पुण्डरीकाक्षस्तोत्रम् मोक्षप्रद Mokshapradashripundarikakshastotram

वराह उवाच ।नमस्ते पुण्डरीकाक्ष नमस्ते मधुसूदन ।नमस्ते सर्व लोकेश नमस्ते तिग्मचक्रिणे ॥ १॥

varāha uvāca |namaste puṇḍarīkākṣa namaste madhusūdana |namaste sarva lokeśa namaste tigmacakriṇe || 1||

विश्वमूर्तिं महाबाहुं वरदं सर्वतेजसम् ।नमामि पुण्डरीकाक्षं विद्याऽविद्यात्मकं विभुम् ॥ २॥

viśvamūrtiṃ mahābāhuṃ varadaṃ sarvatejasam |namāmi puṇḍarīkākṣaṃ vidyā'vidyātmakaṃ vibhum || 2||

आदिदेवं महादेवं वेदवेदाङ्गपारगम् ।गम्भीरं सर्वदेवानां नमस्ये वारिजेक्षणम् ॥ ३॥

ādidevaṃ mahādevaṃ vedavedāṅgapāragam |gambhīraṃ sarvadevānāṃ namasye vārijekṣaṇam || 3||

सहस्रशीर्षणं देवं सहस्राक्षं महाभुजम् ।जगत्संव्याप्य तिष्ठन्तं नमस्ये परमेश्वरम् ॥ ४॥

sahasraśīrṣaṇaṃ devaṃ sahasrākṣaṃ mahābhujam |jagatsaṃvyāpya tiṣṭhantaṃ namasye parameśvaram || 4||

शरण्यं शरणं देवं विष्णुं जिष्णुं सनातनम् ।नीलमेघप्रतीकाशं नमस्ये चक्रपाणिनम् ॥ ५॥

śaraṇyaṃ śaraṇaṃ devaṃ viṣṇuṃ jiṣṇuṃ sanātanam |nīlameghapratīkāśaṃ namasye cakrapāṇinam || 5||

शुद्धं सर्वगतं नित्यं व्योमरूपं सनातनम् ।भावाभावविनिर्मुक्तं नमस्ये सर्वगं हरिम् ॥ ६॥

śuddhaṃ sarvagataṃ nityaṃ vyomarūpaṃ sanātanam |bhāvābhāvavinirmuktaṃ namasye sarvagaṃ harim || 6||

नान्यत्किञ्चित्प्रपश्यामि व्यतिरिक्तं त्वयाच्युत ।त्वन्मयं च प्रपश्यामि सर्वमेतच्चराचरम् ॥ ७॥

nānyatkiñcitprapaśyāmi vyatiriktaṃ tvayācyuta |tvanmayaṃ ca prapaśyāmi sarvametaccarācaram || 7||

इति मोक्षप्रदश्रीपुण्डरीकाक्षस्तोत्रं सम्पूर्णम् ॥

iti mokṣapradaśrīpuṇḍarīkākṣastotraṃ sampūrṇam ||