सत्यबोधस्तोत्रम् Shri Satyabodha Stotram

श्रीसत्यबोधो निजकामधेनुर्मायातमःखण्डनचण्डभानुः ।दुरन्तपापप्रदहे कृशानुर्देयान्ममेष्टं गुरुराजसूनुः ॥ १॥

śrīsatyabodho nijakāmadhenurmāyātamaḥkhaṇḍanacaṇḍabhānuḥ |durantapāpapradahe kṛśānurdeyānmameṣṭaṃ gururājasūnuḥ || 1||

श्रीसत्यबोधेतिपदाभिधानः सदा विशुद्धात्मधिया समानः ।समस्तविद्वन्निचयप्रधानो देयान्ममेष्टं विबुधान् दधानः ॥ २॥

śrīsatyabodhetipadābhidhānaḥ sadā viśuddhātmadhiyā samānaḥ |samastavidvannicayapradhāno deyānmameṣṭaṃ vibudhān dadhānaḥ || 2||

रमाधिनाथार्हणवाणिजानिः स्वभक्तसंप्रापितदुःखहानिः ।लसत्सरोजारुणनेत्रपाणिर्देयान्ममेष्टं शुभदैकवाणिः ॥ ३॥

ramādhināthārhaṇavāṇijāniḥ svabhaktasaṃprāpitaduḥkhahāniḥ |lasatsarojāruṇanetrapāṇirdeyānmameṣṭaṃ śubhadaikavāṇiḥ || 3||

भक्तेषु विन्यस्तकृपाकटाक्षो दुर्वादिविद्रावणदक्षदीक्षः ।समीहितार्थार्पणकल्पवृक्षो देयान्ममेष्टं कृतसर्वरक्षः ॥ ४॥

bhakteṣu vinyastakṛpākaṭākṣo durvādividrāvaṇadakṣadīkṣaḥ |samīhitārthārpaṇakalpavṛkṣo deyānmameṣṭaṃ kṛtasarvarakṣaḥ || 4||

श्रीमध्वदुग्धाब्धिविवर्धचन्द्रः समस्तकल्याणगुणैकसान्द्रः ।निरन्तराराधितरामचन्द्रो देयान्ममेष्टं सुधियां महेन्द्रः ॥ ५॥

śrīmadhvadugdhābdhivivardhacandraḥ samastakalyāṇaguṇaikasāndraḥ |nirantarārādhitarāmacandro deyānmameṣṭaṃ sudhiyāṃ mahendraḥ || 5||

निरन्तरं यस्तु पठेदिमां शुभां श्रीश्रीनिवासार्पितपञ्चपद्यीम् ।तस्य प्रसीदेत् गुरुराजहृद्गः सीतासमेतो नितरां रघूत्तमः ॥ ६॥

nirantaraṃ yastu paṭhedimāṃ śubhāṃ śrīśrīnivāsārpitapañcapadyīm |tasya prasīdet gururājahṛdgaḥ sītāsameto nitarāṃ raghūttamaḥ || 6||

॥ इति श्रीनिवासाचार्य जगन्नाथदासकृतं श्रीसत्यबोधस्तोत्रं सम्पूर्णम् ॥

|| iti śrīnivāsācārya jagannāthadāsakṛtaṃ śrīsatyabodhastotraṃ sampūrṇam ||