श्रीशगुणदर्पणस्तोत्रम् Shri Shrishagunadarpanastotram

या सुगन्धास्यनासादिनवद्वाराऽखिलेन या ।दुराधर्षा सर्वसस्योदयार्थं या करीषिणी ॥ १॥

yā sugandhāsyanāsādinavadvārā'khilena yā |durādharṣā sarvasasyodayārthaṃ yā karīṣiṇī || 1||

या नित्यपुष्टा सर्वाङ्गैः सौन्दर्यादिगुणैरपि ।ई॒श्वरी॑+ सर्व॑भूता॒नां॒ तामि॒होप॑ह्वये॒ श्रियम् ॥ २॥ (श्रीसूक्तम् ९)

yā nityapuṣṭā sarvāṅgaiḥ saundaryādiguṇairapi |īśvarī+ sarvabhūtānāṃ tāmihopahvaye śriyam || 2|| (śrīsūktam 9)

मातर्लक्ष्मि नमस्तुभयं माधवप्रियमानिनि ।युवां विश्वस्य पितरावितरेतरयोगिनौ ॥ ३॥

mātarlakṣmi namastubhayaṃ mādhavapriyamānini |yuvāṃ viśvasya pitarāvitaretarayoginau || 3||

समना किल मातस्त्वममुना ततयोगिनी ।मम नाथेन देवश्च विमनाश्च न स त्वयि ॥ ४॥

samanā kila mātastvamamunā tatayoginī |mama nāthena devaśca vimanāśca na sa tvayi || 4||

त्वं वेदमानिनी वेदवेद्यः किल स ते प्रियः ।त्वं मूलप्रकृतिर्देवी स चादिपुरुषः किल ॥ ५॥

tvaṃ vedamāninī vedavedyaḥ kila sa te priyaḥ |tvaṃ mūlaprakṛtirdevī sa cādipuruṣaḥ kila || 5||

यस्त्वामुरसि धत्तेऽम्ब कौस्तुभद्युतिभासिते ।स त्वां नैवाच्युतः सर्वस्यात्यये सत्यपि त्यजेत् ॥ ६॥

yastvāmurasi dhatte'mba kaustubhadyutibhāsite |sa tvāṃ naivācyutaḥ sarvasyātyaye satyapi tyajet || 6||

देवि त्वं ललनारत्नं देवोऽसौ पुरुषोत्तमः ।युवां युवानौ सततं युवयोर्न वयोऽधिकः ॥ ७॥

devi tvaṃ lalanāratnaṃ devo'sau puruṣottamaḥ |yuvāṃ yuvānau satataṃ yuvayorna vayo'dhikaḥ || 7||

त्वं पद्मिनी पद्मवक्त्रा पद्माक्षी पद्मविष्टरा ।पद्मद्वयधरा पद्मकोशोद्यत्स्तनशोभना ॥ ८॥

tvaṃ padminī padmavaktrā padmākṣī padmaviṣṭarā |padmadvayadharā padmakośodyatstanaśobhanā || 8||

पद्महस्ता पद्मपादा पद्मनाभमनःप्रिया ।पद्मोद्भवस्य जननी पद्मा च वरवर्णिनी ॥ ९॥

padmahastā padmapādā padmanābhamanaḥpriyā |padmodbhavasya jananī padmā ca varavarṇinī || 9||

अम्बां पीताम्बरश्रोणीं लम्बालकलसन्मुखीम् ।बिम्बाधरोष्ठीं कस्तूरिजम्बालतिलकां भजे ॥ १०॥

ambāṃ pītāmbaraśroṇīṃ lambālakalasanmukhīm |bimbādharoṣṭhīṃ kastūrijambālatilakāṃ bhaje || 10||

रत्नोद्दीप्तसुमाङ्गल्यसूत्रावृत्तशिरोधराम् ।कुण्डलप्रभयोद्दण्डगण्डमण्डलमण्डिताम् ॥ ११॥

ratnoddīptasumāṅgalyasūtrāvṛttaśirodharām |kuṇḍalaprabhayoddaṇḍagaṇḍamaṇḍalamaṇḍitām || 11||

कुचकञ्चुकसञ्चारिहारनिष्कमनोहराम् ।काञ्चीकिङ्किणिमञ्जीरकङ्कणाद्यैरलङ्कृताम् ॥ १२॥

kucakañcukasañcārihāraniṣkamanoharām |kāñcīkiṅkiṇimañjīrakaṅkaṇādyairalaṅkṛtām || 12||

सुवर्णमण्डपे रत्नचित्रसिंहासनोत्तमे ।नमामि हरिणा साकमिन्दिरां कृतमन्दिराम् ॥ १३॥

suvarṇamaṇḍape ratnacitrasiṃhāsanottame |namāmi hariṇā sākamindirāṃ kṛtamandirām || 13||

ब्रह्माद्या विबुधश्रेष्ठा ब्रह्माण्याद्याः सुराङ्गनाः ।यां पूजयन्ते सेवन्ते सा मां पातु रमा सदा ॥ १४॥

brahmādyā vibudhaśreṣṭhā brahmāṇyādyāḥ surāṅganāḥ |yāṃ pūjayante sevante sā māṃ pātu ramā sadā || 14||

सर्वालङ्कारभरितौ सर्वज्ञौ सर्वसद्गुणौ ।शर्वादिसर्वभक्तौघ सर्वसर्वस्वदायकौ ॥ १५॥

sarvālaṅkārabharitau sarvajñau sarvasadguṇau |śarvādisarvabhaktaugha sarvasarvasvadāyakau || 15||

सुमुखौ सुन्दरतरौ सुनासौ सुखचित्तनू ।सुराराधितपादाब्जौ रमानारायणौ स्तुमः ॥ १६॥

sumukhau sundaratarau sunāsau sukhacittanū |surārādhitapādābjau ramānārāyaṇau stumaḥ || 16||

चतुष्कपर्दा या देवी चतुरास्यादिभिः स्तुता ।चतुर्वेदोदितगुणा चतुर्मूर्तेर्हरेः प्रिया ॥ १७॥

catuṣkapardā yā devī caturāsyādibhiḥ stutā |caturvedoditaguṇā caturmūrterhareḥ priyā || 17||

घृतप्रतीकां तां नित्यं घृतपूर्णान्नदायिनीम् ।यथेष्टवित्तदात्रिं च नतोऽस्म्यभयदां श्रियम् ॥ १८॥

ghṛtapratīkāṃ tāṃ nityaṃ ghṛtapūrṇānnadāyinīm |yatheṣṭavittadātriṃ ca nato'smyabhayadāṃ śriyam || 18||

वादिराजेन रचितं श्रीश्रीशगुणदर्पणम् ।इमं स्तवं पठन्मर्त्यः श्रीमान्स्यान्नात्र सशयः ॥ १९॥

vādirājena racitaṃ śrīśrīśaguṇadarpaṇam |imaṃ stavaṃ paṭhanmartyaḥ śrīmānsyānnātra saśayaḥ || 19||

॥ इति श्रीमद्वादिराजपूज्यचरणविरचितंश्री श्रीशगुणदर्पणस्तोत्रं सम्पूर्णम् ॥

|| iti śrīmadvādirājapūjyacaraṇaviracitaṃśrī śrīśaguṇadarpaṇastotraṃ sampūrṇam ||