हनुमत्स्तोत्रम् यन्त्रोद्धारक Shrihanumatstotram

यन्त्रोद्धारक हनूमत्सोत्रम्नमामि दूतं रामस्य सुखदं च सुरद्रुमम् ।पीनवृत्तमहाबाहुं सर्वशत्रुनिबर्हणम् ॥ १॥

yantroddhāraka hanūmatsotramnamāmi dūtaṃ rāmasya sukhadaṃ ca suradrumam |pīnavṛttamahābāhuṃ sarvaśatrunibarhaṇam || 1||

नानारत्नसमायुक्तकुण्डलादिविभूषितम् ।सर्वदाभीष्टदातारं सतां वै दृढमाहवे ॥ २॥

nānāratnasamāyuktakuṇḍalādivibhūṣitam |sarvadābhīṣṭadātāraṃ satāṃ vai dṛḍhamāhave || 2||

वासिनं चक्रतीर्थस्य दक्षिणस्थगिरौ सदा ।तुङ्गाम्भोधितरङ्गस्य वातेन परिशोभिते ॥ ३॥

vāsinaṃ cakratīrthasya dakṣiṇasthagirau sadā |tuṅgāmbhodhitaraṅgasya vātena pariśobhite || 3||

नानादेशागतैः सद्भिः सेव्यमानं नृपोत्तमैः ।धूपदीपादिनैवेद्यैः पञ्चखाद्यैश्च शक्तितः ॥ ४॥

nānādeśāgataiḥ sadbhiḥ sevyamānaṃ nṛpottamaiḥ |dhūpadīpādinaivedyaiḥ pañcakhādyaiśca śaktitaḥ || 4||

भजामि श्रीहनूमन्तं हेमकान्तिसमप्रभम् ।व्यासतीर्थयतीन्द्रेण पूजितं प्रणिधानतः ॥ ५॥

bhajāmi śrīhanūmantaṃ hemakāntisamaprabham |vyāsatīrthayatīndreṇa pūjitaṃ praṇidhānataḥ || 5||

त्रिवारं यः पठेन्नित्यं स्तोत्रं भक्त्या द्विजोत्तमः ।वांछितं लभतेऽभीष्टं षण्मासाभ्यन्तरे खलु ॥ ६॥

trivāraṃ yaḥ paṭhennityaṃ stotraṃ bhaktyā dvijottamaḥ |vāṃchitaṃ labhate'bhīṣṭaṃ ṣaṇmāsābhyantare khalu || 6||

पुत्रार्थी लभते पुत्रं यशोऽर्थी लभते यशः ।विद्यार्थी लभते विद्यां धनार्थी लभते धनम् ॥ ७॥

putrārthī labhate putraṃ yaśo'rthī labhate yaśaḥ |vidyārthī labhate vidyāṃ dhanārthī labhate dhanam || 7||

सर्वथा मास्तु सन्देहो हरिः साक्षी जगत्पतिः ।यः करोत्यत्र सन्देहं स याति निरयं ध्रुवम् ॥ ८॥

sarvathā māstu sandeho hariḥ sākṣī jagatpatiḥ |yaḥ karotyatra sandehaṃ sa yāti nirayaṃ dhruvam || 8||

इति श्रीव्यासतीर्थविरचितम् हनुमत्स्तोत्रं सम्पूर्णम् ।

iti śrīvyāsatīrthaviracitam hanumatstotraṃ sampūrṇam |