मोहनक्षेत्रनाथसुप्रभातम् Shri Mohanakshetranatha Suprabhatam

भास्वानुदेति धनसन्तमसप्ररोहाःनष्टा भवन्ति विकचानि सरोरुहाणि ।घोषैर्दिशो मुखरयन्त्यखिला विहङ्गाःपद्मेश मोहनपते तव सुप्रभातम् ॥ १॥

bhāsvānudeti dhanasantamasaprarohāḥnaṣṭā bhavanti vikacāni saroruhāṇi |ghoṣairdiśo mukharayantyakhilā vihaṅgāḥpadmeśa mohanapate tava suprabhātam || 1||

अम्भोरुहप्रभवशङ्करवासवाद्यास्त्रैविक्रमादिचरितं विबुधाः समस्ताः ।त्वत्पादसेवनसमुत्सुकिताः स्तुवन्तस्तिष्ठन्ति मोहनपते तव सुप्रभातम् ॥ २॥

ambhoruhaprabhavaśaṅkaravāsavādyāstraivikramādicaritaṃ vibudhāḥ samastāḥ |tvatpādasevanasamutsukitāḥ stuvantastiṣṭhanti mohanapate tava suprabhātam || 2||

आदाय सप्त मुनयः समुपास्य सन्ध्यामत्र्यादयः सरसिजानि मनोहराणि ।पादारविन्दयुगमर्चयितुं प्रपन्नास्तिष्ठन्ति मोहनपते तव सुप्रभातम् ॥ ३॥

ādāya sapta munayaḥ samupāsya sandhyāmatryādayaḥ sarasijāni manoharāṇi |pādāravindayugamarcayituṃ prapannāstiṣṭhanti mohanapate tava suprabhātam || 3||

ईषत्प्रफुल्लकमलोदरनिर्गतानांझङ्कारगीतलसतां सुमनोहराणाम् ।वर्गाश्च दिव्यमकरन्दवतामलीनांनिर्यान्ति मोहनपते तव सुप्रभातम् ॥ ४॥

īṣatpraphullakamalodaranirgatānāṃjhaṅkāragītalasatāṃ sumanoharāṇām |vargāśca divyamakarandavatāmalīnāṃniryānti mohanapate tava suprabhātam || 4||

उत्फुल्लपङ्कजसुचम्पकनालिकेरमाकन्दपूगसुमनोहरमल्लिकानाम् ।मन्दानिलः सुखकरः सह दिव्यगन्धैरावाति मोहनपते तव सुप्रभातम् ॥ ५॥

utphullapaṅkajasucampakanālikeramākandapūgasumanoharamallikānām |mandānilaḥ sukhakaraḥ saha divyagandhairāvāti mohanapate tava suprabhātam || 5||

गोपालमुक्तमहिषाः पशुजातयश्चगावश्चरन्ति परितः खलु पक्षिणश्च ।गायन्ति कर्णमधुरं भ्रमराः शुक्राश्चपद्मेश मोहनपते तव सुप्रभातम् ॥ ६॥

gopālamuktamahiṣāḥ paśujātayaścagāvaścaranti paritaḥ khalu pakṣiṇaśca |gāyanti karṇamadhuraṃ bhramarāḥ śukrāścapadmeśa mohanapate tava suprabhātam || 6||

वैकुण्ठवासिविबुधाश्च महीसुराश्चस्वर्गस्थदेवनिवहाश्च महर्षयस्ते ।सम्मर्दिताः खलु भृशं तव सेवनार्थंतिष्ठन्ति मोहनपते तव सुप्रभातम् ॥ ७॥

vaikuṇṭhavāsivibudhāśca mahīsurāścasvargasthadevanivahāśca maharṣayaste |sammarditāḥ khalu bhṛśaṃ tava sevanārthaṃtiṣṭhanti mohanapate tava suprabhātam || 7||

गन्धर्वयक्षगरुडामरकिन्नराद्याःश्रीनारदादिमुनयः सविशेषवाद्याः ।गायन्ति कर्णमधुरं तव सेवनार्थंपद्मेश मोहनपते तव सुप्रभातम् ॥ ८॥

gandharvayakṣagaruḍāmarakinnarādyāḥśrīnāradādimunayaḥ saviśeṣavādyāḥ |gāyanti karṇamadhuraṃ tava sevanārthaṃpadmeśa mohanapate tava suprabhātam || 8||

त्वद्दासदासशरणागतदासदासतद्यासदासचरमावधिदासदासाः ।त्वत्पादपङ्कजयुगं शरणङ्गताश्चतिष्ठन्ति मोहनपते तव सुप्रभातम् ॥ ९॥

tvaddāsadāsaśaraṇāgatadāsadāsatadyāsadāsacaramāvadhidāsadāsāḥ |tvatpādapaṅkajayugaṃ śaraṇaṅgatāścatiṣṭhanti mohanapate tava suprabhātam || 9||

मोहनक्षेत्रनाथस्य सुप्रभातं तु यः पठेत् ।प्रातर्दि ने स वै विद्वान् प्राप्नुयात् परमं शुभम् ॥ १०॥

mohanakṣetranāthasya suprabhātaṃ tu yaḥ paṭhet |prātardi ne sa vai vidvān prāpnuyāt paramaṃ śubham || 10||

मङ्गल कालमेघाय कल्याणगुणसिन्धवे ।मोहनक्षेत्रनाथाय नित्यश्रीर्नित्यमङ्गलम् ॥ ११॥

maṅgala kālameghāya kalyāṇaguṇasindhave |mohanakṣetranāthāya nityaśrīrnityamaṅgalam || 11||

इति श्रीमोहनक्षेत्रनाथसुप्रभातं सम्पूर्णम् ॥

iti śrīmohanakṣetranāthasuprabhātaṃ sampūrṇam ||