गणेशस्तुतिः दूर्वाकृता Shri Ganesha Stuti Durvakrita

॥ श्रीगणेशाय नमः ॥दूर्वोवाच ।गणेशाय नमस्तुभ्यं विघ्नराजाय ते नमः ।भक्तानां विघ्नसंहर्त्रे त्वभक्तानां भयङ्कर ॥ ३२॥

|| śrīgaṇeśāya namaḥ ||dūrvovāca |gaṇeśāya namastubhyaṃ vighnarājāya te namaḥ |bhaktānāṃ vighnasaṃhartre tvabhaktānāṃ bhayaṅkara || 32||

अनन्तायाप्रमेयाय नानालीलाधराय च ।हेरम्बाय महेशानां नमः पूज्याय ते नमः ॥ ३३॥

anantāyāprameyāya nānālīlādharāya ca |herambāya maheśānāṃ namaḥ pūjyāya te namaḥ || 33||

सर्वपूज्याय सर्वादिपूज्याय ब्रह्मरूपिणे ।ब्रह्माकाराय सर्वेश ब्रह्मणस्पतये नमः ॥ ३४॥

sarvapūjyāya sarvādipūjyāya brahmarūpiṇe |brahmākārāya sarveśa brahmaṇaspataye namaḥ || 34||

अनाकाराय साकारमूर्तये ब्रह्मरूपिणे ।शान्तिभ्यः शान्तिदात्रे ते परेशाय नमो नमः ॥ ३५॥

anākārāya sākāramūrtaye brahmarūpiṇe |śāntibhyaḥ śāntidātre te pareśāya namo namaḥ || 35||

लम्बोदराय चौरेशवाहनाय परात्मने ।चतुर्भुजाय सर्वेषां मात्रे पित्रे नमो नमः ॥ ३६॥

lambodarāya caureśavāhanāya parātmane |caturbhujāya sarveṣāṃ mātre pitre namo namaḥ || 36||

ज्येष्ठेभ्यो ज्येष्ठराजाय ज्येष्ठपदप्रदायिने ।महोदराय पूर्णाय पूर्णानन्दाय ते नमः ॥ ३७॥

jyeṣṭhebhyo jyeṣṭharājāya jyeṣṭhapadapradāyine |mahodarāya pūrṇāya pūrṇānandāya te namaḥ || 37||

स्वानन्दवासिने तुभ्यं सिद्धिबुद्धिमयाय च ।सिद्धिबुद्धिपते नाथ भक्तेशाय नमो नमः ॥ ३८॥

svānandavāsine tubhyaṃ siddhibuddhimayāya ca |siddhibuddhipate nātha bhakteśāya namo namaḥ || 38||

किं स्तौमि त्वां गणाधीश यत्र वेदा विसिस्मिरे ।अतस्त्वां प्रणमाम्येव तेन तुष्टो भव प्रभो ॥ ३९॥

kiṃ staumi tvāṃ gaṇādhīśa yatra vedā visismire |atastvāṃ praṇamāmyeva tena tuṣṭo bhava prabho || 39||

एवं स्तुत्वा गणेशानं भक्तियुक्ता ननर्त ह ।जगाद गणराजस्तु दूर्वां तां हर्षसंयुतः ॥ ४०॥

evaṃ stutvā gaṇeśānaṃ bhaktiyuktā nanarta ha |jagāda gaṇarājastu dūrvāṃ tāṃ harṣasaṃyutaḥ || 40||

श्रीगणेश उवाच ।त्वया कृतमिदं स्तोत्रमपराधसहं भवेत् ।मां स्तौति तस्य दूर्वेऽहमपराधं सहाम्यहम् ॥ ४१॥

śrīgaṇeśa uvāca |tvayā kṛtamidaṃ stotramaparādhasahaṃ bhavet |māṃ stauti tasya dūrve'hamaparādhaṃ sahāmyaham || 41||

यं यं चिन्तयते कामं तं तं दास्यामि सर्वदा ।भुक्तिमुक्तिप्रदं स्तोत्रं भविष्यति सुसिद्धिदम् ॥ ४२॥

yaṃ yaṃ cintayate kāmaṃ taṃ taṃ dāsyāmi sarvadā |bhuktimuktipradaṃ stotraṃ bhaviṣyati susiddhidam || 42||

वरं वरय दास्यामि चित्तस्थं भक्तितोषितः ।क्रोधयुक्तोऽपि देवि त्वां मन्त्रत्यागकरीं पुनः ॥ ४३॥

varaṃ varaya dāsyāmi cittasthaṃ bhaktitoṣitaḥ |krodhayukto'pi devi tvāṃ mantratyāgakarīṃ punaḥ || 43||

श्रुत्वा तं भयसंयुक्ता जगाद वाक्यमुत्तमम् ।दूर्वा लम्बोदरं प्रीत्या साश्रुनेत्रा प्रजापते ॥ ४४॥

śrutvā taṃ bhayasaṃyuktā jagāda vākyamuttamam |dūrvā lambodaraṃ prītyā sāśrunetrā prajāpate || 44||

दूर्वोवाच ।वरदोऽसि यदा नाथ तदा ते भक्तिमुत्तमाम् ।दृढां देहि गणाध्यक्ष तया सर्वं शुभं भवेत् ॥ ४५॥

dūrvovāca |varado'si yadā nātha tadā te bhaktimuttamām |dṛḍhāṃ dehi gaṇādhyakṣa tayā sarvaṃ śubhaṃ bhavet || 45||

अन्यच्च मदसंयुक्तां जगदम्बां गजानन ।स्पर्धेहं तत्कलांशा वै तया शप्ताऽतिदारुणम् ॥ ४६॥

anyacca madasaṃyuktāṃ jagadambāṃ gajānana |spardhehaṃ tatkalāṃśā vai tayā śaptā'tidāruṇam || 46||

तृणरूपा भविष्यामि पतिष्यामि धरातले ।तदर्थं त्वामनुप्राप्ता रक्ष मां महतो भयात् ॥ ४७॥

tṛṇarūpā bhaviṣyāmi patiṣyāmi dharātale |tadarthaṃ tvāmanuprāptā rakṣa māṃ mahato bhayāt || 47||

श्रीगजानन उवाच ।मा कुरुष्व वृथा चिन्तां दूर्वे मे शरणागते ।सर्वं शुभं करिष्यामि भविष्यामि नियन्त्रितः ॥ ४८॥

śrīgajānana uvāca |mā kuruṣva vṛthā cintāṃ dūrve me śaraṇāgate |sarvaṃ śubhaṃ kariṣyāmi bhaviṣyāmi niyantritaḥ || 48||

अंशेन तृणरूपा त्वं भविष्यसि महीतले ।देवी देहधरा स्वर्गे चरिष्यसि यथा पुरा ॥ ४९॥

aṃśena tṛṇarūpā tvaṃ bhaviṣyasi mahītale |devī dehadharā svarge cariṣyasi yathā purā || 49||

पृथिव्यां तृणरूपा त्वममृतरूपधारिका ।शतमूला प्रकाण्डाद् वै प्ररोहा च शताङ्कुरा ॥ ५०॥

pṛthivyāṃ tṛṇarūpā tvamamṛtarūpadhārikā |śatamūlā prakāṇḍād vai prarohā ca śatāṅkurā || 50||

सर्वमान्या सर्वपूज्या देवादीनां सदा प्रिया ।भविष्यसि न सन्देहो मद्वरादन्ननायिके ॥ ५१॥

sarvamānyā sarvapūjyā devādīnāṃ sadā priyā |bhaviṣyasi na sandeho madvarādannanāyike || 51||

महामङ्गलदा प्रोक्ता मम प्रीतिविवर्धिनी ।भविष्यसि तु लोकानां शुभमङ्गलदायिका ॥ ५२॥

mahāmaṅgaladā proktā mama prītivivardhinī |bhaviṣyasi tu lokānāṃ śubhamaṅgaladāyikā || 52||

त्वत्पत्रेण नरा भूमावर्चयिष्यन्ति देवपान् ।न त्वत्समं तु पत्रेषु पुण्यदं प्रभविष्यति ॥ ५३॥

tvatpatreṇa narā bhūmāvarcayiṣyanti devapān |na tvatsamaṃ tu patreṣu puṇyadaṃ prabhaviṣyati || 53||

शक्तेश्चैवावतारा ये लक्ष्मीललितिकादयः ।तासां प्रिया विशेषेण भविष्यसि महाशुभे ॥ ५४॥

śakteścaivāvatārā ye lakṣmīlalitikādayaḥ |tāsāṃ priyā viśeṣeṇa bhaviṣyasi mahāśubhe || 54||

शापिता गिरिपुत्र्या त्वं सा त्वां नैव स्पृशेत् कदा ।अन्यत्र मान्यभावेन भविष्यसि न संशयः ॥ ५५॥

śāpitā giriputryā tvaṃ sā tvāṃ naiva spṛśet kadā |anyatra mānyabhāvena bhaviṣyasi na saṃśayaḥ || 55||

मदीया भक्तिरत्यन्तं दृढा ते प्रभविष्यति ।मच्चित्ता मद्गतप्राणा भविष्यसि च दूर्विके ॥ ५६॥

madīyā bhaktiratyantaṃ dṛḍhā te prabhaviṣyati |maccittā madgataprāṇā bhaviṣyasi ca dūrvike || 56||

मदीयामिच्छसि भक्तिमतस्तेऽहं सुहर्षितः ।करिष्यामि सदा देवि मम प्रीतिविवर्धिनीम् ॥ ५७॥

madīyāmicchasi bhaktimataste'haṃ suharṣitaḥ |kariṣyāmi sadā devi mama prītivivardhinīm || 57||

दूर्वापत्रं विना देवि पूजयिष्यन्ति मां नराः ।तेषां नैव फलं तस्याः पूजायाः प्रभविष्यति ॥ ५८॥

dūrvāpatraṃ vinā devi pūjayiṣyanti māṃ narāḥ |teṣāṃ naiva phalaṃ tasyāḥ pūjāyāḥ prabhaviṣyati || 58||

दूर्वासमं न मे किञ्चित् पूजायां सुप्रियं भवेत् ।विना दूर्वां निराहारी भविष्यामि निरन्तरम् ॥ ५९॥

dūrvāsamaṃ na me kiñcit pūjāyāṃ supriyaṃ bhavet |vinā dūrvāṃ nirāhārī bhaviṣyāmi nirantaram || 59||

त्यक्त्वा दूर्वादलं ये वै पूजयिष्यन्ति मानवाः ।शत्रवस्ते मता नित्यं नरकेषु पचन्तु ते ॥ ६०॥

tyaktvā dūrvādalaṃ ye vai pūjayiṣyanti mānavāḥ |śatravaste matā nityaṃ narakeṣu pacantu te || 60||

येनार्पितं च पूजायां दूर्वापत्रं महामते ।तेनापारमयं सर्वं दत्तं मह्यं विशेषतः ॥ ६१॥

yenārpitaṃ ca pūjāyāṃ dūrvāpatraṃ mahāmate |tenāpāramayaṃ sarvaṃ dattaṃ mahyaṃ viśeṣataḥ || 61||

दूर्वापत्रेण सन्तुष्टो दास्यामि सकलं च मे ।ऐश्वर्यं तदपि प्राज्ञे न समं दूर्वया भवेत् ॥ ६२॥

dūrvāpatreṇa santuṣṭo dāsyāmi sakalaṃ ca me |aiśvaryaṃ tadapi prājñe na samaṃ dūrvayā bhavet || 62||

ये मद्भक्ताश्च तैर्नित्यं कर्तव्यं दूर्वया युतम् ।पूजनं मे सदा देवि जितोऽहं नात्र संशयः ॥ ६३॥

ye madbhaktāśca tairnityaṃ kartavyaṃ dūrvayā yutam |pūjanaṃ me sadā devi jito'haṃ nātra saṃśayaḥ || 63||

एवमुक्त्वा गणेशानोंऽतर्दधे च प्रजापते ।इति दूर्वाकृता श्रीगणेशस्तुतिः सम्पूर्णा ॥॥ मुद्गलपुराणं पञ्चमः खण्डः । अध्यायः २७ । ५\।२७। ३२६३॥– ॥ मुद्गलपुराणं पञ्चमः खण्डः । अध्यायः २७ । ५।२७। ३२-६३॥

evamuktvā gaṇeśānoṃ'tardadhe ca prajāpate |iti dūrvākṛtā śrīgaṇeśastutiḥ sampūrṇā |||| mudgalapurāṇaṃ pañcamaḥ khaṇḍaḥ | adhyāyaḥ 27 | 5\|27| 3263||– || mudgalapurāṇaṃ pañcamaḥ khaṇḍaḥ | adhyāyaḥ 27 | 5|27| 32-63||