नृसिंहकरुणारसस्तोत्रम् २ Shri Nrisimhakarunarasa Stotram

श्रीनृसिंहाय नमः ।याचेऽहं करुणासिन्धो यावज्जीवमिदं तव ।अदैन्यं देहदार्द्धं च त्वत्पादाम्बुजसद्गतिम् ॥ १॥

śrīnṛsiṃhāya namaḥ |yāce'haṃ karuṇāsindho yāvajjīvamidaṃ tava |adainyaṃ dehadārddhaṃ ca tvatpādāmbujasadgatim || 1||

अनाद्यनन्तकालेषु भृत्योऽहं त्वं हि मे प्रभुः ।त्वं तुष्टोवाथ रुष्टो वा त्वां विना मे गतिर्नहि ॥ २॥

anādyanantakāleṣu bhṛtyo'haṃ tvaṃ hi me prabhuḥ |tvaṃ tuṣṭovātha ruṣṭo vā tvāṃ vinā me gatirnahi || 2||

तुष्टोऽसि त्वं दयासिन्धो किमन्यैर्मम रक्षणे ।रुष्टोऽसि त्वं दयासिन्धो किमन्यैर्मम रक्षणे ॥ ३॥

tuṣṭo'si tvaṃ dayāsindho kimanyairmama rakṣaṇe |ruṣṭo'si tvaṃ dayāsindho kimanyairmama rakṣaṇe || 3||

दोषाणां च सहिष्णुत्वे त्वत्समो नास्ति भूतले ।मत्समो नहि देवेश कृतघ्नो वञ्चकोऽपि वा ॥ ४॥

doṣāṇāṃ ca sahiṣṇutve tvatsamo nāsti bhūtale |matsamo nahi deveśa kṛtaghno vañcako'pi vā || 4||

प्रसिद्धशुक्लदासोऽहं शश्वत्तव जगत्पते ।किं भयं किमु मे लक्ष्यं सर्वेष्वपि धुरन्धर ॥ ५॥

prasiddhaśukladāso'haṃ śaśvattava jagatpate |kiṃ bhayaṃ kimu me lakṣyaṃ sarveṣvapi dhurandhara || 5||

ईशस्य पूर्णकामस्य किमसाध्यं वदाच्युत ।ममेष्टं च कियन्मात्रं किमेतावद्विलम्बनम् ॥ ६॥

īśasya pūrṇakāmasya kimasādhyaṃ vadācyuta |mameṣṭaṃ ca kiyanmātraṃ kimetāvadvilambanam || 6||

जगत्स्वामी कृपापूर्णः सम्भवेन्निर्दयापरः ।का तदा गतिरस्माकं गरदायां स्वमातरि ॥ ७॥

jagatsvāmī kṛpāpūrṇaḥ sambhavennirdayāparaḥ |kā tadā gatirasmākaṃ garadāyāṃ svamātari || 7||

त्वमेवैको जगत्राता दाता ज्ञाता दयान्वितः ।त्वां विना कः पुमान्कर्ता ह्यस्माकं तु मनोरथम् ॥ ८॥

tvamevaiko jagatrātā dātā jñātā dayānvitaḥ |tvāṃ vinā kaḥ pumānkartā hyasmākaṃ tu manoratham || 8||

उदारगुणशीलस्य साम्यं सर्वत्र वै तव ।कस्मालक्ष्मीपतेः श्रीमन् मयि लोभः किमीदृशः ॥ ९॥

udāraguṇaśīlasya sāmyaṃ sarvatra vai tava |kasmālakṣmīpateḥ śrīman mayi lobhaḥ kimīdṛśaḥ || 9||

आर्तबन्धुरिति ज्ञात्वा त्वामहं शरणं गतः ।रक्ष मां अथवा सम्यक् त्वं यशो मुञ्च शाश्वतम् ॥ १०॥

ārtabandhuriti jñātvā tvāmahaṃ śaraṇaṃ gataḥ |rakṣa māṃ athavā samyak tvaṃ yaśo muñca śāśvatam || 10||

दीनबन्धो दयासिन्धो सुहृद्वन्धो जगत्पते ।संसारार्णवमग्नं मामिन्दिरेश समुद्धर ॥ ११॥

dīnabandho dayāsindho suhṛdvandho jagatpate |saṃsārārṇavamagnaṃ māmindireśa samuddhara || 11||

श्रीनृसिंह दयामूर्ते मय्यार्ते निर्दयाकृता ।को धर्मः किमिदं भाग्यं किं यशो लोकविश्रुतम् ॥ १२॥

śrīnṛsiṃha dayāmūrte mayyārte nirdayākṛtā |ko dharmaḥ kimidaṃ bhāgyaṃ kiṃ yaśo lokaviśrutam || 12||

सुकृतीनां मदीयत्वं करोषि त्वं किमद्भुतम् ।तत्कृतं चेन्मयि हरे तदैव विपुलं यशः ॥ १३॥

sukṛtīnāṃ madīyatvaṃ karoṣi tvaṃ kimadbhutam |tatkṛtaṃ cenmayi hare tadaiva vipulaṃ yaśaḥ || 13||

निर्गुणेष्वपि सर्वेषु दयां कुर्वन्ति साधवः ।न हि संहरते ज्योत्स्नां चन्द्रश्चाण्डालवेश्मनि ॥ १४॥

nirguṇeṣvapi sarveṣu dayāṃ kurvanti sādhavaḥ |na hi saṃharate jyotsnāṃ candraścāṇḍālaveśmani || 14||

प्रसीद मे श्रियः कान्त सुप्रसीद दयानिधे ।पुनः पुनः प्रसीद त्वं प्रसीदं वरदोभव ॥ १५॥

prasīda me śriyaḥ kānta suprasīda dayānidhe |punaḥ punaḥ prasīda tvaṃ prasīdaṃ varadobhava || 15||

इति श्री पञ्चरात्रागमोक्तकरुणारसस्तोत्रं सम्पूर्णम् ।

iti śrī pañcarātrāgamoktakaruṇārasastotraṃ sampūrṇam |