हनूमत्स्तोत्रम् ३ Shrihanumatstotram 3

शृणु देवि प्रवक्ष्यामि स्तोत्रं सर्वसुखावहम् ।सर्वकामप्रदं नॄणां हनुमत्स्तोत्रमुत्तमम् ॥ १॥

śṛṇu devi pravakṣyāmi stotraṃ sarvasukhāvaham |sarvakāmapradaṃ nṝṇāṃ hanumatstotramuttamam || 1||

तप्तहाटकसङ्काशं नानापुष्पविराजितम् ।उद्यद्बालार्कवदनं त्रिनेत्रं कुण्डलोज्ज्वलम् ॥ २॥

taptahāṭakasaṅkāśaṃ nānāpuṣpavirājitam |udyadbālārkavadanaṃ trinetraṃ kuṇḍalojjvalam || 2||

मौञ्जीकौपीनकं हेममययज्ञोपवीतिनम् ।पिङ्गलाक्षं महाकायं टङ्कशैलेन्द्रधारिणम् ॥ ३॥

mauñjīkaupīnakaṃ hemamayayajñopavītinam |piṅgalākṣaṃ mahākāyaṃ ṭaṅkaśailendradhāriṇam || 3||

मूर्तित्रयात्मकं वीरं महाशौर्यं महाहनुम् ।हनूमन्तं वायुसूनुं नमामि ब्रह्मचारिणम् ॥ ४॥

mūrtitrayātmakaṃ vīraṃ mahāśauryaṃ mahāhanum |hanūmantaṃ vāyusūnuṃ namāmi brahmacāriṇam || 4||

त्रिवर्णाक्षरमन्त्रस्थं जपाकुसुमसन्निभम् ।नानाभूषणसंयुक्तमाञ्जनेयं नमाम्यहम् ॥ ५॥

trivarṇākṣaramantrasthaṃ japākusumasannibham |nānābhūṣaṇasaṃyuktamāñjaneyaṃ namāmyaham || 5||

पञ्चाक्षरस्थितं देवं नीलनीरदसन्निभम् ।पूजितं सर्वदेवैस्तु राक्षसारिं नमाम्यहम् ॥ ६॥

pañcākṣarasthitaṃ devaṃ nīlanīradasannibham |pūjitaṃ sarvadevaistu rākṣasāriṃ namāmyaham || 6||

अचलद्युतिसङ्काशं सर्वालङ्कारभूषितम् ।षडक्षरयुतं देवं नमामि ब्रह्मचारिणम् ॥ ७॥

acaladyutisaṅkāśaṃ sarvālaṅkārabhūṣitam |ṣaḍakṣarayutaṃ devaṃ namāmi brahmacāriṇam || 7||

सप्तवर्णमयं देवं हरीशं तं सुरार्चितम् ।सुन्दरास्याब्जसंयुक्तं त्रिनेत्रं तं नमाम्यहम् ॥ ८॥

saptavarṇamayaṃ devaṃ harīśaṃ taṃ surārcitam |sundarāsyābjasaṃyuktaṃ trinetraṃ taṃ namāmyaham || 8||

अष्टादशाधिपं देवं हेमवर्णं महातनुम् ।नमामि जगतां वन्द्यं लङ्काप्रासाददाहनम् ॥ ९॥

aṣṭādaśādhipaṃ devaṃ hemavarṇaṃ mahātanum |namāmi jagatāṃ vandyaṃ laṅkāprāsādadāhanam || 9||

अतसीपुष्पसङ्काशं दशवर्णात्मकं विभुम् ।जटाधरं चतुर्बाहुं नमामि कपिनायकम् ॥ १०॥

atasīpuṣpasaṅkāśaṃ daśavarṇātmakaṃ vibhum |jaṭādharaṃ caturbāhuṃ namāmi kapināyakam || 10||

द्वादशाक्षरमन्त्रस्य नायकं कुन्तधारिणम् ।हेमवर्णलसत्कायं भजे सुग्रीवमन्त्रिणम् ॥ ११॥

dvādaśākṣaramantrasya nāyakaṃ kuntadhāriṇam |hemavarṇalasatkāyaṃ bhaje sugrīvamantriṇam || 11||

मालामन्त्रात्मकं देवं त्रिवर्णं च चतुर्भुजम् ।पाशाङ्कुशधरं देवं कपिवर्यं नमाम्यहम् ॥ १२॥

mālāmantrātmakaṃ devaṃ trivarṇaṃ ca caturbhujam |pāśāṅkuśadharaṃ devaṃ kapivaryaṃ namāmyaham || 12||

त्रयोदशाक्षरहितं सीतादुःखनिवारणम् ।सुरासुरगणैः सर्वैः संस्तुतं प्रणमाम्यहम् ॥ १३॥

trayodaśākṣarahitaṃ sītāduḥkhanivāraṇam |surāsuragaṇaiḥ sarvaiḥ saṃstutaṃ praṇamāmyaham || 13||

हाहाकारमुखान्तनित्यदहनज्वालासमूहोज्ज्वलंविद्वन्मण्डलजातरोषपरुषं श्रीरामदासं विभुम् ।सञ्चूर्णीकृतधूम्रलोचनमहाह्यक्षादिरक्षोबलंतं वन्दे रविधारणं सुरवरैर्वन्द्यं समीरात्मजम् ॥ १४॥

hāhākāramukhāntanityadahanajvālāsamūhojjvalaṃvidvanmaṇḍalajātaroṣaparuṣaṃ śrīrāmadāsaṃ vibhum |sañcūrṇīkṛtadhūmralocanamahāhyakṣādirakṣobalaṃtaṃ vande ravidhāraṇaṃ suravarairvandyaṃ samīrātmajam || 14||

रघुपतिपदभक्तं किङ्किणीकोत्तमाङ्गंमुकुलितकरपद्मं मोदयानं तरङ्गे ।पुलकितविपुलाङ्गं पुण्यलीलानुषङ्गंवनचरकुलनाथं वायुपुत्रं नतोऽस्मि ॥ १५॥

raghupatipadabhaktaṃ kiṅkiṇīkottamāṅgaṃmukulitakarapadmaṃ modayānaṃ taraṅge |pulakitavipulāṅgaṃ puṇyalīlānuṣaṅgaṃvanacarakulanāthaṃ vāyuputraṃ nato'smi || 15||