लक्ष्म्यष्टोत्तरशतनामस्तोत्रम् १ Shrilakshmyashtottarashatanamastotram (2)

श्रीगणेशाय नमः ।देव्युवाचदेवदेव महादेव त्रिकालज्ञ महेश्वर ।करुणाकर देवेश भक्तानुग्रहकारक ॥ १॥

śrīgaṇeśāya namaḥ |devyuvācadevadeva mahādeva trikālajña maheśvara |karuṇākara deveśa bhaktānugrahakāraka || 1||

अष्टोत्तरशतं लक्ष्म्याः श्रोतुमिच्छामि तत्त्वतः ।ईश्वर उवाचदेवि साधु महाभागे महाभाग्यप्रदायकम् ।सर्वैश्वर्यकरं पुण्यं सर्वपापप्रणाशनम् ॥ २॥

aṣṭottaraśataṃ lakṣmyāḥ śrotumicchāmi tattvataḥ |īśvara uvācadevi sādhu mahābhāge mahābhāgyapradāyakam |sarvaiśvaryakaraṃ puṇyaṃ sarvapāpapraṇāśanam || 2||

सर्वदारिद्र्यशमनं श्रवणाद्भुक्तिमुक्तिदम् ।राजवश्यकरं दिव्यं गुह्याद्गुह्यतमं परम् ॥ ३॥

sarvadāridryaśamanaṃ śravaṇādbhuktimuktidam |rājavaśyakaraṃ divyaṃ guhyādguhyatamaṃ param || 3||

दुर्लभं सर्वदेवानां चतुःषष्टिकलास्पदम् ।पद्मादीनां वरान्तानां विधीनां नित्यदायकम् ॥ ४॥

durlabhaṃ sarvadevānāṃ catuḥṣaṣṭikalāspadam |padmādīnāṃ varāntānāṃ vidhīnāṃ nityadāyakam || 4||

समस्तदेवसंसेव्यमणिमाद्यष्टसिद्धिदम् ।किमत्र बहुनोक्तेन देवी प्रत्यक्षदायकम् ॥ ५॥

samastadevasaṃsevyamaṇimādyaṣṭasiddhidam |kimatra bahunoktena devī pratyakṣadāyakam || 5||

तव प्रीत्याद्य वक्ष्यामि समाहितमनाः शृणुम् ।अष्टोत्तरशतस्यास्य महालक्ष्मीस्तु देवता ॥ ६॥

tava prītyādya vakṣyāmi samāhitamanāḥ śṛṇum |aṣṭottaraśatasyāsya mahālakṣmīstu devatā || 6||

क्लींबीजपदमित्युक्तं शक्तिस्तु भुवनेश्वरी ।अङ्गन्यासः करन्यास स इत्यादिः प्रकीर्तितः ॥ ७॥

klīṃbījapadamityuktaṃ śaktistu bhuvaneśvarī |aṅganyāsaḥ karanyāsa sa ityādiḥ prakīrtitaḥ || 7||

ध्यानम्वन्दे पद्मकरां प्रसन्नवदनां सौभाग्यदां भाग्यदांहस्ताभ्यामभयप्रदां मणिगणैर्नानाविधैर्भूषिताम् ।भक्ताभीष्टफलप्रदां हरिहरब्रह्मादिभिः सेवितांपार्श्वे पङ्कजशङ्खपद्मनिधिभिर्युक्तां सदा शक्तिभिः ॥ ८॥

dhyānamvande padmakarāṃ prasannavadanāṃ saubhāgyadāṃ bhāgyadāṃhastābhyāmabhayapradāṃ maṇigaṇairnānāvidhairbhūṣitām |bhaktābhīṣṭaphalapradāṃ hariharabrahmādibhiḥ sevitāṃpārśve paṅkajaśaṅkhapadmanidhibhiryuktāṃ sadā śaktibhiḥ || 8||

सरसिजनयने सरोजहस्ते धवलतरांशुकगन्धमाल्यशोभे ।भगवति हरिवल्लभे मनोज्ञे त्रिभुवनभूतिकरि प्रसीद मह्यम् ॥ ९॥

sarasijanayane sarojahaste dhavalatarāṃśukagandhamālyaśobhe |bhagavati harivallabhe manojñe tribhuvanabhūtikari prasīda mahyam || 9||

ॐ प्रकृतिं विकृतिं विद्यां सर्वभूतहितप्रदाम् ।श्रद्धां विभूतिं सुरभिं नमामि परमात्मिकाम् ॥ १०॥

oṃ prakṛtiṃ vikṛtiṃ vidyāṃ sarvabhūtahitapradām |śraddhāṃ vibhūtiṃ surabhiṃ namāmi paramātmikām || 10||

वाचं पद्मालयां पद्मां शुचिं स्वाहां स्वधां सुधाम् ।धन्यां हिरण्मयीं लक्ष्मीं नित्यपुष्टां विभावरीम् ॥ ११॥

vācaṃ padmālayāṃ padmāṃ śuciṃ svāhāṃ svadhāṃ sudhām |dhanyāṃ hiraṇmayīṃ lakṣmīṃ nityapuṣṭāṃ vibhāvarīm || 11||

अदितिं च दितिं दीप्तां वसुधां वसुधारिणीम् ।नमामि कमलां कान्तां कामाक्षीं क्रोधसम्भवाम् ॥ १२॥ वर् कामा क्षीरोदसम्भवाम्

aditiṃ ca ditiṃ dīptāṃ vasudhāṃ vasudhāriṇīm |namāmi kamalāṃ kāntāṃ kāmākṣīṃ krodhasambhavām || 12|| var kāmā kṣīrodasambhavām

अनुग्रहपदां बुद्धिमनघां हरिवल्लभाम् ।अशोकाममृतां दीप्तां लोकशोकविनाशिनीम् ॥ १३॥

anugrahapadāṃ buddhimanaghāṃ harivallabhām |aśokāmamṛtāṃ dīptāṃ lokaśokavināśinīm || 13||

नमामि धर्मनिलयां करुणां लोकमातरम् ।पद्मप्रियां पद्महस्तां पद्माक्षीं पद्मसुन्दरीम् ॥ १४॥

namāmi dharmanilayāṃ karuṇāṃ lokamātaram |padmapriyāṃ padmahastāṃ padmākṣīṃ padmasundarīm || 14||

पद्मोद्भवां पद्ममुखीं पद्मनाभप्रियां रमाम् ।पद्ममालाधरां देवीं पद्मिनीं पद्मगन्धिनीम् ॥ १५॥

padmodbhavāṃ padmamukhīṃ padmanābhapriyāṃ ramām |padmamālādharāṃ devīṃ padminīṃ padmagandhinīm || 15||

पुण्यगन्धां सुप्रसन्नां प्रसादाभिमुखीं प्रभाम् ।नमामि चन्द्रवदनां चन्द्रां चन्द्रसहोदरीम् ॥ १६॥

puṇyagandhāṃ suprasannāṃ prasādābhimukhīṃ prabhām |namāmi candravadanāṃ candrāṃ candrasahodarīm || 16||

चतुर्भुजां चन्द्ररूपामिन्दिरामिन्दुशीतलाम् ।आह्लादजननीं पुष्टिं शिवां शिवकरीं सतीम् ॥ १७॥

caturbhujāṃ candrarūpāmindirāminduśītalām |āhlādajananīṃ puṣṭiṃ śivāṃ śivakarīṃ satīm || 17||

विमलां विश्वजननीं तुष्टिं दारिद्र्यनाशिनीम् ।प्रीतिपुष्करिणीं शान्तां शुक्लमाल्याम्बरां श्रियम् ॥ १८॥

vimalāṃ viśvajananīṃ tuṣṭiṃ dāridryanāśinīm |prītipuṣkariṇīṃ śāntāṃ śuklamālyāmbarāṃ śriyam || 18||

भास्करीं बिल्वनिलयां वरारोहां यशस्विनीम् ।वसुन्धरामुदाराङ्गीं हरिणीं हेममालिनीम् ॥ १९॥ (वसुन्धरामुदाराङ्गां)

bhāskarīṃ bilvanilayāṃ varārohāṃ yaśasvinīm |vasundharāmudārāṅgīṃ hariṇīṃ hemamālinīm || 19|| (vasundharāmudārāṅgāṃ)

धनधान्यकरीं सिद्धिं सदा सौम्यां शुभप्रदाम् ।नृपवेश्मगतानन्दां वरलक्ष्मीं वसुप्रदाम् ॥ २०॥

dhanadhānyakarīṃ siddhiṃ sadā saumyāṃ śubhapradām |nṛpaveśmagatānandāṃ varalakṣmīṃ vasupradām || 20||

शुभां हिरण्यप्राकारां समुद्रतनयां जयाम् ।नमामि मङ्गलां देवीं विष्णुवक्षःस्थलस्थिताम् ॥ २१॥

śubhāṃ hiraṇyaprākārāṃ samudratanayāṃ jayām |namāmi maṅgalāṃ devīṃ viṣṇuvakṣaḥsthalasthitām || 21||

विष्णुपत्नीं प्रसन्नाक्षीं नारायणसमाश्रिताम् ।दारिद्र्यध्वंसिनीं देवीं सर्वोपद्रवहारिणीम् ॥ २२॥

viṣṇupatnīṃ prasannākṣīṃ nārāyaṇasamāśritām |dāridryadhvaṃsinīṃ devīṃ sarvopadravahāriṇīm || 22||

नवदुर्गां महाकालीं ब्रह्मविष्णुशिवात्मिकाम् ।त्रिकालज्ञानसम्पन्नां नमामि भुवनेश्वरीम् ॥ २३॥

navadurgāṃ mahākālīṃ brahmaviṣṇuśivātmikām |trikālajñānasampannāṃ namāmi bhuvaneśvarīm || 23||

लक्ष्मीं क्षीरसमुद्रराजतनयां श्रीरङ्गधामेश्वरींदासीभूतसमस्तदेववनितां लोकैकदीपाङ्कुराम् ।श्रीमन्मन्दकटाक्षलब्धविभवद्ब्रह्मेन्द्रगङ्गाधरांत्वां त्रैलोक्यकुटुम्बिनीं सरसिजां वन्दे मुकुन्दप्रियाम् ॥ २४॥

lakṣmīṃ kṣīrasamudrarājatanayāṃ śrīraṅgadhāmeśvarīṃdāsībhūtasamastadevavanitāṃ lokaikadīpāṅkurām |śrīmanmandakaṭākṣalabdhavibhavadbrahmendragaṅgādharāṃtvāṃ trailokyakuṭumbinīṃ sarasijāṃ vande mukundapriyām || 24||

मातर्नमामि कमले कमलायताक्षिश्रीविष्णुहृत्कमलवासिनि विश्वमातः ।क्षीरोदजे कमलकोमलगर्भगौरि लक्ष्मिप्रसीद सततं नमतां शरण्ये ॥ २५॥

mātarnamāmi kamale kamalāyatākṣiśrīviṣṇuhṛtkamalavāsini viśvamātaḥ |kṣīrodaje kamalakomalagarbhagauri lakṣmiprasīda satataṃ namatāṃ śaraṇye || 25||

त्रिकालं यो जपेद्विद्वान् षण्मासं विजितेन्द्रियः ।दारिद्र्यध्वंसनं कृत्वा सर्वमाप्नोत्ययत्नतः ॥ २६॥

trikālaṃ yo japedvidvān ṣaṇmāsaṃ vijitendriyaḥ |dāridryadhvaṃsanaṃ kṛtvā sarvamāpnotyayatnataḥ || 26||

देवीनामसहस्रेषु पुण्यमष्टोत्तरं शतम् ।येन श्रियमवाप्नोति कोटिजन्मदरिद्रतः ॥ २७॥

devīnāmasahasreṣu puṇyamaṣṭottaraṃ śatam |yena śriyamavāpnoti koṭijanmadaridrataḥ || 27||

भृगुवारे शतं धीमान् पठेद्वत्सरमात्रकम् ।अष्टैश्वर्यमवाप्नोति कुबेर इव भूतले ॥ २८॥

bhṛguvāre śataṃ dhīmān paṭhedvatsaramātrakam |aṣṭaiśvaryamavāpnoti kubera iva bhūtale || 28||

दारिद्र्यमोचनं नाम स्तोत्रमम्बापरं शतम् ।येन श्रियमवाप्नोति कोटिजन्मदरिद्रितः ॥ २९॥

dāridryamocanaṃ nāma stotramambāparaṃ śatam |yena śriyamavāpnoti koṭijanmadaridritaḥ || 29||

भुक्त्वा तु विपुलान् भोगानस्याः सायुज्यमाप्नुयात् ।प्रातःकाले पठेन्नित्यं सर्वदुःखोपशान्तये ।पठंस्तु चिन्तयेद्देवीं सर्वाभरणभूषिताम् ॥ ३०॥

bhuktvā tu vipulān bhogānasyāḥ sāyujyamāpnuyāt |prātaḥkāle paṭhennityaṃ sarvaduḥkhopaśāntaye |paṭhaṃstu cintayeddevīṃ sarvābharaṇabhūṣitām || 30||

॥ इति श्रीलक्ष्म्यष्टोत्तरशतनामस्तोत्रं सम्पूर्णम् ॥

|| iti śrīlakṣmyaṣṭottaraśatanāmastotraṃ sampūrṇam ||