कृष्णस्तोत्रम् (मोहिनीकृतम् सम्मोहनतन्त्रान्तर्गतम्) Mohini Rachita Stotra

श्री गणेशाय नमः ।मोहिन्युवाच ।सर्वेन्द्रियाणां प्रवरं विष्णोरंशं च मानसम् ।तदेव कर्मणां बीजं तदुद्भव नमोऽस्तु ते ॥ १॥

śrī gaṇeśāya namaḥ |mohinyuvāca |sarvendriyāṇāṃ pravaraṃ viṣṇoraṃśaṃ ca mānasam |tadeva karmaṇāṃ bījaṃ tadudbhava namo'stu te || 1||

स्वयमात्मा हि भगवान् ज्ञानरूपो महेश्वरः ।नमो ब्रह्मन् जगत्स्रष्टस्तदुद्भव नमोऽस्तु ते ॥ २॥

svayamātmā hi bhagavān jñānarūpo maheśvaraḥ |namo brahman jagatsraṣṭastadudbhava namo'stu te || 2||

सर्वाजित जगज्जेतर्जीवजीव मनोहर ।रतिबीज रतिस्वामिन् रतिप्रिय नमोऽस्तु ते ॥ ३॥

sarvājita jagajjetarjīvajīva manohara |ratibīja ratisvāmin ratipriya namo'stu te || 3||

शश्वद्योषिदधिष्ठान योषित्प्राणाधिकप्रिय ।योषिद्वाहन योषास्त्र योषिद्बन्धो नमोऽस्तु ते ॥ ४॥

śaśvadyoṣidadhiṣṭhāna yoṣitprāṇādhikapriya |yoṣidvāhana yoṣāstra yoṣidbandho namo'stu te || 4||

पतिसाध्यकराशेषरूपाधार गुणाश्रय ।सुगन्धिवातसचिव मधुमित्र नमोऽस्तु ते ॥ ५॥

patisādhyakarāśeṣarūpādhāra guṇāśraya |sugandhivātasaciva madhumitra namo'stu te || 5||

शश्वद्योनिकृताधार स्त्रीसन्दर्शनवर्धन ।विदग्धानां विरहिणां प्राणान्तक नमोऽस्तु ते ॥ ६॥

śaśvadyonikṛtādhāra strīsandarśanavardhana |vidagdhānāṃ virahiṇāṃ prāṇāntaka namo'stu te || 6||

अकृपा येषु तेऽनर्थं तेषां ज्ञानं विनाशनम् ।अनूहरूपभक्तेषु कृपासिन्धो नमोऽस्तु ते ॥ ७॥

akṛpā yeṣu te'narthaṃ teṣāṃ jñānaṃ vināśanam |anūharūpabhakteṣu kṛpāsindho namo'stu te || 7||

तपस्विनां च तपसां विघ्नबीजाय लीलया ।मनः सकामं मुक्तानां कर्तुं शक्तं नमोऽस्तु ते ॥ ८॥

tapasvināṃ ca tapasāṃ vighnabījāya līlayā |manaḥ sakāmaṃ muktānāṃ kartuṃ śaktaṃ namo'stu te || 8||

तपःसाध्यस्तथाऽऽराध्यः सदैवं पाञ्चभौतिकः ।पञ्चेन्द्रियकृताधार पञ्चबाण नमोऽस्तु ते ॥ ९॥

tapaḥsādhyastathā''rādhyaḥ sadaivaṃ pāñcabhautikaḥ |pañcendriyakṛtādhāra pañcabāṇa namo'stu te || 9||

मोहिनीत्येवमुक्त्वा तु मनसा सा विधेः पुरः ।विरराम नम्रवक्त्रा बभूव ध्यानतत्परा ॥ १०॥

mohinītyevamuktvā tu manasā sā vidheḥ puraḥ |virarāma namravaktrā babhūva dhyānatatparā || 10||

उक्तं माध्यन्दिने कान्ते स्तोत्रमेतन्मनोहरम् ।पुरा दुर्वाससा दत्तं मोहिन्यै गन्धमादने ॥ ११॥

uktaṃ mādhyandine kānte stotrametanmanoharam |purā durvāsasā dattaṃ mohinyai gandhamādane || 11||

स्तोत्रमेतन्महापुण्यं कामी भक्त्या यदा पठेत् ।अभीष्टं लभते नूनं निष्कलङ्को भवेद् ध्रुवम् ॥ १२॥

stotrametanmahāpuṇyaṃ kāmī bhaktyā yadā paṭhet |abhīṣṭaṃ labhate nūnaṃ niṣkalaṅko bhaved dhruvam || 12||

चेष्टां न कुरुते कामः कदाचिदपि तं प्रियम् ।भवेदरोगी श्रीयुक्तः कामदेवसमप्रभः ।वनितां लभते साध्वीं पत्नीं त्रैलोक्यमोहिनीम् ॥ १३॥

ceṣṭāṃ na kurute kāmaḥ kadācidapi taṃ priyam |bhavedarogī śrīyuktaḥ kāmadevasamaprabhaḥ |vanitāṃ labhate sādhvīṃ patnīṃ trailokyamohinīm || 13||

॥ इति श्रीमोहिनीकृतं कृष्णस्तोत्रं समाप्तम् ॥

|| iti śrīmohinīkṛtaṃ kṛṣṇastotraṃ samāptam ||