषयः सिद्धाश्च न विदुः पदम् ।कः पुनर्जन्तुरपरो ज्ञातुमर्हति वेदितुम् ॥ ४१॥

aviddhadṛk paraḥ sākṣī sarvātmā'nekarūpadhṛk |ātmabhūtaḥ parabrahma tapantaṃ śaraṇaṃ gatāḥ || 2\|15\|40||na yasya devā ṛṣayaḥ siddhāśca na viduḥ padam |kaḥ punarjanturaparo jñātumarhati veditum || 41||

दिदृक्षवो यस्य पदं मुक्तसङ्गास्सुसाधवः ।चरितं सुगतिर्नस्त्वं सलोकव्रतमव्रणम् ॥ ४२॥

didṛkṣavo yasya padaṃ muktasaṅgāssusādhavaḥ |caritaṃ sugatirnastvaṃ salokavratamavraṇam || 42||

त्वज्जन्मादिविकारा नो विद्यन्ते केऽपि दुःखदाः ।तथापि मायया त्वं हि गृह्णासि कृपया च तान् ॥ ४३॥

tvajjanmādivikārā no vidyante ke'pi duḥkhadāḥ |tathāpi māyayā tvaṃ hi gṛhṇāsi kṛpayā ca tān || 43||

तस्मै नमः परेशाय तुभ्यमाश्चर्यकर्मणे ।नमो गिरां विदूराय ब्रह्मणे परमात्मने ॥ ४४॥

tasmai namaḥ pareśāya tubhyamāścaryakarmaṇe |namo girāṃ vidūrāya brahmaṇe paramātmane || 44||

अरूपायोरुरूपाय परायानन्तशक्तये ।त्रिलोकपतये सर्वसाक्षिणे सर्वगाय च ॥ ४५॥

arūpāyorurūpāya parāyānantaśaktaye |trilokapataye sarvasākṣiṇe sarvagāya ca || 45||

नम आत्मप्रदीपाय निर्वाणसुखसम्पदे ।ज्ञानात्मने नमस्तेऽस्तु व्यापकायेश्वराय च ॥ ४६॥

nama ātmapradīpāya nirvāṇasukhasampade |jñānātmane namaste'stu vyāpakāyeśvarāya ca || 46||

नैष्कर्म्येण सुलभ्याय कैवल्यपतये नमः ।पुरुषाय परेशाय नमस्ते सर्वदाय च ॥ ४७॥

naiṣkarmyeṇa sulabhyāya kaivalyapataye namaḥ |puruṣāya pareśāya namaste sarvadāya ca || 47||

क्षेत्रज्ञायात्मरूपाय सर्वप्रत्ययहेतवे ॥ ४८॥

kṣetrajñāyātmarūpāya sarvapratyayahetave || 48||

सर्वाध्यक्षाय महते मूलप्रकृतये नमः ।पुरुषाय परेशाय नमस्ते सर्वदाय च ॥ ४९॥

sarvādhyakṣāya mahate mūlaprakṛtaye namaḥ |puruṣāya pareśāya namaste sarvadāya ca || 49||

त्रिनेत्रायेषुवक्त्राय सदाभासाय ते नमः ।सर्वेन्द्रियगुणद्रष्ट्रे निष्कारण नमोऽस्तु ते ॥ २\।१५\।५०॥त्रिलोककारणायाथापवर्गाय नमो नमः ।अपवर्गप्रदायाशु शरणागततारिणे ॥ ५१॥

trinetrāyeṣuvaktrāya sadābhāsāya te namaḥ |sarvendriyaguṇadraṣṭre niṣkāraṇa namo'stu te || 2\|15\|50||trilokakāraṇāyāthāpavargāya namo namaḥ |apavargapradāyāśu śaraṇāgatatāriṇe || 51||

सर्वाम्नायागमानां चोदधये परमेष्ठिने ।परायणाय भक्तानां गुणानां च नमोऽस्तु ते ॥ ५२॥

sarvāmnāyāgamānāṃ codadhaye parameṣṭhine |parāyaṇāya bhaktānāṃ guṇānāṃ ca namo'stu te || 52||

नमो गुणारणिच्छन्न चिदूष्माय महेश्वर ।मूढदुष्प्राप्तरूपाय ज्ञानिहृद्वासिने सदा ॥ ५३॥

namo guṇāraṇicchanna cidūṣmāya maheśvara |mūḍhaduṣprāptarūpāya jñānihṛdvāsine sadā || 53||

पशुपाशविमोक्षाय भक्तसन्मुक्तिदाय च ।स्वप्रकाशाय नित्यायाऽव्ययायाजस्रसंविदे ॥ ५४॥

paśupāśavimokṣāya bhaktasanmuktidāya ca |svaprakāśāya nityāyā'vyayāyājasrasaṃvide || 54||

प्रत्यग्द्रष्ट्रेऽविकाराय परमैश्वर्यधारिणे ।यं भजन्ति चतुर्वर्गे कामयन्तीष्टसद्गतिम् ।सोऽभूदकरुणस्त्वं नः प्रसन्नो भव ते नमः ॥ ५५॥

pratyagdraṣṭre'vikārāya paramaiśvaryadhāriṇe |yaṃ bhajanti caturvarge kāmayantīṣṭasadgatim |so'bhūdakaruṇastvaṃ naḥ prasanno bhava te namaḥ || 55||

एकान्तिनः कञ्चनार्थं भक्ता वाञ्छन्ति यस्य न ।केवलं चरितं ते ते गायन्ति परमङ्गलम् ॥ ५६॥

ekāntinaḥ kañcanārthaṃ bhaktā vāñchanti yasya na |kevalaṃ caritaṃ te te gāyanti paramaṅgalam || 56||

अक्षरं परमं ब्रह्म तमव्यक्ताकृतिं विभुम् ।अध्यात्मयोगगम्यं त्वां परिपूर्णं स्तुमो वयम् ॥ ५७॥

akṣaraṃ paramaṃ brahma tamavyaktākṛtiṃ vibhum |adhyātmayogagamyaṃ tvāṃ paripūrṇaṃ stumo vayam || 57||

अतीन्द्रियमनाधारं सर्वाधारमहेतुकम् ।अनन्तमाद्यं सूक्ष्मं त्वां प्रणमामोऽखिलेश्वरम् ॥ ५८॥

atīndriyamanādhāraṃ sarvādhāramahetukam |anantamādyaṃ sūkṣmaṃ tvāṃ praṇamāmo'khileśvaram || 58||

हर्यादयोऽखिला देवास्तथा लोकाश्चराचराः ।नामरूपविभेदेन फल्ग्व्या च कलया कृताः ॥ ५९॥

haryādayo'khilā devāstathā lokāścarācarāḥ |nāmarūpavibhedena phalgvyā ca kalayā kṛtāḥ || 59||

यथार्चिषोऽग्नेस्सवितुर्यान्ति निर्यान्ति वासकृत् ।गभस्तयस्तथायं वै प्रवाहो गौण उच्यते ॥ २\।१५\।६०॥न त्वं देवोऽसुरो मर्त्यो न तिर्यङ्न द्विजः प्रभो ।न स्त्री न षण्ढो न पुमान् सदसन्न च किञ्चन ॥ ६१॥

yathārciṣo'gnessavituryānti niryānti vāsakṛt |gabhastayastathāyaṃ vai pravāho gauṇa ucyate || 2\|15\|60||na tvaṃ devo'suro martyo na tiryaṅna dvijaḥ prabho |na strī na ṣaṇḍho na pumān sadasanna ca kiñcana || 61||

निषेधशेषस्सर्वं त्वं विश्वकृद्विश्वपालकः ।विश्वलयकृद्विश्वात्मा प्रणतास्स्मस्तमीश्वरम् ॥ ६२॥

niṣedhaśeṣassarvaṃ tvaṃ viśvakṛdviśvapālakaḥ |viśvalayakṛdviśvātmā praṇatāssmastamīśvaram || 62||

योगरन्धितकर्माणो यं प्रपश्यन्ति योगिनः ।योगसम्भाविते चित्ते योगेशं त्वां नता वयम् ॥ ६३॥

yogarandhitakarmāṇo yaṃ prapaśyanti yoginaḥ |yogasambhāvite citte yogeśaṃ tvāṃ natā vayam || 63||

नमोऽस्तु तेऽसह्यवेग शक्तित्रय त्रयीमय ।नमः प्रसन्नपालाय नमस्ते भूरिशक्तये ॥ ६४॥

namo'stu te'sahyavega śaktitraya trayīmaya |namaḥ prasannapālāya namaste bhūriśaktaye || 64||

कदिन्द्रियाणां दुर्गेशानवाप्य परवर्त्मने ।भक्तोद्धाररतायाथ नमस्ते गूढवर्चसे ॥ ६५॥

kadindriyāṇāṃ durgeśānavāpya paravartmane |bhaktoddhāraratāyātha namaste gūḍhavarcase || 65||

यच्छक्त्याहं धियाऽऽत्मानं हन्त वेद न मूढधीः ।तं दुरत्ययमाहात्म्यं त्वां नतः स्मो महाप्रभुम् ॥ ६६॥

yacchaktyāhaṃ dhiyā''tmānaṃ hanta veda na mūḍhadhīḥ |taṃ duratyayamāhātmyaṃ tvāṃ nataḥ smo mahāprabhum || 66||

ब्रह्मोवाच ।इति स्तुत्वा महादेवं सर्वे विष्ण्वादिकास्सुराः ।तूष्णीमासन्प्रभोरग्रे सद्भक्तिनतकन्धराः ॥ ६७॥

brahmovāca |iti stutvā mahādevaṃ sarve viṣṇvādikāssurāḥ |tūṣṇīmāsanprabhoragre sadbhaktinatakandharāḥ || 67||

इति श्रीशिवमहापुराणे द्वितीयायां रुद्रसंहितायांद्वितीये सतीखण्डे नन्दाव्रतविधानशिवस्तुतिवर्णनं नाम पञ्चदशोऽध्यायः ॥ १५॥

iti śrīśivamahāpurāṇe dvitīyāyāṃ rudrasaṃhitāyāṃdvitīye satīkhaṇḍe nandāvratavidhānaśivastutivarṇanaṃ nāma pañcadaśo'dhyāyaḥ || 15||

शिवपुराण । रुद्रसंहिता । सतीखण्ड । अध्याय १५/३६६६॥शिवपुराण । रुद्रसंहिता । सतीखण्ड । अध्याय १५/३६-६६॥

śivapurāṇa | rudrasaṃhitā | satīkhaṇḍa | adhyāya 15/3666||śivapurāṇa | rudrasaṃhitā | satīkhaṇḍa | adhyāya 15/36-66||