आनन्दस्तोत्रम् Anandastotram

श्रीकृष्णः परमानन्दो गोविन्दो नन्दनन्दनः ।तमालश्यामलरुचिः शिखण्डकृतशेखरः ॥ १॥

śrīkṛṣṇaḥ paramānando govindo nandanandanaḥ |tamālaśyāmalaruciḥ śikhaṇḍakṛtaśekharaḥ || 1||

पीतकौशेयवसनो मधुरस्मितशोभितः ।कन्दर्पकोटिलावण्यो वृन्दारण्यमहोत्सवः ॥ २॥

pītakauśeyavasano madhurasmitaśobhitaḥ |kandarpakoṭilāvaṇyo vṛndāraṇyamahotsavaḥ || 2||

वैजयन्तीस्फुरद्वक्षाः कक्षात्तलगुडोत्तमः ।कुञ्जापितरतिर्गुञ्जापुञ्जमञ्जुलकण्ठकः ॥ ३॥

vaijayantīsphuradvakṣāḥ kakṣāttalaguḍottamaḥ |kuñjāpitaratirguñjāpuñjamañjulakaṇṭhakaḥ || 3||

कर्णिकाराढ्यकर्णश्रीधृतिस्वर्णाभवर्णकः ।मुरलीवादनपटुर्वल्लवीकुलवल्लभः ॥ ४॥

karṇikārāḍhyakarṇaśrīdhṛtisvarṇābhavarṇakaḥ |muralīvādanapaṭurvallavīkulavallabhaḥ || 4||

गान्धर्वाप्तिमहापर्वा राधाराधनपेशलः ।इति श्रीकृष्णचन्द्रस्य नाम विंशतिसंज्ञितम् ॥ ५॥

gāndharvāptimahāparvā rādhārādhanapeśalaḥ |iti śrīkṛṣṇacandrasya nāma viṃśatisaṃjñitam || 5||

आनन्दाख्यं महास्तोत्रं यः पठेच्छृणुयाच्च यः ।स परं सौख्यमासाद्य कृष्णप्रेमसमन्वितः ॥ ६॥

ānandākhyaṃ mahāstotraṃ yaḥ paṭhecchṛṇuyācca yaḥ |sa paraṃ saukhyamāsādya kṛṣṇapremasamanvitaḥ || 6||

सर्वलोकप्रियो भूत्वा सद्गुणावलिभूषितः ।व्रजराजकुमारस्य सन्निकर्षमवाप्नुयात् ॥ ७॥

sarvalokapriyo bhūtvā sadguṇāvalibhūṣitaḥ |vrajarājakumārasya sannikarṣamavāpnuyāt || 7||

इति श्रीरूपगोस्वामिविरचितस्तवमालायां श्रीमहानन्दाख्यस्तोत्रं समाप्तम् ।

iti śrīrūpagosvāmiviracitastavamālāyāṃ śrīmahānandākhyastotraṃ samāptam |