गणेशकुण्डतीर्थस्तोत्रम् Shri Ganeshakundatirtha Stotram

॥ श्रीगणेशाय नमः ॥ब्रह्मोवाच ।नमामि तीर्थं गणनायकस्य गणेशकुण्डं गणनातिगं च ।अनन्ततीर्थप्रभवं पुराणं संसेविनां ब्रह्मप्रदं निजात्म्यम् ॥ २॥

|| śrīgaṇeśāya namaḥ ||brahmovāca |namāmi tīrthaṃ gaṇanāyakasya gaṇeśakuṇḍaṃ gaṇanātigaṃ ca |anantatīrthaprabhavaṃ purāṇaṃ saṃsevināṃ brahmapradaṃ nijātmyam || 2||

अभेदभेदादिविहीनरूपं चतुष्पदं पञ्चममाद्यभूतम् ।गणेशमायाकृतदृश्यभावं नमामि कैवल्यघनं परेषाम् ॥ ३॥

abhedabhedādivihīnarūpaṃ catuṣpadaṃ pañcamamādyabhūtam |gaṇeśamāyākṛtadṛśyabhāvaṃ namāmi kaivalyaghanaṃ pareṣām || 3||

भवत्प्रसूतं च तुरीयमात्म्यं भवेदरूपं किल तीर्थकानाम् ।अहं विशुद्धोऽपि च दर्शनेनाऽभवं कृतब्रह्मकमण्डलुस्थम् ॥ ४॥

bhavatprasūtaṃ ca turīyamātmyaṃ bhavedarūpaṃ kila tīrthakānām |ahaṃ viśuddho'pi ca darśanenā'bhavaṃ kṛtabrahmakamaṇḍalustham || 4||

तदेव त्रैगुण्यमयं बभूव भागीरथीस्थं रविजामयं च ।सरस्वतीस्थं च ततः प्रसूताः सरित्समूहा भुवनेषु संस्थाः ॥ ५॥

tadeva traiguṇyamayaṃ babhūva bhāgīrathīsthaṃ ravijāmayaṃ ca |sarasvatīsthaṃ ca tataḥ prasūtāḥ saritsamūhā bhuvaneṣu saṃsthāḥ || 5||

स्नानेन पापं विनिहत्य सर्वा नद्यो नराणामथ पापयुक्ताः ।नित्यं जले ते विनिमज्य शुद्धा आयान्ति स्वस्थानमघापहारि ॥ ६॥

snānena pāpaṃ vinihatya sarvā nadyo narāṇāmatha pāpayuktāḥ |nityaṃ jale te vinimajya śuddhā āyānti svasthānamaghāpahāri || 6||

प्रयागतीर्थे मरणेन जन्तुर्मनीषितं तीर्थवरे लभेद्वै ।तवावलोकेन गणेशकुण्ड तदेव सद्यो लभते सकृच्चेत् ॥ ७॥

prayāgatīrthe maraṇena janturmanīṣitaṃ tīrthavare labhedvai |tavāvalokena gaṇeśakuṇḍa tadeva sadyo labhate sakṛccet || 7||

वाचः परं ते जलबिन्दुजेऽहं स्पर्शे भवं किं प्रवदामि पुण्यम् ।साक्षाद्गणेशाङ्कुशघातजं तन्नमामि कुण्डं गणनायकस्य ॥ ८॥

vācaḥ paraṃ te jalabinduje'haṃ sparśe bhavaṃ kiṃ pravadāmi puṇyam |sākṣādgaṇeśāṅkuśaghātajaṃ tannamāmi kuṇḍaṃ gaṇanāyakasya || 8||

धन्योऽहमेवं तव दर्शनेन स्पर्शेन तोयस्य निमज्जनेन ।तोये तथा ते च महानुभावं ब्रह्मैव तुष्टं च नमो नमस्ते ॥ ९॥

dhanyo'hamevaṃ tava darśanena sparśena toyasya nimajjanena |toye tathā te ca mahānubhāvaṃ brahmaiva tuṣṭaṃ ca namo namaste || 9||

त्वदीयतीरे मरणं वरिष्ठं सुमङ्गलं ब्रह्ममयप्रदं तत् ।विना श्रमेणैव नरा लभन्ते शुकादिकानां पदमत्र चित्रम् ॥ १०॥

tvadīyatīre maraṇaṃ variṣṭhaṃ sumaṅgalaṃ brahmamayapradaṃ tat |vinā śrameṇaiva narā labhante śukādikānāṃ padamatra citram || 10||

त्वत्तोयजस्पृष्टिरहो ममास्तु स्नानं तु पानं च सदावलोकः ।किं वर्णयाम्येव गणेशकुण्ड स्वल्पज्ञभावात्तु नमो नमस्ते ॥ ११॥

tvattoyajaspṛṣṭiraho mamāstu snānaṃ tu pānaṃ ca sadāvalokaḥ |kiṃ varṇayāmyeva gaṇeśakuṇḍa svalpajñabhāvāttu namo namaste || 11||

(फलश्रुतिः)भृशुण्ड्युवाच ।स्तोत्रं गणेशकुण्डस्य यः पठिष्यति मानवः ।भुक्तिं मुक्तिं लभेत् सोऽपि श्रद्धया ब्रह्मभूयकम् ॥ १२॥

(phalaśrutiḥ)bhṛśuṇḍyuvāca |stotraṃ gaṇeśakuṇḍasya yaḥ paṭhiṣyati mānavaḥ |bhuktiṃ muktiṃ labhet so'pi śraddhayā brahmabhūyakam || 12||

इदं ब्रह्मकृतं स्तोत्रं सर्वसिद्धिप्रदायकम् ।यत्र कुत्र स्थितायापि भक्त्या भवति पाठतः ॥ १३॥

idaṃ brahmakṛtaṃ stotraṃ sarvasiddhipradāyakam |yatra kutra sthitāyāpi bhaktyā bhavati pāṭhataḥ || 13||

ब्रह्मा ततो गणेशानं जगाम हर्षसंयुतः ।पूज्य स्तुत्वा महेशानाः प्रदक्षिणपरोऽभवत् ॥ १४॥

brahmā tato gaṇeśānaṃ jagāma harṣasaṃyutaḥ |pūjya stutvā maheśānāḥ pradakṣiṇaparo'bhavat || 14||

पादस्पर्शेन तस्यापि कमण्डलुजलैर्युतः ।न्युब्जतामगमत्तत्र नदी तस्मादजायत ॥ १५॥

pādasparśena tasyāpi kamaṇḍalujalairyutaḥ |nyubjatāmagamattatra nadī tasmādajāyata || 15||

ततः प्रणम्य विघ्नेशं योगमायासमन्वितः ।सरितं तां चकर्षाऽसौ पुनर्ब्रह्मा कमण्डलौ ॥ १६॥

tataḥ praṇamya vighneśaṃ yogamāyāsamanvitaḥ |saritaṃ tāṃ cakarṣā'sau punarbrahmā kamaṇḍalau || 16||

जगाद गणराजश्च ततस्तं हर्षसंयुतः ।मा गृह्णीष्व विधातस्त्वं सर्वतीर्थमयीं नदीम् ॥ १७॥

jagāda gaṇarājaśca tatastaṃ harṣasaṃyutaḥ |mā gṛhṇīṣva vidhātastvaṃ sarvatīrthamayīṃ nadīm || 17||

मम सेवार्थमत्यन्तलालसा नित्यमाभजेत् ।मदिच्छया नदी जाता मत्क्षेत्रे सर्वपावनी ॥ १८॥

mama sevārthamatyantalālasā nityamābhajet |madicchayā nadī jātā matkṣetre sarvapāvanī || 18||

ततस्तं प्रणतो भूत्वा ब्रह्मा शोकसमन्वितः ।जगाद तीर्थहीनोऽहं भविष्यमि गजानन ॥ १९॥

tatastaṃ praṇato bhūtvā brahmā śokasamanvitaḥ |jagāda tīrthahīno'haṃ bhaviṣyami gajānana || 19||

इति श्रीगणेशकुण्डतीर्थस्तोत्रं सम्पूर्णम् ॥॥ मुद्गलपुराणं षष्टः खण्डः । अध्यायः २४ । ६\।२४ २१९॥– ॥ मुद्गलपुराणं षष्टः खण्डः । अध्यायः २४ । ६।२४ २-१९॥

iti śrīgaṇeśakuṇḍatīrthastotraṃ sampūrṇam |||| mudgalapurāṇaṃ ṣaṣṭaḥ khaṇḍaḥ | adhyāyaḥ 24 | 6\|24 219||– || mudgalapurāṇaṃ ṣaṣṭaḥ khaṇḍaḥ | adhyāyaḥ 24 | 6|24 2-19||