गणेशाष्टोत्तरशतनामस्तोत्रम् ५ Shri Ganesha Ashtottarashata Nama Stotram 5

गणेश्वरो गणक्रीडो महागणपतिस्तथा ।विश्वकर्ता विश्वमुखो दुर्जयो धूर्वहो जयः ॥ १॥

gaṇeśvaro gaṇakrīḍo mahāgaṇapatistathā |viśvakartā viśvamukho durjayo dhūrvaho jayaḥ || 1||

सुरूपः सर्वनेत्राधिवासो वीरासनाश्रयः ।योगाधिपस्तारकस्थः पुरुषो गजकर्णकः ॥ २॥

surūpaḥ sarvanetrādhivāso vīrāsanāśrayaḥ |yogādhipastārakasthaḥ puruṣo gajakarṇakaḥ || 2||

चित्राङ्कश्यामदशनो भालचन्द्रश्चतुर्भुजः ।शम्भुतेजा यज्ञकायः सर्वात्मा सामबृंहितः ॥ ३॥

citrāṅkaśyāmadaśano bhālacandraścaturbhujaḥ |śambhutejā yajñakāyaḥ sarvātmā sāmabṛṃhitaḥ || 3||

कुलाचलांसो व्योमनाभिः कल्पद्रुमवनालयः ।निम्ननाभिः स्थूलकुक्षिः पीनवक्षा बृहद्भुजः ॥ ४॥

kulācalāṃso vyomanābhiḥ kalpadrumavanālayaḥ |nimnanābhiḥ sthūlakukṣiḥ pīnavakṣā bṛhadbhujaḥ || 4||

पीनस्कन्धः कम्बुकण्ठो लम्बोष्ठो लम्बनासिकः ।सर्वावयवसम्पूर्णः सर्वलक्षणलक्षितः ॥ ५॥

pīnaskandhaḥ kambukaṇṭho lamboṣṭho lambanāsikaḥ |sarvāvayavasampūrṇaḥ sarvalakṣaṇalakṣitaḥ || 5||

इक्षुचापधरः शूली कान्तिकन्दलिताश्रयः ।अक्षमालाधरो ज्ञानमुद्रावान् विजयावहः ॥ ६॥

ikṣucāpadharaḥ śūlī kāntikandalitāśrayaḥ |akṣamālādharo jñānamudrāvān vijayāvahaḥ || 6||

कामिनीकामनः काममालिनी केलिलालितः ।अमोघसिद्धिराधार आधाराधेयवर्जितः ॥ ७॥

kāminīkāmanaḥ kāmamālinī kelilālitaḥ |amoghasiddhirādhāra ādhārādheyavarjitaḥ || 7||

इन्दीवरदलश्याम इन्दुमण्डलनिर्मलः ।कर्मसाक्षी कर्मकर्ता कर्माकर्मफलप्रदः ॥ ८॥

indīvaradalaśyāma indumaṇḍalanirmalaḥ |karmasākṣī karmakartā karmākarmaphalapradaḥ || 8||

कमण्डलुधरः कल्पः कपर्दी कटिसूत्रभृत् ॥कारुण्यदेहः कपिलो गुह्यागमनिरूपितः ॥ ९॥

kamaṇḍaludharaḥ kalpaḥ kapardī kaṭisūtrabhṛt ||kāruṇyadehaḥ kapilo guhyāgamanirūpitaḥ || 9||

गुहाशयो गुहाब्धिस्थो घटकुम्भो घटोदरः ।पूर्णानन्दः परानन्दो धनदो धरणीधरः ॥ १०॥

guhāśayo guhābdhistho ghaṭakumbho ghaṭodaraḥ |pūrṇānandaḥ parānando dhanado dharaṇīdharaḥ || 10||

बृहत्तमो ब्रह्मपरो ब्रह्मण्यो ब्रह्मवित्प्रियः ।भव्यो भूतालयो भोगदाता चैव महामनाः ॥ ११॥

bṛhattamo brahmaparo brahmaṇyo brahmavitpriyaḥ |bhavyo bhūtālayo bhogadātā caiva mahāmanāḥ || 11||

वरेण्यो वामदेवश्च वन्द्यो वज्रनिवारणः ।विश्वकर्ता विश्वचक्षुर्हवनं हव्यकव्यभुक् ॥ १२॥

vareṇyo vāmadevaśca vandyo vajranivāraṇaḥ |viśvakartā viśvacakṣurhavanaṃ havyakavyabhuk || 12||

स्वतन्त्रस्सत्यसङ्कल्पस्तथा सौभाग्य वर्द्धनः ।कीर्तिदः शोकहारी च त्रिवर्गफलदायकः ॥ १३॥

svatantrassatyasaṅkalpastathā saubhāgya varddhanaḥ |kīrtidaḥ śokahārī ca trivargaphaladāyakaḥ || 13||

चतुर्बाहुश्चतुर्दन्तश्चतुर्थीतिथिसम्भवः ।सहस्रशीर्षा पुरुषः सहस्राक्षस्सहस्रपात् ॥ १४॥

caturbāhuścaturdantaścaturthītithisambhavaḥ |sahasraśīrṣā puruṣaḥ sahasrākṣassahasrapāt || 14||

कामरूपः कामगतिर्द्विरदो द्वीपरक्षकः ।क्षेत्राधिपः क्षमाभर्ता लयस्थो लड्डुकप्रियः ॥ १५॥

kāmarūpaḥ kāmagatirdvirado dvīparakṣakaḥ |kṣetrādhipaḥ kṣamābhartā layastho laḍḍukapriyaḥ || 15||

प्रतिवादिमुखस्तम्भो दुष्टचित्तप्रसादनः ।भगवान् भक्तिसुलभो याज्ञिको याजकप्रियः ॥ १६॥

prativādimukhastambho duṣṭacittaprasādanaḥ |bhagavān bhaktisulabho yājñiko yājakapriyaḥ || 16||

इत्येवं देवदेवस्य गणराजस्य धीमतः ।शतमष्टोत्तरं नाम्नां सारभूतं प्रकीर्तितम् ॥ १७॥

ityevaṃ devadevasya gaṇarājasya dhīmataḥ |śatamaṣṭottaraṃ nāmnāṃ sārabhūtaṃ prakīrtitam || 17||

सहस्रनाम्नामाकृष्य देवप्रोक्तं मनोहरम् ।ब्राह्मे मुहूर्ते उत्थाय स्मृत्वा देवं गणेश्वरम् ।पठेत्स्तोत्रमिदं भक्त्या गणराजः प्रसीदति ॥ १८॥

sahasranāmnāmākṛṣya devaproktaṃ manoharam |brāhme muhūrte utthāya smṛtvā devaṃ gaṇeśvaram |paṭhetstotramidaṃ bhaktyā gaṇarājaḥ prasīdati || 18||

इति श्रीगणेशाष्टोत्तरशतनामस्तोत्रं (५) सम्पूर्णम् ।

iti śrīgaṇeśāṣṭottaraśatanāmastotraṃ (5) sampūrṇam |