रासक्रीडा Rasakrida

नमः श्रीरासरसिकाय ।शारदशशधरवीक्षणहृष्टःपरमविलासालिभिरभिमृष्टः ।वल्लवरमणीमण्डलभावःप्रोल्लासककलमुरलीरावः ॥ १॥

namaḥ śrīrāsarasikāya |śāradaśaśadharavīkṣaṇahṛṣṭaḥparamavilāsālibhirabhimṛṣṭaḥ |vallavaramaṇīmaṇḍalabhāvaḥprollāsakakalamuralīrāvaḥ || 1||

अथ सकलाभिर्मदविकलाभिर्निशि परिभूय स्वजनान् भूयः ।अविरुवतीभिर्नवयुवतीभिर्विहितोद्देशः सुन्दरवेशः ॥ २॥

atha sakalābhirmadavikalābhirniśi paribhūya svajanān bhūyaḥ |aviruvatībhirnavayuvatībhirvihitoddeśaḥ sundaraveśaḥ || 2||

मिलितमृगाक्षीवाञ्छितसाक्षीकृतपरिहासः स्फीतविलासः ।तदमलवाणीनिशितकृपाणीदलितनिकारः कलितविकारः ॥ ३॥

militamṛgākṣīvāñchitasākṣīkṛtaparihāsaḥ sphītavilāsaḥ |tadamalavāṇīniśitakṛpāṇīdalitanikāraḥ kalitavikāraḥ || 3||

प्रमदोत्तरलितवल्लवनारीमुखचुम्बनपरिरम्भणकारी ।उन्नतमनसां सुदृशां मानप्रेक्षणतः कलितान्तर्धानः ॥ ४॥

pramadottaralitavallavanārīmukhacumbanaparirambhaṇakārī |unnatamanasāṃ sudṛśāṃ mānaprekṣaṇataḥ kalitāntardhānaḥ || 4||

अनुकृतचरितः पुलिने परितस्तरुषु च पृष्टः क्वापि न दृष्टः ।यवतिचमूभिस्त्वरितममूभिर्मुहुरनुगीतः कुतुकपरीतः ॥ ५॥

anukṛtacaritaḥ puline paritastaruṣu ca pṛṣṭaḥ kvāpi na dṛṣṭaḥ |yavaticamūbhistvaritamamūbhirmuhuranugītaḥ kutukaparītaḥ || 5||

काकिभिराभिः प्रार्थितसङ्गःप्रकटितमूर्तिर्धृतरतिरङ्गः ।किमपि निगूढरुषा परिपृष्टःकलितोत्तरविधिरलमुपविष्टः ॥ ६॥

kākibhirābhiḥ prārthitasaṅgaḥprakaṭitamūrtirdhṛtaratiraṅgaḥ |kimapi nigūḍharuṣā paripṛṣṭaḥkalitottaravidhiralamupaviṣṭaḥ || 6||

करुणाशीलः खण्डितपीलःस्तवकितलीलः कुवलयनीलः ।धृतमृदुहासः प्रेमविलासस्तततनुवासः कल्पितरासः ॥ ७॥

karuṇāśīlaḥ khaṇḍitapīlaḥstavakitalīlaḥ kuvalayanīlaḥ |dhṛtamṛduhāsaḥ premavilāsastatatanuvāsaḥ kalpitarāsaḥ || 7||

अथ परिकल्पितमण्डलबन्धःकुसुमशरासनविभ्रमकन्दः ।युवतीयुगयुगसुभगस्कन्धन्यस्तलसद्भुजदण्डद्वन्द्वः ॥ ८॥

atha parikalpitamaṇḍalabandhaḥkusumaśarāsanavibhramakandaḥ |yuvatīyugayugasubhagaskandhanyastalasadbhujadaṇḍadvandvaḥ || 8||

अलिपरिवीते मारुतशीतेवरसङ्गीते भुवनातीते ।भूषणतारध्वनिपरिसारक्रान्तवनान्ते शशिरुचिकान्ते ॥ ९॥

aliparivīte mārutaśītevarasaṅgīte bhuvanātīte |bhūṣaṇatāradhvaniparisārakrāntavanānte śaśirucikānte || 9||

मध्यगमध्यगमधुपविराजिस्फुटचम्पकततिविभ्रमभाजि ।रासे कृतरुचिरन्तस्थायीवेणुमुखाधरपल्लवदायी ॥ १०॥

madhyagamadhyagamadhupavirājisphuṭacampakatativibhramabhāji |rāse kṛtarucirantasthāyīveṇumukhādharapallavadāyī || 10||

स्तम्भितराकापतिरविकारान्अपि सुरदारान् मदयन्न् आरात् ।कुतुकाकृष्टश्चिरमभिवृष्टःसपदि विलूनैः सुरतरुसूनैः ॥ ११॥

stambhitarākāpatiravikārānapi suradārān madayann ārāt |kutukākṛṣṭaściramabhivṛṣṭaḥsapadi vilūnaiḥ suratarusūnaiḥ || 11||

अथ कल्पीकृतरजनिविहारीखस्थसुरासुरविस्मयकारी ।निजनिजनिकटस्थितिविज्ञानप्रमुदितरमणीकृतसम्मानः ॥ १२॥

atha kalpīkṛtarajanivihārīkhasthasurāsuravismayakārī |nijanijanikaṭasthitivijñānapramuditaramaṇīkṛtasammānaḥ || 12||

निजदृग्भङ्गीक्षुभितकुरङ्गीनयनामण्डलगुरुकुचसङ्गी ।केलिविलोलः प्रचलनिचोलःस्वेदजलाङ्कुरचारुकपोलः ॥ १३॥

nijadṛgbhaṅgīkṣubhitakuraṅgīnayanāmaṇḍalagurukucasaṅgī |kelivilolaḥ pracalanicolaḥsvedajalāṅkuracārukapolaḥ || 13||

कुमुदयुतायां तरणिसुतायांसलिलविनोदप्रवलितमोदः ।युवतिनिकायप्रोक्षितकायःशिथिलितमालः पुलककरालः ॥ १४॥

kumudayutāyāṃ taraṇisutāyāṃsalilavinodapravalitamodaḥ |yuvatinikāyaprokṣitakāyaḥśithilitamālaḥ pulakakarālaḥ || 14||

अथ वनमाली वरविपिनालीकुञ्जनिकेतनवीक्षणशाली ।जयति विहारि निशि मणिहारीव्रजतरुणीगणमानसहारी ॥ १५॥

atha vanamālī varavipinālīkuñjaniketanavīkṣaṇaśālī |jayati vihāri niśi maṇihārīvrajataruṇīgaṇamānasahārī || 15||

नतजनबन्धो जय रससिन्धोवदनोल्लसितश्रमजलबिन्दो ।त्वमखिलदेवावलिकृतसेवासन्ततिरधमा वयमिह के वा ॥ १६॥

natajanabandho jaya rasasindhovadanollasitaśramajalabindo |tvamakhiladevāvalikṛtasevāsantatiradhamā vayamiha ke vā || 16||

जय जय कुण्डलयुगरुचिमण्डलवृतगण्डस्थल दमिताखण्डल ।धृतगोवर्धन गोकुलवर्धनदेहि रतिं मे त्वयि मुरमर्दन ॥ १७॥

jaya jaya kuṇḍalayugarucimaṇḍalavṛtagaṇḍasthala damitākhaṇḍala |dhṛtagovardhana gokulavardhanadehi ratiṃ me tvayi muramardana || 17||

इति श्रीरूपगोस्वामिविरचितस्तवमालायां रासक्रीडा समाप्ता ।

iti śrīrūpagosvāmiviracitastavamālāyāṃ rāsakrīḍā samāptā |