सूर्यनामवर्णनस्तोत्रम् Brahmaproktam Suryanamavarnana Stotram

ब्रह्मोवाच ।नामभिः संस्तुतो देवो यैरर्कः परितुष्यति ।तानि ते कीर्तयाम्येष यथावदनुपूर्वशः ॥ १॥

brahmovāca |nāmabhiḥ saṃstuto devo yairarkaḥ parituṣyati |tāni te kīrtayāmyeṣa yathāvadanupūrvaśaḥ || 1||

नमः सूर्याय नित्याय रवये कार्यभानवे ।भास्कराय मतङ्गाय मार्तण्डाय विवस्वते ॥ २॥

namaḥ sūryāya nityāya ravaye kāryabhānave |bhāskarāya mataṅgāya mārtaṇḍāya vivasvate || 2||

आदित्यायादिदेवाय नमस्ते रश्मिमालिने ।दिवाकराय दीप्ताय अग्नये मिहिराय च ॥ ३॥

ādityāyādidevāya namaste raśmimāline |divākarāya dīptāya agnaye mihirāya ca || 3||

प्रभाकराय मित्राय नमस्तेऽदितिसम्भव ।नमो गोपतये नित्यं दिशां च पतये नमः ॥ ४॥

prabhākarāya mitrāya namaste'ditisambhava |namo gopataye nityaṃ diśāṃ ca pataye namaḥ || 4||

नमो धात्रे विधात्रे च अर्यम्णे वरुणाय च ।पूष्णे भगाय मित्राय पर्जन्यायांशवे नमः ॥ ५॥

namo dhātre vidhātre ca aryamṇe varuṇāya ca |pūṣṇe bhagāya mitrāya parjanyāyāṃśave namaḥ || 5||

नमो हितकृते नित्यं धर्माय तपनाय च ।हरये हरिताश्वाय विश्वस्य पतये नमः ॥ ६॥

namo hitakṛte nityaṃ dharmāya tapanāya ca |haraye haritāśvāya viśvasya pataye namaḥ || 6||

विष्णवे ब्रह्मणे नित्यं त्र्यम्बकाय तथात्मने ।नमस्ते सप्तलोकेश नमस्ते सप्तसप्तये ॥ ७॥

viṣṇave brahmaṇe nityaṃ tryambakāya tathātmane |namaste saptalokeśa namaste saptasaptaye || 7||

एकस्मै हि नमस्तुभ्यमेकचक्ररथाय च ।ज्योतिषां पतये नित्यं सर्वप्राणभृते नमः ॥ ८॥

ekasmai hi namastubhyamekacakrarathāya ca |jyotiṣāṃ pataye nityaṃ sarvaprāṇabhṛte namaḥ || 8||

हिताय सर्वभूतानां शिवायार्तिहराय च ।नमः पद्मप्रबोधाय नमो वेदादिमूर्तये ॥ ९॥

hitāya sarvabhūtānāṃ śivāyārtiharāya ca |namaḥ padmaprabodhāya namo vedādimūrtaye || 9||

काधिजाय नमस्तुभ्यं नमस्तारासुताय च ।भीमजाय नमस्तुभ्यं पावकाय च वै नमः ॥ १०॥

kādhijāya namastubhyaṃ namastārāsutāya ca |bhīmajāya namastubhyaṃ pāvakāya ca vai namaḥ || 10||

धिषणाय नमो नित्यं नमः कृष्णाय नित्यदा ।नमोऽस्त्वदितिपुत्राय नमो लक्ष्याय नित्यशः ॥ ११॥

dhiṣaṇāya namo nityaṃ namaḥ kṛṣṇāya nityadā |namo'stvaditiputrāya namo lakṣyāya nityaśaḥ || 11||

एतान्यादित्यनामानि मया प्रोक्तानि वै पुरा ।आराधनाय देवस्य सर्वकामेन सुव्रत ॥ १२॥

etānyādityanāmāni mayā proktāni vai purā |ārādhanāya devasya sarvakāmena suvrata || 12||

सायं प्रातः शुचिर्भूत्वा यः पठेत्सुसमाहितः ।स प्राप्नोत्यखिलान्कामान्यथाहं प्राप्तवान्पुरा ॥ १३॥

sāyaṃ prātaḥ śucirbhūtvā yaḥ paṭhetsusamāhitaḥ |sa prāpnotyakhilānkāmānyathāhaṃ prāptavānpurā || 13||

प्रसादात्तस्य देवस्य भास्करस्य महात्मनः ।श्रीकामः श्रियमाप्नोति धर्मार्थी धर्ममाप्नुयात् ॥ १४॥

prasādāttasya devasya bhāskarasya mahātmanaḥ |śrīkāmaḥ śriyamāpnoti dharmārthī dharmamāpnuyāt || 14||

आतुरो मुच्यते रोगाद्बद्धो मुच्येत बन्धनात् ।राज्यार्थी राज्यमाप्नोति कामार्थी काममाप्नुयात् ॥ १५॥

āturo mucyate rogādbaddho mucyeta bandhanāt |rājyārthī rājyamāpnoti kāmārthī kāmamāpnuyāt || 15||

एतज्जप्यं रहस्यं च सन्ध्योपासनमेव च ।एतेन जपमात्रेण नरः पापात्प्रमुच्यते ॥ १६॥

etajjapyaṃ rahasyaṃ ca sandhyopāsanameva ca |etena japamātreṇa naraḥ pāpātpramucyate || 16||

इति श्रीभविष्येपुराणे ब्राह्मे पर्वणि एकसप्ततितमाध्यायान्तर्गतंब्रह्मप्रोक्तसूर्यनामवर्णनं समाप्तम् ।भविष्यपुराण । ब्राह्मपर्व । अध्याय ७१/२१६॥भविष्यपुराण । ब्राह्मपर्व । अध्याय ७१/२-१६॥

iti śrībhaviṣyepurāṇe brāhme parvaṇi ekasaptatitamādhyāyāntargataṃbrahmaproktasūryanāmavarṇanaṃ samāptam |bhaviṣyapurāṇa | brāhmaparva | adhyāya 71/216||bhaviṣyapurāṇa | brāhmaparva | adhyāya 71/2-16||