विघ्नेश्वरगीतम् Shri Vighneshvara Gitam

विशदवाससं विस्तृतोरसं विमलतेजसं विद्धराक्षसम् ।विगततामसं विष्टरौकसं विभुमुपास्महे विघ्ननायकम् ॥ १॥

viśadavāsasaṃ vistṛtorasaṃ vimalatejasaṃ viddharākṣasam |vigatatāmasaṃ viṣṭaraukasaṃ vibhumupāsmahe vighnanāyakam || 1||

विधिहरिस्तुतं विष्टरस्थितं विपुललोचनं वीर्यशालिनम् ।विकटविक्रमं विद्ययावृतं विभुमुपास्महे विघ्ननायकम् ॥ २॥

vidhiharistutaṃ viṣṭarasthitaṃ vipulalocanaṃ vīryaśālinam |vikaṭavikramaṃ vidyayāvṛtaṃ vibhumupāsmahe vighnanāyakam || 2||

विबुधसत्तमं विप्रपूजितं विधुकुलोज्ज्वलं विघ्ननाशनम् ।विधृतभूषणं वीतरागिणं विभुमुपास्महे विघ्ननायकम् ॥ ३॥

vibudhasattamaṃ viprapūjitaṃ vidhukulojjvalaṃ vighnanāśanam |vidhṛtabhūṣaṇaṃ vītarāgiṇaṃ vibhumupāsmahe vighnanāyakam || 3||

विभवसंयुतं विभ्रमान्वितं विषधरेट्तनूवेष्टितोदरम् ।विनुतपौरुषं (विस्तरा)विस्तृतालिकं विभुमुपास्महे विघ्ननायकम् ॥ ४॥

vibhavasaṃyutaṃ vibhramānvitaṃ viṣadhareṭtanūveṣṭitodaram |vinutapauruṣaṃ (vistarā)vistṛtālikaṃ vibhumupāsmahe vighnanāyakam || 4||

विमतमर्दनं विश्वनायकं वितरणोत्सुकं वारणाननम् ।विचलितश्रुतिं वीतकल्मषं विभुमुपास्महे विघ्ननायकम् ॥ ५॥

vimatamardanaṃ viśvanāyakaṃ vitaraṇotsukaṃ vāraṇānanam |vicalitaśrutiṃ vītakalmaṣaṃ vibhumupāsmahe vighnanāyakam || 5||

॥ इति श्रीविघ्नेश्वरगीतं सम्पूर्णम् ॥

|| iti śrīvighneśvaragītaṃ sampūrṇam ||