गीतमाला वसिष्ठगणपतिमुनिविरचिता Gitamala by Vasishtha Ganapati Muni

वाचमधितिष्ठज्ज्योतिरपि भौमम् ।किञ्चिदपि दैवं गेयमविरामम् ॥ १॥

vācamadhitiṣṭhajjyotirapi bhaumam |kiñcidapi daivaṃ geyamavirāmam || 1||

स क्रतुषु होता विप्रमुखवासी ।अत्ति च स हव्यं वेदितलभासी ॥ २॥

sa kratuṣu hotā vipramukhavāsī |atti ca sa havyaṃ veditalabhāsī || 2||

पावक वसुस्त्वं ज्वालशतमाली ।कश्चिदसि रुद्रः शास्त्रशतशाली ॥ ३॥

pāvaka vasustvaṃ jvālaśatamālī |kaścidasi rudraḥ śāstraśataśālī || 3||

पावक यदास्ये भासि मनुजानाम् ।ते तदिह राज्यं बिभ्रति पशूनाम् ॥ ४॥

pāvaka yadāsye bhāsi manujānām |te tadiha rājyaṃ bibhrati paśūnām || 4||

अस्मि तव दास्ये सञ्चर मदास्ये ।सत्सदसि मोहं यामि न यथाहम् ॥ ५॥

asmi tava dāsye sañcara madāsye |satsadasi mohaṃ yāmi na yathāham || 5||

नास्ति शरणं मे कोऽप्यवनिपृष्ठे ।अग्निमवनार्थी देवमुपतिष्ठे ॥ ६॥

nāsti śaraṇaṃ me ko'pyavanipṛṣṭhe |agnimavanārthī devamupatiṣṭhe || 6||

अस्ति करमाली कोऽपि दिवि राजा ।एष ननु कीली भाति भुवि राजा ॥ ७॥

asti karamālī ko'pi divi rājā |eṣa nanu kīlī bhāti bhuvi rājā || 7||

आह्वयति भानुं प्रातरशनाय ।त्वामनल यज्वा सायमशनाय ॥ ८॥

āhvayati bhānuṃ prātaraśanāya |tvāmanala yajvā sāyamaśanāya || 8||

एकममृतत्वां प्रातरपि सायम् ।श्रोतुमयि वाणीराह्वयति सोऽयम् ॥ ९॥

ekamamṛtatvāṃ prātarapi sāyam |śrotumayi vāṇīrāhvayati so'yam || 9||

दीप्ततरकील त्वं भजसि हव्यम् ।नेतरयि वाचां स्तोत्रमपि भव्यम् ॥ १०॥

dīptatarakīla tvaṃ bhajasi havyam |netarayi vācāṃ stotramapi bhavyam || 10||

अस्मि न समर्थो यज्ञमयि कर्तुम् ।स्तोत्रमवलम्बे शर्म तव भर्तुम् ॥ ११॥

asmi na samartho yajñamayi kartum |stotramavalambe śarma tava bhartum || 11||

पार्थिवविभूतिस्त्वं पचनकारी ।वैद्युतविभूतिर्वाक्पटलधारी ॥ १२॥

pārthivavibhūtistvaṃ pacanakārī |vaidyutavibhūtirvākpaṭaladhārī || 12||

त्वं पचनकारी भास्युदरभाण्डे ।वाक्पटलधारी देव कुलकुण्डे । १३॥

tvaṃ pacanakārī bhāsyudarabhāṇḍe |vākpaṭaladhārī deva kulakuṇḍe | 13||

भास्युदर भाण्डे भासि कुलकुण्डे ।किं च हृदि जीवो भास्यनल पिण्डे । १४॥

bhāsyudara bhāṇḍe bhāsi kulakuṇḍe |kiṃ ca hṛdi jīvo bhāsyanala piṇḍe | 14||

स्वस्य हृदि रूपं त्वामनल लोके ।भामि विमलोऽयं धाम्नि गतभीके ॥ १५॥

svasya hṛdi rūpaṃ tvāmanala loke |bhāmi vimalo'yaṃ dhāmni gatabhīke || 15||

त्वां तमहमर्थं यः स्मरति नित्यम् ।पावक विशोकः पश्यति स सत्यम् ॥ १६॥

tvāṃ tamahamarthaṃ yaḥ smarati nityam |pāvaka viśokaḥ paśyati sa satyam || 16||

यत्स्फुरणमन्तः स्वस्य धुतपापम् ।ध्येयमिदमग्ने देव तव रूपम् ॥ १७॥

yatsphuraṇamantaḥ svasya dhutapāpam |dhyeyamidamagne deva tava rūpam || 17||

देव भवसि त्वं वह्निरिह लोके ।सर्वद समन्ताद्विद्युदसि नाके । १८॥

deva bhavasi tvaṃ vahniriha loke |sarvada samantādvidyudasi nāke | 18||

अत्र जननी ते भूमिरतिपूता ।द्यौरनल देवी तत्र तव माता ॥ १९॥

atra jananī te bhūmiratipūtā |dyauranala devī tatra tava mātā || 19||

अत्र वसवस्ते वायुसख हस्ते ।वाचमनुभद्रास्तत्र तव रुद्राः ॥ २०॥

atra vasavaste vāyusakha haste |vācamanubhadrāstatra tava rudrāḥ || 20||

अत्र हृदि राजन्राजसि नराणाम् ।तत्र वरदान्तः खेलसि सुराणाम् ॥ २१॥

atra hṛdi rājanrājasi narāṇām |tatra varadāntaḥ khelasi surāṇām || 21||

अत्र जगदीश त्वं ज्वलननामा ।तत्र मघवा त्वं निःसदृशधामा ॥ २२॥

atra jagadīśa tvaṃ jvalananāmā |tatra maghavā tvaṃ niḥsadṛśadhāmā || 22||

द्वावनलशक्रौ पामरजनानाम् ।स द्वितनुरेकः पण्डितजनानाम् ॥ २३॥

dvāvanalaśakrau pāmarajanānām |sa dvitanurekaḥ paṇḍitajanānām || 23||

भानुरपि देवो लोक सुहृदेषः ।व्यापककृशानो कोऽपि तव वेषः ॥ २४॥

bhānurapi devo loka suhṛdeṣaḥ |vyāpakakṛśāno ko'pi tava veṣaḥ || 24||

देहि भगवन्मे सम्पदमुदाराम् ।बुद्धिमपि वह्ने त्रातरतिधीराम् ॥ २५॥

dehi bhagavanme sampadamudārām |buddhimapi vahne trātaratidhīrām || 25||

देव वरदाग्ने त्वं भव ममास्त्रम् ।बोधय च मह्यं सर्वमपि शास्त्रम् ॥ २६॥

deva varadāgne tvaṃ bhava mamāstram |bodhaya ca mahyaṃ sarvamapi śāstram || 26||

सुप्रभ घिया त्वां व्याप्तमखिलानि ।नौमि सकलानि क्षेमद जयानि ॥ २७॥

suprabha ghiyā tvāṃ vyāptamakhilāni |naumi sakalāni kṣemada jayāni || 27||

गाणपतमग्ने सर्वजनहृद्यम् ।भातु भयहारि च्छन्द इदमाद्यम् ॥ २८॥

gāṇapatamagne sarvajanahṛdyam |bhātu bhayahāri cchanda idamādyam || 28||

भद्रतरमूर्तिं भद्रतमकीर्तिम् ।रुद्रतनयं तं गायत महान्तम् ॥ १॥

bhadrataramūrtiṃ bhadratamakīrtim |rudratanayaṃ taṃ gāyata mahāntam || 1||

ज्योतिरिह सूक्ष्मज्वालमतिदीप्तम् ।भाति कुलकुण्डे योगिमनुजाप्तम् ॥ २॥

jyotiriha sūkṣmajvālamatidīptam |bhāti kulakuṇḍe yogimanujāptam || 2||

तन्नमत वाचो दैवतमुदारम् ।सङ्कटशतानां यातुमिह पारम् ॥ ३॥

tannamata vāco daivatamudāram |saṅkaṭaśatānāṃ yātumiha pāram || 3||

तं गणपतिं यो विस्मरति लोके ।सन्ततमभाग्यो मज्जति स शोके ॥ ४॥

taṃ gaṇapatiṃ yo vismarati loke |santatamabhāgyo majjati sa śoke || 4||

दम्पतिविहारः शीतशशिखण्डे ।नन्दननिवासो दीप्तकुलकुण्डे ॥ ५॥

dampativihāraḥ śītaśaśikhaṇḍe |nandananivāso dīptakulakuṇḍe || 5||

मित्र कुरु भक्तिं विश्वयुवराजे ।देहि हृदमुष्मै योगिनुतिभाजे ॥ ६॥

mitra kuru bhaktiṃ viśvayuvarāje |dehi hṛdamuṣmai yoginutibhāje || 6||

अत्र सशरीरे मूलशिखिरूपी ।योगविमुखो ना विन्दति न पापी ॥ ७॥

atra saśarīre mūlaśikhirūpī |yogavimukho nā vindati na pāpī || 7||

ध्यायति सदान्तर्योऽग्रभुजमेतस् ।तं भजति देवो सिद्धिरतिपूतम् ॥ ८॥

dhyāyati sadāntaryo'grabhujametas |taṃ bhajati devo siddhiratipūtam || 8||

तस्य वरभासा सन्द्रवति शीर्षम् ।यस्य परितप्तं विन्दति सहर्षम् ॥ ९॥

tasya varabhāsā sandravati śīrṣam |yasya paritaptaṃ vindati saharṣam || 9||

योगविद आहुः शीर्षरसधाराम् ।सिद्धिशतहेतुं ताममृतसाराम् ॥ १०॥

yogavida āhuḥ śīrṣarasadhārām |siddhiśatahetuṃ tāmamṛtasārām || 10||

पीठमधिरूढं मूलसरसीजम् ।सर्वभुवनानां नौमि युवराजम् ॥ ११॥

pīṭhamadhirūḍhaṃ mūlasarasījam |sarvabhuvanānāṃ naumi yuvarājam || 11||

काचन रुचिस्ते भर्गसुत पूता ।मङ्गलसुषुम्नामार्गचरमाता ॥ १२॥

kācana ruciste bhargasuta pūtā |maṅgalasuṣumnāmārgacaramātā || 12||

भाग्यमखिलानां देव तव हस्ते ।भूरि महिमानं वर्णयतु कस्ते ॥ १३॥

bhāgyamakhilānāṃ deva tava haste |bhūri mahimānaṃ varṇayatu kaste || 13||

हस्तिवदनो ना सत्वमधिदैवम् ।सङ्कटहरार्यैः सङ्गदितमेवम् ॥ १४॥

hastivadano nā satvamadhidaivam |saṅkaṭaharāryaiḥ saṅgaditamevam || 14||

त्वत्पदसरोजे यस्य हृदि भक्तिः ।काऽपि शिवसूनो तद्वचसि शक्तिः ॥ १५॥

tvatpadasaroje yasya hṛdi bhaktiḥ |kā'pi śivasūno tadvacasi śaktiḥ || 15||

त्वं खलु मघोनो धूतसुजनार्तिः ।अत्र भुवि काचित्कार्यकरमूर्तिः ॥ १६॥

tvaṃ khalu maghono dhūtasujanārtiḥ |atra bhuvi kācitkāryakaramūrtiḥ || 16||

त्वां भजति गाढप्रीतिरतिशस्ता ।सिद्धिरिति लक्ष्मीस्तामरसहस्ता ॥ १७॥

tvāṃ bhajati gāḍhaprītiratiśastā |siddhiriti lakṣmīstāmarasahastā || 17||

सश्रियमुदारां श्रीहृदयहारी ।संवितरतान्मे सर्वबलधारी ॥ १८॥

saśriyamudārāṃ śrīhṛdayahārī |saṃvitaratānme sarvabaladhārī || 18||

शीतनगजायाः सूनुरतिहृद्याम् ।भूरिकरुणो मे पूरयतु विद्याम् ॥ १९॥

śītanagajāyāḥ sūnuratihṛdyām |bhūrikaruṇo me pūrayatu vidyām || 19||

वारणमुखो मे वारयतु कष्टम् ।सर्वमपि देयाच्छर्वसुत इष्टम् ॥ २०॥

vāraṇamukho me vārayatu kaṣṭam |sarvamapi deyāccharvasuta iṣṭam || 20||

मां चरणभाजं पापहरनामा ।पालयतु शम्भोः सूनुरतिधामा ॥ २१॥

māṃ caraṇabhājaṃ pāpaharanāmā |pālayatu śambhoḥ sūnuratidhāmā || 21||

निर्जितजराधिं निर्दलितरोगम् ।दन्तिवदनो मे वर्धयतु योगम् ॥ २२॥

nirjitajarādhiṃ nirdalitarogam |dantivadano me vardhayatu yogam || 22||