गीतावली १ Gitavali

प्रथमं नन्दोत्सवादिश्रीराधाकृष्णौ जयतः

prathamaṃ nandotsavādiśrīrādhākṛṣṇau jayataḥ

भैरवरागेण गीयते ।पुत्रमुदारमसूत यशोदा ।समजनि वल्लवततिरतिमोदा ॥ ध्रुवम् ॥कोऽप्यपनयति विविधमुपहारम् ।नृत्यति कोऽपि जनो बहुबारम् ॥कोऽपि मधुरमुपगायति गीतम् ।विकिरति कोऽपि सदधि नवनीतम् ॥कोऽपि तनोति मनोरथपूर्तिम् ।पश्यति कोऽपि सनातनमूर्तिम् ॥ १॥

bhairavarāgeṇa gīyate |putramudāramasūta yaśodā |samajani vallavatatiratimodā || dhruvam ||ko'pyapanayati vividhamupahāram |nṛtyati ko'pi jano bahubāram ||ko'pi madhuramupagāyati gītam |vikirati ko'pi sadadhi navanītam ||ko'pi tanoti manorathapūrtim |paśyati ko'pi sanātanamūrtim || 1||

आसावरी ।विप्रवृन्दमभूदलङ्कृतिगोधनैरपि पूर्णम् ।गायनान् अपि मद्विधान् व्रजनाथ तोषय तूर्णम् ॥सूनुरद्भुतसुन्दरोऽजनि नन्दराज तवायम् ।देहि गोष्ठजनाय वाञ्छितमुत्सवोचितदायम् ॥ ध्रुवम् ॥तावकात्मजवीक्षणक्षणनन्दि मद्विधचित्तम् ।यन्न कैरपि लब्धमर्थिभिरेतदिच्छति वित्तम् ॥श्रीसनातनचित्तमानसकेलिनीलमराले ।मादृशां रतिरत्र तिष्ठतु सर्वदा तव बाले ॥ २॥

āsāvarī |vipravṛndamabhūdalaṅkṛtigodhanairapi pūrṇam |gāyanān api madvidhān vrajanātha toṣaya tūrṇam ||sūnuradbhutasundaro'jani nandarāja tavāyam |dehi goṣṭhajanāya vāñchitamutsavocitadāyam || dhruvam ||tāvakātmajavīkṣaṇakṣaṇanandi madvidhacittam |yanna kairapi labdhamarthibhiretadicchati vittam ||śrīsanātanacittamānasakelinīlamarāle |mādṛśāṃ ratiratra tiṣṭhatu sarvadā tava bāle || 2||

वसन्तपञ्चमीवसन्तरागःअभिनवकुट्मलगुच्छसमुज्ज्वलकुञ्चितकुन्तलभार ।प्रणयिजनेरितवन्दनसहकृतचूर्णितवनघनसार ॥जय जय सुन्दर नन्दकुमार ।सौरभसङ्कटवृन्दावनविहितवसन्तविहार ॥ ध्रुव ॥अधरविराजितमन्दतरस्मितलोभितनिजपरिवार ।चटुलदृगञ्चलरचितरसोच्चलराधामदनविकार ॥भुवनविमोहनमञ्जुलनर्तनगतिवल्गितमणिहार ।निजवल्लभजनसुहृत्सनातनचित्तविहरदवतार ॥ ३॥

vasantapañcamīvasantarāgaḥabhinavakuṭmalagucchasamujjvalakuñcitakuntalabhāra |praṇayijaneritavandanasahakṛtacūrṇitavanaghanasāra ||jaya jaya sundara nandakumāra |saurabhasaṅkaṭavṛndāvanavihitavasantavihāra || dhruva ||adharavirājitamandatarasmitalobhitanijaparivāra |caṭuladṛgañcalaracitarasoccalarādhāmadanavikāra ||bhuvanavimohanamañjulanartanagativalgitamaṇihāra |nijavallabhajanasuhṛtsanātanacittaviharadavatāra || 3||

दोलोत्सवःवसन्तरागःकेलिरसमाधुरी ततिभिरतिमेदुरीकृतनिखिलबन्धुपशुपालम् ।हृदि विधृतचन्दनं स्फुरदरुणवन्दनंदेहरुचिनिर्जिततमालम् ॥सुन्दरि माधवमवकलयालम् ।मित्रकरलोलया रत्नमयदोलयाचलितवपुरतिचपलमालम् ॥ ध्रुव ॥व्रजहरिणलोचना रचितगोरोचनातिलकरुचिरुचिरतरभालम् ।स्मितजनितलोभया वदनशशिशोभयाविभ्रमितनवयुवतिजालम् ॥नर्ममयपण्डितं पुष्पकुलमण्डितंरमणमिह वक्षसि विशालम् ।प्रणतभयशातनं प्रियमधि सनातनंगोष्ठजनमानसमरालम् ॥ ४॥

dolotsavaḥvasantarāgaḥkelirasamādhurī tatibhiratimedurīkṛtanikhilabandhupaśupālam |hṛdi vidhṛtacandanaṃ sphuradaruṇavandanaṃdeharucinirjitatamālam ||sundari mādhavamavakalayālam |mitrakaralolayā ratnamayadolayācalitavapuraticapalamālam || dhruva ||vrajahariṇalocanā racitagorocanātilakaruciruciratarabhālam |smitajanitalobhayā vadanaśaśiśobhayāvibhramitanavayuvatijālam ||narmamayapaṇḍitaṃ puṣpakulamaṇḍitaṃramaṇamiha vakṣasi viśālam |praṇatabhayaśātanaṃ priyamadhi sanātanaṃgoṣṭhajanamānasamarālam || 4||

आसावरीनिपतति परितो वन्दनपाली ।तं दोलयति मुदा सुहृदाली ॥विलसति दोलोपरि वनमाली ।तरलसरोरुहशिरसि यथाली ॥ ध्रुव ॥जनयति गोपीजनकरताली ।कापि पुरो नृत्यति पशुपाली ॥अयमारण्यकमण्डनशाली ।जयति सनातनरसपरिपाली ॥ ५॥

āsāvarīnipatati parito vandanapālī |taṃ dolayati mudā suhṛdālī ||vilasati dolopari vanamālī |taralasaroruhaśirasi yathālī || dhruva ||janayati gopījanakaratālī |kāpi puro nṛtyati paśupālī ||ayamāraṇyakamaṇḍanaśālī |jayati sanātanarasaparipālī || 5||

धनाश्रीःन कुरु कदर्थनमत्र सरण्याम् ।मामवलोक्य सतीमशरण्याम् ॥चञ्चल मुञ्च पटाञ्चलभागम् ।करवाण्यधुना भास्करयागम् ॥ ध्रुव ॥न रचय गोकुलवीर विलम्बम् ।विदधे विधुमुख विनतिकदम्बम् ॥रहसि बिभेमि विलोलदृगन्तम् ।वीक्ष्य सनातन देव भवन्तम् ॥ ६॥

dhanāśrīḥna kuru kadarthanamatra saraṇyām |māmavalokya satīmaśaraṇyām ||cañcala muñca paṭāñcalabhāgam |karavāṇyadhunā bhāskarayāgam || dhruva ||na racaya gokulavīra vilambam |vidadhe vidhumukha vinatikadambam ||rahasi bibhemi viloladṛgantam |vīkṣya sanātana deva bhavantam || 6||

सौरष्ट्रीराधे निगद निजं गदमूलम् ।उदयति तनुमनु किमिति तापकुलमनुकृतविकटकुकूलम् ॥ ध्रुव ॥प्रचुरपुरन्दरगोपविनिन्दककान्तिपटलमनुकूलम् ।क्षिपसि विदूरे मृदुलं मुहुरपि सम्भृतमुरसि दुकूलम् ॥अभिनन्दसि न हि चन्द्ररजोभरवासितमपि ताम्बूलम् ।इदमपि विकिरसि वरचम्पककृतमनुपमदाम सचूलम् ॥भजदनवस्थितिमखिलपदे सखि सपदि विडम्बिततूलम् ।कलितसनातनकौतुकमपि तव हृदयं स्फुरति सशूलम् ॥ ७॥

sauraṣṭrīrādhe nigada nijaṃ gadamūlam |udayati tanumanu kimiti tāpakulamanukṛtavikaṭakukūlam || dhruva ||pracurapurandaragopavinindakakāntipaṭalamanukūlam |kṣipasi vidūre mṛdulaṃ muhurapi sambhṛtamurasi dukūlam ||abhinandasi na hi candrarajobharavāsitamapi tāmbūlam |idamapi vikirasi varacampakakṛtamanupamadāma sacūlam ||bhajadanavasthitimakhilapade sakhi sapadi viḍambitatūlam |kalitasanātanakautukamapi tava hṛdayaṃ sphurati saśūlam || 7||

सौरष्ट्रीकुटिलं मामवलोक्य नवाम्बुजमुपरि चुचुम्ब स रङ्गी ।तेन हठादहमभवं वेपथुमण्डलसञ्चलदङ्गी ॥भामिनि पृच्छ न वारं वारम् ।हन्त विमुह्यति वीक्ष्य मनो मम वल्लवराजकुमारम् ॥ ध्रुव ॥दाडिमलतिकामनु निस्तलफलनमितां स दधे हस्तम् ।तदनुभवान् मम धर्मोज्ज्वलमपि धैर्यधनं गतमस्तम् ॥अदशदशोकलतापल्लवमयमतनुसनातननर्मा ।तदहमवेक्ष्य बभूव चिरं बत विस्मृतकायिककर्मा ॥ ८॥

sauraṣṭrīkuṭilaṃ māmavalokya navāmbujamupari cucumba sa raṅgī |tena haṭhādahamabhavaṃ vepathumaṇḍalasañcaladaṅgī ||bhāmini pṛccha na vāraṃ vāram |hanta vimuhyati vīkṣya mano mama vallavarājakumāram || dhruva ||dāḍimalatikāmanu nistalaphalanamitāṃ sa dadhe hastam |tadanubhavān mama dharmojjvalamapi dhairyadhanaṃ gatamastam ||adaśadaśokalatāpallavamayamatanusanātananarmā |tadahamavekṣya babhūva ciraṃ bata vismṛtakāyikakarmā || 8||

धनाश्रीःअनधिगताकस्मिकगदकारणमर्पितमन्त्रौषधिनिकुरम्बम् ।अविरतरुदितविलोहितलोचनमनुशोचति तामखिलकुटुम्बम् ॥देव हरे भव कारुण्यशाली ।सा तव निशितकटाक्षशराहतहृदया जीवति कृशतनूराली ॥ ध्रुव ॥हृदि वलदविरलसञ्ज्वरपटलीस्फुटदुज्ज्वलमौक्तिकसमुदाया ।शीतलभूतलनिश्चलतनुरियमवसीदति संप्रति निरुपाया ॥गोष्ठजनाभयसत्रमहाव्रतदीक्षित भवतो माधव बाला ।कथमर्हति तां हन्त सनातन विषमदशां गुणवृन्दविशाला ॥ ९॥

dhanāśrīḥanadhigatākasmikagadakāraṇamarpitamantrauṣadhinikurambam |avirataruditavilohitalocanamanuśocati tāmakhilakuṭumbam ||deva hare bhava kāruṇyaśālī |sā tava niśitakaṭākṣaśarāhatahṛdayā jīvati kṛśatanūrālī || dhruva ||hṛdi valadaviralasañjvarapaṭalīsphuṭadujjvalamauktikasamudāyā |śītalabhūtalaniścalatanuriyamavasīdati saṃprati nirupāyā ||goṣṭhajanābhayasatramahāvratadīkṣita bhavato mādhava bālā |kathamarhati tāṃ hanta sanātana viṣamadaśāṃ guṇavṛndaviśālā || 9||

आसावरीहन्त न किमु मन्थरयसि सन्ततमभिजल्पम् ।दन्तरोचिरन्तरयति सन्तमसमनल्पम् ॥राधे पथि मुञ्च भुरि सम्भ्रममभिसारे ।चारय चरणाम्बुरुहे धीरं सुकुमारे ॥ ध्रुव ॥सन्तनु घनवर्णमतुलकुन्तलनिचयान्तम् ।ध्वान्तं तव जीवतु नखकान्तिभिरभिशान्तम् ॥ससनातनमानसाद्य यान्ती गतशङ्कम् ।अङ्गीकुरु मञ्जुकुञ्जवसतेरलमङ्कम् ॥ १०॥

āsāvarīhanta na kimu mantharayasi santatamabhijalpam |dantarocirantarayati santamasamanalpam ||rādhe pathi muñca bhuri sambhramamabhisāre |cāraya caraṇāmburuhe dhīraṃ sukumāre || dhruva ||santanu ghanavarṇamatulakuntalanicayāntam |dhvāntaṃ tava jīvatu nakhakāntibhirabhiśāntam ||sasanātanamānasādya yāntī gataśaṅkam |aṅgīkuru mañjukuñjavasateralamaṅkam || 10||

गौडीसिचयमुदञ्चय हृदयादल्पम् ।विलिखाम्यद्भुतमकराकल्पम् ॥इह न हि सङ्कुच पङ्कजनयने ।वेशं तव करवै रतिशयने ॥ ध्रुव ॥राधे दोलय न किल कपोलम् ।चित्रं रचयाम्यहमविलोलम् ॥तव वपुरद्य सनातनशोभम् ।जनयति हृदि मम कञ्चन लोभम् ॥ ११॥

gauḍīsicayamudañcaya hṛdayādalpam |vilikhāmyadbhutamakarākalpam ||iha na hi saṅkuca paṅkajanayane |veśaṃ tava karavai ratiśayane || dhruva ||rādhe dolaya na kila kapolam |citraṃ racayāmyahamavilolam ||tava vapuradya sanātanaśobham |janayati hṛdi mama kañcana lobham || 11||

आसावरीतव चञ्चलमतिरयमघहन्ता ।अहमुत्तमधृतिदिग्धदिगन्ता ॥दूति विदूरय कोमलकथनम् ।पुनरभिधास्ये न हि मधुमथनम् ॥ ध्रुव ॥शठचरितोऽयं तव वनमाली ।मृदुहृदयाहं निजकुलपाली ॥तव हरिरेष निरङ्कुशनर्मा ।अहमनुबद्धसनातनधर्मा ॥ १२॥

āsāvarītava cañcalamatirayamaghahantā |ahamuttamadhṛtidigdhadigantā ||dūti vidūraya komalakathanam |punarabhidhāsye na hi madhumathanam || dhruva ||śaṭhacarito'yaṃ tava vanamālī |mṛduhṛdayāhaṃ nijakulapālī ||tava harireṣa niraṅkuśanarmā |ahamanubaddhasanātanadharmā || 12||

भैरवःमण्डितहल्लीसकमण्डलांनटयन् राधां चलकुण्डलाम् ॥निखिलकलासम्पदि परिचयी ।प्रियसखि पश्य नटति मुरजयी ॥ ध्रुव ॥मुहुरान्दोलित रत्नवलयम् ।सलयं चलयन् करकिशलयम् ॥गतिभङ्गिभिरवशीकृतशशी ।स्थगितसनातनशङ्करवशी ॥ १३॥

bhairavaḥmaṇḍitahallīsakamaṇḍalāṃnaṭayan rādhāṃ calakuṇḍalām ||nikhilakalāsampadi paricayī |priyasakhi paśya naṭati murajayī || dhruva ||muhurāndolita ratnavalayam |salayaṃ calayan karakiśalayam ||gatibhaṅgibhiravaśīkṛtaśaśī |sthagitasanātanaśaṅkaravaśī || 13||

भैरवःदामोदररतिवर्धनवेशेहरिनिष्कुटवृन्दाविपिनेशे ।राधे जय जय माधवदयितेगोकुलतरुणीमण्डलमहिते ॥ ध्रुव ॥वृषभानुदधिनवशशिलेखेललितासखि गुणरमितविशाखे ।करुणां कुरु मयि करुणाभरिते ।सनकसनातनवर्णितचरिते ॥ १४॥

bhairavaḥdāmodararativardhanaveśehariniṣkuṭavṛndāvipineśe |rādhe jaya jaya mādhavadayitegokulataruṇīmaṇḍalamahite || dhruva ||vṛṣabhānudadhinavaśaśilekhelalitāsakhi guṇaramitaviśākhe |karuṇāṃ kuru mayi karuṇābharite |sanakasanātanavarṇitacarite || 14||

धनाश्रीः ।राजपुराद् गोकुलमुपयातम् ।प्रमदोन्मादितजननीतातम् ॥स्वप्ने सखि पुनरद्य मुकुन्दम् ।आलोकयमवतंसितकुन्दम् ॥ ध्रुव ॥परममहोत्सवघुर्णितघोषम् ।नयनेङ्गितकृतमत्परितोषम् ॥नवगुञ्जावलिकृतपरभागम् ।प्रबलसनातनसुहृदनुरागम् ॥ १५॥

dhanāśrīḥ |rājapurād gokulamupayātam |pramadonmāditajananītātam ||svapne sakhi punaradya mukundam |ālokayamavataṃsitakundam || dhruva ||paramamahotsavaghurṇitaghoṣam |nayaneṅgitakṛtamatparitoṣam ||navaguñjāvalikṛtaparabhāgam |prabalasanātanasuhṛdanurāgam || 15||

सौराष्ट्रीपुलकमुपैति भयान् मम गात्रम् ।हससि तथापि मदादतिमात्रम् ॥वारय तूर्णमिमं सखि कृष्णम् ।अनुचितकर्मणि निर्मिततृष्णम् ॥ ध्रुव ॥जाने भवतीमेव विपक्षाम् ।मामुपनीता यद् वनकक्षाम् ॥अद्य सनातनमतिसुखहेतुम् ।न परिहरिष्ये विधिकृतसेतुम् ॥ १६॥

saurāṣṭrīpulakamupaiti bhayān mama gātram |hasasi tathāpi madādatimātram ||vāraya tūrṇamimaṃ sakhi kṛṣṇam |anucitakarmaṇi nirmitatṛṣṇam || dhruva ||jāne bhavatīmeva vipakṣām |māmupanītā yad vanakakṣām ||adya sanātanamatisukhahetum |na parihariṣye vidhikṛtasetum || 16||

अथ रासः

atha rāsaḥ

धनाश्रीःकोमलशशिकररम्यवनान्तरनिर्मितगीतविलास ।तूर्णसमागतवल्लवयौवतवीक्षणकृतपरिहास ॥जय जय भानुसुतातटरङ्गमहानट सुन्दर नन्दकुमार ।शरदङ्गीकृतदिव्यरसावृत मङ्गलरासविहार ॥ ध्रुव ॥गोपीचुम्बित रागकरम्बित मानविलोकनलीन ।गुणवर्गोन्नतराधासङ्गतसौहृदसम्पदधीन ॥तद्वचनामृतपानमदाहृत वलयीकृतपरिवार ।सुरतरुणीगणमतिविक्षोभण खेलनवल्गितहार ॥अम्बुविगाहननन्दितनिजजन मण्डितयमुनातीर ।सुखसंविद्घन पूर्णसनातन निर्मलनीलशरीर ॥ १७॥

dhanāśrīḥkomalaśaśikararamyavanāntaranirmitagītavilāsa |tūrṇasamāgatavallavayauvatavīkṣaṇakṛtaparihāsa ||jaya jaya bhānusutātaṭaraṅgamahānaṭa sundara nandakumāra |śaradaṅgīkṛtadivyarasāvṛta maṅgalarāsavihāra || dhruva ||gopīcumbita rāgakarambita mānavilokanalīna |guṇavargonnatarādhāsaṅgatasauhṛdasampadadhīna ||tadvacanāmṛtapānamadāhṛta valayīkṛtaparivāra |surataruṇīgaṇamativikṣobhaṇa khelanavalgitahāra ||ambuvigāhanananditanijajana maṇḍitayamunātīra |sukhasaṃvidghana pūrṇasanātana nirmalanīlaśarīra || 17||

धनाश्रीःशुद्धसतीव्रतवित्ता अहमतिनिर्मलचित्ता ।प्रथयसि सुजनविमुक्तं नर्मेदं किमयुक्तम् ॥माधव परिहर मे पटमेतम् ।यामि जवेन निकेतम् ॥ ध्रुव ॥यदि जानाम्यधितीरं त्वामतिगूढशरीरम् ।दूरे सूरसुतायां सायं कथमुपयायाम् ॥विदधे भवदवनामं चरितं परिहर वामम् ।वर्त्म सनातनमुचितं पालय धार्मिकरुचितम् ॥ १८॥

dhanāśrīḥśuddhasatīvratavittā ahamatinirmalacittā |prathayasi sujanavimuktaṃ narmedaṃ kimayuktam ||mādhava parihara me paṭametam |yāmi javena niketam || dhruva ||yadi jānāmyadhitīraṃ tvāmatigūḍhaśarīram |dūre sūrasutāyāṃ sāyaṃ kathamupayāyām ||vidadhe bhavadavanāmaṃ caritaṃ parihara vāmam |vartma sanātanamucitaṃ pālaya dhārmikarucitam || 18||

कर्णाटःकिं वितनोषि मुधाङ्गविभूषणकपटेनात्र विघातम् ।सोढुमहं समयस्य न संप्रति शक्ता लवमपि पातम् ॥गोकुलमङ्गलवंशीध्वनिरुद्गर्जति वनगतये स्मरभूपतिशासनशंसी ॥ ध्रुव ॥माधवचरणाङ्गुष्ठनखद्युतिरयमुदयति हिमधामा ।मा गुरुजनभयमुद्गिर मुहुरियमभवं धावितकामा ॥तं सेवितुमिह पश्य सनातनपरमारण्यजवेशम् ।गोपवधूततिरियमुपसर्पति भानुसुतातटदेशम् ॥ १९॥

karṇāṭaḥkiṃ vitanoṣi mudhāṅgavibhūṣaṇakapaṭenātra vighātam |soḍhumahaṃ samayasya na saṃprati śaktā lavamapi pātam ||gokulamaṅgalavaṃśīdhvanirudgarjati vanagataye smarabhūpatiśāsanaśaṃsī || dhruva ||mādhavacaraṇāṅguṣṭhanakhadyutirayamudayati himadhāmā |mā gurujanabhayamudgira muhuriyamabhavaṃ dhāvitakāmā ||taṃ sevitumiha paśya sanātanaparamāraṇyajaveśam |gopavadhūtatiriyamupasarpati bhānusutātaṭadeśam || 19||

कर्णाटःस्फुरदिन्दीवरनिन्दिकलेवरराधाकुचकुङ्कुमभर पिञ्जर ।सुन्दरचन्द्रकचूड मनोहरचन्द्रावलिमानसशुकपञ्जर ॥जय जय जय गुञ्जावलिमण्डित ।प्रणयविशृङ्खलगोपीमण्डलवरबिम्बाधरखण्डनपण्डित ॥ ध्रुव ॥मृगवनिताननतृणविस्रंसनकर्मधुरन्धरमुरलीकूजित ।स्वारसिकस्मितसुषमोन्मादितसिद्धसतीनयनाञ्चलपूजित ॥ताम्बूलोल्लसदाननसारसजाम्बूनदरुचिविस्फुरदम्बर ।हरकमलासनसनकसनातनधृतिविध्वंसनलीलाडम्बर ॥ २०॥

karṇāṭaḥsphuradindīvaranindikalevararādhākucakuṅkumabhara piñjara |sundaracandrakacūḍa manoharacandrāvalimānasaśukapañjara ||jaya jaya jaya guñjāvalimaṇḍita |praṇayaviśṛṅkhalagopīmaṇḍalavarabimbādharakhaṇḍanapaṇḍita || dhruva ||mṛgavanitānanatṛṇavisraṃsanakarmadhurandharamuralīkūjita |svārasikasmitasuṣamonmāditasiddhasatīnayanāñcalapūjita ||tāmbūlollasadānanasārasajāmbūnadarucivisphuradambara |harakamalāsanasanakasanātanadhṛtividhvaṃsanalīlāḍambara || 20||

केदारःसौरभसेवितपुष्पविनिर्मितनिर्मलवनमालापरिमण्डित ।मद्नतरस्मितकान्तिकरम्बितवदनाम्बुजनवविभ्रमपण्डित ॥जय जय मरकतकन्दलसुन्दर ।वरचामीकरपीताम्बरधरवृन्दावनजनवृन्दपुरन्दर ॥ ध्रुव ॥नवगुञ्जाफलराजिभिरुज्ज्वलकेकिशिखण्डकशेखरमञ्जुल ।गुणवर्गातुलगोपवधूकुलचित्तशिलीमुखपुष्पितवञ्जुल ॥कलमुरलीक्वणपूरविचक्षणपशुपालाधिपहृदयानन्दन ।गिरिशसनातनसनकसनन्दननारदकमलासनकृतवन्दन ॥ २१॥

kedāraḥsaurabhasevitapuṣpavinirmitanirmalavanamālāparimaṇḍita |madnatarasmitakāntikarambitavadanāmbujanavavibhramapaṇḍita ||jaya jaya marakatakandalasundara |varacāmīkarapītāmbaradharavṛndāvanajanavṛndapurandara || dhruva ||navaguñjāphalarājibhirujjvalakekiśikhaṇḍakaśekharamañjula |guṇavargātulagopavadhūkulacittaśilīmukhapuṣpitavañjula ||kalamuralīkvaṇapūravicakṣaṇapaśupālādhipahṛdayānandana |giriśasanātanasanakasanandananāradakamalāsanakṛtavandana || 21||

गौडीयामुनजलकणिकाभिरुपेते ।सङ्गतमुज्ज्वलकुञ्जनिकेते ॥त्वयि विनिहितवरसौहृदभारम् ।विहितापरतरुणीपरिहारम् ॥भज सखि वल्लवराजकुमारम् ।कामिततावकसङ्गविहारम् ॥ ध्रुव ॥नवगुञ्जाफलमञ्जुलहारम् ।माल्यविहारिमधुपपरिवारम् ॥निर्मलनर्मविभावनशीलम् ।वल्लवमत्र सनातनलीलम् ॥

gauḍīyāmunajalakaṇikābhirupete |saṅgatamujjvalakuñjanikete ||tvayi vinihitavarasauhṛdabhāram |vihitāparataruṇīparihāram ||bhaja sakhi vallavarājakumāram |kāmitatāvakasaṅgavihāram || dhruva ||navaguñjāphalamañjulahāram |mālyavihārimadhupaparivāram ||nirmalanarmavibhāvanaśīlam |vallavamatra sanātanalīlam ||

मल्लारःतरुणीलोचनतापविमोचनहाससुधाङ्कुरधारी ।मन्दमरुच्चलपिञ्छकृतोज्ज्वलमौलिरुदारविहारी ॥सुन्दरि पश्य मिलति वनमाली ।दिवसे परिणतिमुपगच्छति सतिनवनवविभ्रमशाली ॥ ध्रुव ॥धेनुखुरोद्धुतरेणुपरिप्लुतफुल्लसरोरुहदामा ।अचिरविकस्वरलसदिन्दीवरमण्डलसुन्दरधामा ॥कलमुरलीरुतिकृततावकरतिरत्र दृगन्ततरङ्गी ।चारुसनातनतनुरनुरञ्जनकारिसुहृद्गणसङ्गी ॥ २३॥

mallāraḥtaruṇīlocanatāpavimocanahāsasudhāṅkuradhārī |mandamaruccalapiñchakṛtojjvalamaulirudāravihārī ||sundari paśya milati vanamālī |divase pariṇatimupagacchati satinavanavavibhramaśālī || dhruva ||dhenukhuroddhutareṇupariplutaphullasaroruhadāmā |aciravikasvaralasadindīvaramaṇḍalasundaradhāmā ||kalamuralīrutikṛtatāvakaratiratra dṛgantataraṅgī |cārusanātanatanuranurañjanakārisuhṛdgaṇasaṅgī || 23||

धनाश्रीःयद्यपि समाधिषु विधिरपि पश्यतिन तव नखाग्रमरीचिम् ।इदमिच्छामि निशम्य तवाच्युततदपि कृपाद्भुतवीचिम् ॥देव भवन्तं वन्दे ।मन्मानसमधुकरमर्पय निजपदपङ्कजमकरन्दे ॥ ध्रुव ॥भक्तिरुदञ्चति यद्यपि माधवन त्वयि मम तिलमात्री ।परमेश्वरता तदपि तवाधिकदुर्घटघटनविधात्री ॥अयमविलोलतयाद्य सनातनकलिताद्भुतरसभारम् ।निवसतु नित्यमिहामृतनिन्दिनिविन्दन्मधुरिमसारम् ॥ २४॥

dhanāśrīḥyadyapi samādhiṣu vidhirapi paśyatina tava nakhāgramarīcim |idamicchāmi niśamya tavācyutatadapi kṛpādbhutavīcim ||deva bhavantaṃ vande |manmānasamadhukaramarpaya nijapadapaṅkajamakarande || dhruva ||bhaktirudañcati yadyapi mādhavana tvayi mama tilamātrī |parameśvaratā tadapi tavādhikadurghaṭaghaṭanavidhātrī ||ayamavilolatayādya sanātanakalitādbhutarasabhāram |nivasatu nityamihāmṛtanindinivindanmadhurimasāram || 24||

अथ नायिकाभेदाःअथाभिसारिका वाससज्जाप्युत्कण्ठिता तथा ।विप्रलब्धा खण्डिता च कलहान्तरिता परा ॥प्रोषितप्रेयसी प्रोक्ता तथा स्वाधीनभर्तृका ।इत्यष्टौ नायिकाभेदा रसतन्त्रे प्रकीर्तिताः ॥तत्राभिसारिकाया पर्युत्सुकचित्तातिमदेन मदनेन च ।आत्मनाभिसरेत् कान्तं सा भवेदभिसारिका ॥

atha nāyikābhedāḥathābhisārikā vāsasajjāpyutkaṇṭhitā tathā |vipralabdhā khaṇḍitā ca kalahāntaritā parā ||proṣitapreyasī proktā tathā svādhīnabhartṛkā |ityaṣṭau nāyikābhedā rasatantre prakīrtitāḥ ||tatrābhisārikāyā paryutsukacittātimadena madanena ca |ātmanābhisaret kāntaṃ sā bhavedabhisārikā ||

धनाश्रीःत्वं कुचवल्गितमौक्तिकमाला ।स्मितसान्द्रीकृतशशिकरजाला ॥हरिमभिसर सुन्दरि सितवेशा ।राकारजनिरजनि गुरुरेषा ॥ ध्रुव ॥परिहितमाहिषदधिरुचिसिचया ।वपुरर्पितघनचन्दननिचया ॥कर्णकरम्बितकैरवहासा ।कलितसनातनसङ्गविलासा ॥ २५॥

dhanāśrīḥtvaṃ kucavalgitamauktikamālā |smitasāndrīkṛtaśaśikarajālā ||harimabhisara sundari sitaveśā |rākārajanirajani gurureṣā || dhruva ||parihitamāhiṣadadhirucisicayā |vapurarpitaghanacandananicayā ||karṇakarambitakairavahāsā |kalitasanātanasaṅgavilāsā || 25||

अथ वासकसज्जाभवेद् वासकसज्जासौ सज्जिताङ्गरतालया ।निश्चित्यागमनं भर्तुर्द्वारेक्षणपरायणा ॥

atha vāsakasajjābhaved vāsakasajjāsau sajjitāṅgaratālayā |niścityāgamanaṃ bharturdvārekṣaṇaparāyaṇā ||

कल्याणःकुसुमावलिभिरुपस्कुरु तल्पम् ।माल्यं चामलमणिसरकल्पम् ॥प्रियसखि केलिपरिच्छदपुञ्जम् ।उपकल्पय सत्वरमधिकुञ्जम् ॥ ध्रुव ॥मणिसम्पुटमुपनय ताम्बूलम् ।शयनाञ्चलमपि पीतदुकूलम् ॥विद्धि समागतमप्रतिबन्धम् ।माधवमाशु सनातनसन्धम् ॥ २५॥

kalyāṇaḥkusumāvalibhirupaskuru talpam |mālyaṃ cāmalamaṇisarakalpam ||priyasakhi keliparicchadapuñjam |upakalpaya satvaramadhikuñjam || dhruva ||maṇisampuṭamupanaya tāmbūlam |śayanāñcalamapi pītadukūlam ||viddhi samāgatamapratibandham |mādhavamāśu sanātanasandham || 25||

अथोत्कण्ठितासा स्यादुत्कण्ठिता यस्या वासं नैति द्रुतं प्रियः ।तस्यानगमने हेतुं चिन्तयन्त्या शुचा भृशम् ॥

athotkaṇṭhitāsā syādutkaṇṭhitā yasyā vāsaṃ naiti drutaṃ priyaḥ |tasyānagamane hetuṃ cintayantyā śucā bhṛśam ||

आसावरीकिमु चन्द्रावलिरनयगभीरा ।न्यरुणदमुं रतिवीरमधीरा ॥अतिचिरमजनि रजनिरतिकाली ।सङ्गमविन्दत न हि वनमाली ॥ ध्रुव ॥किमिह जने धृतपङ्कविपाके ।विस्मृतिरस्य बभूव वराके ॥किमुत सनातनतनुरलघिष्ठम् ।रणमारभत सुरारिभिरिष्टम् ॥ २७॥

āsāvarīkimu candrāvaliranayagabhīrā |nyaruṇadamuṃ rativīramadhīrā ||aticiramajani rajaniratikālī |saṅgamavindata na hi vanamālī || dhruva ||kimiha jane dhṛtapaṅkavipāke |vismṛtirasya babhūva varāke ||kimuta sanātanatanuralaghiṣṭham |raṇamārabhata surāribhiriṣṭam || 27||

अथ विप्रलब्धायस्या दूतीं स्वयं प्रेष्य समये नागतः प्रियः ।शोचन्ती तं विना दुःस्था विप्रलब्धा तु सा स्मृता ॥

atha vipralabdhāyasyā dūtīṃ svayaṃ preṣya samaye nāgataḥ priyaḥ |śocantī taṃ vinā duḥsthā vipralabdhā tu sā smṛtā ||

गौडीकोमलकुसुमावलीकृतचयनम् ।अपसारय रतिलीलाशयनम् ॥श्रीहरिणाद्य न लेभे शमये ।हन्त जनं सखि शरणं कमये ॥ ध्रुव ॥निधृतमनोहरगन्धविलासम् ।क्षिप यामुनतटभुवि पटवासम् ॥लब्धमवेहि निशान्तिमयामम् ।मुञ्च सनातनसङ्गतिकामम् ॥ २८॥

gauḍīkomalakusumāvalīkṛtacayanam |apasāraya ratilīlāśayanam ||śrīhariṇādya na lebhe śamaye |hanta janaṃ sakhi śaraṇaṃ kamaye || dhruva ||nidhṛtamanoharagandhavilāsam |kṣipa yāmunataṭabhuvi paṭavāsam ||labdhamavehi niśāntimayāmam |muñca sanātanasaṅgatikāmam || 28||

अथ खण्डिताअन्यया सह कान्तस्य दृष्टे सम्भोगलक्षणे ।ईर्ष्याकषायितात्मासौ खण्डिता खलु कथ्यते ॥

atha khaṇḍitāanyayā saha kāntasya dṛṣṭe sambhogalakṣaṇe |īrṣyākaṣāyitātmāsau khaṇḍitā khalu kathyate ||

रामकेलिःहृदयान्तरमधिशायितम् । रमय जनं निजदयितम् ॥किं फलमपराधिकया । संप्रति तव राधिकया ॥माधव परिहर पटिमतरङ्गम् ।वेत्ति न का तव रङ्गम् ॥ ध्रुव ॥आघूर्णति तव नयनम् । याहि घटीं भज शयनम् ॥अनुलेपं रचयालम् । नश्यतु नखपदजालम् ॥त्वामिह विलसति बाला । मुखरसखीनां माला ॥देव सनातन वन्दे । न कुरु विलम्बमालिन्दे ॥ २९॥

rāmakeliḥhṛdayāntaramadhiśāyitam | ramaya janaṃ nijadayitam ||kiṃ phalamaparādhikayā | saṃprati tava rādhikayā ||mādhava parihara paṭimataraṅgam |vetti na kā tava raṅgam || dhruva ||āghūrṇati tava nayanam | yāhi ghaṭīṃ bhaja śayanam ||anulepaṃ racayālam | naśyatu nakhapadajālam ||tvāmiha vilasati bālā | mukharasakhīnāṃ mālā ||deva sanātana vande | na kuru vilambamālinde || 29||

यां सेवितवान् असि जागरी ।त्वामजयत् सा निशि नागरी ॥कपटमिदं तव विन्दति हरे ।नावसरं पुनरालिनिकरे ॥ ध्रुव ॥मा कुरु शपथं गोकुलपते ।वेत्ति चिरं का चरितं न ते ॥मुक्तसनातनसौहृदभरे ।न पुनरहं त्वयि रसमाहरे ॥ ३०॥

yāṃ sevitavān asi jāgarī |tvāmajayat sā niśi nāgarī ||kapaṭamidaṃ tava vindati hare |nāvasaraṃ punarālinikare || dhruva ||mā kuru śapathaṃ gokulapate |vetti ciraṃ kā caritaṃ na te ||muktasanātanasauhṛdabhare |na punarahaṃ tvayi rasamāhare || 30||

अथ कलहान्तरितानिरस्तो मन्युना कान्तो नमन्नपि यया पुरः ।सानुतापयुता दीना कलहान्तरिता भवेत् ॥

atha kalahāntaritānirasto manyunā kānto namannapi yayā puraḥ |sānutāpayutā dīnā kalahāntaritā bhavet ||

ललितःनाकर्णयमतिसुहृदुपदेशम् ।माधवचाटुपटलमपि लेशम् ॥सीदति सखि मम हृदयमधीरम् ।यदभजमिह न हि गोकुलवीरम् ॥ ध्रुव ॥नालोकयमर्पितमुरुहारम् ।प्रणमन्तं च दयितमनुवारम् ॥हन्त सनातनगुणमभियान्तम् ।किमधारयमहमुरसि न कान्तम् ॥ ३१॥

lalitaḥnākarṇayamatisuhṛdupadeśam |mādhavacāṭupaṭalamapi leśam ||sīdati sakhi mama hṛdayamadhīram |yadabhajamiha na hi gokulavīram || dhruva ||nālokayamarpitamuruhāram |praṇamantaṃ ca dayitamanuvāram ||hanta sanātanaguṇamabhiyāntam |kimadhārayamahamurasi na kāntam || 31||

अथ विरहिणी प्रोषितप्रेयसीकुतश्चित् कारणाद् यस्या विदूरस्थो भवेत् पतिः ।तदनागमदुःखार्ता सा स्यात् प्रोषितभर्तृका ॥

atha virahiṇī proṣitapreyasīkutaścit kāraṇād yasyā vidūrastho bhavet patiḥ |tadanāgamaduḥkhārtā sā syāt proṣitabhartṛkā ||

गौडीकुर्वति किल कोकिलकुले उज्ज्वलकलनादम् ।जैमिनिरिति जैमिन्रिति जल्पति सविषादम् ॥माधव घोरे वियोगतमसि निपपात राधा ।विधुरमलिनमूर्तिरधिकमधिरूढबाधा ॥ ध्रुव ॥नीलनलिनमाल्यमहह वीक्ष्य पुलकवीता ।गरुड गरुड गरुडेत्यभिरौति परमभीता ॥लम्भितमृगनाभिमगुरुकर्दममनु दीना ।ध्यायति शितिकण्ठमपि सनातनमनुलीना ॥ ३२॥

gauḍīkurvati kila kokilakule ujjvalakalanādam |jaiminiriti jaiminriti jalpati saviṣādam ||mādhava ghore viyogatamasi nipapāta rādhā |vidhuramalinamūrtiradhikamadhirūḍhabādhā || dhruva ||nīlanalinamālyamahaha vīkṣya pulakavītā |garuḍa garuḍa garuḍetyabhirauti paramabhītā ||lambhitamṛganābhimagurukardamamanu dīnā |dhyāyati śitikaṇṭhamapi sanātanamanulīnā || 32||

अथ स्वाधीनभर्तृकायस्याः प्रेमगुणाकृष्टः प्रियः पार्श्वं न मुञ्चति ।विचित्रसम्भ्रमासक्ता सा स्यात् स्वाधीनभर्तृका ॥

atha svādhīnabhartṛkāyasyāḥ premaguṇākṛṣṭaḥ priyaḥ pārśvaṃ na muñcati |vicitrasambhramāsaktā sā syāt svādhīnabhartṛkā ||

मल्लारःपत्रावलिमिह मम हृदि गौरे ।मृगमदबिन्दुभिरर्पय शौरे ॥श्यामल सुन्दर विविधविशेषम् ।विरचय वपुषि ममोज्ज्वलवेशम् ॥ ध्रुव ॥पिञ्छमुकुट मम पिञ्छनिकाशम् ।वरमवतंसय कुन्तलपाशम् ॥अत्र सनातन शिल्पलवङ्गम् ।श्रुतियुगले मम लम्भय सङ्गम् ॥ ३३॥

mallāraḥpatrāvalimiha mama hṛdi gaure |mṛgamadabindubhirarpaya śaure ||śyāmala sundara vividhaviśeṣam |viracaya vapuṣi mamojjvalaveśam || dhruva ||piñchamukuṭa mama piñchanikāśam |varamavataṃsaya kuntalapāśam ||atra sanātana śilpalavaṅgam |śrutiyugale mama lambhaya saṅgam || 33||

वसन्तरागःकिमयं रचयति नयनतरङ्गम् ।कैरविनी न हि भजति पतङ्गम् ॥वारय माधवमुद्यदनङ्गम् ।स्पृशति यथायं न सखि मदङ्गम् ॥ ध्रुव ॥कम्पिकरान् मम पतति लवङ्गम् ।त्वमपि तथापि न मुञ्चसि रङ्गम् ॥कमपि सनातनधर्ममभङ्गम् ।न परिहरिष्ये हृदि कृतसङ्गम् ॥ ३४॥

vasantarāgaḥkimayaṃ racayati nayanataraṅgam |kairavinī na hi bhajati pataṅgam ||vāraya mādhavamudyadanaṅgam |spṛśati yathāyaṃ na sakhi madaṅgam || dhruva ||kampikarān mama patati lavaṅgam |tvamapi tathāpi na muñcasi raṅgam ||kamapi sanātanadharmamabhaṅgam |na parihariṣye hṛdi kṛtasaṅgam || 34||

भैरवरागःअपघनघटितघुसृणघनसार ।पिञ्छखचितकुञ्चितकचभार ॥जय जय वल्लवराजकुमार ।राधावक्षसि हरिमणिहार ॥ ध्रुव ॥राधाधृतिहरमुरलीतार ।नयनाञ्चलकृतमदनविकार ॥रसरञ्जितराधापरिवार ।कलितसनातनचित्तविहार ॥ ३५॥

bhairavarāgaḥapaghanaghaṭitaghusṛṇaghanasāra |piñchakhacitakuñcitakacabhāra ||jaya jaya vallavarājakumāra |rādhāvakṣasi harimaṇihāra || dhruva ||rādhādhṛtiharamuralītāra |nayanāñcalakṛtamadanavikāra ||rasarañjitarādhāparivāra |kalitasanātanacittavihāra || 35||

कर्णाटरागः, एकताली तालःसुन्दरि साध्वी त्वमिह किशोरी ।तत् कथमसि वद गोष्ठपुरन्दरनन्दन हृन्मणिचौरी ॥न हि सङ्गोपय परधनमधुना त्वं विदिता कुलपाली ।ललितासखि कुरु करुणां सीदति कन्दरभुवि वनमाली ॥अयि रमणीमणि रमणीयं मणिमर्पय पुनरावलम्बम् ।बह्वतु निराकुलमतिकृपया तव हरिपरिजननिकुरम्बम् ॥दूतीयुगमिदमवनमति स्वयमवनिलुठितकचजुटम् ।तन्वि सनातनसौहृदमनुसर विस्तारय न हि कूटम् ॥ ३६॥

karṇāṭarāgaḥ, ekatālī tālaḥsundari sādhvī tvamiha kiśorī |tat kathamasi vada goṣṭhapurandaranandana hṛnmaṇicaurī ||na hi saṅgopaya paradhanamadhunā tvaṃ viditā kulapālī |lalitāsakhi kuru karuṇāṃ sīdati kandarabhuvi vanamālī ||ayi ramaṇīmaṇi ramaṇīyaṃ maṇimarpaya punarāvalambam |bahvatu nirākulamatikṛpayā tava hariparijananikurambam ||dūtīyugamidamavanamati svayamavaniluṭhitakacajuṭam |tanvi sanātanasauhṛdamanusara vistāraya na hi kūṭam || 36||

मल्लाररागः, एकताली तालःराधे कलय हृदयमनुकूलम् ।दलति दृगञ्चलशरहतहृत् तव गोकुलजीवितमूलम् ॥ ध्रुव ॥शीलितपञ्चमगीतिरदक्षिणपाणिसरोरुहहंसी ।तनुते साम्प्रतमस्य मुनिव्रतमरतिभरादिव वंशी ॥भ्रमदिन्दिन्दिरवृन्दविकर्षणपरिमलपटलविशाला ।पतिता कण्ठतटादभिशुष्यति तस्य वने वनमाला ॥अदये दधती तनुरपि तनुतां तस्य समुज्झितलीला ।शीर्यति कन्दरधाम्नि सनातनहृदयानन्दनशीला ॥ ३७॥

mallārarāgaḥ, ekatālī tālaḥrādhe kalaya hṛdayamanukūlam |dalati dṛgañcalaśarahatahṛt tava gokulajīvitamūlam || dhruva ||śīlitapañcamagītiradakṣiṇapāṇisaroruhahaṃsī |tanute sāmpratamasya munivratamaratibharādiva vaṃśī ||bhramadindindiravṛndavikarṣaṇaparimalapaṭalaviśālā |patitā kaṇṭhataṭādabhiśuṣyati tasya vane vanamālā ||adaye dadhatī tanurapi tanutāṃ tasya samujjhitalīlā |śīryati kandaradhāmni sanātanahṛdayānandanaśīlā || 37||

वसन्तरागःमधुरिपुरद्य वसन्ते ।खेलति गोकुलयुवतिभिरुज्ज्वलपुष्पसुगन्धदिगन्ते ॥ ध्रुव ॥प्रेमकरम्बितराधाचुम्बितमुखविधुरुत्सवशाली ।धृतचन्द्रावलिचारुकराङ्गुलिरिह नवचम्पकमाली ॥नवशशिरेखालिखितावशाखातनुरथ ललितासङ्गी ।श्यामलयाश्रितबाहुरुदञ्चितपद्माविभ्रमरङ्गी ॥भद्रालम्बितशैव्योदीरितरक्तरजोभरधारी ।पश्य सनातनमूर्तिरयं घनवृन्दावनरुचिकारी ॥ ३८॥

vasantarāgaḥmadhuripuradya vasante |khelati gokulayuvatibhirujjvalapuṣpasugandhadigante || dhruva ||premakarambitarādhācumbitamukhavidhurutsavaśālī |dhṛtacandrāvalicārukarāṅguliriha navacampakamālī ||navaśaśirekhālikhitāvaśākhātanuratha lalitāsaṅgī |śyāmalayāśritabāhurudañcitapadmāvibhramaraṅgī ||bhadrālambitaśaivyodīritaraktarajobharadhārī |paśya sanātanamūrtirayaṃ ghanavṛndāvanarucikārī || 38||

(३९]वसन्तरागःऋतुराजार्पिततोषरङ्गम् ।राधे भज वृन्दावनंरङ्गम् ॥ ध्रुव ॥मलयानिलगुरुशिक्षितलास्या ।नटति लताततिरुज्ज्वलहास्या ॥पिकततिरिह वादयति मृदङ्गम् ।पश्यति तरुकुलमङ्कुरदङ्गम् ॥गायति भृङ्गघटाद्भुतशीला ।मम वंशीव सनातनलीला ॥ ३९॥

(39]vasantarāgaḥṛturājārpitatoṣaraṅgam |rādhe bhaja vṛndāvanaṃraṅgam || dhruva ||malayānilaguruśikṣitalāsyā |naṭati latātatirujjvalahāsyā ||pikatatiriha vādayati mṛdaṅgam |paśyati tarukulamaṅkuradaṅgam ||gāyati bhṛṅgaghaṭādbhutaśīlā |mama vaṃśīva sanātanalīlā || 39||

वसन्तरागःविहरति सह राधिकया रङ्गी ।मधुमधुरे वृन्दावनरोधसि हरिरिह हर्षतरङ्गी ॥ ध्रुव ॥विकिरति यन्त्रेरितमघवैरिणि राधा कुङ्कुमपङ्कम् ।दयितामयमपि सिञ्चति मृगमदरसराशिभिरविशङ्कम् ॥क्षिपति मिथो युवमिथुनमिदं नवमरुणतरं पटवासम् ।जितमिति जितमिति मुहुरपि जल्पति कल्पयदतनुविलासम् ॥सुबलो रणयति घनकरताली जितवान् इति वनमाली ।ललिता वदति सनातनवल्लभमजयत् पश्य ममाली ॥ ४०॥

vasantarāgaḥviharati saha rādhikayā raṅgī |madhumadhure vṛndāvanarodhasi haririha harṣataraṅgī || dhruva ||vikirati yantreritamaghavairiṇi rādhā kuṅkumapaṅkam |dayitāmayamapi siñcati mṛgamadarasarāśibhiraviśaṅkam ||kṣipati mitho yuvamithunamidaṃ navamaruṇataraṃ paṭavāsam |jitamiti jitamiti muhurapi jalpati kalpayadatanuvilāsam ||subalo raṇayati ghanakaratālī jitavān iti vanamālī |lalitā vadati sanātanavallabhamajayat paśya mamālī || 40||

धनाश्रीःराधा सखि जलकेलिषु निपुणा ।खेलति निजकुण्डे मधुरिपुणा ॥ ध्रुव ॥कुचपटलुण्ठननिर्मितकलिना ।आयुधपदवीयोजितनलिना ॥दृढपरिरम्भणचुम्बनहठिना ।हिमजलसेचनकर्मणि कठिना ॥सुखभरशिथिलसनातनमहसा ।दयितपराजयलक्षणसहसा ॥

dhanāśrīḥrādhā sakhi jalakeliṣu nipuṇā |khelati nijakuṇḍe madhuripuṇā || dhruva ||kucapaṭaluṇṭhananirmitakalinā |āyudhapadavīyojitanalinā ||dṛḍhaparirambhaṇacumbanahaṭhinā |himajalasecanakarmaṇi kaṭhinā ||sukhabharaśithilasanātanamahasā |dayitaparājayalakṣaṇasahasā ||

धनाश्रीःराधे निजकुण्डपयसि तुङ्गीकुरु रङ्गम् ।किं च सिञ्च पिञ्छमुकुटमङ्गीकृतभङ्गम् ॥ ध्रुव ॥अस्य पश्य फुल्लकुसुमरचितोज्ज्वलचूडा ।भीतिभिरतिनीलनिविडकुन्तलमनु गूढा ॥धातुरचितचित्रवीथिरम्भसि परिलीना ।मालाप्यतिशिथिलवृत्तिरजनि भृङ्गहीना ॥श्रीसनातनसुमणिरत्नमंशुभिरपि चण्डम् ।भेजे प्रतिबिम्बभावदम्भी तव गण्डम् ॥ ४२॥

dhanāśrīḥrādhe nijakuṇḍapayasi tuṅgīkuru raṅgam |kiṃ ca siñca piñchamukuṭamaṅgīkṛtabhaṅgam || dhruva ||asya paśya phullakusumaracitojjvalacūḍā |bhītibhiratinīlaniviḍakuntalamanu gūḍhā ||dhāturacitacitravīthirambhasi parilīnā |mālāpyatiśithilavṛttirajani bhṛṅgahīnā ||śrīsanātanasumaṇiratnamaṃśubhirapi caṇḍam |bheje pratibimbabhāvadambhī tava gaṇḍam || 42||

इति श्रीरूपगोस्वामिविरचितस्तवमालायां गीतावली समाप्ता ।

iti śrīrūpagosvāmiviracitastavamālāyāṃ gītāvalī samāptā |