महाबुद्धिदेव्यष्टोत्तरशतनामस्तोत्रम् Mahabuddhidevi Ashtottarashata Nama Stotram

सूर्य उवाचमूलवह्निसमुद्भूता मूलाज्ञानविनाशिनी ।निरुपाधिमहामाया शारदा प्रणवात्मिका ॥ १॥

sūrya uvācamūlavahnisamudbhūtā mūlājñānavināśinī |nirupādhimahāmāyā śāradā praṇavātmikā || 1||

सुषुम्नामुखमध्यस्था चिन्मयी नादरूपिणी ।नादातीता ब्रह्मविद्या मूलविद्या परात्परा ॥ २॥

suṣumnāmukhamadhyasthā cinmayī nādarūpiṇī |nādātītā brahmavidyā mūlavidyā parātparā || 2||

सकामदायिनीपीठमध्यस्था बोधरूपिणी ।मूलाधारस्थगणपदक्षिणाङ्कनिवासिनी ॥ ३॥

sakāmadāyinīpīṭhamadhyasthā bodharūpiṇī |mūlādhārasthagaṇapadakṣiṇāṅkanivāsinī || 3||

विश्वाधारा ब्रह्मरूपा निराधारा निरामया ।सर्वाधारा साक्षिभूता ब्रह्ममूला सदाश्रया ॥ ४॥

viśvādhārā brahmarūpā nirādhārā nirāmayā |sarvādhārā sākṣibhūtā brahmamūlā sadāśrayā || 4||

विवेकलभ्यवेदान्तगोचरा मननातिगा ।स्वानन्दयोगसंलभ्या निदिध्यासस्वरूपिणी ॥ ५॥

vivekalabhyavedāntagocarā mananātigā |svānandayogasaṃlabhyā nididhyāsasvarūpiṇī || 5||

विवेकादिभृत्ययुता शमादिकिङ्करान्विता ।भक्त्यादिकिङ्करीजुष्टा स्वानन्देशसमन्विता ॥ ६॥

vivekādibhṛtyayutā śamādikiṅkarānvitā |bhaktyādikiṅkarījuṣṭā svānandeśasamanvitā || 6||

महावाक्यार्थसंलभ्या गणेशप्राणवल्लभा ।तमस्तिरोधानकरी स्वानन्देशप्रदर्शिनी ॥ ७॥

mahāvākyārthasaṃlabhyā gaṇeśaprāṇavallabhā |tamastirodhānakarī svānandeśapradarśinī || 7||

स्वाधिष्ठानगता वाणी रजोगुणविनाशिनी ।रागादिदोषशमनी कर्मज्ञानप्रदायिनी ॥ ८॥

svādhiṣṭhānagatā vāṇī rajoguṇavināśinī |rāgādidoṣaśamanī karmajñānapradāyinī || 8||

मणिपूराज्ञनिलया तमोगुणविनाशिनी ।अनाहतैकनिलया गुणसत्वप्रकाशिनी ॥ ९॥

maṇipūrājñanilayā tamoguṇavināśinī |anāhataikanilayā guṇasatvaprakāśinī || 9||

अष्टाङ्गयोगफलदा तपोमार्गप्रकाशिनी ।विशुद्धिस्थाननिलया हृदयग्रन्थिभेदिनी ॥ १०॥

aṣṭāṅgayogaphaladā tapomārgaprakāśinī |viśuddhisthānanilayā hṛdayagranthibhedinī || 10||

विवेकजननी प्रज्ञा ध्यानयोगप्रबोधिनी ।आज्ञाचक्रसमासीना निर्गुणब्रह्मसंयुता ॥ ११॥

vivekajananī prajñā dhyānayogaprabodhinī |ājñācakrasamāsīnā nirguṇabrahmasaṃyutā || 11||

ब्रह्मरन्ध्रपद्मगता जगद्भावप्रणाशिनी ।द्वादशान्तैकनिलया स्वस्वानन्दप्रदायिनी ॥ १२॥

brahmarandhrapadmagatā jagadbhāvapraṇāśinī |dvādaśāntaikanilayā svasvānandapradāyinī || 12||

पीयूषवर्षिणी बुद्धिस्स्वानन्देशप्रकाशिनी ।इक्षुसागरमध्यस्था निजलोकनिवासिनी ॥ १३॥

pīyūṣavarṣiṇī buddhissvānandeśaprakāśinī |ikṣusāgaramadhyasthā nijalokanivāsinī || 13||

वैनायकी विघ्नहन्त्री स्वानन्दब्रह्मरूपिणी ।सुधामूर्तिस्सुधार्णवा केवला हृद्गुहामयी ॥ १४॥

vaināyakī vighnahantrī svānandabrahmarūpiṇī |sudhāmūrtissudhārṇavā kevalā hṛdguhāmayī || 14||

शुभ्रवस्त्रा पीनकुचा कल्याणी हेमकञ्चुका ।विकचाम्भोरुहदललोचना ज्ञानरूपिणी ॥ १५॥

śubhravastrā pīnakucā kalyāṇī hemakañcukā |vikacāmbhoruhadalalocanā jñānarūpiṇī || 15||

रत्नताटङ्कयुगला भद्रा चम्पकनासिका ।रत्नदर्पणसङ्काशकपोला निर्गुणात्मिका ॥ १६॥

ratnatāṭaṅkayugalā bhadrā campakanāsikā |ratnadarpaṇasaṅkāśakapolā nirguṇātmikā || 16||

ताम्बूलपूरितस्मेरवदना सत्यरूपिणी ।कम्बुकण्ठी सुबिम्बोष्ठी वीणापुस्तकधारिणी ॥ १७॥

tāmbūlapūritasmeravadanā satyarūpiṇī |kambukaṇṭhī subimboṣṭhī vīṇāpustakadhāriṇī || 17||

गणेशज्ञातसौभाग्यमार्दवोरुद्वयान्विता ।कैवल्यज्ञानसुखदपदाब्जा भारती मतिः ॥ १८॥

gaṇeśajñātasaubhāgyamārdavorudvayānvitā |kaivalyajñānasukhadapadābjā bhāratī matiḥ || 18||

वज्रमाणिक्यकटककिरीटा मञ्जुभाषिणी ।विघ्नेशबद्धमाङ्गल्यसूत्रशोभितकन्धरा ॥ १९॥

vajramāṇikyakaṭakakirīṭā mañjubhāṣiṇī |vighneśabaddhamāṅgalyasūtraśobhitakandharā || 19||

अनेककोटिकेशार्कयुग्मसेवितपादुका ।वागीश्वरी लोकमाता महाबुद्धिस्सरस्वती ॥ २०॥

anekakoṭikeśārkayugmasevitapādukā |vāgīśvarī lokamātā mahābuddhissarasvatī || 20||

चतुष्पष्टिकोटिविद्याकलालक्ष्मीनिषेविता ।कटाक्षकिङ्करीभूतकेशवृन्दसमन्विता ॥ २१॥

catuṣpaṣṭikoṭividyākalālakṣmīniṣevitā |kaṭākṣakiṅkarībhūtakeśavṛndasamanvitā || 21||

ब्रहाविष्ण्वीशशक्तीनां दृशा शासनकारिणी ।पञ्चचित्तवृत्तिमयी तारमन्त्रस्वरूपिणी ॥ २२॥

brahāviṣṇvīśaśaktīnāṃ dṛśā śāsanakāriṇī |pañcacittavṛttimayī tāramantrasvarūpiṇī || 22||

वरदा भक्तिवशगा भक्ताभीष्टप्रदायिनी ।ब्रह्मशक्तिर्महामाया जगद्ब्रह्मस्वरूपिणी ॥ २३॥

varadā bhaktivaśagā bhaktābhīṣṭapradāyinī |brahmaśaktirmahāmāyā jagadbrahmasvarūpiṇī || 23||

अष्टोत्तरशतनाम्नां महाबुद्धेर्वरान्तगम् ।यः पठेद्भक्तिभावेन विद्यां बुद्धिं श्रियं बलम् ।सम्प्राप्य ज्ञानमतुलं ब्रह्मभूयमवाप्नुयात् ॥ २४॥

aṣṭottaraśatanāmnāṃ mahābuddhervarāntagam |yaḥ paṭhedbhaktibhāvena vidyāṃ buddhiṃ śriyaṃ balam |samprāpya jñānamatulaṃ brahmabhūyamavāpnuyāt || 24||

इति महाबुद्ध्यष्टोत्तरशतनामस्तोत्रं सम्पूर्णा ।

iti mahābuddhyaṣṭottaraśatanāmastotraṃ sampūrṇā |