कृष्णस्तोत्रम् (बालकृतम्) Balakritam Krishnastotram Or Davanala Samharana Stotram

बाला ऊचुःयथा सुरक्षित ब्रह्मन् सर्वापत्स्वेव नः कुलम् ।तथा रक्षां कुरु पुनर्दावाग्नेर्मधुसूदन ॥ १॥

bālā ūcuḥyathā surakṣita brahman sarvāpatsveva naḥ kulam |tathā rakṣāṃ kuru punardāvāgnermadhusūdana || 1||

त्वमिष्टदेवताऽस्माकं त्वमेव कुलदेवता ।स्रष्टा पाता च संहर्ता जगतां च जगत्पते ॥ २॥

tvamiṣṭadevatā'smākaṃ tvameva kuladevatā |sraṣṭā pātā ca saṃhartā jagatāṃ ca jagatpate || 2||

वह्निर्वा वरूणो वाऽपि चन्द्रो वा सूर्य एव च ।नमः कुबेरः पवन ईशानाद्याश्च देवता ॥ ३॥

vahnirvā varūṇo vā'pi candro vā sūrya eva ca |namaḥ kuberaḥ pavana īśānādyāśca devatā || 3||

ब्रह्मेशशेषधर्मेन्द्रा मुनीन्द्रा मनवः स्मृताः ।मानवाश्च तथा दैत्या यक्षराक्षसकिन्नराः ॥ ४॥

brahmeśaśeṣadharmendrā munīndrā manavaḥ smṛtāḥ |mānavāśca tathā daityā yakṣarākṣasakinnarāḥ || 4||

ये ये चराऽचराश्चैव सर्वे तव विभूतयः ।आविर्भावस्तिरोभावः सर्वेषां च तवेच्छया ॥ ५॥

ye ye carā'carāścaiva sarve tava vibhūtayaḥ |āvirbhāvastirobhāvaḥ sarveṣāṃ ca tavecchayā || 5||

अभयं देहि गोविंद वह्निसंहरणं कुरु ।वयं त्वां शरणं यामो रक्ष नः शरणागतान् ॥ ६॥

abhayaṃ dehi goviṃda vahnisaṃharaṇaṃ kuru |vayaṃ tvāṃ śaraṇaṃ yāmo rakṣa naḥ śaraṇāgatān || 6||

इत्येवमुक्त्वा ते सर्वे तस्थुर्ध्यात्वा पदाम्बुजम् ।दूरीभूतस्तु दावाग्निः श्रीकृष्णामृतदृष्टितः ॥ ७॥

ityevamuktvā te sarve tasthurdhyātvā padāmbujam |dūrībhūtastu dāvāgniḥ śrīkṛṣṇāmṛtadṛṣṭitaḥ || 7||

दूरीभूते च दावाग्नौ ननृतुस्ते मुदान्विताः ।सर्वापदः प्रणश्यन्ति हरिस्मरणमात्रतः ॥ ८॥

dūrībhūte ca dāvāgnau nanṛtuste mudānvitāḥ |sarvāpadaḥ praṇaśyanti harismaraṇamātrataḥ || 8||

इदं स्तोत्रं महापुण्यं प्रातरूत्थाय यः पठेत् ।वह्नितो न भवेत्तस्य भयं जन्मनि जन्मनि ॥ ९॥

idaṃ stotraṃ mahāpuṇyaṃ prātarūtthāya yaḥ paṭhet |vahnito na bhavettasya bhayaṃ janmani janmani || 9||

शत्रुग्रस्ते च दावाग्नौ विपत्तौ प्राणसंकटे ।स्तोत्रमेतत् पठित्वा तु मुच्यते नाऽत्र संशयः ॥ १०॥

śatrugraste ca dāvāgnau vipattau prāṇasaṃkaṭe |stotrametat paṭhitvā tu mucyate nā'tra saṃśayaḥ || 10||

शत्रुसैन्यं क्षयं याति सर्वत्र विजयी भवेत् ।इह लोके हरेर्भक्तिमन्ते दास्यं लभेध्रुवम् ॥ ११॥

śatrusainyaṃ kṣayaṃ yāti sarvatra vijayī bhavet |iha loke harerbhaktimante dāsyaṃ labhedhruvam || 11||

॥ इति श्रीब्रह्मवैवर्ते श्रीकृष्णजन्मखण्डे बालकृतंकृष्णस्तोत्रं अथवा दावानल संहरण स्तोत्रं सम्पूर्णम् ॥

|| iti śrībrahmavaivarte śrīkṛṣṇajanmakhaṇḍe bālakṛtaṃkṛṣṇastotraṃ athavā dāvānala saṃharaṇa stotraṃ sampūrṇam ||