यमाष्टकम् २ Yamashtakam from Narasimhapurana

श्रीव्यास उवाचस्वपुरुषमभिवीक्ष्य पाशहस्तं वदति यमः किल तस्य कर्णमूले ।परिहर मधुसूदनप्रपन्नान् प्रभुरहमन्यनृणां न वैष्णवानाम् ॥ १॥

śrīvyāsa uvācasvapuruṣamabhivīkṣya pāśahastaṃ vadati yamaḥ kila tasya karṇamūle |parihara madhusūdanaprapannān prabhurahamanyanṛṇāṃ na vaiṣṇavānām || 1||

अहममरगणार्चितेन धात्रा यम इति लोकहिताहिते नियुक्तः ।हरिगुरुविमुखान् प्रशास्मि मर्त्यान् हरिचरणप्रणतान्नमस्करोमि ॥ २॥

ahamamaragaṇārcitena dhātrā yama iti lokahitāhite niyuktaḥ |hariguruvimukhān praśāsmi martyān haricaraṇapraṇatānnamaskaromi || 2||

सुगतिमभिलषामि वासुदेवादहमपि भागवते स्थितान्तरात्मा ।मधुवधवशगोऽस्मि न स्वतन्त्रः प्रभवति संयमने ममापि कृष्णः ॥ ३॥

sugatimabhilaṣāmi vāsudevādahamapi bhāgavate sthitāntarātmā |madhuvadhavaśago'smi na svatantraḥ prabhavati saṃyamane mamāpi kṛṣṇaḥ || 3||

भगवति विमुखस्य नास्ति सिद्धिर्विषममृतं भवतीति नेदमस्ति ।वर्षशतमपीह पच्यमानं व्रजति न काञ्चनतामयः कदाचित् ॥ ४॥

bhagavati vimukhasya nāsti siddhirviṣamamṛtaṃ bhavatīti nedamasti |varṣaśatamapīha pacyamānaṃ vrajati na kāñcanatāmayaḥ kadācit || 4||

नहि शशिकलुषच्छविः कदाचिद्विरमति नो रवितामुपैति चन्द्रः ।भगवति च हरावनन्यचेता भृशमलिनोऽपि विराजते मनुष्यः ॥ ५॥

nahi śaśikaluṣacchaviḥ kadācidviramati no ravitāmupaiti candraḥ |bhagavati ca harāvananyacetā bhṛśamalino'pi virājate manuṣyaḥ || 5||

महदपि सुविचार्य लोकतत्त्वं भगवदुपास्तिमृते न सिद्धिरस्ति ।सुरगुरुसुदृढप्रसाददौ तौ हरिचरणौ स्मरतापवर्गहेतोः ॥ ६॥

mahadapi suvicārya lokatattvaṃ bhagavadupāstimṛte na siddhirasti |suragurusudṛḍhaprasādadau tau haricaraṇau smaratāpavargahetoḥ || 6||

शुभमिदमुपलभ्य मानुषत्वं सुकृतशतेन वृथेन्द्रियार्थहेतोः ।रमयति कुरुते न मोक्षमार्गं दहयति चन्दनमाशु भस्महेतोः ॥ ७॥

śubhamidamupalabhya mānuṣatvaṃ sukṛtaśatena vṛthendriyārthahetoḥ |ramayati kurute na mokṣamārgaṃ dahayati candanamāśu bhasmahetoḥ || 7||

मुकुलितकरकुड्मलैः सुरेन्द्रैः सततनमस्कृतपादपङ्कजो यः ।अविहतगतये सनातनाय जगति जनिं हरते नमोऽग्रजाय ॥ ८॥

mukulitakarakuḍmalaiḥ surendraiḥ satatanamaskṛtapādapaṅkajo yaḥ |avihatagataye sanātanāya jagati janiṃ harate namo'grajāya || 8||

यमाष्टकमिदं पुण्यं पठते यः शृणोति वा ।मुच्यते सर्वपापेभ्यो विष्णुलोकं स गच्छति ॥ ९॥

yamāṣṭakamidaṃ puṇyaṃ paṭhate yaḥ śṛṇoti vā |mucyate sarvapāpebhyo viṣṇulokaṃ sa gacchati || 9||

इतीदमुक्तं यमवाक्यमुत्तमं मयाधुना ते हरिभक्तिवर्द्धनम् ।पुनः प्रवक्ष्यामि पुरातनीं कथां भृगोस्तु पौत्रेण च या पुरा कृता॥ १०॥

itīdamuktaṃ yamavākyamuttamaṃ mayādhunā te haribhaktivarddhanam |punaḥ pravakṣyāmi purātanīṃ kathāṃ bhṛgostu pautreṇa ca yā purā kṛtā|| 10||

इति श्रीनरसिंहपुराणे यमाष्टकनाम नवमोऽध्यायः ॥ ९॥

iti śrīnarasiṃhapurāṇe yamāṣṭakanāma navamo'dhyāyaḥ || 9||

णरसिम्हपुरन अध्याय ९

ṇarasimhapurana adhyāya 9