गोरक्षस्तोत्रराजः स्तवराजः Goraksha Shtotrarajah

ॐ अस्य श्रीगोरक्षनाथस्तोत्रमन्त्रस्य विष्णु ऋषिः ।अनुष्टुप् छन्दः । श्रीगोरक्ष निरञ्जनो देवता ।विमला शक्तिः । धर्मार्थकाममोक्षार्थे जपे विनियोगः ।आकाशमन्दिरं चैव तारारत्नैश्च मण्डितम् ।तस्य मध्ये स्थितो नित्यं वराभयकराम्बुजः ॥ १॥

oṃ asya śrīgorakṣanāthastotramantrasya viṣṇu ṛṣiḥ |anuṣṭup chandaḥ | śrīgorakṣa nirañjano devatā |vimalā śaktiḥ | dharmārthakāmamokṣārthe jape viniyogaḥ |ākāśamandiraṃ caiva tārāratnaiśca maṇḍitam |tasya madhye sthito nityaṃ varābhayakarāmbujaḥ || 1||

निरञ्जनो निराकारो निर्विकल्पो निरामयः ।अगम्योऽगोचरोऽलक्ष्यो गोरक्षः सिद्धवन्दितः ॥ २॥

nirañjano nirākāro nirvikalpo nirāmayaḥ |agamyo'gocaro'lakṣyo gorakṣaḥ siddhavanditaḥ || 2||

कौपीनी च परध्यानी तप्तकाञ्चनसन्निभः ।ध्येयः शिवः परो देवो जटामुकुटमण्डितः ॥ ३॥

kaupīnī ca paradhyānī taptakāñcanasannibhaḥ |dhyeyaḥ śivaḥ paro devo jaṭāmukuṭamaṇḍitaḥ || 3||

चिन्तामणिः पुमर्थानां चन्द्रार्काग्नित्रिलोचनः ।सिद्धगन्धर्वयक्षेड्यो देवर्षिगणसेवितः ॥ ४॥

cintāmaṇiḥ pumarthānāṃ candrārkāgnitrilocanaḥ |siddhagandharvayakṣeḍyo devarṣigaṇasevitaḥ || 4||

विमला वामभागे च निजा शक्तिः परात्मिका ।एवं ध्यात्वा शिवं योगी बद्धसिद्धासनः सदा ॥ ५॥

vimalā vāmabhāge ca nijā śaktiḥ parātmikā |evaṃ dhyātvā śivaṃ yogī baddhasiddhāsanaḥ sadā || 5||

इदं स्तोत्रं पठेन्नित्यं सर्वसिद्धिफलप्रदम् ।श्रीगोरक्षस्तोत्रराजं दुर्लभं भुवनत्रये ॥ ६॥

idaṃ stotraṃ paṭhennityaṃ sarvasiddhiphalapradam |śrīgorakṣastotrarājaṃ durlabhaṃ bhuvanatraye || 6||

देवासुरमनुष्याश्च न जानन्ति महीतले ।सम्यग्ज्ञात्वा स्तुतो देवः सर्वकामप्रदायकः ॥ ७॥

devāsuramanuṣyāśca na jānanti mahītale |samyagjñātvā stuto devaḥ sarvakāmapradāyakaḥ || 7||

श्रीगोरक्ष ! नमस्तुभ्यं नमस्तुभ्यं सदाशिव ! ।सम्पूर्णाय नमस्तुभ्यं नमो लक्ष्मीप्रियाय ते ॥ ८॥

śrīgorakṣa ! namastubhyaṃ namastubhyaṃ sadāśiva ! |sampūrṇāya namastubhyaṃ namo lakṣmīpriyāya te || 8||

सर्वेषामेव जन्तूनां पापपुण्यविपाकदः ।परं ब्रह्म परं धाम ! श्रीगोरक्ष ! नमोऽस्तुते ॥ ९॥

sarveṣāmeva jantūnāṃ pāpapuṇyavipākadaḥ |paraṃ brahma paraṃ dhāma ! śrīgorakṣa ! namo'stute || 9||

गकारो गुणसंयुक्तो रकारो रूपलक्षणः ।क्षकारेणाक्षयं ब्रह्म श्रीगोरक्ष ! नमोऽस्तुते ॥ १०॥

gakāro guṇasaṃyukto rakāro rūpalakṣaṇaḥ |kṣakāreṇākṣayaṃ brahma śrīgorakṣa ! namo'stute || 10||

ब्रह्मणां च परं ब्रह्म रुद्रादीनां शिरोमणिः ।त्रैलोक्यं निर्मितं येन श्रीगोरक्ष ! नमोऽस्तुते ॥ ११॥

brahmaṇāṃ ca paraṃ brahma rudrādīnāṃ śiromaṇiḥ |trailokyaṃ nirmitaṃ yena śrīgorakṣa ! namo'stute || 11||

क्षमाधारी जितक्रोधः सन्तोषी विजितेन्द्रियः ।धर्माधर्मपरित्यागी श्रीगोरक्ष ! नमोऽस्तुते ॥ १२॥

kṣamādhārī jitakrodhaḥ santoṣī vijitendriyaḥ |dharmādharmaparityāgī śrīgorakṣa ! namo'stute || 12||

ब्रह्मचारी सदाशुद्धः कायकर्मी महातपाः ।आशापाशो हृतो येन श्रीगोरक्ष ! नमोऽस्तुते ॥ १३॥

brahmacārī sadāśuddhaḥ kāyakarmī mahātapāḥ |āśāpāśo hṛto yena śrīgorakṣa ! namo'stute || 13||

ज्ञानी धर्मेषु यो लीनः सत्यवादी दृढव्रतः ।आत्मध्यानरतो नित्यं श्रीगोरक्ष ! नमोऽस्तुते ॥ १४॥

jñānī dharmeṣu yo līnaḥ satyavādī dṛḍhavrataḥ |ātmadhyānarato nityaṃ śrīgorakṣa ! namo'stute || 14||

शुभाशुभविनिर्मुक्तो भावाभावविवर्जितः ।निजभक्ते स्वयं दाता श्रीगोरक्ष ! नमोऽस्तुते ॥ १५॥

śubhāśubhavinirmukto bhāvābhāvavivarjitaḥ |nijabhakte svayaṃ dātā śrīgorakṣa ! namo'stute || 15||

नरलोके नराधीशो नागलोके च नागराट् ।देवलोके च देवेन्द्रः श्रीगोरक्ष ! नमोऽस्तुते ॥ १६॥

naraloke narādhīśo nāgaloke ca nāgarāṭ |devaloke ca devendraḥ śrīgorakṣa ! namo'stute || 16||

राजन्यानाञ्च यो राजा महाराजो महेश्वरः ।महीपतिर्महीन्द्रश्च श्रीगोरक्ष ! नमोऽस्तुते ॥ १७॥

rājanyānāñca yo rājā mahārājo maheśvaraḥ |mahīpatirmahīndraśca śrīgorakṣa ! namo'stute || 17||

समस्तरसभोक्ता यो यः सदा भोगवर्जितः ।सदा समरसो यश्च श्रीगोरक्ष ! नमोऽस्तुते ॥ १८॥

samastarasabhoktā yo yaḥ sadā bhogavarjitaḥ |sadā samaraso yaśca śrīgorakṣa ! namo'stute || 18||

हठयोगविधाता च मत्स्यकीर्तिविवर्धनः ।योगिभिर्मनसा गम्यः श्रीगोरक्ष ! नमोऽस्तुते ॥ १९॥

haṭhayogavidhātā ca matsyakīrtivivardhanaḥ |yogibhirmanasā gamyaḥ śrīgorakṣa ! namo'stute || 19||

रेचकः पूरकश्चैव कुम्भक स्त्रोटक स्तथा ।प्राणायामश्चतुर्धा ते श्रीगोरक्ष ! नमोऽस्तुते ॥ २०॥

recakaḥ pūrakaścaiva kumbhaka stroṭaka stathā |prāṇāyāmaścaturdhā te śrīgorakṣa ! namo'stute || 20||

ब्रह्मादिश्चैव बिष्णवादी रुद्रादिश्च सदाशिवः ।ज्योतिर्मयोऽनवच्छिन्नः श्रीगोरक्ष ! नमोऽस्तुते ॥ २१॥

brahmādiścaiva biṣṇavādī rudrādiśca sadāśivaḥ |jyotirmayo'navacchinnaḥ śrīgorakṣa ! namo'stute || 21||

सिद्धानाञ्च महासिद्ध ऋषीणां च ऋषीश्वरः ।योगिनाञ्चैव योगीन्द्र: श्रीगोरक्ष ! नमोऽस्तुते ॥ २२॥

siddhānāñca mahāsiddha ṛṣīṇāṃ ca ṛṣīśvaraḥ |yogināñcaiva yogīndra: śrīgorakṣa ! namo'stute || 22||

पीठादीनां महापीठं शिवादीनां महाशिव: ।मन्त्रादीनां महामन्त्रः श्रीगोरक्ष ! नमोऽस्तुते ॥ २३॥

pīṭhādīnāṃ mahāpīṭhaṃ śivādīnāṃ mahāśiva: |mantrādīnāṃ mahāmantraḥ śrīgorakṣa ! namo'stute || 23||

विश्वतेजो विश्वरुपं विश्ववन्द्यः सदाशिवः ।विश्वनामा विश्वनाथ: श्रीगोरक्ष ! नमोऽस्तुते ॥ २४॥

viśvatejo viśvarupaṃ viśvavandyaḥ sadāśivaḥ |viśvanāmā viśvanātha: śrīgorakṣa ! namo'stute || 24||

सर्वगुणो गुणाभावो निर्गुणश्च गुणस्थितः ।साकारो वा निराकारः श्रीगोरक्ष ! नमोऽस्तुते ॥ २५॥

sarvaguṇo guṇābhāvo nirguṇaśca guṇasthitaḥ |sākāro vā nirākāraḥ śrīgorakṣa ! namo'stute || 25||

अनन्तलोकनाथश्च नाथनाथशिरोमणिः ।सर्वनाथसमाराध्यः श्रीगोरक्ष ! नमोऽस्तुते ॥ २६॥

anantalokanāthaśca nāthanāthaśiromaṇiḥ |sarvanāthasamārādhyaḥ śrīgorakṣa ! namo'stute || 26||

विश्वोत्पत्तिकरश्चैव विश्वेषां प्रतिपालकः ।विश्वसंहारकर्ता च श्रीगोरक्ष ! नमोऽस्तुते ॥ २७॥

viśvotpattikaraścaiva viśveṣāṃ pratipālakaḥ |viśvasaṃhārakartā ca śrīgorakṣa ! namo'stute || 27||

उत्पत्तिस्थितिसंहार कारिणे क्लेशहारिणे ।सर्वाधारस्वरुपाय श्रीगोरक्ष ! नमोऽस्तुते ॥ २८॥

utpattisthitisaṃhāra kāriṇe kleśahāriṇe |sarvādhārasvarupāya śrīgorakṣa ! namo'stute || 28||

पिण्डब्रह्माण्डमध्ये च भुवनानि चतुर्दश ।सर्वत्र व्यापको नाथः श्रीगोरक्ष ! नमोऽस्तुते ॥ २९॥

piṇḍabrahmāṇḍamadhye ca bhuvanāni caturdaśa |sarvatra vyāpako nāthaḥ śrīgorakṣa ! namo'stute || 29||

न जानामि कुलं गोत्रं वर्णावर्णविवर्जित ! ।लक्ष्यालक्ष्यस्वरुपोऽसि श्रीगोरक्ष ! नमोऽस्तुते ॥ ३०॥

na jānāmi kulaṃ gotraṃ varṇāvarṇavivarjita ! |lakṣyālakṣyasvarupo'si śrīgorakṣa ! namo'stute || 30||

नोत्पत्तिर्न लयो नास्ते विकारो न च बन्धनम् ।सदा समरसा बृत्तिः श्रीगोरक्ष ! नमोऽस्तुते ॥ ३१॥

notpattirna layo nāste vikāro na ca bandhanam |sadā samarasā bṛttiḥ śrīgorakṣa ! namo'stute || 31||

न माता न पिता चैव न ते बन्धुः सहोदरः ।अजः स्वयम्भूः सर्वात्मा श्रीगोरक्ष ! नमोऽस्तुते ॥ ३२॥

na mātā na pitā caiva na te bandhuḥ sahodaraḥ |ajaḥ svayambhūḥ sarvātmā śrīgorakṣa ! namo'stute || 32||

अदृश्यं दृश्यते नाथ ! अश्राव्यं श्रूयते सदा ।त्वत्कृपालेशमात्रेण श्रीगोरक्ष ! नमोऽस्तुते ॥ ३३॥

adṛśyaṃ dṛśyate nātha ! aśrāvyaṃ śrūyate sadā |tvatkṛpāleśamātreṇa śrīgorakṣa ! namo'stute || 33||

सर्वत्र व्यापकः सूक्ष्मो जीवरुपी महेश्वरः ।सर्वेन्द्रियमयो नाथ ! श्रीगोरक्ष ! नमोऽस्तुते ॥ ३४ ॥

sarvatra vyāpakaḥ sūkṣmo jīvarupī maheśvaraḥ |sarvendriyamayo nātha ! śrīgorakṣa ! namo'stute || 34 ||

चन्द्रादीनां तथा शैत्यं सूर्यादीनां त्वमुष्णता ।सर्वसारस्वरुपोऽसि श्रीगोरक्ष ! नमोऽस्तुते ॥ ३५॥

candrādīnāṃ tathā śaityaṃ sūryādīnāṃ tvamuṣṇatā |sarvasārasvarupo'si śrīgorakṣa ! namo'stute || 35||

उत्तमं मध्यमं नीचं त्वया सर्व विनिर्मितम् ।यर्थवाग्निः सर्वरुपः श्रीगोरक्ष ! नमोऽस्तुते ॥ ३६॥

uttamaṃ madhyamaṃ nīcaṃ tvayā sarva vinirmitam |yarthavāgniḥ sarvarupaḥ śrīgorakṣa ! namo'stute || 36||

अण्डजस्वेदजोद्भिज्ज जेरजानां त्वमुद्भवः ।अनन्तकोटिजीवानां श्रीगोरक्ष ! नमोऽस्तुते ॥ ३७॥

aṇḍajasvedajodbhijja jerajānāṃ tvamudbhavaḥ |anantakoṭijīvānāṃ śrīgorakṣa ! namo'stute || 37||

वायुस्त्व पञ्चरुपेण प्राणिनां देहधारकः ।स्वयं सर्वमयो नाथः श्रीगोरक्ष ! नमोस्तुते ॥ ३८॥

vāyustva pañcarupeṇa prāṇināṃ dehadhārakaḥ |svayaṃ sarvamayo nāthaḥ śrīgorakṣa ! namostute || 38||

शून्यानां च परं शून्यं परेषां परमेश्वरः ।ध्यायताञ्च परंधाम श्रीगोरक्ष ! नमोऽस्तुते ॥ ३९॥

śūnyānāṃ ca paraṃ śūnyaṃ pareṣāṃ parameśvaraḥ |dhyāyatāñca paraṃdhāma śrīgorakṣa ! namo'stute || 39||

एकाकी वर्तते नित्यं भवपाशविवर्जितः ।परं ब्रह्माक्षरं ज्योतिः श्रीगोरक्ष ! नमोऽस्तुते ॥ ४०॥

ekākī vartate nityaṃ bhavapāśavivarjitaḥ |paraṃ brahmākṣaraṃ jyotiḥ śrīgorakṣa ! namo'stute || 40||

स्वर्गेषु पूज्यते दैवैर्मर्त्यलोकेषु मानवैः ।पाताले नाथलोकैश्च श्रीगोरक्ष ! नमोऽस्तुते ॥ ४१॥

svargeṣu pūjyate daivairmartyalokeṣu mānavaiḥ |pātāle nāthalokaiśca śrīgorakṣa ! namo'stute || 41||

त्रिनेत्र स्त्रिपुराराति स्त्रिवेद स्त्रिजगत्पतिः ।त्रयीवेद्य स्त्रिदेवात्मा श्रीगोरक्ष ! नमोऽस्तुते ॥ ४२॥

trinetra stripurārāti striveda strijagatpatiḥ |trayīvedya stridevātmā śrīgorakṣa ! namo'stute || 42||

सिद्धाम्नायसमाम्नाता सिद्धाम्नायैकसिद्धिदः ।सिद्धसङ्घैः सदा सेव्यः श्रीगोरक्ष ! नमोऽस्तुते ॥ ४३॥

siddhāmnāyasamāmnātā siddhāmnāyaikasiddhidaḥ |siddhasaṅghaiḥ sadā sevyaḥ śrīgorakṣa ! namo'stute || 43||

तेजःपुञ्जः स्वयं देवो दीपो दीप्तिमतामपि ।सर्वस्वान्तःस्थितं ज्योतिः श्रीगोरक्ष ! नमोऽस्तुते ॥ ४४॥

tejaḥpuñjaḥ svayaṃ devo dīpo dīptimatāmapi |sarvasvāntaḥsthitaṃ jyotiḥ śrīgorakṣa ! namo'stute || 44||

सर्वासां जीवजातीनां पापपुण्यैकसाक्षिणे ।शुभाशुभफलाध्यक्ष ! श्रीगोरक्ष ! नमोऽस्तुते ॥ ४५॥

sarvāsāṃ jīvajātīnāṃ pāpapuṇyaikasākṣiṇe |śubhāśubhaphalādhyakṣa ! śrīgorakṣa ! namo'stute || 45||

श्रीगोरक्ष स्तोत्रराजः स्वयं कृणेन निर्मितः ।जपतां भक्तिभावेन सर्वसिद्धिविधायकः ॥ ४६॥

śrīgorakṣa stotrarājaḥ svayaṃ kṛṇena nirmitaḥ |japatāṃ bhaktibhāvena sarvasiddhividhāyakaḥ || 46||

शिवस्तोत्रं विष्णुकृतं ब्रह्मणा पठितं पुनः ।ये पठन्ति सदा भक्त्या ते लभन्ते समीहितम् ॥ ४७॥

śivastotraṃ viṣṇukṛtaṃ brahmaṇā paṭhitaṃ punaḥ |ye paṭhanti sadā bhaktyā te labhante samīhitam || 47||

इदं स्तोत्रं जपेन्नित्यं सर्वपापैः प्रमुच्यते ।धनं पुत्रांस्तथा दाराँल्लभते नात्र संशयः ॥ ४८॥

idaṃ stotraṃ japennityaṃ sarvapāpaiḥ pramucyate |dhanaṃ putrāṃstathā dārām̐llabhate nātra saṃśayaḥ || 48||

मनसा कर्मणा वाचा स्तोत्रं यः पठते नरः ।उद्धरेत्सप्तगोत्राणि कुलान्येकोत्तरं शतम् ॥ ४९॥

manasā karmaṇā vācā stotraṃ yaḥ paṭhate naraḥ |uddharetsaptagotrāṇi kulānyekottaraṃ śatam || 49||

धनवाञ्जायते वंशे स्तोत्रं यस्य हृदि स्थितम् ।जन्मजन्मकृतं पापं नाशमायाति सत्वरम् ॥ ५०॥

dhanavāñjāyate vaṃśe stotraṃ yasya hṛdi sthitam |janmajanmakṛtaṃ pāpaṃ nāśamāyāti satvaram || 50||

दर्शनं लभते साक्षाच्छ्रीनाथस्य जस्पतवम् ।भूर्जपत्रे लिखेत्स्तोत्रमष्टगन्धेन भक्तितः ॥ ५१॥

darśanaṃ labhate sākṣācchrīnāthasya jaspatavam |bhūrjapatre likhetstotramaṣṭagandhena bhaktitaḥ || 51||

धारयेतकण्ठमध्ये च यमलोके न पीड्यते ।स्तोत्रराजं जपेत् प्रातः यत्स्वयं हरिणोदितम् ॥ ५२॥

dhārayetakaṇṭhamadhye ca yamaloke na pīḍyate |stotrarājaṃ japet prātaḥ yatsvayaṃ hariṇoditam || 52||

गोरक्षमक्षयं देवं मनोवाचामगोचरम् ।सिद्धनाथं सिद्धसेव्यं लभते नात्र संशयः ॥ ५३॥

gorakṣamakṣayaṃ devaṃ manovācāmagocaram |siddhanāthaṃ siddhasevyaṃ labhate nātra saṃśayaḥ || 53||

इति श्रीकल्पद्रुमतन्त्रे श्रीकृष्णविरचितःश्रीगोरक्षनाथस्तोत्रराजः सम्पूर्णः ।

iti śrīkalpadrumatantre śrīkṛṣṇaviracitaḥśrīgorakṣanāthastotrarājaḥ sampūrṇaḥ |