गणेशस्तुतिः गृत्समदकृता Shri Ganesha Stuti Gritsamadakrita

॥ श्रीगणेशाय नमः ॥गृत्समद उवाच ।नमस्ते ब्रह्मणां नाथ ब्रह्मणां ब्रह्मरूपिणे ।ब्रह्मणस्पतये तुभ्यं गणेशाय नमो नमः ॥ १॥

|| śrīgaṇeśāya namaḥ ||gṛtsamada uvāca |namaste brahmaṇāṃ nātha brahmaṇāṃ brahmarūpiṇe |brahmaṇaspataye tubhyaṃ gaṇeśāya namo namaḥ || 1||

ज्येष्ठराजाय ज्येष्ठानां ज्येष्ठपदप्रदायिने ।ज्येष्ठानां ज्येष्ठरूपाय सर्वपूज्याय ते नमः ॥ २॥

jyeṣṭharājāya jyeṣṭhānāṃ jyeṣṭhapadapradāyine |jyeṣṭhānāṃ jyeṣṭharūpāya sarvapūjyāya te namaḥ || 2||

कर्तॄणां कतृरूपाय कवये कविनायक ।कर्तृभ्यः कर्तृदात्रे वै कविराजाय ते नमः ॥ ३॥

kartṝṇāṃ katṛrūpāya kavaye kavināyaka |kartṛbhyaḥ kartṛdātre vai kavirājāya te namaḥ || 3||

जगत्सु ब्रह्मसु प्राज्ञ नानाभोगकराय ते ।उपमान्नप्रभोक्त्रे तु ब्रह्मभोक्त्रे नमो नमः ॥ ४॥

jagatsu brahmasu prājña nānābhogakarāya te |upamānnaprabhoktre tu brahmabhoktre namo namaḥ || 4||

सदा मोहयुतायैव मोहमोहकराय ते ।जीवाय बृहतां नाथाय बृहस्पतये नमः ॥ ५॥

sadā mohayutāyaiva mohamohakarāya te |jīvāya bṛhatāṃ nāthāya bṛhaspataye namaḥ || 5||

सदा ब्रह्मसुखस्थाय परमात्मस्वरूपिणे ।गुहाहिताय साङ्ख्याय बृहस्पतिसखाय ते ॥ ६॥

sadā brahmasukhasthāya paramātmasvarūpiṇe |guhāhitāya sāṅkhyāya bṛhaspatisakhāya te || 6||

स्वसंवेद्यमयायैव स्वानन्दे योगधारिणे ।जीवानां ब्रह्मणां संयोगाय ते वै नमो नमः ॥ ७॥

svasaṃvedyamayāyaiva svānande yogadhāriṇe |jīvānāṃ brahmaṇāṃ saṃyogāya te vai namo namaḥ || 7||

सत्यायायोगरूपाय मनोवाणीविवर्जित ।भद्राणां भद्रकायैव सत्यसत्याय ते नमः ॥ ८॥

satyāyāyogarūpāya manovāṇīvivarjita |bhadrāṇāṃ bhadrakāyaiva satyasatyāya te namaḥ || 8||

सर्वेषां पोषकायैव सोमायामृतरूपिणे ।सोमानां सोमदात्रे ते पुष्टिनाथाय ते नमः ॥ ९॥

sarveṣāṃ poṣakāyaiva somāyāmṛtarūpiṇe |somānāṃ somadātre te puṣṭināthāya te namaḥ || 9||

उत्तिष्ठत्सृष्टिकर्त्रे ते पालकाय हराय च ।त्रयीमयाय तूर्याय तूर्यातीताय ते नमः ॥ १०॥

uttiṣṭhatsṛṣṭikartre te pālakāya harāya ca |trayīmayāya tūryāya tūryātītāya te namaḥ || 10||

इन्द्रादिदेवतानां वै सहायाय नमो नमः ।धर्मपालकभावाय धर्माधीशाय ते नमः ॥ ११॥

indrādidevatānāṃ vai sahāyāya namo namaḥ |dharmapālakabhāvāya dharmādhīśāya te namaḥ || 11||

सर्वेषां राज्यदात्रे वै राज्यराजाय ते नमः ।अराज्याय परेशाय संसारार्णवतारिणे ॥ १२॥

sarveṣāṃ rājyadātre vai rājyarājāya te namaḥ |arājyāya pareśāya saṃsārārṇavatāriṇe || 12||

योगेभ्यो योगदात्रे च योगयोगाय ते नमः ।शान्तिदाय सदा शान्तिस्थाय तत्पतये नमः ॥ १३॥

yogebhyo yogadātre ca yogayogāya te namaḥ |śāntidāya sadā śāntisthāya tatpataye namaḥ || 13||

इत्यादि भेदा बहवो ब्रह्मणो वेदवादतः ।तेषां स्वामिस्वरूपाय ब्रह्मणे ते नमो नमः ॥ १४॥

ityādi bhedā bahavo brahmaṇo vedavādataḥ |teṣāṃ svāmisvarūpāya brahmaṇe te namo namaḥ || 14||

किं स्तौमि गणनाथ त्वां ब्रह्मणस्पतिरूपिणम् ।भव प्रसन्नो ब्रह्मेश कृपया ते नमो नमः ॥ १५॥

kiṃ staumi gaṇanātha tvāṃ brahmaṇaspatirūpiṇam |bhava prasanno brahmeśa kṛpayā te namo namaḥ || 15||

एवं गृत्समदः स्तुत्वा गणेशानं महीपते ।हर्षेणोत्फुल्लनयनो ननर्त प्रेमविह्वलः ॥ १६॥

evaṃ gṛtsamadaḥ stutvā gaṇeśānaṃ mahīpate |harṣeṇotphullanayano nanarta premavihvalaḥ || 16||

दृष्ट्वा तं गणराजस्तु जगाद घननिस्वनः ।वरं मत्तस्त्वं वरयाधुना स्तोत्रेण तोषितः ॥ १७॥

dṛṣṭvā taṃ gaṇarājastu jagāda ghananisvanaḥ |varaṃ mattastvaṃ varayādhunā stotreṇa toṣitaḥ || 17||

त्वया कृतमिदं स्तोत्रं सर्वसिद्धिप्रदायकम् ।भविष्यति न सन्देहो मम भक्तिविवर्धनम् ॥ १८॥

tvayā kṛtamidaṃ stotraṃ sarvasiddhipradāyakam |bhaviṣyati na sandeho mama bhaktivivardhanam || 18||

सदा शान्तिमयो भूत्वा मां भजिष्यसि मानद ।त्वया कृतेन स्तोत्रेण ब्रह्मभूतो भविष्यसि ॥ १९॥

sadā śāntimayo bhūtvā māṃ bhajiṣyasi mānada |tvayā kṛtena stotreṇa brahmabhūto bhaviṣyasi || 19||

पुत्रपौत्रादिकं सर्वं धनधान्यादिवर्धनम् ।प्रभविष्यति पाठेन श्रवणेन मुनेऽस्य तु ॥ २०॥

putrapautrādikaṃ sarvaṃ dhanadhānyādivardhanam |prabhaviṣyati pāṭhena śravaṇena mune'sya tu || 20||

तस्य तद्वचनं श्रुत्वा सावधानो बभूव ह ।नियम्य हर्षमुग्रं स प्रणनाम गजाननम् ॥ २१॥

tasya tadvacanaṃ śrutvā sāvadhāno babhūva ha |niyamya harṣamugraṃ sa praṇanāma gajānanam || 21||

उवाच विस्खलद्वाक्यो मुनिर्गृत्समदो महान् ।गणेशं भक्तिसंयुक्तो भक्तराजेश्वरः स्वयम् ॥ २२॥

uvāca viskhaladvākyo munirgṛtsamado mahān |gaṇeśaṃ bhaktisaṃyukto bhaktarājeśvaraḥ svayam || 22||

गृत्समद उवाच ।धन्यौ मे जनकौ नाथ जन्म धन्यं तपो वयः ।विद्या व्रतादिकं सर्वं त्वदङ्घ्रियुगदर्शनात् ॥ २३॥

gṛtsamada uvāca |dhanyau me janakau nātha janma dhanyaṃ tapo vayaḥ |vidyā vratādikaṃ sarvaṃ tvadaṅghriyugadarśanāt || 23||

अहो साक्षाद्गणेशानो ब्रह्मेन्द्रो दृष्टिमागतः ।मनोवाणीविहीनो न ताभ्यां युक्तो न वै भवान् ॥ २४॥

aho sākṣādgaṇeśāno brahmendro dṛṣṭimāgataḥ |manovāṇīvihīno na tābhyāṃ yukto na vai bhavān || 24||

एतादृशं गणेशानं दृष्ट्वा त्वां किं वृणोम्यहम् ।तथापि वरयामि त्वां त्वदाज्ञापालनार्थतः ॥ २५॥

etādṛśaṃ gaṇeśānaṃ dṛṣṭvā tvāṃ kiṃ vṛṇomyaham |tathāpi varayāmi tvāṃ tvadājñāpālanārthataḥ || 25||

ब्रह्मभूताश्च वेदेषु ब्राह्मणाः कथिता बुधैः ।अतो मां ब्राह्मणं नाथ कुरु योगीन्द्र वन्द्यकम् ॥ २६॥

brahmabhūtāśca vedeṣu brāhmaṇāḥ kathitā budhaiḥ |ato māṃ brāhmaṇaṃ nātha kuru yogīndra vandyakam || 26||

यथा त्वं ब्रह्मणां नाथस्तथाऽहं ब्रह्मभूयिनाम् ।नाथो भवामि विघ्नेश योगीन्द्राणां गुरोर्गुरुः ॥ २७॥

yathā tvaṃ brahmaṇāṃ nāthastathā'haṃ brahmabhūyinām |nātho bhavāmi vighneśa yogīndrāṇāṃ gurorguruḥ || 27||

त्वदीयपादपद्मे वै भक्तिं देहि गजानन ।सुदृढां गाणपत्येषु सङ्गं देहि सदा च मे ॥ २८॥

tvadīyapādapadme vai bhaktiṃ dehi gajānana |sudṛḍhāṃ gāṇapatyeṣu saṅgaṃ dehi sadā ca me || 28||

गाणपत्येषु विख्यातं मां कुरुष्व विशेषतः ।गृत्समदसमो नास्ति गाणपत्यस्वभावधृक् ॥ २९॥

gāṇapatyeṣu vikhyātaṃ māṃ kuruṣva viśeṣataḥ |gṛtsamadasamo nāsti gāṇapatyasvabhāvadhṛk || 29||

एवमुक्त्वा गणेशानं प्रणनाम महामुनिः ।तमुवाच गणेशानो भक्तिं दृष्ट्वा महाद्भुताम् ॥ ३०॥

evamuktvā gaṇeśānaṃ praṇanāma mahāmuniḥ |tamuvāca gaṇeśāno bhaktiṃ dṛṣṭvā mahādbhutām || 30||

(फलश्रुतिः)श्रीगणेश उवाच ।गणानां त्वेति मन्त्रस्य जपः खलु कृतस्त्वया ।सूक्तस्यापि तथा मे वै तत्र मुख्यो भविष्यसि ॥ ३१॥

(phalaśrutiḥ)śrīgaṇeśa uvāca |gaṇānāṃ tveti mantrasya japaḥ khalu kṛtastvayā |sūktasyāpi tathā me vai tatra mukhyo bhaviṣyasi || 31||

ऋषिर्भव महाभाग गणानां त्वास्य मन्त्रतः ।सूक्तस्यापि विशेषेण ब्राह्मणेन्द्रो भवापि तु ॥ ३२॥

ṛṣirbhava mahābhāga gaṇānāṃ tvāsya mantrataḥ |sūktasyāpi viśeṣeṇa brāhmaṇendro bhavāpi tu || 32||

आदावृषेश्च यज्ञादौ स्मरणं ते करिष्यति ।पश्चान् मे देवतायाश्च मुख्यो भव मदीयके ॥ ३३॥

ādāvṛṣeśca yajñādau smaraṇaṃ te kariṣyati |paścān me devatāyāśca mukhyo bhava madīyake || 33||

न त्वत्समो भवेत् कुत्र मद्भक्तेषु महामुने ।मानयिष्यन्ति विप्रास्त्वामत्रिमुख्या न संशयः ॥ ३४॥

na tvatsamo bhavet kutra madbhakteṣu mahāmune |mānayiṣyanti viprāstvāmatrimukhyā na saṃśayaḥ || 34||

त्वदीयस्मरणं नास्ति मन्त्रे वैदिकगे च मे ।गणानां त्वा जपिष्यन्ति फलहीना भवन्तु ते ॥ ३५॥

tvadīyasmaraṇaṃ nāsti mantre vaidikage ca me |gaṇānāṃ tvā japiṣyanti phalahīnā bhavantu te || 35||

शिवविष्ण्वादयो देवा ब्रह्माद्या ब्राह्मणा नराः ।शेषाद्याश्चासुराद्याश्च त्वां नमस्यन्ति नित्यदा ॥ ३६॥

śivaviṣṇvādayo devā brahmādyā brāhmaṇā narāḥ |śeṣādyāścāsurādyāśca tvāṃ namasyanti nityadā || 36||

त्वदीयावज्ञया क्रुद्धो दहिष्यामि चराचरम् ।त्वदीयहृदये नित्यं स्थास्यामि भक्तिलोलुपः ॥ ३७॥

tvadīyāvajñayā kruddho dahiṣyāmi carācaram |tvadīyahṛdaye nityaṃ sthāsyāmi bhaktilolupaḥ || 37||

त्वया यत्र तपस्तप्तं तदेव क्षेत्रमुत्तमम् ।भविष्यति मदीयं वै पुष्पकं सर्वसिद्धिदम् ॥ ३८॥

tvayā yatra tapastaptaṃ tadeva kṣetramuttamam |bhaviṣyati madīyaṃ vai puṣpakaṃ sarvasiddhidam || 38||

भुक्तिं मुक्तिं ब्रह्मभूयं भक्तिं पुष्णाति मानद ।तेन क्षेत्रं समाख्यातं पुष्यकं मत्समाश्रितम् ॥ ३९॥

bhuktiṃ muktiṃ brahmabhūyaṃ bhaktiṃ puṣṇāti mānada |tena kṣetraṃ samākhyātaṃ puṣyakaṃ matsamāśritam || 39||

यद्यच्चिन्तयसि प्राज्ञ तत्तत्ते सफलं भवेत् ।स्मरणेन महाकार्ये प्रत्यक्षोऽहं भवामि च ॥ ४०॥

yadyaccintayasi prājña tattatte saphalaṃ bhavet |smaraṇena mahākārye pratyakṣo'haṃ bhavāmi ca || 40||

इति गृत्समदकृता श्रीगणेशस्तुतिः सम्पूर्णा ॥॥ मुद्गलपुराणं पञ्चमः खण्डः । अध्यायः ३६ । ५\।३६। १४०॥– ॥ मुद्गलपुराणं पञ्चमः खण्डः । अध्यायः ३६ । ५।३६। १-४०॥

iti gṛtsamadakṛtā śrīgaṇeśastutiḥ sampūrṇā |||| mudgalapurāṇaṃ pañcamaḥ khaṇḍaḥ | adhyāyaḥ 36 | 5\|36| 140||– || mudgalapurāṇaṃ pañcamaḥ khaṇḍaḥ | adhyāyaḥ 36 | 5|36| 1-40||